1-2. (1) ?From wanem yumi no sapraes se Jisas i mekem wan Memoriol we i isi nomo, blong makem ded blong hem? (2) ?Wanem ol fasin blong Jisas we bambae yumi tokbaot?

?YU SAVE eksplenem wanem i stap hapen evri yia long Memoriol blong ded blong Jisas? Ating yumi evriwan i save talem ol samting we i hapen long Kakae ya blong Masta. ?From wanem? From we kakae ya i smol nomo, i no gat plante samting. Nating se i olsem, hem i impoten tumas. Taswe, maet yumi askem se: ‘?From wanem kakae ya i smol olsem?’

² Taem Jisas i stap long wol mo i stap tijim ol man long ol impoten trutok, hem i yusum fasin we i isi, i klia, mo i no had blong kasem save. (Mat. 7:28, 29) Taswe, yumi no sapraes se hem i mekem wan Memoriol * we i isi nomo, blong makem ded blong hem. Bambae yumi tokbaot Memoriol ya mo sam samting we Jisas i talem mo i mekem long taem ya. Bambae yumi kasem save moa long fasin blong Jisas blong gat tingting daon, strong tingting, mo lav, mo olsem wanem yumi save folem gud ol fasin ya.

3. Folem Matiu 26:26-28, ?olsem wanem Memoriol we Jisas i stanemap i isi nomo, mo tufala samting we hem i yusum oli pija blong wanem?

³ Jisas i stap wetem ol 11 gudfala aposol blong hem taem hem i stanemap Memoriol blong ded blong hem. Afta we oli finisim kakae blong Pasova, hem i yusum tufala samting we i stap, hemia bred we i no gat is long hem mo waen, blong mekem  wan isi Memoriol. (Ridim Matiu 26:26-28.) Jisas i talem long ol aposol se tufala samting ya i pija blong bodi mo blad blong hem we i stret olgeta. I no longtaem bambae hem i givim tufala samting ya olsem wan sakrefaes blong sevem olgeta. Ating ol aposol oli no sapraes se impoten kakae ya we Jisas i stanemap i wan isi kakae nomo. ?From wanem?

4. ?Olsem wanem Jisas i folem advaes we hem i givim long Mata, taem hem i mekem kakae blong Memoriol?

⁴ Tingbaot samting we i hapen plante manis bifo, hemia long namba tri yia we Jisas i prij long wol. Hem i go long haos blong ol gudfala fren blong hem, Lasaros, Mata, mo Meri. Taem oli stap sidaon wanples, Jisas i stat blong tijim trifala. Be Mata i no lesin gud from we hem i stap rerem wan bigfala kakae blong ona long Jisas. Nao Jisas i toktok kaen long Mata blong stretem tingting blong hem. Hem i givhan long Mata blong i luksave se i no nidim wan bigfala kakae. (Luk 10:40-42) Biaen, sam aoa nomo bifo we Jisas i ded, hem i folem advaes ya we hem i bin givim long Mata. Hem i mekem wan smol kakae nomo long Memoriol. ?Hemia i soemaot wanem long saed blong Jisas?

5. ?Kakae ya we i smol nomo i soemaot wanem long saed blong Jisas, mo olsem wanem i joen wetem Filipae 2:5-8?

⁵ Evri samting we Jisas i talem mo mekem, i soemaot se hem i gat tingting daon. Taswe, yumi no sapraes se hem i soemaot tingting daon long naet bifo we hem i ded. (Mat. 11:29) Hem i save se bambae hem i givim wan sakrefaes we i bigwan moa i bitim eni narafala sakrefaes. Mo hem i save se Jehova bambae i mekem hem i laef bakegen, blong i kam king long heven. Nating se i olsem, hem i no wantem se ol man blong hem oli mekem wan bigfala kakae blong leftemap hem, taem oli tingbaot ded blong hem. Be hem i talem long olgeta se wan taem evri yia oli mas mekem smol kakae ya nomo blong tingbaot hem. (Jon 13:15; 1 Kor. 11:23-25) Kakae ya we i no flas nating i soemaot se Jisas i no gat flas tingting. Yumi glad se tingting daon i wan nambawan fasin blong King blong yumi long heven.—Ridim Filipae 2:5-8.

