STADI 4
?From Wanem Yumi Joen Long Memoriol?
“Yufala i mas gohed blong mekem samting ya oltaem blong tingbaot mi.”—LUK 22:19.
SINGSING 20 Yu Givim Pikinini Ya Blong Yu
BIGFALA TINGTING *
1-2. (1) ?Wetaem yumi tingbaot moa famle blong yumi we i ded? (2) ?Jisas i mekem wanem long naet bifo we hem i ded?
NOMATA sipos wan fren o famle blong yumi i ded longtaem finis, be yumi stap tingbaot hem yet, speseli long dei we hem i ded.
2 Evri yia, yumi joen wetem plante milian man raon long wol blong tingbaot ded blong wan man we yumi lavem hem tumas, hemia Jisas Kraes. (1 Pita 1:8) Yumi joen wanples blong tingbaot hem from we hem i givim laef blong hem olsem wan ransom blong sevem yumi long sin mo ded. (Mat. 20:28) Jisas i wantem se ol man we oli folem hem oli mas tingbaot ded blong hem. Taswe long naet bifo we hem i ded, hem i stanemap wan spesel kakae mo i talem se: “Yufala i mas gohed blong mekem samting ya oltaem blong tingbaot mi.” *—Luk 22:19.
3. ?Bambae yumi tokbaot wanem long stadi ya?
3 I gat smol namba nomo blong ol man we oli joen long Memoriol blong ded blong Kraes we oli gat hop blong laef long heven. Be plante milian man we oli joen, oli gat hop blong laef long wol. Long stadi ya, bambae yumi tokbaot sam risen from wanem tufala grup ya i glad nomo blong joen long Memoriol evri yia. Mo tu, bambae yumi tokbaot sam gudfala samting we yumi save kasem taem yumi joen long Memoriol. Be fastaem, bambae yumi luk sam risen from wanem ol tabu Kristin oli joen long Memoriol.
?FROM WANEM OL TABU KRISTIN OLI JOEN LONG MEMORIOL?
4. ?From wanem ol tabu Kristin oli kakae bred mo dring waen long taem blong Memoriol?
4 Evri yia, ol tabu Kristin we oli joen long Memoriol oli kakae bred mo dring waen. ?From wanem oli mekem olsem? Blong ansa, i gud yumi tingbaot samting we i hapen long laswan naet blong Jisas long wol. Afta we hem i mekem kakae blong Pasova wetem ol aposol blong hem, hem i stanemap Kakae Blong Masta. Hem i pasem bred mo waen long ol 11 aposol blong hem, mo i talem long olgeta blong oli kakae mo dring. Long taem ya, hem i tokbaot tu kontrak o agrimen long olgeta, hemia niufala kontrak mo kontrak blong Kingdom. * (Luk 22:19, 20, 28-30) Tufala kontrak ya i openem rod blong ol aposol, mo wan smol namba blong ol narafala man blong oli kam king mo pris long heven. (Rev. 5:10; 14:1) Smol haf blong ol tabu Kristin * we oli stap yet long wol, we oli stap insaed long tufala kontrak ya, olgeta nomo oli save kakae bred mo dring waen long taem blong Memoriol.
5. ?Ol tabu Kristin oli luksave wanem long saed blong hop we oli gat?
5 I gat wan narafala risen we i mekem ol tabu Kristin oli wantem tumas blong joen long Memoriol: Hemia i givim janis long olgeta blong oli tingbaot hop blong olgeta. Jehova i givim wan nambawan hop long olgeta long heven, hemia se bodi blong olgeta i no save roten mo i no save ded samtaem, bambae oli rul wetem Jisas Kraes mo ol narafala haf blong 144,000 man, antap moa bambae oli stanap long fored blong Jehova God. (1 Kor. 15:51-53; 1 Jon 3:2) Ol tabu Kristin oli luksave se Jehova i invaetem olgeta blong haremgud long nambawan privilej ya long heven. Be blong oli go long heven, oli mas holemstrong long Jehova kasem we oli ded. (2 Tim. 4:7, 8) Hop ya blong go laef long heven i mekem ol tabu Kristin oli glad tumas. (Taet. 2:13) ?Be olsem wanem long “ol narafala sipsip”? (Jon 10:16) ?From wanem oli joen long Memoriol?
