1-3. ?Wanem sam samting we i save mekem yumi krae?

 ?WETAEM laswan taem we yu bin krae? Samtaem yumi krae from we yumi glad, be plante taem yumi krae from we yumi harem nogud. Eksampol, maet yumi krae taem wan we yumi lavem hem i ded. Lorilei, wan sista long Yunaeted Stet i talem se: “Samtaem mi harem nogud bitim mak from gel blong mi we i ded, mo mi harem olsem se i no gat wan samting we i save mekem mi mi harem gud bakegen. Mi no ting se mi save harem gud bakegen.” *

² Be samtaem yumi krae from sam narafala risen tu. Hiromi, wan paenia sista long Japan i talem se: “Samtaem mi harem nogud from ol man we mi prij long olgeta oli no intres long Baebol. Mo samtaem mi krae taem mi askem long Jehova blong i halpem mi blong faenem wan man we i stap lukaotem trutok.”

³ ?Samtaem yu tu yu gat sem filing olsem ol sista ya? Maet plante long yumi bambae oli ansa se yes. (1 Pita 5:9) Yumi wantem ‘mekem wok blong Jehova we yumi glad,’ be samtaem yumi krae from wan we yumi lavem hem i ded, tingting blong yumi i foldaon, o yumi fesem wan problem we i mekem i had blong yumi holemstrong long God. (Sam 6:6; 100:2) ?Yumi save mekem wanem taem yumi gat filing olsem?

4. ?Bambae yumi tokbaot wanem long stadi ya?

⁴ Yumi save lanem samting long eksampol blong Jisas. Samtaem, hem tu i fesem sam samting we i mekem hem “i krae.” (Jon 11:35; Luk 19:41; 22:44; Hib. 5:7) Naoia bambae yumi tokbaot ol defren taem ya we Jisas i krae, mo luk lesen we yumi save lanem from. Mo tu, bambae yumi tokbaot samting we yumi save mekem, taem yumi fesem ol samting we i mekem yumi krae.

5. Folem Jon 11:32-36, ?yumi lanem wanem long saed blong Jisas?

⁵ Long koltaem blong yia 32 K.T., gudfala fren blong Jisas hemia Lasaros i sik mo i ded. (Jon 11:3, 14) Lasaros i gat tu sista, hemia Meri mo Mata, mo Jisas i lavem famle ya tumas. Tufala woman ya i harem nogud tumas taem brata blong tufala i ded. Afta we Lasaros i ded, Jisas i travel i go long vilej blong Betani, long ples we Meri mo Mata i laef long hem. Taem Mata i harem se Jisas i stap kam, hem i resis blong go mitim hem. Hem i harem nogud tumas, nao i talem se: “Masta, sipos yu bin stap long ples ya, bambae brata blong mi i no save ded.” (Jon 11:21) Biaen, taem Jisas i luk Meri mo ol narafala we oli stap wetem hem oli stap krae, hem tu “i krae.”—Ridim Jon 11:32-36.

6. ?From wanem Jisas i krae long taem ya?

⁶ ?From wanem Jisas i krae long taem ya? Buk ya Insight on the Scriptures i talem se: “Taem Jisas i luk we fren blong hem Lasaros i ded mo tufala sista blong Lasaros i stap harem nogud, hem i ‘pulum win blong hem from, nao i krae.’” * Maet Jisas i stap tingbaot soa we fren blong hem Lasaros i fesem taem hem i sik bigwan, mo filing blong Lasaros taem hem i luksave se i no longtaem bambae hem i ded. Mo tu, i sua se Jisas i krae from we hem i luk olsem wanem Meri mo Mata i harem nogud bigwan from brata blong tufala. Sipos yu lusum wan gudfala fren o famle long ded, i sua se yu tu yu bin gat filing olsem. Traem luk tri lesen we yu save lanem from stori ya.

7. ?Yumi lanem wanem long saed blong Jehova, taem Jisas i krae from ol fren blong hem?

