1. ?Jemes i gruap long wanem kaen famle?

 JEMES we i brata blong Jisas, i gruap long wan famle we i strong long spirit. * Perens blong hem hemia Josef mo Meri, tufala i lavem Jehova tumas mo tufala i mekem bes blong tufala blong wosipim Hem. Be Jemes i gat wan narafala blesing tu, bigfala brata blong hem bambae i gruap mo i kam Mesaea. !Hemia i wan nambawan privilej we Jemes i gat blong gruap long wan famle olsem!

2. ?Wanem ol risen we i sud pulum Jemes blong i tinghae long bigfala brata blong hem?

² Jemes i gat plante risen blong tinghae long bigfala brata blong hem. (Mat. 13:55) Eksampol, Jisas i savegud ol Tok blong Baebol, mo taem hem i gat 12 yia, ol tija blong loa long Jerusalem oli sapraes long ol save blong hem. (Luk 2:46, 47) Maet Jemes i joen wetem Jisas blong mekem wok blong kapenta. Sipos i olsem, hem i gat plante janis blong savegud brata blong hem. Plante taem Nathan H. Knorr i talem se: “Yu save lanem plante samting long saed blong wan man taem yu wok wetem hem.” * I sua se Jemes i luksave se “Jisas i stap kam bigwan mo i stap kam waes moa. Mo God i glad tumas long hem, mo ol man tu oli glad long hem.” (Luk 2:52) Taswe, maet yumi save gat tingting ya se Jemes i wan long ol faswan disaepol blong Jisas. Be i no olsem.

3. ?Taem Jisas i stat blong prij, Jemes i gat wanem tingting long hem?

³ Taem Jisas i stap long wol mo i stap prij, Jemes i no kam wan disaepol blong hem. (Jon 7:3-5) Be maet hem i wan long  ol famle blong Jisas we i ting se “hed blong [Jisas] i krangke.” (Mak 3:21) Mo i no gat wan ples long Baebol we i talem se Jemes i stap wetem mama blong olgeta Meri, taem Jisas i stap hang long pos.—Jon 19:25-27.

4. ?Bambae yumi tokbaot wanem long stadi ya?

⁴ Biaen, Jemes i bilif long Jisas mo i kam wan elda we olgeta long Kristin kongregesen oli respektem hem. Long stadi ya, bambae yumi tokbaot tu lesen we yumi save lanem long Jemes: (1) ?From wanem yumi mas gat tingting daon? Mo (2) ?olsem wanem yumi save kam wan gudfala tija?

5. ?Jemes i mekem wanem taem Jisas i laef bakegen mo i kamtru long hem?

⁵ ?Wetaem Jemes i kam wan disaepol blong Jisas? Afta we Jisas i laef bakegen, “hem i kamtru long Jemes, mo biaen bakegen long olgeta aposol.” (1 Kor. 15:7) Afta we Jisas i mitim Jemes, hem i kam wan disaepol blong hem. Mo Jemes i stap tu wetem ol narafala aposol long Jerusalem long wan rum antap, taem oli stap wet blong kasem tabu spirit. (Wok 1:13, 14) Biaen, Jemes i kasem nambawan blesing ya blong stap olsem wan memba blong hed kampani. (Wok 15:6, 13-22; Gal. 2:9) Mo samtaem bifo long yia 62 K.T., tabu spirit i pulum hem blong raetem wan leta i go long ol tabu Kristin. Leta ya i stret yet long yumi tede, nomata se yumi blong laef long heven o long wol. (Jem. 1:1) Folem tok blong Josephus we i man blong raetem histri, Jemes i ded folem oda blong Hae Pris Ananaeas we i boe blong Anas. Jemes i holemstrong long Jehova kasem we hem i ded.

6. ?Olsem wanem Jemes i defren long ol lida blong skul long taem blong hem?

