1. ?From wanem taem ya we yumi stap laef long hem, i spesel?

YUMI stap laef long wan taem we i spesel. Jehova i stap hivimap wan bigfala kampani blong man we ‘oli kamaot long olgeta kantri, olgeta laen, olgeta grup blong man, mo olgeta lanwis.’ Hemia ‘wan bigfala neson’ blong bitim eit milian man we oli glad, mo ‘oli mekem tabu wok blong God long dei mo long naet.’ (Revelesen 7:9, 15; Aesea 60:22) I no gat wan taem bifo, we plante man olsem oli lavem God mo ol narafala man.

2. ?Ol man we oli no fren gud wetem God, oli gat wanem kaen lav? (Yu luk pija long stat blong stadi.)

² Be Baebol i talem tu, se long taem blong yumi, ol man we oli no fren gud wetem God bambae oli gat wan lav we i narakaen. Hemia from we oli tingbaot olgeta nomo. Aposol Pol i talem se long ol las dei, ol man bambae oli “tingbaot olgeta nomo, oli laekem mane tumas,” mo “oli laekem moa ol samting we oli save harem gud long hem, i bitim we oli lavem God.” (2 Timoti 3:1-4) Ol man olsem oli defren olgeta long ol man we oli lavem God. Oli ting se bambae oli glad sipos oli tingbaot olgeta nomo, be i no tru. Oli mekem wol i kam moa nogud, mo oli mekem laef blong evriwan i had.

3. ?Long stadi ya, bambae yumi tokbaot wanem? ?From wanem?

 ³ Aposol Pol i save se ol man we oli tingbaot olgeta nomo bambae oli kam plante, mo oli save spolem ol Kristin. Taswe hem i givim woning se yumi “no mas go klosap nating” long olgeta. (2 Timoti 3:5) Be ol man olsem oli stap long evri ples, yumi no save ronwe long olgeta. Taswe, ?yumi save mekem wanem blong tingting blong olgeta i no kasem yumi, mo blong mekem God ya blong lav Jehova, i glad? Bambae yumi luk olsem wanem lav we 2 Timoti 3:2-4 i tokbaot, i defren long lav we God i wantem se yumi gat. Afta, yumi save skelem yumi mo luk olsem wanem blong soemaot lav ya we i givim trufala glad.

4. ?From wanem i no rong blong laekem yu wan?

⁴ Pol i talem se: “Bambae ol man oli tingbaot olgeta nomo.” ?Hemia i min se i rong blong laekem yu wan? Nogat, i stret nomo, mo i mas olsem. Jehova i wokem yumi long fasin ya. Jisas i talem se: “Yu mas lavem ol man raonabaot long yu olsem we yu stap mekem long yu wan.” (Mak 12:31) Blong talem stret, yu no save lavem ol narafala sipos yu no laekem yu wan. Baebol i talem se: “Ol hasban oli mas lavem waef blong olgeta olsem we oli lavem prapa bodi blong olgeta. Man we i lavem waef blong hem, hem i lavem hem wan, from we i no gat man we i no laekem nating prapa bodi blong hem. Man i stap fidim bodi blong hem mo i stap mekem i gud long hem.” (Efesas 5:28, 29) Taswe i klia se yu mas laekem yu wan.

5. ?Man we i laekem hem wan tumas, i olsem wanem?

⁵ Seken Timoti 3:2 i no stap tokbaot trufala lav, be i tokbaot lav ya we i narakaen, we man i laekem hem wan tumas, i min se, i tinghae bitim mak long hem wan. (Ridim Rom 12:3.) Hem i no tingbaot narafala. Taem wan samting i hapen, hem i blemem ol narafala. Man ya i olsem anamol ya blak nidel long solwota (sea urchin). Hem i stap harem gud aninit long ston, be i soemaot ol nidel blong hem nomo long ol narafala. Ol man we oli gat fasin olsem, oli no glad.

