1-2. (1) Taem plante milian man oli joen blong mekem Kakae blong Masta, ?Jehova i stap luk wanem? (Yu luk pija long fran pej.) (2) ?Long stadi ya, bambae yumi tokbaot wanem?

TRAEM tingbaot samting we Jehova i luk taem plante milian man long wol oli joen blong mekem Kakae blong Masta. Hem i no luk nomo se i gat plante man, be hem i luk ol man wanwan. Hem i luk olgeta we oli stap kam evri yia long Memoriol. Sam long olgeta oli fesem hadtaem from ol man we oli agensem olgeta bigwan. Sam narafala oli no stap kam long olgeta miting, be oli tingbaot Memoriol olsem wan impoten miting we oli no mas mestem. Jehova i luk olgeta tu we oli neva kam long Memoriol bifo, be oli kam from we oli wantem save moa long saed blong miting ya.

² I tru, Jehova i glad tumas blong luk we plante man oli kam long Memoriol. (Luk 22:19) Be hem i no wari tumas long namba blong ol man we oli kam. Hem i tingbaot risen from wanem oli kam, hemia samting we i moa impoten long tingting blong Jehova. Long stadi ya, bambae yumi tokbaot wan impoten kwestin: ?From wanem yumi go long Memoriol evri yia, mo ol miting we Jehova i stap mekemrere evri wik blong olgeta we oli lavem hem?

3-4. (1) ?From wanem yumi stap go long ol miting? (2) Taem yumi stap go long ol miting, ?hemia i soemaot se yumi gat wanem fasin? (3) Folem 1 Korin 11:23-26, ?from wanem yumi no mas mestem Memoriol?

³ Bigfala risen from wanem yumi go long ol miting, hemia blong wosipim Jehova. Mo tu, long ol miting Jehova i stap tijim yumi. Ol man we oli gat flas tingting oli no wantem se narafala  i tijim olgeta, oli ting se oli save finis. (3 Jon 9) Be yumi no olsem. Yumi wantem se Jehova mo ogenaesesen blong hem oli tijim yumi.—Aes. 30:20; Jon 6:45.

⁴ Taem yumi go long ol miting, hemia i soemaot se yumi gat tingting daon, mo yumi wantem se Jehova i tijim yumi. Yumi no go long Memoriol from we yumi harem se yumi mas go nomo. Be yumi go long impoten miting ya from we yumi obei wetem tingting daon long tok ya blong Jisas se: “Yufala i mas gohed blong mekem samting ya oltaem blong tingbaot mi.” (Ridim 1 Korin 11:23-26.) Miting ya i mekem se hop we yumi gat i kam strong moa. Mo tu, yumi tingbaot we Jehova i lavem yumi tumas. Be Jehova i save se wan miting long wan yia i no naf blong leftemap tingting blong yumi mo mekem yumi strong. Taswe hem i rerem ol miting blong yumi evri wik, mo hem i wantem se yumi go long ol miting ya. Yumi obei from we yumi gat tingting daon. Yumi spenem plante aoa evri wik blong rerem ol miting ya mo blong go long olgeta.

5. ?From wanem ol man we oli gat tingting daon oli kam taem Jehova i singaot olgeta?

⁵ Evri yia, Jehova i singaot ol man blong oli kam mo kasem tijing we hem i givim, mo plante man we oli gat tingting daon, oli glad blong kam. (Aes. 50:4) Oli laekem blong kam long Memoriol, mo oli stat blong kam long ol narafala miting tu. (Sek. 8:20-23) Long taem ya, yumi we yumi stap long trutok longtaem finis, yumi glad blong joen wetem ol niuwan blong letem Jehova i tijim mo lidim yumi. ‘Oltaem hem i stap givhan long yumi mo sevem yumi.’ (Sam 40:17) ?Yu ting se i gat wan samting we i moa gud o i moa impoten, i bitim we yumi letem Jehova mo Pikinini ya we hem i lavem tumas, i tijim yumi? !Nogat!—Mat. 17:5; 18:20; 28:20.

6. ?Olsem wanem tingting daon i givhan long wan man blong kam long Memoriol?

⁶ Evri yia, yumi traehad blong invaetem olgeta man oli kam long Memoriol blong ded blong Jisas. Plante man we tingting blong olgeta i stap daon, oli kam mo oli kasem plante gudfala samting. Tingbaot wan long olgeta. Plante yia bifo, wan brata i invaetem wan man blong kam long Memoriol, be man ya i talem se hem i no save kam. Taswe brata i sapraes blong luk man ya i kam insaed long Haos Kingdom long naet blong Memoriol. Man ya i glad tumas taem ol brata oli kam sekhan mo welkamem hem. Nao hem i stat blong kam long miting evri wik. Long wan ful yia, hem i mestem tri miting nomo. ?From wanem hem i jenisim tingting blong hem mo i kam long miting? From we hem i gat tingting daon. Brata we i invaetem hem i talem se: “Man ya i wan gudfala man we tingting blong hem i stap daon.” I klia se Jehova i pulum man ya blong i wosipim hem, mo naoia hem i wan brata we i baptaes finis.—2 Saml. 22:28; Jon 6:44.

