1, 2. Long 2018, ?wanem miting bambae i mekem yumi joen long wan spesel fasin, mo olsem wanem? (Yu luk pija long stat blong stadi.)

LONG 31 Maj 2018, plante milian man long olgeta ples long wol bambae oli joen long wan miting we i kamaot wan taem nomo long wan yia. Taem san i godaon, ol Witnes blong Jehova mo plante narafala man tu, bambae oli joen wanples blong tingbaot sakrefaes we Jisas i mekem blong yumi. Evri yia, Memoriol blong ded blong Jisas i mekem ol man oli joen gud long wan spesel fasin. I no gat wan narafala miting long wol we i olsem.

² Yumi save se bambae Jehova mo Jisas i glad tumas long dei ya, blong luk se, long ol defdefren ples long wol, i gat ol man we oli stap mekem Memoriol. Baebol i tokbaot ‘wan bigfala hip blong ol man, we i no gat man i save kaontem olgeta. Oli kamaot long olgeta kantri, laen, grup blong man, mo lanwis,’ mo oli singaot bigwan se: “God blong yumi we i stap sidaon long bigfala jea blong hem, mo Smol Sipsip blong hem, tufala nao i sevem yumi.” (Revelesen 7:9, 10) !I gud tumas se evri yia long Memoriol, plante milian man oli  ona long Jehova mo Jisas from ol nambawan samting we tufala i mekem!

3. Long stadi ya, ?wanem ol fo kwestin we bambae yumi tokbaot?

³ Long stadi ya, bambae yumi faenem ansa blong ol fo kwestin ya: (1) ?Olsem wanem mi save reregud from Memoriol mo kasem ol gudfala samting from? (2) ?Olsem wanem Memoriol i mekem ol man blong God oli joen gud? (3) ?Yumi wanwan i save mekem wanem blong joen gud? (4) ?Bambae i gat wan taem we yumi mekem Memoriol laswan? Sipos yes, ?wetaem?

4. ?From wanem i impoten blong go long Memoriol?

⁴ ?From wanem i impoten blong go long Memoriol? Wan risen se, long ol miting yumi wosipim Jehova. Jehova mo Jisas i luk we yumi mekem bes blong yumi blong kam long Memoriol, miting ya we i moa impoten i bitim ol narafala miting. Yumi wantem soemaot long tufala se bambae i no gat wan samting i save blokem yumi blong joen long Memoriol, nomo sipos wan bigfala sik o wan narafala samting olsem i kasem yumi. Taem yumi soemaot se ol miting oli impoten long yumi, Jehova i glad blong lego nem blong yumi i stap long “buk blong ol memori” blong hem. Hemia “buk blong laef,” we hem i raetemdaon nem blong olgeta we hem i wantem givim laef we i no save finis, long olgeta.—Malakae 3:16, NW; Revelesen 20:15.

5. Bifo long Memoriol, ?i gud yu mekem wanem blong “jekem” yu wan?

⁵ Long ol wik bifo long Memoriol, i gud yu spenem moa taem blong prea, mo blong jekem sipos yu stap fren gud wetem Jehova. (Ridim 2 Korin 13:5.) Aposol Pol i talem long ol Kristin se: “Yufala i mas gohed blong jekem yufala blong luk sipos yufala i stap holem yet fasin blong bilif.” ?Olsem wanem blong mekem samting ya? Yumi wanwan i save askem se: ‘?Mi mi bilif strong se Jehova i stap yusum ogenaesesen ya nomo? ?Mi mi mekem bes blong mi blong talemaot gud nius mo tijim ol man? ?Ol samting we mi mekem oli soemaot se mi rili bilif we yumi stap long ol las dei, mo en blong rul blong Setan i klosap? ?Mi mi trastem Jehova mo Jisas, olsem we mi trastem tufala taem mi jes stat blong mekem wok blong Jehova?’ (Matiu 24:14; 2 Timoti 3:1; Hibrus 3:14) Taem yu tingting gud long ol kwestin olsem, yu “faenemaot” se yu wanem kaen man.

