1. ?Wanem sam trabol we yumi fesem, mo from wanem Jehova i glad long ol man blong hem? (Yu luk pija long stat blong stadi.)

LAEF i no isi long wol ya. Plante gudfala brata mo sista oli gat ol bigfala sik. Plante narafala we oli olfala finis, oli mas lukaot long sam famle we oli olfala moa. Plante oli stap hadwok blong kasem ol samting we famle blong olgeta i nidim. Mo sam long yufala i stap fesem plante long ol trabol ya wantaem, i no wan nomo. Hemia i kakae taem, paoa, mo mane blong yufala. Be yufala i bilif strong se Jehova bambae i givhan long yufala. Yufala i save se ol trabol ya bambae oli finis from we hemia nao promes blong hem. !Tru ya, Jehova i glad long bilif blong yufala!

2. ?Olsem wanem Aesea 40:29 i leftemap tingting? ?Be wanem bigfala mastik we samfala oli mekem?

² ?Olsem wanem? ?Samtaem yu harem se yu no moa save stanap strong, from we ol trabol oli hevi tumas? Sipos yes, yu no mas ting se yu nomo. Sam gudfala man blong God bifo, olgeta tu oli harem sem mak. (1 King 19:4; Job 7:7) ?Be wanem i givhan long olgeta? Oli luk long Jehova blong i givim paoa. Baebol i talem se God ‘i stap givim paoa long  olgeta we oli taed.’ (Aesea 40:29) Sore tumas, sam man blong God tede oli harem se i moa gud oli lego wok blong Jehova fastaem, blong traem winim ol trabol. Wok blong Jehova i no moa wan blesing we oli harem gud long hem, be i kam wan hevi samting we oli ting se oli no naf blong karem. Ale oli no moa ridim Baebol, oli no moa go long miting, mo oli no moa prij. Hemia nao stret samting we Setan i wantem.

3. (1) ?Olsem wanem yumi save blokem Setan, blong i no mekem yumi kam slak? (2) ?Bambae yumi tokbaot wanem long stadi ya?

³ Setan i save se yumi kam strong moa taem yumi bisi long wok blong Jehova. Be hem i no wantem we yumi stanap strong. Taswe taem yu harem se yu taed long bodi mo tingting, yu no mas gowe long Jehova, be yu mas kam klosap moa long hem. Baebol i talem se: ‘Hem bambae i mekem yu yu strong, mo i givim paoa long yu.’ (1 Pita 5:10; Jemes 4:8) Long stadi ya, bambae yumi tokbaot Aesea 40:26-31, mo olsem wanem Jehova i save mekem yumi strong. Afta, bambae yumi tokbaot tufala trabol we i save mekem se yumi no moa strong long wok blong Jehova. Mo tu, bambae yumi luk olsem wanem ol advaes blong Baebol i save givhan long yumi, blong yumi stanap strong.

4. ?Yumi lanem wanem long Aesea 40:26?

⁴ Ridim Aesea 40:26. I no gat man we i save kaontem olgeta sta long skae. Ol saentis oli ting se, i gat bitim 400 bilian sta raonabaot long yumi, mo hemia i no kaontem olgeta we oli stap longwe moa. Be Jehova i singaot ol sta ya wanwan long prapa nem blong olgeta. ?Hemia i soemaot wanem? !Sipos Jehova i intres long evri sta, traem tingbaot olsem wanem hem i intres long ol man we oli laef, olsem yu! Yu wosipim hem from we yu lavem hem, be i no from we yu mas mekem olsem. (Ol Sam 19:1, 3, 14) Gudfala Papa ya i save evri samting long saed blong yu. Baebol i talem se ‘ol hea long hed blong yu, hem i kaontem evriwan.’ (Matiu 10:30) Hem i talem se i “save evri samting we ol gudfala man oli fesem.” (Ol Sam 37:18, NW) I klia se Jehova i luk olgeta trabol blong yu, mo hem i save givim paoa we yu nidim blong stanap strong.

5. ?Olsem wanem yumi save se Jehova i naf blong givim paoa long yumi?

