1, 2. (1) ?Jehova i talem se wanem bambae i hapen long taem blong yumi? (2) ?Wanem ol kwestin we bambae yumi ansa long olgeta long stadi ya? (Yu luk pija long stat blong stadi.)

JEHOVA i talem se, long taem blong yumi bambae i gat “ten man we oli strenja, we lanwis blong olgeta i naranarafala, bambae oli kam luk wan laen blong Isrel, oli talem long hem se, “Mifala i wantem kam fren blong yufala, from we mifala i harem nius se God i stap givhan long yufala.”” (Sekaraea 8:23) “Laen blong Isrel,” hemia ol Kristin we tabu spirit i makemaot olgeta. Baebol i singaot olgeta tu se: “Isrel blong God.” (Galesia 6:16, NW) “Ten man,” hemia olgeta we bambae oli laef olwe long wol ya. Olgeta ya oli save se Jehova i blesem ol tabu Kristin mo oli save se, i wan blesing blong wosipim Jehova wetem ol tabu Kristin ya.

² Olsem profet Sekaraea i talem, Jisas tu i talem se ol man blong God bambae oli joen wanples. Hem i talem se olgeta we bambae oli laef long heven oli ol sipsip we oli “no plante,” mo olgeta we bambae oli laef long wol ya oli “ol narafala sipsip.” Be  Jisas i talem se olgeta evriwan oli “wan kampani” nomo, mo bambae oli folem wan “man nomo blong lukaot long olgeta.” (Luk 12:32; Jon 10:16) Be from we oli tu grup, maet samfala oli stap tingting se: (1) ?Ol narafala sipsip oli mas save nem blong evri tabu Kristin? (2) ?Ol tabu Kristin oli gat wanem tingting long olgeta wan? (3)  Sipos wan man long kongregesen blong mi i stat blong kakae bred mo dring waen long Memoriol, ?mi mas mekem wanem long hem? (4) ?Mi mi mas wari taem mi luk namba blong olgeta we oli kakae bred mo dring waen long Memoriol i stap go antap? Stadi ya bambae i ansa long ol kwestin ya.

3. ?From wanem yumi no save gud se hu bambae i joen long grup blong ol 144,000 tabu Kristin?

³ ?Ol narafala sipsip oli mas save nem blong evri tabu Kristin we oli stap yet long wol? Nogat. ?From wanem? From we i no gat wan man we i save harem save se ol tabu Kristin bambae oli go long heven. [1] (Yu luk ol not, pej 25.) Nating se God i makemaot ol tabu Kristin se bambae oli go long heven, be bambae oli go nomo sipos oli holemstrong long Jehova. Setan tu i save samting ya, taswe hem i yusum ol “giaman profet” blong “giaman” long ol tabu Kristin. (Matiu 24:24) Ol tabu Kristin oli no sua yet se bambae oli go long heven, kasem taem we Jehova bambae i jajem olgeta se oli holemstrong long hem. Bambae Jehova i putum las mak long olgeta, maet bifo we oli ded no jes bifo we “bigfala trabol” i stat.—Revelesen 2:10; 7:3, 14.

4. ?From wanem i no nid blong save nem blong evri tabu Kristin blong yumi save “kam fren” blong olgeta?

⁴ ?Sipos i no nid blong ol narafala sipsip oli save nem blong evri tabu Kristin, olsem wanem oli save “kam fren” blong olgeta? Baebol i talem se ol ten man ya “bambae oli kam luk wan laen blong Isrel, oli talem long hem se, “Mifala i wantem kam fren blong yufala, from we mifala i harem nius se God i stap givhan long yufala.” Nating se vas ya i talem wan laen blong Isrel nomo, be hem i stap tokbaot moa long wan man. Hemia i min se, wan laen blong Isrel i no wan man nomo, be hem i evriwan we oli stap long grup blong ol tabu Kristin. Ol narafala sipsip oli save samting ya, taswe oli mekem wok blong Jehova wetem ol tabu Kristin ya. Mo i no nid blong oli save nem blong evri tabu Kristin blong oli save folem wanwan long olgeta. Jisas nao i stap Lidim yumi, mo Baebol i talem se yumi mas folem hem nomo.—Matiu 23:10.

5. ?Wanem woning we ol tabu Kristin oli mas tingting gud long hem, mo from wanem?

