1. Olsem King Deved, ?sam long yumi i save askem wanem kwestin?

YUMI evriwan i wantem gat wan laef we i kwaet mo i gat pis. I no gat man i wantem wari. Be samtaem, yumi stap wari. Taswe, sam man blong Jehova oli askem kwestin olsem King Deved i askem long Jehova, se: “?Bambae mi wari gogo kasem wetaem, we evri dei mi stap harem nogud long hat blong mi?”—Sam 13:2.

2. ?Bambae yumi tokbaot wanem long stadi ya?

² Nating se yumi no save ronwe fulwan long wari, be yumi save kontrolem. Long stadi ya, fastaem bambae yumi tokbaot sam samting we oli save mekem yumi wari. Biaen, bambae yumi tokbaot sikis rod blong givhan long yumi blong stap kwaet taem yumi dil wetem ol problem blong yumi.

3. ?Wanem sam samting we oli save mekem yumi wari? ?Mo yumi save kontrolem olgeta?

³ Yumi no save kontrolem evri samting we oli mekem yumi wari. Eksampol, yumi no save kontrolem praes blong kakae, klos, mo haos, we i stap go antap evri yia. Mo yumi no save kontrolem hamas taem ol fren long wok mo long skul bambae oli traem blong pulum yumi blong mekem rabis fasin. Mo yumi no save stopem fasin blong brekem loa, we i stap hapen raonabaot long yumi. Yumi fesem ol trabol ya, from we yumi laef long wan wol we ol man blong hem oli no folem ol rul blong Baebol. Setan we i god blong wol ya, i save se ol man bambae oli letem  “ol wari blong sistem blong wol ya” i blokem olgeta blong mekem wok blong Jehova. (Mat. 13:22; 1 Jon 5:19) !Taswe yumi no sapraes se wol ya i fulap long ol trabol we i mekem man i wari!

4. ?Wanem i hapen taem yumi fesem plante presa?

⁴ Maet yumi fesem plante presa, ale yumi wari bitim mak. Eksampol, maet yumi wari se bambae yumi no kasem inaf mane blong lukaot long ol nid blong yumi, o se bambae yumi sik nao yumi no go long wok o yumi lusum wok. Maet yumi wari tu se bambae yumi no holemstrong, taem wan samting i pulum yumi blong brekem loa blong God. Klosap nao Setan bambae i pulum ol man blong hem blong oli atakem ol man blong God, taswe maet yumi wari se bambae yumi mekem wanem long taem ya. Maet yumi stap askem se, ‘?I rong blong wari long ol samting ya?’

5. ?Jisas i minim wanem taem i se: “Yufala i stop blong wari tumas”?

⁵ Yumi save we Jisas i talem long ol man blong hem se: “Yufala i stop blong wari tumas.” (Mat. 6:25) ?Hemia i min se hem i wantem we yumi no wari nating? !Nogat! Sam man blong Jehova bifo oli gat ol wari blong olgeta, be Jehova i glad long olgeta yet. * (1Ki 19:4; Sam 6:3) Jisas i no wantem se yumi wari bitim mak from ol samting blong laef, nao i spolem wok we yumi mekem blong God. ?Taswe, wanem sam rod blong kontrolem ol wari blong yumi?—Yu luk bokis ya “ ?Olsem Wanem Blong Mekem?”

6. Folem Filipae 4:6, 7, ?wanem i save kwaetem tingting blong yumi?

⁶ (1) Prea oltaem. Ol Kristin we oli fesem plante presa, oli haremgud taem oli prea strong long Jehova. (1 Pita 5:7) Jehova i save ansa long prea blong yu, taem hem i givim “pis ya blong God we i bigwan tumas i bitim olgeta save blong [man].” (Ridim Filipae 4:6, 7.) Jehova i givim tabu spirit blong hem blong kwaetem tingting blong yumi.—Gal. 5:22.

7. ?Yumi mas tingbaot wanem taem yumi prea long God?

⁷ Taem yu prea long Jehova, openem hat blong yu long hem. Tok stret. Talemaot stret problem, mo talemaot filing blong yu. Sipos i gat wan rod blong stretem problem, askem hem blong i givim waes blong yu faenem rod ya, mo blong i givim paoa blong yu yusum rod ya. Sipos i no gat rod blong stretem problem ya, askem Jehova blong i halpem yu blong yu no wari bitim mak. Taem yu talemaot stret problem blong yu long ol prea, long stret taem blong hem bambae yu luk klia olsem wanem Jehova i ansa long ol prea ya. Sipos ansa i no kam kwik, yu no givap. Jehova i wantem se yu talemaot stret problem, be i no hemia nomo, hem i wantem tu se yu gohed blong prea from.—Luk 11:8-10.

8. ?Yumi mas talem wanem tu long ol prea blong yumi?