6. Taem yumi lavem God, ?yumi kasem wanem gudfala frut?

⁶ Pol i tokbaot man we i tingbaot hem wan nomo. Sam man we oli stadi dip long Baebol, oli ting se hem i tokbaot fasin ya fastaem, from we i stamba blong ol nogud fasin we hem i talem biaen. Be trufala lav we God i glad long hem, i stamba blong ol gudfala fasin olsem glad, pis, longfala tingting, kaen fasin, gud fasin, bilif, kwaet fasin, mo bos long tingting. (Galesia 5:22, 23) Ol Sam i talem se: ‘Jehova i God blong yumi, mo from samting ya, yumi save harem gud.’ (Ol Sam 144:15) Jehova i glad oltaem, mo ol man blong hem tu oli glad, from we oli givim samting long narafala. Be ol man we oli laekem olgeta tumas, oli tingbaot nomo samting we oli save kasem.—Ol Wok 20:35.

7. ?Wanem ol kwestin we yu save askem blong luk sipos yu laekem yu wan, i bitim God?

⁷ ?Olsem wanem blong save sipos yu laekem yu wan moa, i bitim we yu lavem God? Traem tingbaot gudfala advaes ya:  ‘Yufala i no mas mekem samting blong man i rao nomo no blong leftemap yufala nomo, be yufala i mas mekem tingting blong yufala i stap daon mo luk ol narafala se oli hae moa. Yufala i no mas tingbaot yufala nomo, be yufala i mas tingbaot narafala tu.’ (Filipae 2:3, 4) Yu save askem se: ‘?Mi mi folem advaes ya? ?Mi traehad blong mekem samting we God i wantem? ?Mi mi lukaot rod blong givhan long ol narafala long kongregesen mo long wok blong prij?’ I no isi blong givim taem mo paoa blong yu blong halpem ol narafala. Maet yu mas lego sam samting we yu laekem, mo yu mas wok had. !Be i no gat wan samting we i moa gud, i bitim we yu save se King blong heven mo wol i glad long yu!

8. ?Sam Kristin oli mekem wanem, from we oli lavem God?

⁸ Sam Kristin we oli lavem God mo oli wantem mekem moa long wok blong hem, oli lego wan gudfala wok we i save mekem olgeta oli kam rij. Erika i wan dokta, be hem i jusum blong paenia i bitim we hem i stadi blong kam hae moa long wok blong hem. Hem mo man blong hem, tufala i gat janis blong go long plante kantri blong prij. Erika i talem se: “Ol samting we mitufala i mekem long ol defdefren kantri, mo ol gudfala fren we mitufala i faenem, oli mekem mitufala i glad moa long laef blong mitufala.” Erika i wok yet olsem wan dokta, be hem i yusum bighaf blong taem mo paoa blong hem blong tijim ol man long saed blong Jehova, mo blong givhan long ol brata mo sista. Hem i talem se samting ya i ‘mekem hem i glad bitim mak.’

9. ?From wanem man we i laekem mane tumas i no glad?

⁹ Pol i talem se ol man bambae oli “laekem mane tumas.” Sam yia i pas, wan paenia long Aealan i tokbaot God long  wan man. Nao man ya i openem paos blong hem, i karemaot pepa mane, mo i se: “!Hemia nao god blong mi!” Plante man oli gat tingting ya, be maet oli no talemaot. Oli laekem mane tumas mo ol samting we mane i save pem. Be Baebol i givim woning se: ‘Sipos yu laekem mane tumas, nating we mane blong yu i plante, be neva yu save talem se yu harem gud, mo neva yu save kasem ol samting we yu wantem.’ (Prija 5:10) Man we i laekem mane tumas, i wantem moa oltaem, neva bambae mane blong hem i naf. Hem i yusum ful laef blong hem blong kasem mane, be i “harem nogud” nomo.—1 Timoti 6:9, 10.

10. ?Baebol i talem wanem long saed blong rijman mo puaman?