⁶ Jemes i gat tingting daon. ?From wanem yumi talem olsem? Traem luk olsem wanem fasin blong Jemes i defren long plante lida blong skul. Taem Jemes i luk ol klia pruf we i soemaot se Jisas i pikinini blong God, hem i gat tingting daon mo i akseptem. Be hemia i defren long ol jif pris long Jerusalem. Eksampol, oli luk klia pruf se Jisas i mekem Lasaros i laef bakegen, be oli no wantem akseptem se Jehova nao i sanem hem i kam, nao oli wantem kilim hem mo Lasaros i ded. (Jon 11:53; 12:9-11) Biaen, taem Jisas i laef bakegen, oli wantem haedem samting ya long ol man. (Mat. 28:11-15) From we ol lida blong skul ya oli praod, oli no wantem akseptem Jisas se hem i Mesaea.

7. ?From wanem yumi no mas praod?

 ⁷ Lesen: No kam praod, mo letem Jehova i tijim yu. Wan sik i save mekem se hat blong wan man i no moa wok gud. Long sem fasin, praod i save mekem se yumi no obei long ol daereksen blong Jehova. Ol Farisi oli praod tumas, mekem se oli no bilivim ol klia pruf we i soemaot se spirit blong God i stap wetem Jisas, mo se hem i Pikinini blong God. (Jon 12:37-40) Hemia i denja from we i save blokem olgeta blong oli no kasem laef we i no save finis. (Mat. 23:13, 33) !Taswe i impoten we yumi gohed blong letem Tok blong God mo tabu spirit i gat paoa long ol fasin, tingting, mo ol desisen blong yumi! (Jem. 3:17) Jemes i gat tingting daon, taswe hem i rere blong letem Jehova i tijim hem. Mo olsem we bambae yumi luk, tingting daon i mekem se Jemes i kam wan gudfala tija.

8. ?Wanem i save givhan long yumi blong kam wan gudfala tija?

⁸ Jemes i no go long wan skul blong hae save. Taswe, i sua se ol lida blong skul long taem blong hem oli luk hem se i olsem aposol Pita mo Jon we “tufala i no skul gud mo tufala i man olbaot nomo.” (Wok 4:13) Be taem yumi ridim buk ya we i karem nem blong hem, yumi luksave se Jemes i wan gudfala tija. Olsem Jemes, maet yumi no kasem hae edukesen, be tabu spirit blong Jehova mo trening we yumi kasem long oganaesesen i save givhan long yumi blong kam ol gudfala tija. Naoia bambae yumi luk gudfala eksampol we Jemes i soem olsem wan gudfala tija, mo lesen we yumi save lanem from.

9. ?From wanem yumi save talem se Jemes i wan gudfala tija?

⁹ Jemes i yusum ol tok we i isi mo i klia. From samting ya, ol man we oli lesin long hem oli kasemsave samting we oli mas mekem, mo olsem wanem blong mekem. Eksampol, taem Jemes i tijim ol Kristin se oli no mas kam kros taem narafala i mekem i no stret long olgeta, hem i yusum ol tok we i isi mo i klia. Hem i talem se: “Olgeta we oli stap stanap strong, yumi talem se oli glad. Mo yufala i harem finis stori blong Job we hem i stanap strong mo ol blesing we Jehova i givim long hem. Mo yufala  i luk se Jehova i lavem man tumas, mo i gat sore.” (Jem. 5:11) Makem se Jemes i yusum ol tok blong Baebol blong tijim ol Kristin ya. Hem i yusum Tok blong God blong givhan long ol man we oli stap lesin, blong oli luksave se oltaem Jehova i blesem ol man we oli holemstrong long hem olsem Job. Jemes i yusum ol tok we i isi mo i klia blong makem gud poen ya. Long fasin ya, hem i pulum tingting blong ol man i go long Jehova, be i no long hem wan.

10. ?Olsem wanem yumi save folem fasin blong Jemes taem yumi tijim narafala?