⁷ Jehova i kasemsave long filing blong yu. Jisas i “stret pija” blong Papa blong hem. (Hib. 1:3) Taem Jisas i krae, hem i soemaot filing we Jehova i gat taem wan we yumi lavem hem i ded. (Jon 14:9) Sipos wan we yu lavem hem i ded, yu save sua se Jehova i kasemsave se yu harem nogud, mo i sore long yu. Hem i  wantem hilim hat blong yu we i brok.—Sam 34:18; 147:3.

8. ?From wanem yumi sua se Jisas bambae i mekem olgeta we yumi lavem tumas, oli laef bakegen?

⁸ Jisas i wantem tumas blong mekem olgeta we yu lavem olgeta, oli laef bakegen. Bifo we Jisas i krae, hem i talem long Mata se: “Brata blong yu bambae i laef bakegen.” Mata i bilivim Jisas. (Jon 11:23-27) From we Mata i wosipim Jehova, hem i save se profet Elaejah mo Elisa oli bin mekem sam man oli laef bakegen. (1 King 17:17-24; 2 King 4:32-37) Mo tu, i sua se hem i bin harem nius blong ol man we Jisas i mekem olgeta oli laef bakegen. (Luk 7:11-15; 8:41, 42, 49-56) Yu tu yu save sua se bambae yu luk olgeta we yu lavem olgeta tumas, oli laef bakegen. Jisas i krae taem hem i stap leftemap tingting blong ol fren blong hem we oli harem nogud, mo hemia i tijim yumi se hem i wantem tumas blong mekem ol dedman oli laef bakegen.

9. Olsem Jisas, ?yumi save mekem wanem blong halpem olgeta we oli stap harem nogud? Talem wan eksampol.

⁹ Yu save halpem olgeta we oli harem nogud. Jisas i krae wetem Mata mo Meri, be tu hem i lesin mo i leftemap tingting blong tufala. Yumi save mekem sem mak long olgeta we oli stap harem nogud. Dan, wan elda we i laef long Ostrelia i talem se: “Afta we waef blong mi ded, mi nidim help blong ol narafala. Plante brata mo waef blong olgeta oli rere oltaem blong lesin long mi. Oli stap wetem mi taem mi krae, mo oli letem mi mi talemaot ol harem nogud blong mi. Mo tu, taem mi no naf blong mekem sam samting mi wan, oli givhan long mi, oli wasem trak blong mi, mekem soping, mo kukum kakae blong mi. Mo plante taem oli prea wetem mi. Oli pruvum se oli ol tru fren mo ol brata we oli ‘kamtru long yu long taem blong trabol.’”—Prov. 17:17.

10. ?Luk 19:36-40 i tokbaot wanem?

¹⁰ Jisas i kamtru long Jerusalem long Nisan 9 long yia 33 K.T. Taem hem i stap kam klosap long taon ya, ol man oli hivap wanples mo oli stap putum ol klos blong olgeta long rod, blong soemaot se oli akseptem hem olsem King blong olgeta. Hemia i wan taem blong glad. (Ridim Luk 19:36-40.) Taswe, maet ol disaepol blong hem oli no ekspektem samting we i hapen biaen. “Taem [Jisas] i go klosap long Jerusalem, hem i luk taon ya nao hem i krae.” Wota i fulap long ae blong Jisas, mo hem i talemaot ol nogud samting we i no longtaem bambae oli hapen long ol man we oli laef long Jerusalem.—Luk 19:41-44.

11. ?From wanem Jisas i krae from ol man we oli laef long Jerusalem?

¹¹ Nating se ol man ya oli welkamem gud Jisas, be hem i harem nogud from we hem i save se bighaf blong ol man Jiu bambae oli no akseptem mesej blong Kingdom. From samting ya, ol enemi bambae oli distroem Jerusalem, mo eni man Jiu we i laef tru long trabol ya, bambae oli tekem hem i go wok slef. (Luk 21:20-24) Sori tumas, olsem Jisas i talem, bighaf blong ol man oli no wantem akseptem hem. ?Olsem wanem long ples we yu laef long hem, bighaf blong ol man oli akseptem mesej blong Kingdom? Sipos smol man nomo oli lesin long trutok we yu talemaot, ?yu save lanem wanem long Jisas we i krae from ol neba blong hem? Bambae yumi luk tri moa lesen we yumi save lanem long saed ya.