7. ?Olsem wanem samting we yumi lanem long miting mo long Baebol riding i givhan long yumi blong gat tingting daon?

⁷ Samting we yumi lanem long miting mo long Baebol riding, i save givhan long yumi blong gat tingting daon. Long ol wik bifo long Memoriol, plante taem ol miting oli tokbaot eksampol blong Jisas, mo tingting daon we hem i gat taem hem i givim laef blong hem olsem ransom. Mo long ol dei bifo long Memoriol, yumi ridim stori blong ol samting we i hapen taem Jisas i ded mo i laef bakegen. Samting we yumi lanem long ol miting ya mo long Baebol riding, oli givhan long yumi blong kasem save moa long bigfala samting we Jisas i mekem taem hem i givim laef blong hem olsem wan sakrefaes. Yumi wantem folem fasin blong hem blong gat tingting daon,  mo mekem samting we Jehova i wantem, nating se samtaem i had.—Luk 22:41, 42.

8. ?Olsem wanem Jisas i soemaot strong tingting?

⁸ Yumi traehad tu blong soemaot strong tingting olsem Jisas. Tingbaot strong tingting we hem i soemaot long ol dei bifo we hem i ded. Hem i savegud se i no longtaem ol enemi blong hem bambae oli jikim hem, wipim hem, mo nilim hem long pos. (Mat. 20:17-19) Nating se i olsem, hem i rere blong ded. Klosap long taem we oli kam blong holem hem, hem i talem long ol gudfala aposol we oli stap wetem hem long Getsemane se: “Yufala i stanap, yumi go. !Yufala i luk! Man ya we i letem mi mi go long han blong ol enemi, hem i stap kam.” (Mat. 26:36, 46) Mo taem ol enemi oli kam blong holem hem, hem i go stanap long fored blong olgeta, mo i talem long ol soldia blong oli letem ol aposol oli go fri. (Jon 18:3-8) !Jisas i soemaot nambawan eksampol blong strong tingting! Tede ol tabu Kristin mo ol narafala sipsip oli stap traehad blong soemaot strong tingting olsem Jisas. ?Olsem wanem oli mekem samting ya?

9. (1) ?From wanem yumi nidim strong tingting blong go long ol miting? (2) ?Olsem wanem strong tingting we yumi gat i save givhan long ol brata we oli stap long kalabus from bilif blong olgeta?

⁹ Taem yumi fesem ol trabol, yumi nidim strong tingting blong go long ol miting. Sam long ol brata mo sista oli kam oltaem long ol miting nating se maet wan famle i ded, tingting i foldaon, o oli kasem bigfala sik. Sam narafala oli gat strong tingting blong kam long ol miting nating se ol famle oli agensem olgeta o gavman i blokem olgeta. Traem tingbaot olsem wanem eksampol blong yumi i gat paoa long ol brata mo sista we oli stap long kalabus from bilif blong olgeta. (Hib. 13:3) Taem oli harem se yumi stap gohed nating se yumi kasem trabol, hemia i givim paoa long olgeta blong holemtaet bilif, strong tingting, mo stap tru long Jehova. Aposol Pol tu i harem olsem. Taem hem i stap kalabus long Rom, hem i harem nius blong ol brata mo sista we oli gohed blong holemstrong long Jehova, nao hem i glad tumas. (Fil. 1:3-5, 12-14) Smoltaem bifo we hem i kamaot long kalabus o maet jes afta we hem i kamaot, hem i raetem leta blong Hibrus. Hem i talem se: “Yufala i mas gohed blong lavlavem yufala, olsem we yufala i brata nomo.” Mo oli no mas kam slak blong joen long ol miting.—Hib. 10:24, 25; 13:1.

10-11. (1) ?Yu save singaot hu i kam long Memoriol? (2) Folem Efesas 1:7, ?from wanem yumi mekem olsem?

¹⁰ Yumi soemaot strong tingting taem yumi singaot ol famle, ol fren long wok, mo ol man raonabaot long yumi, blong oli kam long Memoriol. From we yumi glad tumas long samting we Jehova mo Jisas i mekem blong yumi, taswe yumi wantem singaot olgeta man blong oli kam long Memoriol. Yumi wantem se olgeta tu oli lanem olsem wanem oli save kasem blesing from ransom sakrefaes ya we i soemaot se Jehova i “kaen tumas.”—Ridim Efesas 1:7; Rev. 22:17.