¹⁰ Lesen: Yumi mas yusum ol tok we i isi, mo tijim man long Baebol. Taem yumi tijim narafala, yumi no mas traem blong soemaot hamas save we yumi gat, be yumi mas soemaot se Jehova i gat bigfala save mo se hem i kea long olgeta. (Rom 11:33) Blong kasem mak ya, oltaem yumi mas yusum Baebol taem yumi tijim ol man. Eksampol, i nogud yumi talem long ol Baebol studen blong yumi, samting we bambae yumi mekem sipos yumi stap long ples blong olgeta, be i gud yumi halpem olgeta blong tingbaot sam eksampol long Baebol, mo blong oli kasemsave long tingting mo filing blong Jehova. Olsem nao, bambae oli folem samting we oli lanem from we oli wantem mekem Jehova i glad, be i no yumi.

11. ?Wanem problem we sam Kristin oli fesem, mo Jemes i givim wanem advaes long olgeta? (Jemes 5:13-15)

¹¹ Jemes i luksave samting. Leta we Jemes i raetem, i soemaot klia se hem i kasemsave long ol problem we ol brata mo sista blong hem oli fesem, mo hem i givim klia advaes long saed blong samting we oli mas mekem. Eksampol, sam Kristin oli slo blong folem ol advaes. (Jem. 1:22) Sam narafala, oli stap mekem i gud moa long ol rijman. (Jem. 2:1-3) Sam narafala bakegen oli faenem i had blong kontrolem tang blong olgeta. (Jem. 3:8-10) Ol Kristin ya oli fesem sam bigfala problem, be Jemes i sua se oli save jenis. Hem i givim advaes long olgeta, be long wan fasin we i kaen mo i tok stret, mo hem i enkarejem olgeta we oli nidim help long saed blong spirit, blong oli go luk ol elda.—Ridim Jemes 5:13-15.

12. ?Olsem wanem yumi save gat gudfala tingting taem yumi stap halpem ol Baebol studen blong yumi?

¹² Lesen: Luksave samting, be gohed blong gat gudfala tingting long ol narafala. Plante man we yumi stadi Baebol wetem olgeta, oli faenem i had blong folem ol samting we oli lanem. (Jem. 4:1-4) Maet i had blong oli sakemaot ol nogud fasin, mo wokem ol gudfala fasin. Be olsem Jemes, yumi mas gat strong tingting blong talem long olgeta, samting we oli mas kam gud moa long hem. Mo tu, yumi mas gat gudfala tingting mo trastem se Jehova bambae i pulum ol man we oli gat tingting daon blong oli kam long hem, mo bambae hem i givim paoa long olgeta blong oli save mekem ol jenis long laef blong olgeta.—Jem. 4:10.

13. Folem Jemes 3:2 mo futnot, ?Jemes i luksave wanem?

¹³ Jemes i gat stret tingting long hem wan. Jemes i no gat tingting ya se hem i gud moa long ol narafala Kristin, from famle we hem i kamaot long hem o from impoten wok we hem i stap mekem. Be hem i singaot ol narafala Kristin se, “ol gudfala brata blong mi.” (Jem. 1:16, 19; 2:5) Hem i no traem blong mekem ol narafala oli gat tingting ya se hem i stret gud olgeta, be hem i inkludum hem wan wetem olgeta, taem i talem se: “Yumi evriwan i mekem mastik plante taem.”—Ridim Jemes 3:2, mo futnot.

14. ?From wanem yumi mas talemaot klia se samtaem yumi tu yumi mestem?

 ¹⁴ Lesen: Tingbaot se yumi evriwan i sinman. Yumi no mas ting se yumi gud moa long ol man we yumi stap tijim olgeta, from we sipos yumi givim tingting ya long olgeta, tingting blong olgeta bambae i foldaon, mo oli ting se oli no save obei fulwan long God. Be sipos yumi talem stret se samtaem i had long yumi tu blong folem ol advaes blong Baebol, mo yumi eksplenem olsem wanem Jehova i bin halpem yumi blong mekem ol jenis long laef blong yumi, hemia bambae i halpem olgeta blong luksave se olgeta tu oli save wosipim Jehova.