6. (1) ?Wanem rod blong kasem laef we i no save finis? (2) ?Wan elda i mekem wanem blong rere gud from Memoriol? ?Yu save mekem wanem?

⁶ Blong rere gud from Memoriol, yu save ridim ol magasin we oli eksplenem from wanem miting ya i impoten, nao yu tingting dip long ol save ya. (Ridim Jon 3:16; 17:3.) Wan rod nomo blong kasem laef we i no save finis, hemia blong save Jehova mo bilif long Pikinini blong  hem Jisas. Taswe, i gud yumi stadi long ol samting we bambae oli mekem yumi kam klosap moa long tufala. Wan brata we i elda longtaem finis, i stap mekem samting ya. Long ol yia we i pas, hem i putum gud ol haf blong Wajtaoa we oli tokbaot Memoriol, mo lav we Jehova mo Jisas i soemaot. Bifo long Memoriol, hem i ridim ol haf ya bakegen, mo i tingting gud long ol save we i tokbaot from wanem miting ya i impoten tumas. Wanwan taem, hem i ademap wan haf bakegen long olgeta we oli stap finis. Mo tu, hem i mekem Baebol riding blong Memoriol mo i tingting dip long hem. Elda ya i talem se taem hem i mekem olsem evri yia, hem i lanem plante niufala samting. Samting we i moa impoten, se hem i lavem moa Jehova mo Jisas. Sipos yu tu yu stadi olsem, bambae yu lavem moa Jehova mo Jisas, yu glad moa long ol samting we tufala i mekem, mo yu kasem plante moa gudfala samting long Memoriol.

7. (1) Long naet we Jisas i stanemap Kakae Blong Masta, ?hem i tokbaot wanem long prea? (2) ?Wanem i soemaot se Jehova i ansa long prea blong Jisas?

⁷ Long naet we Jisas i stanemap Kakae Blong Masta, hem i mekem wan spesel prea. Hem i tokbaot olsem wanem hem mo Papa blong hem i joen gud. Mo hem i prea se ol disaepol blong hem tu oli joen gud. (Ridim Jon 17:20, 21.) Jehova i ansa long prea ya blong Pikinini blong hem. Memoriol i soemaot moa, i bitim ol narafala miting, se ol Witnes blong Jehova oli stap joen gud. Long dei ya, plante milian man long ol defdefren kantri mo kala, oli joen wanples. Long sam ples, i narakaen blong ol man blong ol defdefren laen oli joen blong mekem wosip, mo plante man oli ting se i no stret blong mekem olsem. Be Jehova mo Jisas i gat defren tingting. Tufala i ting se i naes tumas blong luk ol man oli joen gud blong mekem Memoriol.

8. ?Jehova i talem wanem long Esikel?

⁸ Yumi ol man blong Jehova, yumi no sapraes se yumi joen gud. Ol tok we Jehova i givim long Esikel, oli soemaot se bambae yumi joen gud. Hem i talem long Esikel blong i tekem tu stik, wan we i minim “ol man Juda,” mo wan we i minim “ol man Isrel,” nao hem i mas joenem tufala stik ya i kam wan. (Ridim Esikel 37:15-17.) “Kwestin” we i stap long Wajtaoa blong Julae 2016, i eksplenem se: “Jehova i talem long profet Esikel se, bambae ol man blong hem oli gobak bakegen long Promes Lan mo bambae oli joen gud bakegen olsem wan neson. Profet tok ya i talem tu se, long ol las dei ol man blong Jehova bambae oli joen gud blong wosipim hem.”

9. ?Olsem wanem profet tok blong Esikel i kamtru evri yia long Memoriol?

