1. ?Wanem sam samting we i soem se tede i no gat lav insaed long famle?

BAEBOL i talem se long ol las dei, bambae i “no gat lav insaed long famle.” (2 Tim. 3:1, 3) Yumi luk profet tok ya i stap kamtru tede. Eksampol, plante milian hasban mo waef oli divos, ale oli stap kros long olgeta, mo ol pikinini blong olgeta oli filim se ol perens ya oli no lavem olgeta. Ol famle tu we oli stap nomo long sem haos, oli kam olsem ol strenja. Wan man blong givim advaes long famle, i talem se: “Mama i konektem hem wan long wan kompiuta, tablet, smatfon, o video gem, mo i diskonektem hem long hasban mo ol pikinini blong hem, mo hasban wetem ol pikinini tu oli mekem sem mak. Taswe, nating se ol famle ya oli laef aninit long sem ruf nomo, be oli no savegud olgeta.”

2-3. (1) Folem Rom 12:10, ?yumi mas soem se yumi lavem hu? (2) ?Bambae yumi tokbaot wanem long stadi ya?

² Yumi no wantem se spirit blong wol ya we i no gat lav, i jenisim ol fasin blong yumi. (Rom 12:2) Defren olgeta, yumi mas mekem se yumi lavem tumas famle blong yumi, wetem olgeta ya tu we oli gat sem bilif olsem yumi. (Ridim Rom 12:10.) ?Kaen lav we stadi ya i tokbaot, hem i olsem wanem? Hem i lav we i stap bitwin ol memba blong wan famle we oli frengud. Hemia nao lav we yumi mas gat long famle blong yumi long spirit, hemia ol Kristin brata sista blong yumi. Taem yumi soem lav ya, yumi stap givhan blong mekem se evriwan oli joen gud blong wosipim Jehova.—Maeka 2:12.

³ Blong yumi mekem se yumi lavem tumas ol brata sista mo yumi soemaot lav ya, i gud yumi luk samting we yumi save lanem long ol eksampol long Baebol.

4. ?Jemes 5:11 i talem wanem long saed blong lav blong Jehova?

⁴ Baebol i soemaot ol gudgudfala fasin blong Jehova. Eksampol, hem i talem se “God hem i lav.” (1 Jon 4:8) Toktok ya nomo i pulum yumi i kam klosap long hem. Be Baebol i talem tu se “Jehova i lavem man tumas.” (Ridim Jemes 5:11.) !Hemia wan naesfala wei blong tokbaot bigfala filing we Jehova i gat long yumi!

5. ?Olsem wanem Jehova i soem sore, mo olsem wanem yumi save folem fasin blong hem?

⁵ Makem se Jemes 5:11 i joenem lav blong Jehova, long wan narafala gudfala fasin we i pulum yumi i kam klosap long hem, hemia sore blong hem. (Eks. 34:6) Wan rod we Jehova i soem se hem i sore long yumi, hemia taem i fogivim ol mastik blong yumi. (Sam 51:1) Be long Baebol, sore i no jes minim nomo se man i fogivim narafala. Hem i wan strong filing we man i gat taem i luk wan narafala i kasem trabol, nao filing ya i pusum hem blong i givhan long hem. Jehova i tokbaot se hem i wantem tumas blong halpem yumi, mo se filing ya blong hem i bigwan moa, i bitim filing we wan mama i gat long pikinini blong hem. (Aes. 49:15) Taem yumi kasem trabol, sore blong Jehova i pulum hem blong halpem yumi. (Sam 37:39; 1 Kor. 10:13) Yumi save soem sore long ol brata sista taem yumi fogivim olgeta, mo sipos oli mekem yumi harem nogud, yumi no stap kros longtaem long olgeta. (Efes. 4:32) Be wan impoten rod blong yumi soem sore, hemia blong sapotem ol brata sista taem oli fesem hadtaem. Taem lav i pulum yumi blong soem sore long ol narafala, yumi stap folem fasin blong Jehova we i nambawan eksampol blong lavem ol man tumas.—Efes. 5:1.

6. ?Olsem wanem Jonatan mo Deved i soem se tufala i lavem tufala?

⁶ Long Baebol, i gat plante stori blong ol sinman we oli soem se oli lavem tumas  ol narafala. Tingbaot Jonatan mo Deved. Baebol i talem se: “Jonatan mo Deved tufala i kam gudfala fren, mo Jonatan i stat blong lavem Deved olsem we i lavem hem wan.” (1 Saml. 18:1) God i makemaot Deved blong i kam king long ples blong Sol. Afta long samting ya, Sol i jalus long Deved mo i traem blong kilim hem i ded. Be Jonatan we i boe blong Sol, hem i no joen wetem papa blong hem long rabis plan ya. Be hem mo Deved i mekem promes blong stap fren oltaem, mo blong gohed blong sapotem tufala.—1 Saml. 20:42.