¹⁰ I tru, yumi evriwan i nidim mane, mo mane i save givhan blong mekem laef i moagud. (Prija 7:12) ?Be olsem wanem? ?Yumi save glad sipos yumi gat inaf nomo blong laef? !Yes! (Ridim Prija 5:12.) Aguru we i pikinini blong Jake, i raetem long Baebol se: “Plis, mi wantem blong yu mekem we . . . mi no save kam puaman, mo mi no save kam rijman tu. Mi wantem blong yu givim kakae long mi we i stret nomo long mi.” I isi blong kasem save from wanem man ya i no wantem kam puaman. Samting ya i save pulum hem blong i brekem loa blong God nao i stil. ?Be from wanem hem i no wantem kam rijman? Hem i talem long Jehova se: “Sipos mi gat plante kakae, maet mi save tok nogud long yu, se mi no save yu.” (Ol Proveb 30:8, 9) Ating yu save sam man olsem, we oli trastem mane be oli no trastem God.

11. ?Jisas i talem wanem long saed blong mane?

¹¹ Wan man we i laekem mane tumas i no save mekem God i glad. Jisas i talem se: “I no gat man we i save kam slef blong tu masta wantaem, from we bambae hem i agensem wan mo i laekem narawan, no bambae hem i fren gud long wan be i stap tok nogud long narawan. Yufala i no save kam slef blong God mo long semtaem yufala i slef blong mane.” Mo hem i gohed se: ‘Yufala i mas stop blong hivimap ol gudgudfala samting long wol ya. Long ples ya, kakros i save kakae, rosta i save spolem, mo ol man blong stil oli save stilim. Be yufala i mas hivimap ol gudgudfala samting long heven. Long ples ya, kakros i no save kakae, rosta i no save spolem, mo ol man blong stil oli no save stilim.’—Matiu 6:19, 20, 24.

12. ?From wanem i gud blong mekem laef blong yumi i no fasfas? Talem wan stori.

¹² Plante man blong Jehova oli stap traehad blong mekem laef blong olgeta i no fasfas. Nao oli luksave se oli gat moa taem blong mekem wok blong Jehova, mo oli glad moa. Jak, we i stap long Amerika, i salem bigfala haos blong hem mo bisnes blong hem, blong i save joenem woman blong hem long wok blong paenia. Hem i talem se: “I had blong lego naesfala haos mo bigfala graon blong mitufala.” Be long ol yia we Jak i bin wok, oltaem hem i kambak long haos we i kros mo i harem nogud. Hem i se: “Woman blong mi i wan fultaem paenia, mo hem i glad oltaem. Hem i stap talem long mi se: ‘!Bos blong mi i beswan long wol!’ Naoia, mi tu mi paenia, ale mitufala tugeta i wok blong nambawan Bos ya, Jehova.”

13. ?Olsem wanem yu save skelem tingting we yu gat long mane?

¹³ Taem yu skelem tingting we yu gat long mane, yu no mas giaman long yu  wan bakegen. Traem askem se: ‘?Mi mi soemaot long laef blong mi se mi bilif long samting we Baebol i talem long saed blong mane? ?Mi mi ting se i impoten moa blong winim mane i bitim ol narafala samting? ?Mi laekem moa blong kasem ol sas samting, i bitim we mi fren gud wetem Jehova mo ol man? ?Mi bilif strong se Jehova bambae i givim ol samting we mi nidim?’ !Yumi save sua se Jehova bambae i neva lego ol man we oli trastem hem!—Matiu 6:33.

14. ?Wanem tingting we yu mas gat long ol samting we yu mekem blong harem gud?

¹⁴ Baebol i talem se long ol las dei, ol man bambae oli “laekem moa ol samting we oli save harem gud long hem.” Olsem yumi tokbaot finis, i no rong blong laekem yu wan mo mane, sipos yu no bitim mak. Long sem fasin, i no rong blong laekem samting we yu harem gud long hem, sipos yu no bitim mak. Sam man oli gat tingting ya se oli no mas harem gud nating, be Jehova i no tingting olsem. Baebol i talem se: “Yumi gohed, yumi kakae blong yumi harem gud, mo yumi dring waen blong tingting blong yumi i glad.”—Prija 9:7.

15. ?Ol man we oli “laekem moa ol samting we oli save harem gud long hem,” oli olsem wanem?