?FROM WANEM OL NARAFALA SIPSIP OLI JOEN LONG MEMORIOL?
6. ?From wanem ol narafala sipsip oli joen long Memoriol evri yia?
6 Ol narafala sipsip we oli go long Memoriol, oli no kakae bred mo dring waen, be oli glad nomo blong joen mo luk samting we i hapen. Long 1938, hemia faswan taem we olgeta we oli gat hop blong laef long wol oli joen long Memoriol. Wajtaoa blong 1 Maj 1938, i talem se: “I stret nomo we ol [narafala sipsip] oli stap long miting ya mo luk samting we oli mekem long taem ya. . . . Hemia i wan taem we i sud mekem olgeta tu oli glad.” Olsem ol gest we oli glad nomo blong joen mo luk seremoni blong wan mared, ol narafala sipsip oli glad nomo blong joen long Memoriol.
7. ?From wanem ol narafala sipsip oli luk fowod blong lesin long tok blong Memoriol?
7 Ol narafala sipsip tu oli tingbaot hop blong olgeta. Oli luk fowod blong lesin long tok blong Memoriol from i tokbaot samting we Kraes mo ol 144,000 man we oli rul wetem hem, bambae oli mekem blong givhan long ol man we oli holemstrong long Jehova long 1,000 Yia Rul Blong Kraes. Olgeta we oli rul long heven, bambae oli folem oda blong King blong olgeta, Jisas Kraes, blong mekem wol i kam paradaes mo givhan long ol man blong oli kam stret gud olgeta. Traem tingbaot filing blong plante milian man we oli joen long Memoriol mo oli stap pijarem ol nambawan promes ya we bambae oli kamtru long fiuja, olsem ol promes ya long Aesea 35:5, 6; 65:21-23; mo Revelesen 21:3, 4. Taem oli stap pijarem se olgeta mo ol famle blong olgeta oli stap long niufala wol, hemia i mekem hop blong olgeta long saed blong fiuja i kam strong, mo oli gat strong tingting blong gohed blong wosipim Jehova.—Mat. 24:13; Gal. 6:9.
8. ?Wanem narafala risen we i pulum ol narafala sipsip blong joen long Memoriol?
8 I gat wan narafala risen from wanem ol narafala sipsip oli joen long Memoriol. Oli wantem soemaot se oli lavem mo sapotem ol tabu Kristin. Baebol i talemaot se ol tabu Kristin mo olgeta we oli gat hop blong laef long wol, bambae oli wok tugeta. ?Olsem wanem samting ya i posibol? I gud yumi luk sam eksampol.
9. ?Profet tok long Sekaraea 8:23 i tokbaot wanem?
9 Ridim Sekaraea 8:23. Profet tok ya i tokbaot klia filing we ol narafala sipsip oli gat long ol tabu brata mo sista blong olgeta. Ol tok ya “wan Jiu” mo “yufala,” i stap minim sem grup nomo, hemia smol haf blong ol tabu Kristin we oli stap yet long wol. (Rom 2:28, 29) Ol “ten man we oli kamaot long olgeta lanwis blong ol nesen,” hemia ol narafala sipsip. Oli “holemstrong,” hemia min se oli stap tru long ol tabu Kristin, mo joen wetem olgeta long tru wosip. Taswe, long naet blong Memoriol, ol narafala Kristin oli soemaot se oli stap tru long ol tabu Kristin taem oli joen wetem olgeta long Memoriol.
10. ?Jehova i mekem profet tok long Esikel 37:15-19, 24, 25 i kamtru olsem wanem?
10 Ridim Esikel 37:15-19, 24, 25. Jehova i mekem profet tok ya i kamtru, taem hem i mekem ol tabu Kristin mo ol narafala sipsip oli wok gud tugeta. Profet tok ya i tokbaot tu stik. Olgeta we oli gat hop blong laef long heven oli olsem stik “blong Juda” (hemia traeb we ol king blong Juda oli stap kamaot long hem), mo olgeta we oli gat hop blong laef long wol oli olsem stik “blong Efrem.” * Mo Jehova bambae i joenem tufala grup ya blong tufala i kam “wan stik” nomo. Hemia i min se bambae tufala i wok gud tugeta aninit long wan King nomo, hemia Kraes Jisas. Evri yia, ol tabu Kristin mo ol narafala sipsip oli joen long Memoriol, i no olsem tu defren grup be olsem “wan grup nomo,” we “wan man nomo bambae i lukaot long olgeta.”—Jon 10:16.
