1-3. (1) ?Jehova i lavem Solomon from wanem? ?Wanem ol blesing we Solomon i kasem? (2) ?Wanem ol kwestin we bambae yumi ansarem long stadi ya?

SOLOMON i yang nomo taem hem i kam king blong Isrel. Taem hem i jes stat blong rul, Jehova i kamtru long hem long wan drim mo i talem long hem se: “Sipos yu wantem wanem samting, mi bambae mi givim long yu.” Solomon i ansa se: “Mi mi yangfala nomo, mo mi no save fasin blong rul. . . . Yu mas givim long man blong yu wan hat we i save mekem hem i obei, blong hem i save jajem ol man blong yu.” (1 King 3:5-10, NW) !“Wan hat we i save mekem hem i obei”—hemia i soemaot se Solomon i gat tingting daon! !Yumi kasem save from wanem Jehova i lavem hem! (2 Saml. 12:24) Jehova i glad tumas long samting we yangfala king ya i askem, taswe hem i mekem Solomon i “waes” long hat blong hem, mo i “savegud ol fasin blong rul.”—1 King 3:12.

² Taem Solomon i holemstrong long God, hem i kasem plante blesing. Hem i gat bigfala ona blong wokem haos tempol, blong ol man oli “save kam long hem blong mekem wosip” long Jehova, God blong Isrel. (1 King 8:20) Ol man oli save gud Solomon from bigfala waes we God i givim long hem. Mo ol tok we God i givim long hem oli stap long tri buk blong Baebol. Wan long olgeta, hemia buk blong Ol Proveb.

³ Long ol olfala hanraet blong Ol Proveb, tok ya ‘hat’ i stap samwe long 100 taem. Wan long olgeta, hemia Ol Proveb 4:23, we i talem se: “Samting we yu mas lukaot moa long hem i bitim ol narafala samting, hemia hat blong yu.” ?Long vas ya, “hat” i minim wanem? Long stadi ya, bambae yumi ansarem kwestin ya. Mo tu, bambae yumi tokbaot tufala kwestin ya: ?Olsem wanem Setan i traem blong spolem hat? ?Mo yumi save mekem wanem  blong lukaot gud long hat? Blong holemstrong long God, yumi mas kasem save ansa blong ol impoten kwestin ya.

4-5. (1) ?Olsem wanem Ol Sam 51:6 i halpem yu blong kasem save mining blong tok ya “hat”? (2) ?Olsem wanem samting we yumi mekem blong stap helti i soemaot se yumi mas lukaot gud long hat?

⁴ Long Ol Proveb 4:23, tok ya “hat” i minim “ol fasin we oli haed” o “ol tingting.” (Ridim Ol Sam 51:6, NW.) * Taswe, yumi save talem se “hat” i minim ol tingting we oli haed, ol filing, ol samting we yumi wantem, mo risen from wanem yumi mekem samting. Hem i no minim nomo ol samting long saed blong yumi we ol man oli luk, be i minim tu ol samting insaed we oli no save luk.

⁵ Blong luksave olsem wanem ol fasin we oli haed oli impoten, traem tingbaot helt blong yumi. Yumi mas kakae gud mo mekem eksasaes blong ol haf insaed long bodi oli wok gud. Long sem fasin, blong frengud wetem God, oltaem yumi mas tekem ol gudfala kakae long Tok blong hem Baebol, mo mekem ol wok we oli soemaot bilif. Yumi soemaot bilif taem yumi mekem ol samting we yumi lanem i wok long laef blong yumi, mo yumi tokbaot bilif blong yumi. (Rom 10:8-10; Jem. 2:26) Narafala samting se, maet yumi ting se yumi helti from we i luk olsem se bodi i strong, be maet wan sik i stap insaed long bodi mo i stap spolem yumi. Long sem fasin, maet yumi ting se bilif blong yumi i strong from we yumi folem wan gudfala program blong wosip, be maet yumi stat blong wantem ol samting we oli nogud. (1 Kor. 10:12; Jem. 1:14, 15) Yumi no mas fogetem se Setan i wantem we yumi folem tingting blong hem we i save spolem yumi. ?Olsem wanem hem i traem mekem samting ya? ?Mo olsem wanem yumi save protektem yumi?