⁹ Long yia 1919, Jehova i stat blong mekem ol tabu man blong hem oli joen gud bakegen mo wok gud wanples. Olgeta ya oli olsem stik blong “ol man Juda.” Afta, plante moa man we oli wantem laef olwe long wol, oli stat blong joen wetem ol tabu man ya. Olgeta we oli wantem laef long wol ya oli olsem stik blong “ol man Isrel.” Jehova i promes blong joenem tufala stik ya i kam “wan stik nomo” we hem i holem long han blong hem. (Esikel 37:19) Hem i mekem ol tabu man ya mo “ol narafala sipsip” oli kam “wan  grup nomo.” (Jon 10:16; Sekaraea 8:23) Tede, tufala grup ya i joen gud mo tufala i wosipim Jehova wanples. Tufala i gat wan King nomo, hemia Jisas Kraes, we profet Esikel i singaot hem se ‘Deved, man blong wok’ blong God. (Esikel 37:24, 25) Taem yumi mekem Memoriol evri yia, yumi luk olsem wanem tufala grup ya i joen gud olsem Esikel i talem. ?Be yumi wanwan i save mekem wanem blong holemtaet fasin joen gud ya?

10. ?Yumi save mekem wanem, blong ol man blong God oli joen gud?

¹⁰ ?Yumi save mekem wanem, blong ol man blong God oli joen gud? Yumi save mekem tingting blong yumi i stap daon. Jisas i talem long ol disaepol blong hem se tingting blong olgeta i mas stap daon. (Matiu 23:12) Ol man blong wol oli ting se oli moa impoten i bitim ol narafala. Be sipos tingting blong yumi i stap daon, bambae yumi respektem ol brata we oli lidim kongregesen, mo bambae yumi obei long olgeta. Hemia bambae i mekem kongregesen i joen gud. Samting we i moa impoten se, bambae yumi mekem God i glad, from we hem i “agensem ol man we tingting blong olgeta i antap tumas, be hem i kaen tumas long olgeta we oli mekem tingting blong olgeta i stap daon.”—1 Pita 5:5.

11. ?Wanem mining blong bred mo waen? ?Yumi save tingbaot wanem, we bambae i mekem yumi joen gud?

 ¹¹ ?Wanem narafala samting we yumi save mekem? Yumi save tingting gud long mining blong bred mo waen. Yumi mas mekem samting ya bifo long Memoriol, mo long naet blong Memoriol tu. (1 Korin 11:23-25) Bred ya we i no gat is long hem, i saen blong bodi blong Jisas we i no gat sin. Red waen i saen blong blad blong Jisas. Be i no naf we yumi kasem save long samting ya nomo. Yumi mas tingbaot se, ransom sakrefaes i soemaot bigfala lav blong Jehova mo Jisas, we i bitim lav blong eni narafala man. Jehova i givim Pikinini blong hem blong sevem yumi, mo Jisas i glad blong givim laef blong hem from yumi. Taem yumi tingbaot lav blong tufala, yumi lavem tufala moa. Mo taem yumi evriwan i lavem Jehova, hemia i mekem yumi joen gud.

12. ?Olsem wanem stori blong king mo ol slef i soemaot se Jehova i glad taem yumi fogivim narafala?

¹² ?Wanem narafala samting we yumi save mekem? Yumi save fogivim narafala. Taem yumi wanwan i mekem olsem, yumi soemaot se yumi glad we Jehova i yusum sakrefaes blong Jisas blong fogivim ol sin blong yumi. Jisas i talem stori blong wan king mo ol slef blong hem, blong soemaot se i impoten blong fogivim narafala. I gud yu ridim Matiu 18:23-34, nao yu askem se: ‘?Mi mi glad blong folem tijing ya blong Jisas? ?Mi mi gat longfala tingting long ol brata mo sista, mo mi traehad blong kasem save long olgeta? ?Mi mi glad blong fogivim olgeta we oli mekem i no stret long mi?’ I tru, sam sin oli bigwan moa, mo i had blong fogivim olgeta we oli mekem ol bigfala sin ya. Be stori blong Jisas i tijim yumi se Jehova i glad taem yumi fogivim narafala. (Ridim Matiu 18:35.) Jisas i soemaot klia se Jehova i no save fogivim yumi, sipos yumi no fogivim ol brata we oli tanem tingting from sin we oli mekem. Yumi mas tingting gud long samting ya. Blong holemtaet gudfala fasin joen, yumi mas fogivim narafala olsem Jisas i talem.

13. ?Olsem wanem yumi mekem se yumi evriwan i joen gud?