⁵ Ol tabu Kristin oli mas tingting gud long woning we i stap long 1 Korin 11:27-29. (Ridim.) ?Olsem wanem wan tabu Kristin i kakae bred no dring waen long Memoriol “long fasin we i no stret”? Sipos hem i no gohed blong fren gud wetem Jehova mo i no holemstrong long Hem, hem i no gat respek taem i kakae bred mo i dring waen. (Hibrus 6:4-6; 10:26-29) Strong woning ya i mekem ol tabu  Kristin oli tingbaot se, oli mas holemstrong long Jehova sipos oli wantem kasem praes blong olgeta, hemia we God i singaot olgeta blong oli “joen long Jisas Kraes” antap long heven.—Filipae 3:13-16.

6. ?Ol tabu Kristin oli gat wanem tingting long olgeta wan?

⁶ Pol i talem long ol tabu Kristin se: “Mi mi stap long kalabus, from we mi man blong Masta blong yumi. Oraet, mi mi talem strong long yufala, blong yufala i mekem fasin blong yufala i stret gud long fasin blong God ya we i singaot yufala finis.” ?Oli mekem samting ya olsem wanem? Pol i eksplenem se: “Long olgeta samting, tingting blong yufala i mas stap daon, mo yufala i mas kwaet man. Tingting blong yufala i mas longfala, mo yufala i mas lavlavem yufala, blong yufala i no raorao long yufala. Tabu Spirit, hem i stap mekem yumi evriwan i joen gud, mo hem i givim pis long yumi. Nao from samting ya, yumi mas traehad blong holem pis ya, blong yumi save joen gud oltaem.” (Efesas 4:1-3) Tabu spirit blong Jehova i givhan long ol man blong hem, blong oli gat tingting daon, be oli no praod. (Kolosi 3:12) Taswe, ol tabu Kristin oli no ting se oli gud moa long ol narafala. Oli save se Jehova i no givim moa tabu spirit long olgeta i bitim ol narafala man blong wok blong hem. Mo oli no ting se oli kasem save moa long Baebol i bitim ol narafala man. Mo tu, ol tabu Kristin oli neva talem long wan man we oli ting se tabu spirit i makemaot hem, blong i save kakae bred mo dring waen long Memoriol. Defren olgeta, oli gat tingting daon mo oli save se Jehova nomo i save singaot wan man blong i go long heven.

7, 8. ?Ol tabu Kristin oli no gat wanem tingting, mo from wanem?

⁷ Nating se ol tabu Kristin oli gat blesing ya we God i singaot olgeta blong go long heven, oli no gat tingting ya se, ol man oli mas mekem wan spesel fasin long olgeta. (Efesas 1:18, 19; ridim Filipae 2:2, 3.) Oli save tu se, taem Jehova i makemaot olgeta, hem i no letem ol narafala oli save samting ya. Taswe, wan tabu Kristin i no sapraes sipos wan man i no bilivim se tabu spirit i makemaot hem. Hem i save we Baebol i talem long yumi se, yumi no mas kwik blong bilivim wan man we i talem se God i givim wan spesel wok long hem. (Revelesen 2:2) From we wan tabu Kristin i no ting se ol man oli mas mekem wan spesel fasin long hem, hem i no talem long wan man we i mitim hem se, tabu spirit i makemaot hem. Bambae hem i neva talemaot samting ya long eni man. Mo tu, bambae hem i no tok flas from ol gudfala samting we bambae hem i mekem long heven.—1 Korin 1:28, 29; ridim 1 Korin 4:6-8.

⁸ Ol tabu Kristin oli no harem se oli mas spenem taem nomo wetem ol narafala tabu Kristin, olsem se oli memba blong wan grup. Oli no traem faenem ol narafala tabu Kristin blong oli tokbaot olsem wanem tabu spirit i makemaot olgeta, no blong oli joen olsem wan grup blong stadi long Baebol. (Galesia 1:15-17) Kongregesen bambae i no joen gud, sipos ol tabu Kristin oli mekem olsem. Mo tu, bambae oli agensem tabu spirit we i stap givhan long ol man blong God blong gat pis mo joen gud oltaem.—Ridim Rom 16:17, 18.

9. ?From wanem yu mas lukaot gud long fasin we yu mekem long olgeta we oli kakae bred mo dring waen long Memoriol? (Yu luk bokis ya “ Man We i Lavem Man i ‘No Save Mekem Ol Fasin We Man i Sek Nogud Long Hem.’”)