11. ?Olsem wanem “ol sipsip” we Matiu 25:31-36, 40 i tokbaot, oli sapotem ol tabu Kristin?
11 Ridim Matiu 25:31-36, 40. “Ol sipsip” ya we Jisas i tokbaot, hemia ol stret man we oli laef long taem blong en mo oli gat hop blong laef long wol, hemia i minim ol narafala sipsip. Olgeta ya oli sapotemgud ol tabu Kristin, taem oli givhan long olgeta blong mekem profet tok ya i kamtru, hemia blong prij mo mekem disaepol long olgeta ples long wol.—Mat. 24:14; 28:19, 20.
12-13. ?Ol narafala sipsip oli mekem wanem moa blong sapotem ol brata blong Kraes?
12 Evri yia, long ol wik bifo long Memoriol, ol narafala sipsip oli soemaot se oli stap sapotem ol brata blong Kraes, taem oli joen fulwan long kampen ya blong invaetem ol man we oli intres blong kam long Memoriol. (Luk bokis ya “ ?Yu Yu Mekem Plan Finis From Memoriol?”) Mo tu, oli givhan blong mekem ol arenjmen blong Memoriol i stap long evri kongregesen raon long wol, nating se i no man we i kakae bred mo dring waen long plante long ol kongregesen ya. Ol narafala sipsip oli glad tumas blong sapotem ol brata blong Kraes. Oli save se Jisas i luk samting we oli mekem blong givhan long ol brata blong hem, olsem we oli stap mekem long hem stret.—Mat. 25:37-40.
13 ?Wanem sam narafala risen we i mekem se yumi evriwan i joen long Memoriol, nomata wanem hop yumi gat?
?FROM WANEM YUMI EVRIWAN I JOEN LONG MEMORIOL?
14. ?Olsem wanem Jehova mo Jisas i soemaot bigfala lav long yumi?
14 Yumi wantem talem tangkiu from lav we Jehova mo Jisas i soem long yumi. God blong yumi i mekem plante samting blong soemaot se hem i lavem yumi. Be samting we i impoten moa, hemia taem hem i sanem pikinini blong hem i kam blong i safa mo i ded from yumi. (Jon 3:16) Jisas tu i soemaot se hem i gat bigfala lav, hemia taem i rere nomo blong givim laef blong hem from yumi. (Jon 15:13) Yumi no save pembak lav ya we Jehova mo Jisas i soemaot long yumi. Be yumi save talem tangkiu long tufala, taem yumi yusumgud laef blong yumi evri dei. (Kol. 3:15) Yumi joen long Memoriol from yumi wantem tingbaot lav we tufala i soemaot long yumi, be tu yumi wantem soemaot we yumi lavem tufala.
15. ?From wanem ol tabu Kristin mo ol narafala sipsip oli tinghae long presen ya ransom?
15 Yumi glad tumas long presen ya ransom. (Mat. 20:28) Ol tabu Kristin oli tinghae long ransom, from i mekem se i posibol blong oli kasem nambawan hop blong olgeta. From we oli bilif long sakrefaes blong Kraes, Jehova i talemaot se oli stret man mo hem i adoptem olgeta olsem ol pikinini blong hem. (Rom 5:1; 8:15-17, 23) Ol narafala sipsip tu oli glad long ransom. Mo from we oli bilif long sakrefaes blong Kraes, oli kam klin long fes blong God, oli save mekem tabu wok blong hem, mo oli gat hop blong “pastru long bigfala trabol.” (Rev. 7:13-15) Wan rod we ol tabu Kristin mo ol narafala sipsip oli soemaot se oli glad long ransom, hemia taem oli stap long Memoriol evri yia.
16. ?Wanem wan narafala risen we i mekem se yumi joen long Memoriol?
16 Wan narafala risen from wanem yumi joen long Memoriol, hemia from we yumi wantem obei long Jisas. Nomata wanem hop yumi gat, yumi evriwan i wantem obei long oda we Jisas i talem long naet ya we hem i stanemap Memoriol se: “Yufala i mas gohed blong mekem samting ya oltaem blong tingbaot mi.”—1 Kor. 11:23, 24.