12. ?Yumi lanem wanem long saed blong Jehova, taem Jisas i krae from ol neba blong hem?

¹² Jehova i kea long ol man. Taem Jisas i krae, hemia i rimaenem yumi se Jehova i kea bigwan long ol man. “Hem i no wantem se wan man i ded, hem i wantem se olgeta man oli tanem  tingting blong olgeta.” (2 Pita 3:9) Tede, yumi soem se yumi lavem ol neba blong yumi taem yumi traehad blong talemaot gud nius blong Kingdom long olgeta.—Mat. 22:39. *

13-14. ?Olsem wanem Jisas i soem se hem i sore long ol man? ?Olsem wanem yumi save folem fasin blong hem?

¹³ Jisas i wok had long wok blong prij. Hem i soemaot se hem i lavem ol man, taem hem i tekem evri janis blong tijim olgeta. (Luk 19:47, 48) ?Wanem i pulum hem blong mekem olsem? Jisas i sore long olgeta. Wan taem, Jisas mo ol disaepol blong hem oli ‘no gat taem blong kakae’ from we plante man oli wantem harem ol tok blong hem. (Mak 3:20) Mo taem wan man i wantem toktok wetem Jisas long naet, Jisas i glad nomo blong mitim hem long taem ya. (Jon 3:1, 2) Bighaf blong ol man we oli lesin long Jisas, oli no kam ol disaepol blong hem. Nating se i olsem, hem i givim witnes long olgeta man we oli harem ol tok blong hem. Tede yumi wantem givim janis long evri man blong oli harem gud nius blong Kingdom. (Wok 10:42) Blong mekem olsem, yumi mas rere blong jenisim fasin blong yumi blong prij.

¹⁴ Yumi mas glad blong mekem ol jenis. Sipos oltaem yumi stap prij long semtaem nomo, maet bambae yumi no save mitim ol man we oli glad blong lesin long gud nius. Wan paenia we nem blong hem Matilda, i talem se: “Mi mo hasban blong mi i traem prij long ol man long ol defdefren taem. Long eli moning, mitufala i mekem ol bisnes teritori. Long lanj, taem i gat plante man long rod, mitufala i prij long troli. Mo long aftenun, mitufala i faenemaot se mifala i save faenem plante moa man long haos blong olgeta.” Yumi no mas prij nomo long taem we i stret long yumi, yumi mas rere blong jenisim program blong yumi blong prij long ol taem we yumi save faenem plante moa man. Sipos yumi mekem olsem, yumi save sua se Jehova bambae i glad tumas.

15. Folem Luk 22:39-44, ?wanem i hapen long naet bifo we Jisas i ded?

¹⁵ Long naet blong Nisan 14 long yia 33 K.T., Jisas i go long garen blong Getsemane, mo  i prea long Jehova long fulhat blong hem. (Ridim Luk 22:39-44.) Long taem ya, Jisas “hem i stap prea long God . . . i stap askem ol samting long God long bigfala voes, mo i krae i go long hem . . . we wota blong ae blong hem i stap ron.” (Hib. 5:7) ?Long naet ya Jisas i prea from wanem samting? Hem i prea blong gat paoa blong holemstrong long Jehova mo blong mekem wil blong Hem. Jehova i harem prea blong Pikinini blong hem, mo i sanem wan enjel i kam blong mekem hem i strong.

16. ?From wanem Jisas i harem nogud taem hem i stap prea long garen blong Getsemane?

