1. ?Wanem i hapen long Deved?

 SOL we i king blong Isrel, i wantem kilim Deved i ded. From samting ya, Deved i ronwe blong sevem laef blong hem. Mo taem hem i hanggri, hem i stop long taon ya Nob, mo i askem blong oli givim faef bred long hem. (1 Saml. 21:1, 3) Biaen, Deved wetem ol man blong hem oli ronwe oli go haed long wan hol blong ston. (1 Saml. 22:1) ?Wanem i mekem se Deved i stap long situesen ya?

2. ?Olsem wanem Sol i putum hem wan long denja? (1 Samuel 23:16, 17)

² Sol i jalus bigwan long Deved from we plante man oli laekem hem mo hem i winim plante faet. Sol i save se Jehova i lego hem from hem i no moa obei long hem. Mo i save se Jehova i jusumaot Deved blong i kam nekiswan king. (Ridim 1 Samuel 23:16, 17.) Be from we Sol i stap yet olsem king long Isrel, hem i gat plante sapota mo wan bigfala ami, taswe Deved i mas ronwe blong sevem laef blong hem. ?Olsem wanem? ?Sol i ting se hem i save stopem plan blong God blong mekem Deved i kam king? (Aes. 55:11) Baebol i no talem, be yumi sua long wan samting: Sol i putum hem wan long denja. !Olgeta we oli faet agensem God, oltaem oli lus!

3. ?Wanem tingting blong Deved long situesen blong hem?

³ Deved i wan man we i gat tingting daon. Hem i no jusum blong kam king blong Isrel, be Jehova nao i jusum hem. (1 Saml. 16:1, 12, 13) Sol i no laekem Deved nating. Be Deved  i no komplen long Jehova from situesen blong hem, mo hem i no komplen taem hem i gat smol kakae nomo o taem hem i stap haed long hol blong ston. Defren olgeta, taem Deved i stap long hol blong ston, hem i raetem wan naesfala singsing blong presem Jehova, we sam long ol tok blong hem i stap long stamba vas blong yia ya, we i se: “Olgeta we oli stap lukaotem Jehova, bambae oli no sot long ol gudfala samting.”—Sam 34:10.

4. ?Wanem ol kwestin we bambae yumi tokbaot, mo from wanem oli impoten?

⁴ Tede, plante man blong Jehova oli sot long kakae mo ol narafala samting we oli nidim long laef. Mo yumi luksave samting ya klia nomo long taem blong Covid-19 pandemik. Mo ol samting ya bambae oli kam mowas taem yumi stap go klosap long taem blong “bigfala trabol.” (Mat. 24:21) Taswe blong halpem yumi, i gud yumi faenem ansa blong ol fo kwestin ya: ?Olsem wanem Deved i “no sot long ol gudfala samting”? ?From wanem yumi mas lanem blong glad long samting we yumi gat? ?From wanem yumi sua se Jehova bambae i kea long yumi? ?Mo olsem wanem yumi save rerem yumi naoia from samting we bambae i hapen long fiuja?

5-6. ?Olsem wanem Ol Sam 23:1-6 i halpem yumi blong kasemsave tok blong Deved se ol man blong God oli “no sot long ol gudfala samting”?

⁵ ?Deved i minim wanem taem hem i talem se ol man blong Jehova bambae oli “no sot long ol gudfala samting”? Blong kasem ansa blong kwestin ya, bambae yumi luk ol tok we Deved i yusum taem i raetem Ol Sam 23. (Ridim Ol Sam 23:1-6.) Deved i statem sam ya wetem ol tok ya se: “Jehova i Man Blong Lukaot Long Sipsip, we i lukaot gud long mi. Bambae mi no sot long wan samting.” Long ol narafala vas blong sam ya, Deved i tokbaot ol impoten samting, hemia ol blesing long saed blong spirit we Jehova i givim long hem, from we hem i luk Jehova se i Man blong lukaot long sipsip, we i lukaot gud long hem. Jehova i lidim Deved “long ol rod blong stret fasin,”  mo i gohed blong sapotem hem long gudtaem mo long badtaem. Deved i luksave se nating we Jehova i putum hem “long ples we i gat gras,” be hemia i no min se bambae hem i no kasem trabol. Maet tingting blong hem i save foldaon, olsem we hem i stap wokbaot “long vali we i tudak olgeta,” mo bambae hem i gat ol enemi. Be from we Jehova i olsem Man blong lukaot long sipsip we i lukaot long Deved, Deved bambae i “no fraet se wan samting i save spolem” hem.

⁶ Taswe, ?olsem wanem Deved i “no sot long ol gudfala samting”? Ansa se: Hem i gat evri samting we hem i nidim blong stap klosap long Jehova. Hem i no nidim plante samting blong mekem hem i harem gud. Hem i glad long eni samting we Jehova i givim long hem. Samting we i moa impoten long hem, hemia se Jehova i blesem mo i protektem hem.