?YUMI KASEM WANEM GUDFALA SAMTING TAEM YUMI JOEN LONG MEMORIOL?
17. ?Olsem wanem Memoriol i halpem yumi blong kam klosap long Jehova?
17 Yumi kam klosap long Jehova. (Jem. 4:8) Olsem we yumi bin lanem, Memoriol i givim janis long yumi blong tingbaot hop we Jehova i givim long yumi mo blong yumi tingting dip long bigfala lav we hem i soemaot long yumi. (Jer. 29:11; 1 Jon 4:8-10) Taem yumi tingbaot hop blong yumi long fiuja mo lav we Jehova i soemaot long yumi, hemia i mekem we lav mo frensip blong yumi wetem Jehova i kam strong moa.—Rom 8:38, 39.
18. ?Taem yumi tingting dip long eksampol blong Jisas, hemia i pulum yumi blong mekem wanem?
18 Yumi wantem folem eksampol blong Jisas. (1 Pita 2:21) Long ol dei bifo long Memoriol, yumi ridim ol vas we i tokbaot ol samting we Jisas i mekem long laswan wik blong hem long wol, ded blong hem, mo taem hem i laef bakegen. Mo long naet blong Memoriol, yumi lesin long wan tok we i rimaenem yumi long bigfala lav we Jisas i soem long yumi. (Efes. 5:2; 1 Jon 3:16) Taem yumi ridim nambawan eksampol blong Jisas we i rere blong givim laef blong hem from yumi, mo yumi tingting dip long hem, hemia i mekem se yumi wantem “gohed blong mekem sem samting olsem we Jisas i mekem.”—1 Jon 2:6.
19. ?Yumi mas mekem wanem blong gohed blong frengud wetem God?
19 Yumi wantem gohed blong frengud wetem Jehova. (Jud 20, 21) Blong gohed blong frengud wetem Jehova, yumi mas mekem evri samting we yumi naf blong mekem blong obei long hem, leftemap nem blong hem, mo mekem hat blong hem i glad. (Prov. 27:11; Mat. 6:9; 1 Jon 5:3) Taem yumi joen long Memoriol, hemia i mekem se yumi gat strong tingting blong talem long Jehova evri dei se: ‘!Mi wantem gohed blong frengud wetem yu olwe!’
20. ?Wanem ol risen we i mekem se yumi wantem joen long Memoriol?
20 Nomata se yumi gat hop blong laef olwe long heven o long wol, yumi evriwan i gat gudfala risen blong joen long Memoriol. Evri yia, yumi evriwan i joen wanples long wan spesel dei blong tingbaot ded blong wan we yumi lavem hem tumas, hemia Jisas Kraes. Antap moa, yumi tingbaot bigfala lav we Jehova i soemaot long yumi, taem i givim Boe blong hem olsem wan ransom. Long yia ya, Memoriol bambae i stap long Fraede 15 Eprel 2022. Yumi lavem Jehova mo Boe blong hem, taswe long spesel dei ya blong tingbaot ded blong Jisas, yumi no wantem letem eni samting i blokem yumi blong stap long taem ya.
SINGSING 16 !Yumi Presem God From Mesaea!
^ Evri yia yumi luk fowod blong joen long Memoriol, nomata se yumi gat hop blong laef long heven o long wol. Long stadi ya, bambae yumi tokbaot sam gudfala risen long Baebol, we i soemaot from wanem yumi mas joen long Memoriol, mo gudfala samting we yumi save kasem from.
^ Wan narafala Baebol i talem se: “Mekem samting ya blong rimemba mi.” (Today’s English Version) mo “Mekem samting ya olsem wan memori blong mi.” (The Jerusalem Bible).
^ Blong kasem moa save long saed blong niufala kontrak mo kontrak blong Kingdom, yu luk haf ya “Wan ‘Tabu Nesen Blong Ol King Mo Pris’” long Wajtaoa blong 15 Oktoba 2014, pej 12-15.
^ MINING BLONG TOKTOK: Tok ya “smol haf blong ol tabu Kristin” i minim ol tabu Kristin we oli laef yet long wol.
^ Blong kasemsave moa long profet tok ya we i stap long Esikel japta 37, long saed blong tufala stik ya, yu luk haf ya “Kwestin” long Wajtaoa blong Julae 2016 pej 31.