7. ?Wanem wan samting we i save stopem Jonatan mo Deved blong kam fren?

⁷ Yumi sapraes tumas long lav ya we i stap bitwin Jonatan mo Deved, from we i gat sam samting we i save blokem tufala blong kam fren. Eksampol, Jonatan i gat samwe 30 yia moa long Deved. Sipos Jonatan i wantem, hem i save talem se Deved i yang tumas mo i no gat ekspiriens, taswe bambae hem i no joen nating wetem hem. Be hem i no mekem olsem, hem i no tritim Deved se i daon moa long hem.

8. ?Yu ting se from wanem Jonatan i wan gudfala fren blong Deved?

⁸ Sipos Jonatan i wantem, hem i save kam jalus long Deved. Hem i boe blong King Sol, taswe hem i save fos se hem nao i gat raet blong sidaon long tron. (1 Saml. 20:31) Be Jonatan i gat tingting daon, mo hem i holemstrong long Jehova. Taswe hem i sapotem fulwan Deved we Jehova i jusumaot se i fiuja king. Mo hem i holemstrong long Deved tu, nating se Sol i kros tumas long hem from.—1 Saml. 20:32-34.

9. ?Jonatan i luk Deved se i wan enemi? Yu eksplenem.

⁹ Jonatan i lavem Deved tumas, taswe hem i no luk Deved se i wan enemi. Jonatan i gat gudhan blong sut long bonara, mo hem i wan man blong faet we i no fraet nating. Ol man oli savegud se hem mo papa blong hem Sol, tufala i “kwik moa i bitim ol igel” mo tufala i “strong moa i bitim ol laeon.” (2 Saml. 1:22, 23) Taswe sipos Jonatan i wantem, hem i save tokflas from ol faet we hem i winim. Be Jonatan i no gat fasin ya blong traem winim Deved mo jalus long hem. Defren olgeta, Jonatan i tinghae long Deved, from strong tingting blong hem mo fasin blong hem blong dipen long Jehova. Blong talem stret, afta we Deved i kilim Golaeat i ded, long taem ya nao Jonatan i stat blong lavem Deved olsem we i lavem hem wan. ?Olsem wanem yumi tu yumi save soem sem kaen lav ya long ol brata sista blong yumi?

10. ?Tok ya “strong blong lavlavem [yumi] long fulhat blong [yumi],” i minim wanem?

¹⁰ Baebol i talem se yumi “mas strong blong lavlavem [yumi] long fulhat blong [yumi].” (1 Pita 1:22) Jehova i soem eksampol finis long yumi. Lav blong hem i strong we i strong, nao sipos yumi holemstrong long hem, i no gat wan samting i save tekemaot lav ya. (Rom 8:38, 39) Grik wod we oli tanem i kam “strong,” i givim tingting blong wan man we i pusum hem wan, mo samtaem i fosem hem, blong soem lav ya. Samtaem, maet yumi mas “pusum yumi strong” mo “fosem yumi,” blong soem se yumi lavem tumas wan brata o sista blong yumi. Taem ol narafala oli mekem yumi harem nogud, yumi mas gohed blong mekem se “tingting blong [yumi] i . . . longfala, mo [yumi] no mas tingbaot ol rong  blong narafala from lav. [Yumi] mas traehad blong holemtaet fasin ya we [yumi] wan nomo long spirit, we pis i mekem se [yumi] joen gud.” (Efes. 4:1-3) Taem yumi wok had blong “pis i mekem se [yumi] joen gud,” bambae yumi no tingbaot ol rong blong ol brata sista. Bambae yumi traem bes blong yumi, blong lukluk ol brata sista olsem we Jehova i lukluk olgeta.—1 Saml. 16:7; Sam 130:3.

11. ?From wanem samtaem i no isi blong soem se yumi lavem tumas ol brata sista?

¹¹ I no isi oltaem blong soem se yumi lavem ol brata sista tumas, speseli taem yumi save long ol rong blong olgeta. I luk olsem se samting ya i hapen tu long taem blong ol fas Kristin. Eksampol, i luk olsem se i isi blong Yuodia mo Sintike i “wok had wetem [Pol] long wok blong gud nius.” Be i had blong tufala i wok gud tugeta. Ale Pol i talem long tufala se tufala i “mas gat wan tingting nomo from we [tufala] i joen long Masta.”—Fil. 4:2, 3.

12. ?Olsem wanem yumi save mekem se yumi lavem tumas ol brata sista?

¹² ?Olsem wanem yumi save mekem se yumi lavem tumas ol brata sista tede? Taem yumi save gud olgeta moa, bambae i moa isi blong kasemsave long olgeta, nao bambae yumi lavem olgeta tumas. Yia mo bakgraon blong olgeta i no mas blokem yumi. Rimemba, Jonatan i gat samwe 30 yia moa long Deved; be yet, hem i kam gudfala fren blong hem. ?I gat wan long kongregesen we i olfala moa, o i yang moa long yu, mo yu save kam fren blong hem? Sipos yu mekem olsem, yu stap soem se yu “lavem olgeta brata blong [yu].”—1 Pita 2:17.