⁵ Ridim Aesea 40:28. Jehova i Stamba blong olgeta paoa. Traem tingbaot paoa blong san. Deved Bodanis we i raetem ol buk blong sayens, i talem se, paoa we i kamaot long san long wan seken nomo, i olsem plante bilian niuklia bom we oli bosta wantaem. !Wan narafala man blong stadi i talem se paoa we i kamaot long san long wan seken nomo, i naf blong givim lektrik long fulwol blong 200,000 yia! Tru ya, Jehova we i givim paoa long san, hem i naf blong givim paoa we yumi nidim blong stanap strong taem yumi kasem trabol.

6. ?Yok blong Jisas we yumi karem, i mekem wanem long yumi?

 ⁶ Ridim Aesea 40:29. Taem yumi mekem wok blong Jehova, yumi kasem bigfala glad. Jisas i talem long ol man blong hem se: “Yufala i mas putum yok blong mi long solda blong yufala.” Mo i gohed se: “Nao bambae yufala i save harem gud long laef blong yufala. From we yok blong mi i isi nomo blong man i karem, mo ol samting we mi askem long yufala blong yufala i karem, oli no hevi.” (Matiu 11:28-30) !Hemia i tru we i tru! Samtaem yumi taed tumas taem yumi aot long haos blong go long miting o blong go prij. Be taem yumi kamhom, ?yumi harem olsem wanem? Yumi kasem niufala paoa, mo yumi rere blong traehad moa blong winim ol trabol. Tru ya, yok blong Jisas i isi nomo blong karem.

7. ?I gat wan stori we yu save talem blong soemaot se Matiu 11:28-30 i tru?

⁷ Traem tingbaot wan Kristin sista. Hem i kasem sik ya we i lusum paoa fulwan, tingting i foldaon, mo hed i soa bitim mak. Taswe samtaem i had blong hem i go long miting. Be wan dei, afta we hem i go long miting, hem i talem se: “Long pablik tok, brata i tokbaot tingting we i foldaon. Mi luksave se hem i kasem save long filing blong ol man olsem mi, mo hem i kea. Hemia i tajem hat blong mi mo wota blong ae blong mi i ron. Long taem ya, mi tingbaot se mi nidim tumas ol miting.” !Sista ya i glad tumas se hem i traehad blong go long miting!

8, 9. ?Wanem mining blong tok blong Pol se: “Taem we mi no gat paoa, long taem ya nao mi mi gat paoa”?

⁸ Ridim Aesea 40:30. Nating sipos yumi gat save mo gudhan blong mekem plante samting, be yumi no naf blong mekem evri samting long prapa paoa blong yumi nomo. Hemia wan lesen we yumi evriwan i mas lanem. Aposol Pol i gat save mo gudhan blong mekem plante samting, be hem i no naf blong mekem evri samting we hem i wantem mekem. Taem hem i talemaot filing blong hem, Jehova i ansa se: “Taem yu no gat paoa, long taem ya nao paoa blong mi i kam strong moa long yu.” Pol i kasem save, taswe hem i talem se: “Taem we mi no gat paoa, long taem ya nao mi mi gat paoa.” (2 Korin 12:7-10) ?Wanem mining blong tok ya?

⁹ Pol i luksave se hem i no naf blong mekem sam samting, mo i nidim paoa we i bigwan moa i bitim paoa blong hem. Taem hem i taed mo i slak, tabu spirit i save givim paoa long hem. Be tabu spirit i save mekem moa yet. Hem i givhan long Pol blong i mekem ol samting we oli bigwan tumas long hem. I sem mak long yumi. !Taem Jehova i givim tabu spirit long yumi, yumi strong we yumi strong!

10. ?Olsem wanem Jehova i givhan long Deved?

¹⁰ Plante taem Deved i harem save se tabu spirit i mekem hem i strong. Hem i singsing long God se: “Yu stap givim paoa long mi, blong mi go faet long ol enemi blong mi, mo yu stap mekem mi mi strong, blong mi naf blong klaem i go antap long bigfala stonwol.” (Ol Sam 18:29, NW) Samtaem ol trabol blong yumi oli olsem wan bigfala stonwol we yumi no save klaem i go antap long hem. Yumi no naf blong winim ol trabol ya long prapa paoa blong yumi, be yumi nidim help blong Jehova.