6. ?Wanem samting we Setan i wantem, mo olsem wanem hem i traem mekem?

⁶ Setan i wantem se yumi kam olsem hem—wan stronghed we i tingbaot hem wan mo i no wantem mekem samting we Jehova i glad long hem. Be Setan i no save fosem yumi blong tingting olsem hem mo folem fasin blong hem.  Taswe hem i traem winim yumi long ol narafala rod. Wan rod: Hem i mekem yumi stap long medel blong ol man we oli gat tingting olsem hem. (1 Jon 5:19) Hem i hop se bambae yumi spenem taem wetem olgeta, nating we yumi save finis se ol rabis fren oli save “spolem” tingting mo fasin blong yumi. (1 Kor. 15:33) Hem i yusum trik ya long King Solomon. Solomon i maredem plante woman we oli no wosipim Jehova, mo sloslo oli “pulum hem i gowe long Hae God” Jehova.—1 King 11:3.

7. ?Wanem narafala rod we Setan i yusum blong pulum ol man blong tingting olsem hem? ?From wanem yu mas lukaot gud?

⁷ Setan i yusum ol muvi mo stori long TV blong pulum ol man blong oli tingting olsem hem. Hem i save se yumi glad blong wajem ol stori, be i no hemia nomo, ol stori ya oli tijim yumi tu. Oli givim ol tingting, filing, mo oli pulum yumi blong mekem sam aksen. Jisas i yusum ol stori blong tijim ol man. Tingbaot ol parabol blong hem, olsem gudfala man Sameria mo boe we i lusum rod. (Mat. 13:34; Luk 10:29-37; 15:11-32) Ol man we oli gat tingting blong Setan, oli save yusum ol stori blong spolem yumi. Yumi mas gat stret tingting. I oraet nomo blong wajem wan gudfala muvi o stori long TV we i tijim yumi, mo i no spolem tingting blong yumi. Be yumi mas lukaot gud. Taem yumi jusum samting we yumi wantem wajem, i gud yumi askem se: ‘?Stori ya bambae i tijim mi se i oraet nomo blong folem ol nogud fasin?’ (Gal. 5:19-21; Efes. 2:1-3) Sipos yu luk se stori ya i save pulum yu blong tingting olsem Setan, ?yu mas mekem wanem? !Stap longwe long hem, olsem wan strong sik we yu no wantem kasem!

8. ?Olsem wanem Papa mo Mama i save givhan long pikinini blong i lukaot gud long hat blong hem?

⁸ Papa mo mama, yutufala i gat bigfala wok ya blong protektem pikinini, mo no letem Setan i spolem hat blong hem. I sua se yu mekem evri samting we yu naf blong mekem blong protektem pikinini blong yu long ol strong sik. Yu klinim gud haos, mo yu sakemaot eni samting we i save givim sik long yu mo pikinini blong yu. Long sem fasin, yu mas protektem pikinini  long ol muvi, ol stori long TV, ol video gem, mo ol samting long Intenet we oli save pulum hem blong i tingting olsem Setan. Jehova i givim wok long yu blong yu givhan long pikinini blong yu, blong i kam wan fren blong Jehova. (Prov. 1:8; Efes. 6:1, 4) Taswe yu no mas fraet blong putum sam rul we oli stanap long Baebol, blong evriwan long haos oli folem. Talem long ol smol pikinini blong yu, samting we oli save wajem mo samting we oli no save wajem, mo eksplenem from wanem yu talem olsem. (Mat. 5:37) Taem pikinini i stap kam bigwan, tijim hem blong i luksave samting we Jehova i laekem mo samting we Jehova i no laekem. (Hib. 5:14) Yu mas tingbaot se pikinini blong yu bambae i lanem plante samting from ol tok blong yu, be bambae i lanem moa from ol aksen blong yu.—Dut. 6:6, 7; Rom 2:21.

9. ?Wanem tingting we Setan i stap leftemap, mo olsem wanem i save spolem yumi?