6. Taem yumi fesem ol trabol, ?olsem wanem yumi save gat tingting daon olsem Jisas?

⁶ ?Olsem wanem yumi save gat tingting daon olsem Jisas? Yumi gat tingting daon taem yumi tingbaot nid blong ol narafala fastaem. (Fil. 2:3, 4) Tingbaot samting we i hapen long naet bifo we Jisas i ded. Jisas i save se i no longtaem bambae hem i harem nogud go kasem we hem i ded. Be hem i tingbaot  yet ol gudfala aposol blong hem, we bambae oli harem nogud from ded blong hem. Taswe hem i spenem las naet ya blong tijim olgeta, leftemap tingting blong olgeta, mo mekem oli harem gud. (Jon 14:25-31) Jisas i gat tingting daon mo i tingbaot nid blong ol narafala fastaem. !Hemia wan gudfala eksampol blong yumi!

7. ?Olsem wanem Jisas i soemaot strong tingting afta we hem i stanemap Kakae Blong Masta?

⁷ Afta we Jisas i stanemap Kakae Blong Masta, ?olsem wanem hem i soemaot strong tingting? Hem i savegud we bambae oli jajem hem se hem i tok nogud long God, mo kilim hem i ded from. Nating se i olsem, hem i glad nomo blong mekem samting we Papa blong hem i wantem. (Mat. 26:65, 66; Luk 22:41, 42) Jisas i obei long Jehova from we hem i wantem ona long Jehova, leftemap hae nem blong hem, mo openem rod blong ol man we oli tanem tingting from sin blong olgeta, blong oli kasem laef we i no save finis. Mo tu, hem i rerem ol man blong hem blong fesem ol trabol we bambae i kam.

8. (1) ?Jisas i talem wanem long ol gudfala disaepol blong hem? (2) ?Afta we Jisas i ded, olsem wanem ol disaepol oli gohed blong folem fasin blong hem?

⁸ Jisas i soemaot strong tingting taem hem i no wari tumas long ol trabol we bambae hem i kasem, be hem i tingbaot nid blong ol gudfala aposol blong hem fastaem. Smol kakae ya we hem i mekem afta we i sanemaot Judas, bambae i mekem ol tabu man blong hem oli tingbaot ol blesing we oli kasem from blad blong Jisas, mo blesing blong joen long niufala kontrak. (1 Kor. 10:16, 17) Blong givhan long olgeta blong oli holemstrong kasem we oli go long heven, hem i talem long olgeta samting we hem mo Papa blong hem i wantem olgeta blong mekem. (Jon 15:12-15) Mo tu,  Jisas i talemaot ol trabol we bambae oli fesem. !Hem i talem long olgeta se ‘tingting blong olgeta i mas strong’ olsem hem! (Jon 16:1-4, 33) Taem ol yia oli stap pas, ol disaepol oli gohed blong folem fasin blong Jisas. Oli lego plante samting blong mekem wok blong God, mo oli soemaot strong tingting. Taem oli fesem trabol, oli gohed nomo blong givgivhan long olgeta.—Hib. 10:33, 34.

9. ?Olsem wanem yumi save soemaot strong tingting olsem Jisas?