11. Eksplenem wok we tabu spirit i mekem taem yumi kasem wan trabol.

 ¹¹ Ridim Aesea 40:31. Ol igel oli no flae long prapa paoa blong olgeta nomo. Win we i hot i leftemap igel i go antap, nao hem i naf blong flae longwe, we i no yusum tumas paoa. Taswe taem yu fesem wan bigfala trabol, traem tingbaot igel. Askem strong long Jehova blong i givim ‘tabu spirit blong halpem yu.’ (Jon 14:26) Yumi save kasem tabu spirit enitaem nomo, 24 aoa evri dei. Maet yumi harem se yumi nidim paoa ya moa, taem yumi rao smol wetem wan brata o sista long kongregesen. ?Be from wanem ol smosmol rao ya oli kamaot?

12, 13. (1) ?From wanem sam Kristin oli raorao smol? (2) ?Ol samting we i hapen long laef blong Josef, i tijim yumi long wanem?

¹² Ol smosmol rao oli kamaot from we yumi sinman. Samtaem yumi save kros from samting we narafala i talem o i mekem, mo samtaem yumi nao yumi mekem narafala i kros. Trabol olsem i save traem yumi bigwan, be i givim janis long yumi tu blong holemstrong long Jehova, from we i tijim yumi blong wok gud wanples wetem ol brata mo sista. Jehova i lavem olgeta nating se oli mekem mastik samtaem, mo yumi tu yumi mas lavem olgeta.

¹³ Jehova i no blokem ol man blong hem long ol trabol. Traem tingbaot stori blong Josef. Taem Josef i yangfala, ol brata blong hem oli jalus long hem, ale oli salem hem blong i kam wan slef long Ijip. (Jenesis 37:28) Jehova i luk evri samting we i hapen, mo hem i mas harem nogud taem oli spolem fren mo gudfala man blong wok blong hem, Josef. Be Jehova i no blokem trabol ya. Biaen, oli sakem Josef i go long kalabus from giaman tok ya se hem i repem woman blong Potifa, be Jehova i no blokem samting ya. ?Olsem wanem? ?God i lego Josef? Nogat. Baebol i talem se: “Hae God i stap wetem Josef, mo i stap mekem olgeta wok ya we hem i mekem i gohed gud.”—Jenesis 39:21-23.

14. ?Wanem gudfala samting i kamaot taem yumi lego kros?

¹⁴ Traem tingbaot Deved. I no gat plante man we oli kasem trabol olsem hem.  Be Deved i fren blong God taswe hem i no kam kros. Hem i talem se: “I nogud yu kros, i nogud yu faerap, i nogud yu wari. Ol samting ya i rod blong kasem trabol nomo.” (Ol Sam 37:8) Yumi wantem folem fasin blong Jehova, taswe i impoten blong lego kros. Jehova i fogivim yumi, hem i “no save panisim yumi stret long mak blong ol sin blong yumi.” (Ol Sam 103:10) Mo taem yumi lego kros, i gat sam nara gudfala samting i kamaot tu. Kros i save mekem se hae blad i kam antap, man i sotwin, i save spolem leva mo gat, mo i save mekem se i had blong bel i tantanem kakae. Mo tu, taem yumi kros, tingting blong yumi i no klia. Yumi save talem o mekem samting we i spolem narafala, nao biaen, yumi harem nogud. I moagud yumi stap kwaet nomo. Baebol i talem se: “Sipos tingting blong man i stap kwaet oltaem, hemia bambae i mekem bodi blong hem i stap gud.” (Ol Proveb 14:30) Taswe, taem wan brata o sista i mekem yu yu kros, ?yu save mekem wanem? ?Olsem wanem yu save mekem pis wetem hem? Yu mas folem ol gudfala advaes long Baebol.

15, 16. ?Yu save mekem wanem taem wan brata o sista i mekem yu yu harem nogud?

¹⁵ Ridim Efesas 4:26. Yumi no sapraes taem wan man we i no wosipim Jehova i spolem yumi. Be taem wan Kristin brata o sista o wan famle blong yumi, i talem o mekem samting we i spolem yumi, yumi harem nogud bitim mak. ?Olsem wanem sipos yu no save fogetem? ?Bambae yu stap kros gogo plante yia i pas? ?O bambae yu folem waes blong Baebol blong stretem trabol ya kwiktaem? Sipos yu wet longtaem blong toktok wetem hem, bambae i had moa blong mekem pis.