¹⁶ Jisas i krae taem hem i stap prea long garen blong Getsemane, mo i harem nogud from we ol man bambae oli luk hem olsem wan man we i tok nogud long nem blong God. Mo tu, hem i save se i impoten tumas we hem i holemstrong long God mo leftemap nem blong Papa blong hem. Sipos yu yu stap fesem wan situesen we i traem fasin blong yu blong holemstrong long Jehova, ?yu save lanem wanem long fasin blong Jisas we i krae? Bambae yumi luk tri moa lesen we yumi save lanem.

17. ?Yumi lanem wanem long saed blong Jehova taem hem i ansarem prea blong Jisas?

¹⁷ Jehova i lesin long ol prea blong yu. Jehova i lesin taem Jisas i askem strong long hem blong i givhan long hem. ?From wanem? From we Jisas i wantem tumas blong holemstrong long Papa blong hem, mo leftemap nem blong hem. Sipos yumi tu, yumi wantem tumas blong holemstrong long Jehova mo leftemap nem blong hem, bambae hem i ansarem prea blong yumi taem yumi askem hem blong i halpem yumi.—Sam 145:18, 19.

18. ?From wanem yumi talem se Jisas i wan gudfala fren?

¹⁸ Jisas i kasemsave long ol filing blong yu. Taem yumi wari, yumi glad blong gat wan fren we i kasemsave long ol filing blong yumi, antap moa sipos hem i bin fesem ol semfala traem olsem yumi. Jisas nao i kaen fren ya, from we hem i kasem save filing ya we yumi no gat paoa mo yumi nidim narafala blong halpem yumi. Hem i kasemsave se i gat sam samting we yumi no naf blong mekem, mo bambae hem i meksua se yumi kasem help “long stret taem we yumi nidim.” (Hib. 4:15, 16) Olsem  we Jisas i akseptem help blong wan enjel we i kamtru long hem long garen blong Getsemane, yumi tu yumi mas akseptem help we Jehova i givim, maet tru long ol buk blong yumi, wan video, wan tok, o taem wan elda o wan narafala brata o sista i visitim yumi.

19. ?Wanem i save halpem yu taem yu fesem wan samting we i traem fasin blong yu blong holemstrong long Jehova? Talem wan eksampol.

¹⁹ Jehova bambae i givim “pis ya blong God” long yu. ?Olsem wanem bambae Jehova i mekem yumi strong? Taem yumi prea, bambae yumi kasem “pis ya blong God we i bigwan tumas i bitim olgeta save blong yumi.” (Fil. 4:6, 7) Pis ya we Jehova i givim, bambae i mekem hat blong yumi i stap kwaet mo i halpem yumi blong gat klia tingting. Wan sista we nem blong hem Luz, i pruvum se samting ya i tru. Hem i talem se: “Plante taem mi gat filing ya se mi stap mi wan. Mo samtaem, filing ya i mekem mi ting se Jehova i no lavem mi. Be taem samting ya i hapen, kwiktaem mi talemaot long Jehova ol filing blong mi. Prea i halpem mi blong harem gud bakegen.” Ekspiriens blong sista ya i soem se yumi save kasem pis tru long prea.

20. ?Wanem ol lesen we yumi lanem taem Jisas i krae?

²⁰ Ol stori we oli tokbaot Jisas taem i krae, oli leftemap tingting blong yumi, mo yumi lanem plante gudfala lesen from. Yumi lanem se yumi mas sapotem ol fren we oli stap harem nogud, mo yumi mas trastem tu se Jehova mo Jisas bambae oli sapotem yumi, taem wan we yumi lavem hem tumas i ded. Yumi wantem folem fasin blong Jehova God mo Jisas Kraes blong gat sori long ol man, taswe yumi gat strong tingting blong prij mo tijim olgeta. Mo yumi harem gud tu blong save se Jehova mo Boe blong hem oli kasemsave long filing blong yumi, oli save se yumi no naf blong mekem sam samting, mo oli wantem halpem yumi blong stanap strong. !I gud yumi gohed blong folem ol samting we yumi lanem kasem dei we Jehova i mekem promes ya blong hem i kamtru, blong “ravemaot wota blong ae blong [yumi]”!—Rev. 21:4.