 ¹¹ Taem yumi joen wanples long ol miting hemia i soemaot strong tingting, mo tu i soemaot wan narafala nambawan fasin we Jehova mo Jisas i gat.

12. (1) ?Olsem wanem ol miting oli mekem se yumi lavem moa Jehova mo Jisas? (2) ?Seken Korin 5:14, 15 i talem se yumi mas mekem wanem blong folem eksampol blong Jisas?

¹² Yumi go long ol miting from we yumi lavem Jehova mo Jisas. Mo samting we yumi lanem long miting i mekem se yumi lavem tufala moa. Ol miting oli mekem yumi tingbaot ol samting we tufala i mekem blong yumi. (Rom 5:8) Memoriol i mekem yumi tingbaot moa se tufala i lavem yumi tumas, mo tufala i lavem tu ol man we oli no kasem save fulwan yet long ransom. Blong talem tangkiu, yumi traehad blong folem eksampol blong Jisas evri dei long laef blong yumi. (Ridim 2 Korin 5:14, 15.) Mo tu, hat blong yumi i pulum yumi blong presem Jehova from we hem nao i givim Jisas olsem ransom. Wan rod blong presem hem, hemia blong ansa wetem fulhat blong yumi long ol miting.

13. ?Olsem wanem yumi soemaot se yumi lavem tumas Jehova mo Jisas? Eksplenem.

¹³ Taem yumi rere blong lego sam samting from Jehova mo Jisas, yumi soemaot se yumi lavem tufala tumas. Plante taem yumi mas lego sam samting blong go long miting. Samtaem kongregesen i mekem miting long naet, mo yumi taed from we yumi bin wok fuldei. Mo narafala miting, yumi mekem long wiken taem ol man blong wol oli stap spel. ?Olsem wanem? ?Jehova i makem se yumi go long miting nating se yumi taed? !Yes! Blong talem stret, moa we yumi traehad, moa we Jehova i glad from lav we yumi soemaot long hem.—Mak 12:41-44.

14. ?Olsem wanem Jisas i soemaot nambawan eksampol blong lego samting from ol narafala?

¹⁴ Jisas i soemaot nambawan eksampol blong lego samting from we hem i lavem ol disaepol blong hem. Hem i rere blong ded from olgeta, be i no hemia nomo. Long laef blong hem evri dei, hem i tingbaot olgeta fastaem. Traem tingbaot, hem i tekem taem blong joen wetem olgeta nating se hem i taed o i stap wari. (Luk 22:39-46) Mo hem i tingbaot samting we hem i save givim long olgeta, i no samting we hem i save kasem long olgeta. (Mat. 20:28) Sipos yumi lavem Jehova mo ol brata olsem Jisas i lavem olgeta, bambae yumi mekem evri samting we yumi naf blong mekem,  blong kam long Memoriol mo long ol narafala miting tu.

15. ?Yumi wantem givhan long hu?

¹⁵ I gat wan ogenaesesen blong ol tru Kristin nomo we oli joen olsem ol brata mo sista. Taswe yumi glad blong spenem taem blong invaetem ol niuwan oli kam joen wetem yumi. Yumi wantem givhan tu long olgeta we “oli bilif” olsem yumi, be oli kam slak nao oli no moa prij o kam long ol miting. (Gal. 6:10) Yumi soemaot se yumi lavem olgeta taem yumi go leftemap tingting blong olgeta blong oli kam long ol miting, speseli long Memoriol. Olsem Jehova mo Jisas, yumi tu yumi glad taem wan we i no moa kam long miting, i kambak long Jehova. Hem i Papa blong yumi we i lavem yumi tumas, olsem man blong lukaot long sipsip i lavem ol sipsip blong hem.—Mat. 18:14.

16. (1) ?Olsem wanem yumi leftemap tingting blong yumi, mo ol miting oli mekem wanem long yumi? (2) ?From wanem hemia i wan gudfala taem blong tingbaot toktok blong Jisas long Jon 3:16?

¹⁶ Long ol wik we oli kam, i gud yumi invaetem plante moa man oli kam long Memoriol long Fraede 19 Eprel 2019. (Luk bokis ya “?Bambae Yu Singaot Hu?”) Long yia we i stap kam, i gud yumi traehad blong go long evri miting we Jehova i rerem blong yumi, mo leftemap tingting blong ol narafala. I no longtaem, wol blong Setan bambae i lus, taswe yumi nidim ol miting we oli givhan long yumi blong gat tingting daon, strong tingting, mo lavem ol man. (1 Tes. 5:8-11) !I gud yumi soemaot se yumi lavem Jehova mo Jisas wetem fulhat blong yumi, from lav we tufala i soemaot long yumi!—Ridim Jon 3:16.