⁹ ?Yu no mas mekem wanem long wan brata no sista we tabu spirit i makemaot hem? Jisas  i talem long ol disaepol blong hem se: “Yufala evriwan i brata.” Hem i talem tu se: “Man we hem nomo i leftemap hem blong i kam haeman, bambae God i mekem hem i godaon. Be man we hem nomo i mekem hem i stap daon, bambae God i leftemap hem.” (Matiu 23:8-12) Taswe, i nogud we yumi leftemap wan man tumas, nating se hem i wan tabu brata blong Kraes. Taem Baebol i tokbaot ol elda, hem i leftemap tingting blong yumi blong folem fasin blong bilif blong olgeta, be hem i no talem se yumi save mekem eni man i kam lida blong yumi. (Hibrus 13:7) I tru se Baebol i talem se yumi mas “givim dabol pei” long sam man. Be hemia from we ol man ya oli “stap wok strong long wok blong lidim ol man” mo oli “stap hadwok blong prij mo blong tijim ol man,” be i no from we oli ol tabu Kristin. (1 Timoti 5:17) Sipos yumi leftemap ol tabu Kristin tumas, no yumi mekem wan spesel fasin long olgeta, bambae yumi mekem oli sem. Mo samting we i moa nogud se, yumi save mekem se oli kam praod. (Rom 12:3) I no gat wan long yumi we i wantem mekem eni samting we i save mekem wan tabu brata blong Kraes i mekem wan bigfala mastik olsem.—Luk 17:2.

10. ?Yu save soemaot olsem wanem se yu respektem ol tabu Kristin?

¹⁰ ?Yumi soemaot olsem wanem se yumi respektem ol tabu Kristin we Jehova i makemaot olgeta? Bambae yumi no askem long olgeta se oli kam ol tabu Kristin olsem wanem. Hemia i wan samting we yumi no gat raet blong save, hem i bisnes blong olgeta nomo. (1 Tesalonaeka 4:11; 2 Tesalonaeka 3:11) Mo tu, yumi no mas ting se tabu spirit i makemaot, hasban no waef blong olgeta, papa mo mama blong olgeta no wan narafala memba blong famle blong olgeta. Wan man i no kasem blesing blong laef long heven no long wol tru long ol famle blong hem. (1 Tesalonaeka 2:12) Bambae yumi no askem ol kwestin tu we i save mekem narafala i harem nogud. Eksampol, bambae yumi no askem long waef blong wan tabu brata se, bambae hem i harem olsem wanem sipos hem i laef olwe long wol ya, be man blong hem i no moa stap wetem hem. Yumi sua se long niufala wol, Jehova bambae i mekem evri samting oli “harem gud.”—Ol Sam 145:16.

11. ?Yumi protektem yumi wan olsem wanem sipos yumi blokem fasin blong leftemap wan man tumas?

¹¹ Yumi stap protektem yumi wan, taem yumi no mekem olsem se ol tabu Kristin oli gud moa long ol narafala. ?Olsem wanem yumi protektem yumi wan? Baebol i talem se, maet long kongregesen i gat “sam man we oli giaman se oli brata blong yumi” mo oli talem se tabu spirit i makemaot olgeta. (Galesia 2:4, 5; 1 Jon 2:19) Mo tu, maet sam tabu Kristin oli no holemstrong long Jehova. (Matiu 25:10-12; 2 Pita 2:20, 21) Be sipos yumi blokem trap ya blong leftemap wan man tumas, bambae yumi neva folem ol narafala, nating se tabu spirit i makemaot olgeta, ol man oli save gud olgeta, no oli mekem wok blong Jehova longtaem finis. Nao sipos oli no moa holemstrong long Jehova, no oli lego kongregesen, bambae yumi no lego bilif we yumi gat long Jehova, mo bambae yumi gohed blong mekem wok blong hem.

12, 13. ?From wanem yumi no mas wari long namba blong olgeta we oli kakae bred mo dring waen long Memoriol?

¹² Blong plante yia finis, namba blong olgeta  we oli kakae bred mo dring waen long Memoriol i gohed blong go daon. Be, i no longtaem i pas, namba ya i stap go antap evri yia. ?Yumi mas wari long samting ya? Nogat. Bambae yumi luk from wanem.