⁹ Yumi tu yumi folem eksampol blong Jisas blong gat strong tingting. Traem tingbaot: I nidim strong tingting blong givhan long ol brata we ol man oli ronem mo kilim olgeta. Samtaem oli putum ol brata long presin blong nating nomo. Long taem olsem, yumi mas mekem evri samting we yumi save mekem blong givhan long olgeta, hemia i min se yumi no fraet blong toktok from olgeta tu. (Fil. 1:14; Hib. 13:19) Wan narafala samting we i soemaot se yumi gat strong tingting, hemia taem yumi “no fraet blong” prij. (Wok 14:3) Nating se ol man oli agensem yumi mo spolem yumi, be yumi gat strong tingting olsem Jisas blong talemaot gud nius blong Kingdom. Be samtaem yumi harem se tingting blong yumi i no moa strong. ?Yumi save mekem wanem?

10. Long ol wik bifo long Memoriol, ?yumi mas mekem wanem, mo from wanem?

¹⁰ Blong mekem tingting blong yumi i strong, yumi save tingbaot hop we ransom sakrefaes blong Jisas i givim long yumi. (Jon 3:16; Efes. 1:7) Long ol wik bifo long Memoriol, yumi gat janis blong kasem save moa long ransom sakrefaes ya. Yumi save gohed blong folem Baebol riding blong Memoriol mo tingting dip long ol samting we oli hapen long taem we Jisas i ded. Ale taem yumi go long Memoriol, bambae yumi kasem save moa long mining blong bred mo waen we i stap, mo spesel sakrefaes we tufala i pija blong  hem. Taem yumi kasem save long samting we Jisas mo Jehova i mekem blong yumi, mo olsem wanem samting ya i save givhan long yumi wetem ol famle blong yumi, hemia i mekem se hop blong yumi i kam strong moa, mo yumi gat strong tingting blong gohed kasem en.—Hib. 12:3.

11-12. ?Long stadi ya, yumi lanem wanem?

¹¹ Long stadi ya, yumi lanem se Memoriol i mekem yumi tingbaot ransom sakrefaes ya we i sas tumas, mo tu, i soemaot ol nambawan fasin blong Jisas olsem tingting daon mo strong tingting. !Yumi glad tumas se Jisas i gohed blong soemaot ol nambawan fasin ya, taem hem i stap mekem wok blong Hae Pris long heven mo i toktok from yumi long fes blong God! (Hib. 7:24, 25) Blong talem tangkiu, yumi mas gohed blong tingbaot ded blong hem, olsem we hem i talem. (Luk 22:19, 20) Yumi mekem samting ya long dei we i laenap wetem Nisan 14 long kalenda blong ol man Jiu, hemia dei we i moa impoten i bitim ol narafala dei blong yia.

¹² Kakae ya we i smol nomo, i save tijim yumi long wan narafala fasin we i pulum Jisas blong i ded from yumi. Taem hem i stap long wol, ol man oli savegud hem from fasin ya. ?Wanem fasin?

13. ?Olsem wanem Jon 15:9 mo 1 Jon 4:8-10 i tokbaot lav we Jehova mo Jisas i soemaot, mo hu i save kasem blesing from lav ya?

¹³ Long olgeta samting we Jisas i mekem, hem i soemaot bigfala lav we Jehova i gat long yumi. (Ridim Jon 15:9; 1 Jon 4:8-10.) Antap long hemia, Jisas i glad nomo blong givim laef blong hem blong pemaot yumi. Yumi evriwan i save kasem blesing from lav we Jehova mo Jisas i soemaot long yumi tru long sakrefaes ya, nating se bambae yumi go long heven, o yumi blong “ol narafala sipsip.” (Jon 10:16; 1 Jon 2:2) Mo tu, traem tingbaot ol samting we yumi yusum long Memoriol. ?Olsem wanem ol samting ya i soemaot se Jisas i lavem ol disaepol blong hem mo i tingbaot olgeta?

14. ?Olsem wanem Jisas i soemaot se hem i lavem ol disaepol blong hem?