⁸ Taem yu prea blong putum ol wari blong yu long Jehova, i gud yu talem tangkiu tu long hem. I gud blong tingbaot ol blesing we yumi gat finis, nating sipos situesen blong yumi i no isi. Sipos samtaem yu harem se i had  blong talemaot klia ol filing blong yu, tingbaot se Jehova i save ansa long ol simpol prea tu olsem: ‘!Plis halpem mi!’—2 Kron. 18:31; Rom 8:26.

9. ?Olsem wanem blong stap sef tru?

⁹ (2) Dipen long waes blong Jehova, be i no long waes blong yu. Long ol yia 800 B.K.T., ol man Asiria oli rere blong mekem faet long ol man Juda. Be olgeta oli no wantem nating we Asiria i rulum olgeta, nao oli go lukaotem help blong Ijip. (Aes. 30:1, 2) Jehova i wonem olgeta se bambae oli kasem bigfala trabol from rod ya we oli folem. (Aes. 30:7, 12, 13) Tru long Aesea, Jehova i talem rod blong oli save stap sef tru. Hem i talem se: “Yufala i save kam strong sipos yufala i stap kwaet mo yufala i soemaot se yufala i trastem” Jehova.—Aes. 30:15b.

10. ?Wanem sam situesen we yumi save soemaot se yumi trastem Jehova?

¹⁰ ?Olsem wanem yumi save soemaot se yumi trastem Jehova? Tingbaot sam eksampol. Traem tingbaot se yu kasem wan wok we i gat gudfala pei, be i save kakae taem blong yu mo i blokem wosip blong yu. O tingbaot se wan fren long wok i stap laekem yu, be hem i no wan Witnes. O tingbaot se wan famle we yu lavem tumas i askem long yu se: “?Yu jusum hu? ?Mi o God blong yu?” Long wanwan situesen ya, bambae yu mas mekem wan had desisen, be long olgeta evriwan, Jehova bambae i givim daereksen we yu nidim. (Mat. 6:33; 10:37; 1 Kor. 7:39) Be kwestin se: ?Bambae yu trastem hem fulwan mo yu folem daereksen ya?

11. ?Yumi save stadi long weswan stori long Baebol, blong yumi stap kwaet taem i gat strong fasin agens?

¹¹ (3) Lanem lesen long ol gudfala eksampol mo long ol rabis wan. Long Baebol, i gat plante stori we oli soemaot se i impoten blong stap kwaet mo trastem Jehova. Taem yu stadi long ol stori ya, makem samting we i halpem ol man blong God blong stap kwaet, taem oli fesem strong fasin agens. Eksampol, taem saprim kot blong ol man Jiu i givim oda long ol aposol blong oli stop blong prij, olgeta oli no fraet. Be oli talem se: “Mifala i mas obei long God we i rula blong mifala, i bitim we mifala i obei long ol man.” (Wok 5:29) Nating se ol man oli wipim olgeta tu, be oli no panik. ?From wanem? From we oli save se Jehova i stap wetem olgeta. Hem i glad long olgeta. Taswe oli gohed blong talemaot gud nius. (Wok 5:40-42) Long sem fasin, taem disaepol ya Steven i fesem ded, hem i kwaet mo i gat pis nao fes blong hem i “olsem fes blong enjel.” (Wok 6:12-15) ?From wanem? From we hem i sua fulwan se Jehova i glad long hem.

12. Folem 1 Pita 3:14 mo 4:14, ?from wanem yumi save glad taem ol man oli agensem yumi?

¹² Ol aposol oli gat klia pruf se Jehova i stap wetem olgeta. Hem i givim paoa long olgeta blong mekem merikel. (Wok 5:12-16; 6:8) Be yumi tede i defren. Nating se i olsem, Jehova i yusum Tok blong hem blong talem long yumi wetem lav se, taem yumi safa from stret fasin, hem i glad long yumi mo spirit blong hem i stap wetem yumi. (Ridim 1 Pita 3:14; 4:14.) Taswe i moagud yumi no tingting tumas se bambae yumi mekem wanem, sipos ol man oli agensem yumi. Be yumi mas tingting moa long wanem we yumi save mekem naoia, blong trastem moa paoa blong Jehova blong lukaot  long yumi, mo sevem yumi. Olsem we ol faswan disaepol oli mekem, yumi mas trastem promes ya blong Jisas, we i se: “Mi bambae mi givim ol tok mo waes long yufala, we olgeta man we oli agens long yufala oli no save blokem o tok agensem.” Yumi gat promes ya se: “Sipos yufala i stanap strong, bambae yufala i no lusum laef blong yufala.” (Luk 21:12-19) Be sipos yumi holemstrong long hem go kasem ded, neva fogetem se Jehova i rimemba evri smosmol samting long saed blong yumi. Bambae hem i yusum save ya blong mekem yumi laef bakegen.

13. ?Olsem wanem stori blong olgeta we oli no stap kwaet mo trastem Jehova, i save halpem yumi?