13. ?From wanem maet yumi no save kam gudfala fren blong evriwan long kongregesen?

¹³ ?Be hemia i min se bambae yumi kam gudfala fren blong evriwan long kongregesen? Nogat, hemia i no posibol. I no rong sipos yumi fren moa wetem samfala nomo we oli intres long ol sem samting olsem yumi. Jisas i singaot olgeta aposol  blong hem se “ol fren,” be hem i lavem Jon tumas. (Jon 13:23; 15:15; 20:2) Be Jisas i no mekem i gud moa long Jon i bitim ol narafala. Eksampol, taem Jon wetem brata blong hem Jemes, i askem wan hae posisen long Kingdom blong God, Jisas i talem long tufala se: “Mi mi no gat raet blong jusumaot man we bambae i sidaon long raetsaed mo long lefsaed blong mi.” (Mak 10:35-40) Taswe, folem eksampol blong Jisas, yumi no mas mekem i gud moa long ol gudfala fren blong yumi i bitim ol narafala. (Jem. 2:3, 4) Fasin ya i stap seraotem ol man—hemia wan samting we i no mas stap nating long Kristin kongregesen.—Jud 17-19.

14. Folem Filipae 2:3, ?wanem bambae i halpem yumi blong blokem spirit blong kompetisin?

¹⁴ Taem yumi lavlavem yumi tumas, yumi stap protektem kongregesen blong i no gat spirit blong kompetisin. Tingbaot se Jonatan i no jalus long Deved from tron blong king, nao i traem blong kompit wetem hem. Yumi evriwan i save folem eksampol blong Jonatan. Yu no mas jalus long ol brata sista from gudhan we oli gat blong mekem samting, “be [yu] mas mekem tingting blong [yu] i stap daon mo [yu] mas luk ol narafala man se oli hae moa long [yu].” (Ridim Filipae 2:3.) Tingbaot oltaem se evriwan long kongregesen i naf blong mekem samting, blong givhan long kongregesen. Taem yumi gat tingting daon, yumi save luk ol gudfala fasin blong ol brata sista blong yumi, mo kasem gudfala samting from eksampol blong olgeta.—1 Kor. 12:21-25.

15. ?Yu lanem wanem long ekspiriens blong Tanya mo famle blong hem?

¹⁵ Taem yumi kasem wan traem we yumi  no ekspektem, Jehova i kamfotem yumi tru long help blong ol brata sista we oli lavem yumi tumas. Tingbaot samting we i hapen long wan famle long Yunaeted Stet, long Sarede aftenun, afta we oli joen long wan Intenasnal Asembli blong 2019 “!Lav i No Save Finis Samtaem!” Tanya we i mama blong tri pikinini, i talem se: “Taem mifala i stap draev i gobak long hotel, draeva blong wan nara trak i lusum kontrol, nao i bangem mifala. I no gat wan long mifala i kasem kil, be mifala i sek nogud, ale mifala i goaot long trak, mo stanap i stap nomo long bigrod. Wan man i stap long saed blong rod, nao i singaot mifala blong mifala i go stap sef insaed long trak blong hem. Hem i wan brata blong yumi we hem tu i aot long asembli i kam. Mo i no hem nomo we i stop. I gat faef deleget tu oli stop i stap. Ol sista oli hagem mi mo gel blong mi, !hemia wan samting we mitufala i rili nidim! Biaen mi talem long olgeta se bambae mifala i oraet, be oli no wantem lego mifala. Oli stap wetem mifala go kasem afta we ambulans i kam, mo oli meksua se mifala i gat evri samting we mifala i nidim. Tru long evri samting ya, mifala i filim lav blong Jehova. Ekspiriens ya i mekem se lav blong mifala long ol brata sista i kam strong moa, mo mifala i lavem Jehova moa mo talem tangkiu long hem.” ?Yu yu save tingbaot wan taem we yu gat nid, ale wan brata o sista i soemaot lav long yu?

16. ?Yumi gat wanem risen blong soem long ol brata sista se yumi lavem olgeta tumas?

¹⁶ Tingbaot frut we i kamaot taem yumi soem se yumi lavlavem yumi tumas. Yumi kamfotem ol brata sista taem oli nidim. Yumi mekem se ol man blong God oli joen gud. Yumi pruvum se yumi disaepol blong Jisas, mo hemia i pulum ol man we hat blong olgeta i stret, oli kam long tru wosip. Antap long hemia, yumi leftemap Jehova we i “Papa we i gat sore, mo hem i God ya we i mekem olgeta samting blong leftemap tingting blong man.” (2 Kor. 1:3) !I gud yumi evriwan i gohed blong mekem se yumi gat fasin ya blong lavem tumas ol brata sista, mo yumi soemaot long olgeta!