¹⁴ Jisas i soemaot se hem i lavem ol brata blong hem we tabu spirit i makemaot, taem hem i no mekem wan bigfala kakae, be hem i stanemap wan smol kakae nomo we oli save folem. Taem ol yia oli pas, ol disaepol oli mas gohed blong mekem Memoriol evri yia, nating se oli stap long ol defdefren ples, mo samfala oli stap long presin tu. (Rev. 2:10) ?Olsem wanem? ?Oli gohed blong mekem samting we Jisas i askem? !Yes, oli mekem!

15-16. ?Olsem wanem sam brata mo sista oli mekem Memoriol, nating se oli fesem hadtaem?

¹⁵ Kam kasem tede, ol trufala Kristin oli tingbaot ded blong Jisas evri yia. Oli mekem bes blong olgeta blong folem samting we Jisas i mekem, nating se samtaem i had. Tingbaot stori blong Brata Harold King. Hem i stap hem wan long wan smol rum blong wan presin haos long Jaena, be hem i faenem rod blong mekem Memoriol. Hem i meksua se i no gat man i luk hem, mo hem i yusum ol samting nomo we hem i gat. Mo tu, hem i kaontem gud ol dei, blong mekem se i no mestem dei blong Memoriol. Long dei blong Memoriol, hem wan nomo i singsing, i prea, mo i mekem tok blong Memoriol.

¹⁶ Hemia wan narafala stori. Wan grup blong ol sista we oli stap long presin long taem blong Wol Wo Tu, oli putum laef blong olgeta long denja blong mekem Memoriol. Be from we kakae ya i smol nomo, oli naf blong mekem mo i no gat man i save. Oli talem se: “Mifala i stanap raon long wan smol tebol we mifala i kavremap long waet kaliko mo putum bred  mo waen antap long hem. Mifala i laetem wan kandel nomo blong mekem se oli no save luk klia samting we mifala i stap mekem. . . . Ale mifala i ripitim ol promes blong mifala long Jehova, blong yusum olgeta paoa blong mifala blong pruvum se nem blong hem i tabu.” !Ol sista ya oli soemaot strong bilif! !Mo Jisas i soemaot bigfala lav taem hem i mekem kakae ya i smol nomo, blong yumi save mekem Memoriol nating se samtaem i had!

17. ?Wanem ol kwestin we i gud yumi askem?

¹⁷ Taem Memoriol i stap kam klosap, i gud yumi askem ol kwestin ya: ‘?Olsem wanem mi save kamgud moa blong lavem ol man olsem Jisas i mekem? ?Mi mi tingbaot ol samting we ol brata mo sista oli nidim i bitim ol samting we mi mi nidim? ?Mi mi gat tingting se ol brata mo sista oli save mekem moa, o mi save se oli no naf blong mekem evri samting?’ I gud yumi folem fasin blong Jisas mo yumi “safa wetem olgeta we oli safa.”—1 Pita 3:8.

18-19. (1) ?Yumi save sua long wanem? (2) ?Yu yu gat strong tingting blong mekem wanem?

¹⁸ I no longtaem, bambae i no moa gat Memoriol blong ded blong Kraes. Long taem blong bigfala trabol, Jisas bambae i “kam” blong tekem “ol man we hem i jusumaot olgeta” mo we oli laef yet, oli go long heven, nao bambae yumi no moa mekem Memoriol.—1 Kor. 11:26; Mat. 24:31.

¹⁹ Nating se yumi no moa mekem Memoriol, i sua se ol man blong Jehova bambae oli gohed yet blong tingbaot smol kakae ya olsem pija blong ol gudfala fasin ya tingting daon, strong tingting, mo lav we Jisas i soemaot bitim eni narafala man. Ol man we oli bin stap long nambawan kakae ya bambae oli gohed yet blong tokbaot, long olgeta we oli laef long taem ya. Be blong kasem blesing tede from kakae ya, yumi mas gohed blong folem eksampol blong Jisas blong gat tingting daon, strong tingting, mo lav. Sipos yumi mekem olsem, yumi save sua se Jehova bambae i blesem yumi bigwan.—2 Pita 1:10, 11.