15. ?Ol pijatok we Jemes i yusum oli olsem wanem? (Jemes 3:2-6, 10-12)

¹⁵ Jemes i yusum ol gudfala pijatok blong kasem hat blong ol man. I sua se tabu spirit i bin givhan long hem, be hem i lanem plante samting tu taem i stadi long ol pijatok we bigfala brata blong hem Jisas i bin yusum. Ol pijatok we Jemes i yusum long leta blong hem oli isi, mo lesen we i kamaot from i klia gud.—Ridim Jemes 3:2-6, 10-12.

16. ?From wanem yumi mas yusum ol gudfala pijatok?

¹⁶ Lesen: Yusum ol gudfala pijatok. Taem yu yusum ol gudfala pijatok, ol man oli no jes harem lesen we yu wantem tijim olgeta long hem, be oli save pijarem tu long tingting blong olgeta. I olsem we yu stap pentem wan pija long tingting blong olgeta. Ol pija ya oli save halpem ol man we oli lesin blong oli tingbaot ol impoten trutok blong Baebol. Jisas i beswan man blong yusum ol gudfala pijatok, mo brata blong hem Jemes i folem eksampol blong hem. Naoia bambae yumi tokbaot wan long ol pijatok we Jemes i yusum mo luk from wanem i wok gud.

17. ?From wanem pijatok ya long Jemes 1:22-25 i wok gud?

¹⁷ Ridim Jemes 1:22-25. I gat plante risen we i mekem se pijatok we Jemes i yusum long saed blong mira i wok gud. Jemes i tijim wan impoten lesen, hemia se blong kasem gudfala samting long tok blong God, yumi no mas ridim nomo, be yumi mas folem samting we yumi ridim. Jemes i jusum wan pijatok we i isi blong ol man oli kasemsave. Hem i tokbaot wan man we i stap lukluk fes blong hem long mira. ?Jemes i wantem tijim olgeta long wanem? Bambae i krangke nomo sipos wan man i lukluk fes blong hem long mira, i luksave  samting we hem i mas stretem, be hem i no mekem wan samting. Long sem fasin, bambae i krangke nomo sipos yumi ridim Tok blong God, yumi luksave ol fasin we yumi mas jenisim, be yumi no mekem eni samting.

18. ?Wanem tri samting we yumi mas mekem taem yumi wantem yusum wan pijatok?

¹⁸ Taem yumi yusum ol pijatok, i gat tri samting we yumi save mekem sipos yumi wantem folem eksampol blong Jemes: (1) Meksua se pijatok blong yu i stret long poen we yu stap tokbaot. (2) Yusum pijatok we i isi blong man i kasemsave. (3) Mekem lesen long pijatok ya i kamaot klia. Sipos i had long yu blong faenem ol gudfala pijatok, yu go long Watch Tower Publications Index, aninit long tok ya “Illustrations,” mo bambae yu save faenem plante pijatok we yu save yusum. Tingbaot se ol pijatok oli olsem wan maekrofon, bambae oli mekem poen we yu wantem makem i kamaot klia. Taswe, i gud yu makem nomo ol impoten poen we yu wantem tijim man long hem. Impoten risen we yumi wantem kam gud moa long fasin blong yumi blong tij, hemia blong halpem plante moa man blong oli save kam insaed long famle blong Jehova, be i no blong pulum ol man blong oli tinghae long yumi.

19. ?Yumi soemaot olsem wanem se yumi lavem ol brata mo sista?

¹⁹ Jemes i gruap wetem wan bigfala brata we i stret gud olgeta, be yumi nogat. Nating se i olsem, yumi gat privilej ya blong wosipim Jehova wetem wan bigfala famle blong ol Kristin brata mo sista. Yumi soemaot se yumi lavem olgeta, taem yumi joen wetem olgeta, lanem samting long olgeta, mo joen gud wetem olgeta long wok blong prij mo tijim ol man. Taem yumi traehad blong folem eksampol blong Jemes long ol fasin, mo tijing blong yumi, yumi stap givim ona long Jehova mo yumi halpem ol man we hat blong olgeta i stret blong oli kam klosap long Papa blong yumi long heven we i lavem yumi.