¹⁵ Seken Timoti 3:4 i tokbaot olgeta we oli laekem tumas ol samting we oli save harem gud long hem, be oli no tingbaot God. Vas ya i talem se ol man ya oli laekem moa ol samting we oli harem gud long hem i bitim God. Wan man we i stadi dip long Baebol i talem se: “Vas ya i no min se oli laekem God smol, be i min se oli no laekem God nating.” Hemia wan strong woning long ol man we oli laekem tumas ol samting we oli save harem gud long hem. Baebol i tokbaot ol man olsem, se oli letem ol samting ya i pulum olgeta tumas.—Luk 8:14.

16, 17. ?Jisas i gat wanem tingting long ol samting we hem i mekem blong harem gud?

¹⁶ Jisas i soemaot stret tingting we yumi mas gat long ol samting we yumi save harem gud long hem. Hem i go long wan “lafet blong mared” mo “wan bigfala kakae.” (Jon 2:1-10; Luk 5:29) Long mared ya, waen i finis ale hem i mekem wan merikel blong jenisim wota i kam waen. Long wan narafala taem, sam man oli agensem hem from kakae mo dring, nao hem i soemaot klia se ol man ya oli no gat stret tingting.—Luk 7:33-36.

¹⁷ Be ol samting we Jisas i mekem blong harem gud, oli no kam bigfala samting long laef blong hem. Hem i mekem samting we Jehova i wantem fastaem, mo i traehad oltaem blong givhan long ol narafala. Hem i rere blong harem nogud mo ded long pos blong sevem ol man. Hem i talem long ol man we oli wantem folem hem se: ‘Yufala we ol man oli stap spolem nem blong yufala, mo oli stap ronem mo kilim yufala, mo oli stap talem enikaen rabis tok agens long yufala, yufala i glad. Yufala i harem gud, from we bigfala pei blong yufala i stap long heven. Ol profet  bifo, ol man oli mekem i nogud long olgeta long sem fasin ya nomo.’—Matiu 5:11, 12.

18. ?Wanem ol kwestin we yu save askem?

¹⁸ ?Olsem wanem blong faenemaot sipos yu laekem tumas ol samting we yu stap harem gud long hem? Yu save askem se: ‘?Spel mo pleplei i moa impoten long mi i bitim ol miting mo wok blong prij? ?Mi mi rere blong lego samting we mi harem gud long hem, blong mekem wok blong God? Taem mi jusum samting we mi mekem blong spel mo pleplei, ?mi tingbaot sipos Jehova i glad long hem?’ From we yu lavem God mo yu wantem mekem hem i glad, yu lukaot gud blong no mekem samting we yu save se i rong. Be i no hemia nomo. Yu mas lukaot gud tu blong yu no mekem samting we yu ting se i save mekem God i harem nogud.—Ridim Matiu 22:37, 38.

19. ?Hu olgeta we oli no glad?

¹⁹ Ol man oli safa blong 6,000 yia finis long wol blong Setan. Naoia long ol las dei, wol i fulap long ol man we oli tingbaot olgeta nomo, oli laekem mane tumas, mo oli laekem moa ol samting we oli save harem gud long hem. Oli tingbaot nomo ol samting we oli save kasem mo ol samting we oli wantem. !Be ol man olsem oli no glad! Baebol i tokbaot man we i glad se: ‘Jehova i God blong Jekob. Hem i mekem skae, mo graon, mo solwota, wetem olgeta samting we i stap long trifala, mo man we i putum tingting blong hem i stap long hem, hem bambae i harem gud.’—Ol Sam 146:5.

20. ?Olsem wanem yu kasem glad from we yu lavem God?

²⁰ Ol man blong Jehova oli lavem hem tumas, mo evri yia, plante moa man oli kasem save long Jehova mo lavem hem. !Hemia i soemaot se Kingdom blong God i stap rul, mo i no longtaem bambae i givim ol blesing we oli bitim tingting blong yumi! Taem yumi mekem samting we Jehova i wantem, hem i glad, mo yumi tu yumi glad. !Ol man we oli lavem Jehova bambae oli glad gogo i no save finis! Long nekis stadi, bambae yumi tokbaot ol nogud fasin we oli kamaot taem man i tingbaot hem wan nomo. Mo bambae yumi luk olsem wanem ol fasin ya oli defren long ol gudfala fasin blong ol man blong Jehova.