¹³ Mo tu, yumi save lanem lesen long ol stori blong olgeta we oli no stap kwaet mo trastem Jehova. Taem yumi stadi long ol rabis eksampol ya, bambae i halpem yumi blong no mekem ol sem mastik olsem olgeta. Eksampol, long stat blong rul blong King Asa blong Juda, hem i dipen long Jehova taem hem i mas faet agensem wan bigfala ami, mo Jehova i mekem hem i win. (2 Kron. 14:9-12) Be biaen, taem smol ami blong King Bahasa blong Isrel i kam faet agensem Asa, Asa i pem ami blong Siria blong i halpem hem, be hem i no dipen long Jehova blong i sevem hem olsem bifo. (2 Kron. 16:1-3) Mo taem klosap hem i ded from wan bigfala sik, hem i no dipen long Jehova blong i halpem hem.—2 Kron. 16:12.

14. ?Yumi save lanem wanem long mastik blong Asa?

¹⁴ Long stat, Asa i lukluk i go long Jehova taem i fesem problem. Be biaen, hem i no moa dipen long God blong i halpem hem, hem i wantem moa blong folem prapa tingting blong hem. Fastaem, i luk olsem se plan blong Asa blong askem help blong ol man Siria i waes. Be plan ya i no stap longtaem. Tru long wan profet, Jehova i talem long hem se: “From we yu dipen long king blong Siria be yu no dipen long Jehova we i God blong yu, ol ami blong king blong Siria oli no moa stap long han blong yu, oli ronwe finis.” (2 Kron. 16:7) Yumi mas lukaotgud blong no trastem yumi wan taem yumi stretem sam problem blong yumi, nao yumi no moa lukluk i go long Jehova blong i lidim yumi tru long Tok blong hem. Nating se i nidim blong yumi mekem wan desisen kwiktaem, yumi mas stap kwaet mo dipen long Jehova, nao bambae hem i halpem yumi blong win.

15. ?Yumi save mekem wanem taem yumi ridim Baebol?

¹⁵ (4) Lanem baehat sam vas blong Baebol. Taem yu faenem sam vas blong Baebol we oli soemaot se man i kasem paoa taem hem i stap kwaet mo i trastem Jehova, traem blong lanem olgeta baehat. Maet bambae yu luk se i givhan moa sipos yu ridim ol vas ya long bigfala voes, o yu raetemdaon mo ridim olgeta plante taem. Jehova i talem long Josua se hem i mas ridim buk blong Loa oltaem long smol voes, blong hem i save mekem fasin we i waes. Ol rimaenda ya oli save halpem hem tu blong i no fraet blong lidim ol man blong God. (Jos. 1:8, 9) I gat plante vas long Baebol we oli save givim pis long tingting mo hat blong yu, long ol situesen we maet i save mekem yu wari o fraet.—Sam 27:1-3; Prov. 3:25, 26.

16. ?Olsem wanem Jehova i yusum kongregesen blong halpem yumi blong stap kwaet mo trastem hem?

 ¹⁶ (5) Joen wetem ol man blong God. Jehova i yusum ol brata sista, blong oli halpem yumi blong stap kwaet mo trastem hem. Long ol miting, yumi kasem ol gudfala advaes we oli kamaot long platfom, long ol ansa, mo long ol gudfala storian blong ol brata sista blong yumi. (Hib. 10:24, 25) Yumi save haremgud tu taem yumi talemaot ol filing blong yumi long ol fren we yumi trastem long kongregesen. “Gudfala toktok” blong wan fren i save givhan bigwan blong karemaot hevi wari long yumi.—Prov. 12:25.

17. Folem Hibru 6:19, ?olsem wanem hop blong yumi long Kingdom i save mekem yumi stap kwaet?

¹⁷ (6) Mekem hop blong yu i kam strong. Hop blong yumi long Kingdom i olsem “wan angka blong holem sol blong yumi,” hem i givhan blong yumi stap kwaet, nating se yumi stap long wan hadtaem o yumi wari bitim mak. (Ridim Hibru 6:19.) Tingting dip long promes blong Jehova long wan fiuja we i no moa gat ol negatif tingting long hem. (Aes. 65:17) Tingbaot se yu stap long niufala wol we i gat pis, we i no moa gat ol hadtaem mo wari long hem. (Mae 4:4) Bambae hop blong yu i kam strong tu, taem yu tokbaot long ol narafala. Mekem bes blong yu blong prij mo mekem disaepol. Sipos yu mekem olsem, yu save “bilif strong long hop ya gogo kasem en.”—Hib. 6:11.

18. ?Wanem bambae i hapen i no longtaem, mo olsem wanem blong fesem olgeta?

¹⁸ Moa we yumi stap kam long en blong sistem blong wol ya, moa we bambae i gat plante samting we i save mekem yumi wari. Stamba vas blong 2021 i save halpem yumi blong fesem ol hadtaem ya mo stap kwaet, i no wetem prapa paoa blong yumi, be tru long tras we yumi gat long Jehova. Long yia ya, i gud yumi soem long ol aksen blong yumi se yumi bilif long promes ya blong Jehova, we i se: “Yufala i save kam strong sipos yufala i stap kwaet mo . . . trastem God.”—Aes. 30:15.