¹³ Jehova i “save finis ol man blong hem.” (2 Timoti 2:19) Ol brata we oli stap kaontem namba blong ol man we oli kakae bred mo dring waen long Memoriol oli no olsem Jehova. ?From wanem? From we oli no save se hu nao tabu spirit i makemaot hem. Taswe, taem oli kaontem olgeta, oli kaontem tu ol man we oli ting se tabu spirit i makemaot olgeta, be i no olsem. Eksampol, sam long ol man ya oli stop blong kakae bred mo dring waen. Sam narafala oli gat problem long tingting no filing blong olgeta, nao oli ting se bambae oli rul wetem Kraes long heven. I klia nomo se yumi no save stret namba blong ol tabu Kristin we oli laef yet long wol.

14. ?Baebol i talem wanem long namba blong ol tabu Kristin we bambae oli stap yet long wol?

¹⁴ Bambae i gat ol tabu Kristin long plante ples long wol taem Jisas i kam blong tekem olgeta. Long Baebol, Jisas i talem se “bambae mi sanem ol enjel blong mi oli go tekem ol man we mi mi jusumaot olgeta finis, oli kam wanples. Bambae ol enjel ya oli mas go long evri ples long wol, mo long olgeta ples long heven blong tekem olgeta oli kam.” (Matiu 24:31) Baebol i soemaot tu se, long ol lasdei bambae i gat sam tabu Kristin oli stap yet long wol. (Revelesen 12:17) Be hem i no talem se hamas long olgeta bambae oli stap long wol taem bigfala trabol i stat.

15, 16. ?Yumi mas kasem save wanem long saed blong ol 144,000 man we Jehova i jusum olgeta?

¹⁵ Jehova i jusumaot wetaem we bambae  hem i makemaot wan man. (Rom 8:28-30) Jehova i stat blong jusum ol tabu Kristin afta we Jisas i laef bakegen. I luk olsem se long faswan handred yia, tabu spirit i makemaot evri Kristin. Fo handred yia biaen, plante long olgeta ya we oli talem se oli Kristin oli no folem gud Kraes. Be, long ol yia ya, Jehova i makemaot finis sam tru Kristin. Ol Kristin ya oli olsem sid we Jisas i talem se bambae oli gru wetem ol rabis gras. (Matiu 13:24-30) Long ol lasdei ya, Jehova i gohed blong jusum moa man blong oli joen long grup blong ol 144,000. [2] (Yu luk ol not, pej 25.) Taswe, sipos Jehova i jusum blong makemaot sam moa man jes bifo long en, yumi save se hem i mekem samting we i stret nomo. (Aesea 45:9; Daniel 4:35; ridim Rom 9:11, 16.) [3] (Yu luk ol not, pej 25.) Yumi mas lukaot gud blong no kam olsem ol man we oli stap komplen from we masta blong olgeta i kaen long ol narafala man blong wok, we oli kam wok let.—Ridim Matiu 20:8-15.

¹⁶ I no evri tabu Kristin we oli stap long grup blong ‘slef we i stret mo waes.’ (Matiu 24:45-47) Olsem long faswan handred yia, Jehova mo Jisas i yusum smol man nomo blong givim kakae long plante man. I gat smol tabu Kristin nomo we Jehova i yusum olgeta blong raetem ol Grik haf blong Baebol long faswan handred yia. Tede tu, Jehova i givim wok long sam tabu Kristin nomo blong oli givim kakae long ol man blong hem, long “stret taem blong hem.”

17. ?Yumi lanem wanem long stadi ya?

¹⁷ ?Yumi lanem wanem long stadi ya? Jehova i jusum blong givim laef blong olwe long wol ya, long bighaf blong ol man blong hem, mo laef blong heven long ol man we bambae oli rul wetem Jisas. Jehova i givim blesing long evriwan we oli mekem wok blong hem, ol “laen blong Isrel” mo ol “ten man,” mo hem i wantem se oli obei long sem loa mo oli holemstrong long hem. Yumi evriwan i mas gat tingting daon. Yumi evriwan i mas joen wanples blong mekem wok blong hem mo yumi mas joen gud. Mo, yumi evriwan i mas mekem se i gat pis long kongregesen. Naoia we yumi stap klosap long en, i gud we yumi evriwan i gohed blong mekem wok blong Jehova mo folem Jisas olsem wan kampani nomo.