⁹ Mo tu, Setan i traem spolem hat blong yumi taem hem i pulum yumi blong trastem waes blong wol, i bitim we yumi trastem waes blong Jehova. (Kol. 2:8) Wan tingting we Setan i leftemap hemia blong wantem kam rijman. Sam man we oli folem tingting ya oli kam rij, be sam narafala oli no kam rij. Nating se i olsem wanem, oli stap long denja. ?From wanem? From we oli yusum olgeta taem mo paoa blong olgeta long wan samting nomo, hemia blong kasem mane. Ale plante long olgeta oli kasem wan sik o famle i seraot, mo maet oli no moa frengud wetem God tu. (1 Tim. 6:10) Yumi glad se Papa blong yumi long heven we i waes gud, i givhan long yumi, blong yumi gat stret tingting long saed blong mane.—Pri. 7:12; Luk 12:15.

10-11. (1) ?Yumi mas mekem wanem blong lukaot gud long hat? (2) ?Wanem wok blong wan wajman bifo, mo olsem wanem tingting blong yumi i save mekem wok blong wajman?

¹⁰ Blong lukaot gud long hat, yumi mas luksave ol denja mo tekem aksen kwiktaem blong protektem hat blong yumi. Long Ol Proveb 4:23, tok ya “lukaot gud” i mekem yumi tingbaot wok blong wan wajman. Long taem blong King Solomon bifo, wan wajman i stanap antap long stonwol blong taon, mo i stap lukluk. Sipos hem i luk we i gat wan denja, bambae hem i talemaot long olgeta man. Wok blong wajman ya, i pija blong samting we yumi mas mekem blong blokem Setan blong i no spolem hat mo tingting blong yumi.

¹¹ Long taem bifo, wajman mo man we i gad long doa blong taon, tufala i wok tugeta. (2 Saml. 18:24-26) Blong protektem taon ya, tufala tugeta i meksua se ol doa blong taon oli sat taem wan enemi i kam. (Neh. 7:1-3) Tingting we yumi trenem folem Baebol, * i save kam olsem wan wajman we i givim woning taem Setan i traem blong spolem hat blong yumi. Hemia i min se hem i traem blong bos long ol tingting, ol filing, ol samting we yumi wantem, mo ol tingting we oli pulum yumi blong mekem samting. Taem tingting blong yumi i stikim yumi blong givim woning, yumi mas lesin mo satem doa, i min se, mekem evri samting we yumi save mekem blong blokem denja ya.

12-13. ?Setan i traem pulum yumi olsem wanem, mo yumi mas mekem wanem?

¹² Tingbaot olsem wanem yumi save lukaot gud long hat blong yumi, taem Setan i traem pulum yumi. Jehova i talem se: “Yufala i no mas tokbaot nating enikaen doti fasin blong seks, mo enikaen doti samting.” (Efes. 5:3) ?Bambae yu mekem wanem sipos ol fren long skul o long wok oli stat blong tokbaot ol doti fasin blong seks? Yumi savegud se yumi mas “sakemaot ol fasin we God i no laekem, mo ol  rabis samting blong wol ya we ol man oli wantem.” (Taet. 2:12) Long taem olsem, wajman, we hemia tingting blong yumi, bambae i givim woning. (Rom 2:15) ?Olsem wanem? ?Bambae yu lesin? Setan bambae i traem blong mekem se yu lesin long ol fren o luk samting we oli stap luk. Be taem olsem i stret taem blong satem doa blong taon, mo blokem denja. Yu mekem olsem taem yu jenisim storian, o yu aot long grup blong ol fren ya.

¹³ Yumi nidim strong tingting blong no letem ol fren oli pulum yumi blong tingbaot o mekem wan nogud samting. Yumi save sua se Jehova i stap luk, mo bambae hem i givim paoa mo waes we yumi nidim blong agensem ol tingting blong Setan. (2 Kron. 16:9; Aes. 40:29; Jem. 1:5) ?Yumi save mekem wanem moa, blong lukaot gud long hat blong yumi?

14-15. (1) ?Yumi mas openem hat blong yumi long wanem, mo olsem wanem blong mekem samting ya? (2) ?Olsem wanem Ol Proveb 4:20-22 i halpem yumi blong kasem ol gudfala samting long Baebol riding? (Yu luk bokis ya tu, “ ?Olsem Wanem Blong Tingting Dip?”)