¹³ Taem yumi fogivim ol brata mo sista, yumi mekem pis i stap. Aposol Pol i talem se yumi mas wok had blong joen gud mo blong gat pis. (Efesas 4:3) Taswe, long ol wik bifo long Memoriol, mo speseli long naet blong Memoriol, i gud yu tingting dip long fasin we yu mekem long ol narafala. Yu save askem se: ‘?Ol narafala oli luksave se mi no stap kros long man we i spolem mi? ?Oli luksave se mi stap traehad blong mekem pis mo joen gud wetem narafala?’ Hemia ol impoten kwestin blong tingbaot.

14. ?Olsem wanem ‘yumi lavlavem yumi blong yumi no raorao’?

¹⁴ ?Wanem narafala samting we yumi save mekem, blong ol man blong God oli joen gud? Yumi folem fasin blong Jehova blong lavem ol brata. (1 Jon 4:8) Bambae yumi no talem se: “Mi mas gat pis wetem ol brata, be i no nid blong mi kam klosap tumas long olgeta.” Sipos yumi tingting olsem, yumi no stap folem advaes blong Pol se, ‘yumi lavlavem yumi blong yumi no raorao.’ (Efesas 4:2) Makem gud se Pol i no talem nomo se ‘yumi no raorao,’ be hem i talem tu se ‘yumi  lavlavem yumi.’ Tufala samting ya i no sem mak. I gat ol defren kaen man long ol kongregesen blong yumi, mo Jehova i pulum olgeta evriwan oli kam long hem. (Jon 6:44) Hem i luk plante gudfala fasin we hem i lavem olgeta from. Sipos God i lavem ol brata mo sista, ?olsem wanem yumi save talem se i no nid blong lavem olgeta? Yumi mas glad tumas blong lavem olgeta, olsem we Jehova i wantem.—1 Jon 4:20, 21.

15. ?Olsem wanem yumi save se bambae yumi mekem Memoriol laswan?

¹⁵ Wan dei, bambae yumi mekem Memoriol laswan. ?Olsem wanem yumi save samting ya? Pol i talem long ol tabu Kristin se taem oli tingbaot ded blong Jisas evri yia, oli stap “talemaot ded blong Masta long ol man gogo kasem we hem i kam.” (1 Korin 11:26) Mo tu, long profet tok blong Jisas long saed blong taem blong en, hem i talem se bambae hem i “kam.” Hem i tokbaot taem blong bigfala trabol we i klosap nao, i se: “Saen blong Pikinini blong man bambae i kamaot long skae. Olgeta laen blong man long wol bambae oli kilkilim jes blong olgeta from we oli sore tumas. Mo bambae oli luk Pikinini blong man i kam long klaod long skae wetem paoa mo bigfala laet we i saen. Pupu bambae i krae bigwan, mo hem bambae i sanem ol enjel blong hem oli go long ol fo win long wol, blong tekem ol man we hem i jusumaot olgeta oli kam wanples. Oli go stat long ples we skae i kasem solwota i go kasem narasaed en blong hem.” (Matiu 24:29-31) Jisas i talem se bambae hem i “tekem ol man we hem i jusumaot olgeta oli kam wanples.” Hemia bambae i hapen taem hem i tekem ol tabu Kristin we oli stap yet long wol, oli go antap long heven. Hemia long taem blong bigfala trabol, bifo we faet blong Amagedon i stat. Long faet ya, Jisas wetem ol 144,000, bambae oli winim ol king blong wol ya. (Revelesen 17:12-14) Memoriol we bambae yumi mekem jes bifo we Jisas i “kam” blong tekemaot ol tabu man, laswan ya nao.

16. ?From wanem yu gat strong tingting blong joen long Memoriol long yia ya?

¹⁶ Yu mas gat strong tingting blong joen long Memoriol long 31 Maj 2018. Mo yu mas askem help blong Jehova blong holemtaet fasin blong joen gud wetem ol man blong hem. (Ridim Ol Sam 133:1.) Wan dei, bambae yumi go long Memoriol laswan. Go kasem dei ya, yumi gohed blong soemaot se gudfala fasin joen we yumi gat evri yia long Memoriol, i wan samting we i nambawan tumas.