¹⁶ Maet yu stap tingting oltaem long samting we hem i mekem long yu. ?Olsem wanem yu save mekem pis wetem hem? Fastaem, yu prea long Jehova, blong i givhan long yu blong yu storian gud wetem brata o sista ya. Tingbaot se, hem tu i wan fren blong Jehova. (Ol Sam 25:14) Jehova i lavem hem. Hem i kaen long ol fren blong hem, mo i wantem se yu tu yu mekem sem mak. (Ol Proveb 15:23; Matiu 7:12; Kolosi 4:6) Seken samting, yu tingting gud long ol tok we bambae yu talem. Yu no mas hareap blong ting se hem i minim nomo blong spolem yu. Maet hem i mestem nomo, o maet hem i no kasem save gud long samting we i hapen. Yu mas luksave se maet yu tu yu gat fol. Taswe, yu save statem storian olsem: “Ating mi mi hareap tumas blong harem nogud, be taem yu toktok long mi yestede, mi harem se . . . ” Sipos storian ya i no mekem pis wetem hem, yu no mas lego. Prea from brata o sista ya. Askem long Jehova blong i blesem hem mo i givhan long yu blong yu luk ol gudfala fasin blong hem. Yu save se Jehova bambae i glad taem yu traehad blong mekem pis wetem brata o sista ya we i wan fren blong hem.

17. Taem yu mekem bigfala sin, ?Jehova i save givhan long yu olsem wanem? ?From wanem yu mas kwik blong kasem help?

¹⁷ Samfala oli harem se oli no stret blong mekem wok blong Jehova, from  we oli mekem wan bigfala sin. Taem tingting blong yumi i stikim yumi oltaem, yumi lusum pis, glad, mo paoa. Samting ya i hapen long King Deved, nao hem i talem se: “Taem mi no talemaot ol sin blong mi long yu, mi mi slak we mi slak, from we evri dei nomo, mi stap krae kasem tudak. Long dei mo long naet, yu stap panisim mi.” Be Deved i no fraet blong mekem samting we Jehova i wantem. Hem i se: “Mi talemaot ol sin blong mi long yu . . . nao yu yu fogivim mi, yu tekemaot ol sin blong mi.” (Ol Sam 32:3-5) Sipos yu mekem wan bigfala sin, Jehova i rere blong fogivim yu. Hem i wantem givhan long yu blong yu fren gud wetem hem bakegen. Hem i yusum ol elda blong oli givhan long yu, mo yu yu mas glad long help we oli givim. (Ol Proveb 24:16; Jemes 5:13-15) !Yu no mas wet! !Sipos yu wantem kasem laef we i no save finis, yu mas mekem samting ya kwiktaem! Be maet tingting blong yu i gohed blong stikim yu, longtaem afta we God i fogivim yu. Sipos i olsem, ?yu mas mekem wanem?

18. ?Eksampol blong Pol i givhan olsem wanem long man we i harem nogud from sin blong hem?

¹⁸ Samtaem, aposol Pol tu i harem nogud from ol sin we hem i mekem bifo. Hem i se: “Mi mi daon moa long ol narafala aposol mo i no stret nating blong ol man oli singaot mi se aposol, from we fastaem, mi stap spolem kongregesen blong God.” Be Pol i gohed se: ‘God i kaen long mi, from samting ya mi mi olsemia nao.’ (1 Korin 15:9, 10) Jehova i save se Pol i no stret gud olgeta. Be hem i glad blong yusum Pol, mo i wantem se Pol i save samting ya. Taem yu sore tumas from sin we yu mekem, mo yu tokbaot wetem Jehova, mo sipos i gat nid yu talemaot long ol elda, yu save sua se Jehova bambae i fogivim yu. !Afta, yu mas bilif strong se Jehova i fogivim yu, mo yu mas glad long samting ya!—Aesea 55:6, 7.

19. ?Wanem vas blong yia 2018, mo from wanem yumi nidim?

¹⁹ Taem yumi stap kam klosap moa long en, bambae yumi kasem moa trabol. Be yumi mas tingbaot oltaem se Jehova ‘i stap givim paoa long olgeta we oli taed, mo i stap mekem olgeta we oli no strong, oli strong bakegen.’ Taswe, hem i save givim wanem we yu nidim blong yu gohed long wok blong hem. (Aesea 40:29; Ol Sam 55:22; 68:19) Long 2018, bambae yumi tingbaot impoten trutok ya, taem yumi go long ol miting mo yumi luk vas blong yia we i talem se: ‘Jehova i givim paoa long olgeta we oli stap luk long hem.’—Aesea 40:31.