¹⁴ Blong lukaot gud long hat, i no naf blong satem nomo long ol nogud samting, be yumi mas openem tu long ol gudfala samting. Traem tingbaot pijatok blong taon we stonwol i goraon long hem. Man we i lukaot long doa blong taon ya i satem doa blong blokem ol enemi, be i openem doa blong letem ol man blong karem kakae mo ol samting we taon i nidim, oli go insaed. Sipos oli no openem doa nating, ol man long taon ya bambae oli no gat kakae. Long sem fasin, yumi mas openem hat blong yumi blong letem ol gudfala tingting blong God oli go insaed.

¹⁵ Tingting blong Jehova i stap long Baebol, taswe evri taem we yu ridim Baebol, yu letem ol tingting blong Jehova oli gat paoa long ol tingting, filing, mo aksen blong yu. ?Olsem wanem blong kasem ol gudfala samting long Baebol riding blong yu? I impoten blong prea. Wan sista i talem se: “Bifo we mi ridim Baebol, mi prea blong Jehova i givhan long mi blong mi ‘luk ol gudgudfala samting’ long Tok blong hem.” (Sam 119:18) Mo tu, yu mas tingting dip long samting we yu ridim. Sipos yu prea, ridim Baebol, mo tingting dip, Tok blong God bambae i kasem “tingting [“hat,” NW] blong yu,” mo sloslo bambae yu laekem tumas ol tingting blong Jehova.—Ridim Ol Proveb 4:20-22; Sam 119:97.

16. ?JW Brodkasting i givhan olsem wanem long plante brata mo sista?

¹⁶ Wan narafala rod blong letem tingting blong God i gat paoa long yumi, i blong wajem JW Brodkasting^®. Wan brata mo waef blong hem i talem se: “!Ol program we oli kamaot evri manis oli ansarem prea blong mitufala! Oli mekem mitufala i strong, mo taem mitufala i harem nogud o harem se mitufala i no gat fren, oli leftemap tingting blong mitufala. Taem mitufala i stap kuk, klinim haos, mo kakae, mitufala i plei bakegen mo bakegen ol niufala singsing we oli stap kamaot long JW Brodkasting.” Ol program ya oli givhan long yumi, blong yumi lukaot gud long hat blong yumi. Oli tijim yumi blong tingting olsem Jehova, mo agensem ol samting we i pulum yumi blong tingting olsem Setan.

 17-18. (1) Olsem 1 King 8:61 i soemaot, taem yumi folem samting we Jehova i talem, ?hemia i givhan olsem wanem? (2) ?Eksampol blong King Hesekia i tijim yumi long wanem? (3) ?Yu save askem wanem long prea blong yu, olsem Deved long Ol Sam 139:23, 24?

¹⁷ Evri taem we yumi blokem nogud fasin mo mekem samting we i stret, bilif blong yumi i kam strong moa. (Jem. 1:2, 3) Yumi harem gud from we Jehova i glad blong singaot yumi se yumi pikinini blong hem, nao tingting blong yumi i kam strong moa blong mekem hem i glad. (Prov. 27:11) Evri taem we wan samting i traem yumi, hemia wan moa janis blong soemaot se yumi no gat tu tingting, be yumi  wantem wosipim Jehova wetem fulhat blong yumi. (Sam 119:113) Yumi soemaot se yumi lavem Jehova wetem fulhat blong yumi, wan hat we i glad blong obei long ol tok blong hem mo mekem samting we hem i wantem.—Ridim 1 King 8:61, NW. *

¹⁸ I tru, samtaem bambae yu mekem mastik, from we yumi evriwan i sinman. Be sipos yu mestem, i gud yu tingbaot King Hesekia. Hem i mekem sam mastik, be hem i tanem tingting blong hem, mo i gohed blong mekem wok blong Jehova “wetem fulhat blong hem.” (Aes. 38:3-6, NW; 2 Kron. 29:1, 2; 32:25, 26) Ale, yu mas agensem Setan taem hem i traem pulum yu blong tingting olsem hem. Yu mas prea blong yu save gat wan “hat we i mekem se yu obei.” (1 King 3:9, NW; ridim Ol Sam 139:23, 24.) Yu save holemstrong long Jehova, sipos yu lukaot gud long hat blong yu i bitim ol narafala samting.