7. Folem Luk 21:20-24, ?wanem ol hadtaem we sam Kristin long Judia oli fesem?

⁷ Ol tok ya blong Deved oli mekem yumi luksave se i impoten blong yumi gat stret tingting long saed blong ol samting we yumi gat. Yumi save harem gud long ol samting we yumi gat, be yumi no mas luk se oli moa impoten long laef blong yumi. Hemia i wan impoten trutok we ol fas Kristin long Judia oli kasemsave long hem. (Ridim Luk 21:20-24.) Jisas i wonem olgeta se i gat taem i stap kam we bambae “ol soldia oli raonemgud” Jerusalem. Taem samting ya i hapen, oli mas “ronwe i go long ol bigfala hil.” Sipos oli ronwe long taon ya, bambae oli stap laef, be bambae oli lego plante samting. Sam yia i pas, wan Wajtaoa i talem se: “Oli livim ol garen mo ol haos blong olgeta, mo oli no tekem taem blong pikimap ol samting blong olgeta long haos. Oli trastem paoa blong Jehova blong protektem olgeta mo givhan long olgeta. Taswe oli putum wosip blong Jehova long fas ples, bitim evri narafala impoten samting.”

8. ?Wanem impoten lesen we yumi save lanem long samting we i hapen long ol fas Kristin long Judia?

⁸ ?Wanem impoten lesen we yumi save lanem long samting we i hapen long ol fas Kristin long Judia? Semfala Wajtaoa ya i talem se: “Maet bambae yumi gat traem long saed blong olgeta samting blong yumi, mo olsem wanem yumi tingbaot olgeta. ?Oli impoten tumas long yumi, bitim evri samting? ?No ating i moa impoten blong sevem laef blong yumi, wetem olgeta we oli stap long saed blong God? Tru ya, maet taem yumi ronwe, bambae yumi kasem hadtaem mo yumi sot long sam samting. Bambae yumi mas rere blong mekem evri samting we yumi mas mekem long taem ya, olsem ol Kristin blong bifo we oli olsem yumi, oli ronwe long Judia.” *

9. ?Advaes ya we Pol i talem long ol man Hibru i enkarejem yu olsem wanem?

⁹ Traem tingbaot, ating i had blong ol Kristin ya oli lego evri samting we oli gat, mo statem wan niufala laef long wan niufala ples. Oli mas gat bilif blong trastem se Jehova bambae i givim ol samting we oli nidim. Be i gat wan samting we i save halpem olgeta. Faef yia bifo we ol soldia blong Rom oli kam raonem Jerusalem, aposol Pol i givim sam impoten advaes long ol man Hibru. Hem i talem se: “I nogud yufala i gat fasin ya blong laekem mane tumas. Sipos yufala i gat wanem samting, be yufala i mas harem gud long hem, from we God i talem se: ‘Bambae mi mi neva lego yu, mo bambae mi neva livim yu yu stap yu wan.’ Olsem nao, tingting blong yumi i save strong, mo yumi save talem se: ‘Jehova nao i stap halpem mi. Bambae mi no fraet. ?Man i save mekem wanem long mi?’” (Hib. 13:5, 6) I sua se  olgeta we oli lesin long advaes ya blong Pol oli harem gud long smol samting nomo we oli gat, taem oli muv i go long niufala haos blong olgeta. Oli sua se Jehova bambae i givim ol samting we oli rili nidim. Mo ol tok ya blong Pol oli givhan long yumi tu blong trastem Jehova.

10. ?Pol i talemaot wanem “sikret” long yumi?

¹⁰ Pol i givim sem advaes ya long Timoti, mo advaes ya i kam long yumi tu. Hem i talem se: “Taswe sipos yumi gat kakae blong yumi mo klos blong yumi, hemia i naf, yumi save harem gud.” (1 Tim. 6:8) ?Hemia i min se yumi no save harem gud long wan naesfala kakae, gat wan naesfala haos, o pem ol niufala klos? !Nogat! Pol i no minim olsem. Pol i stap minim se yumi save harem gud long samting we yumi gat. (Fil. 4:12) Hemia nao “sikret” blong Pol. Impoten samting we yumi gat, hemia frensip blong yumi wetem God, be i no eni narafala samting we yumi gat.—Hab. 3:17, 18.

11. ?Yumi lanem wanem long tok we Moses i talem long ol man Isrel?

¹¹ Samting we yumi ting se yumi nidim, maet i no sem mak long wanem we Jehova i tingbaot. Traem luk samting we Moses i talem long ol man Isrel afta we oli spenem 40 yia long draeples, hem i se: “Jehova we i God blong yufala, i stap blesem yufala long olgeta samting we yufala i mekem. Hem i savegud wokbaot blong yufala long bigfala draeples ya. Long ol 40 yia ya, God blong yufala Jehova i stap wetem yufala, nao yufala i no sot long wan samting.” (Dut. 2:7) Afta long ol  40 yia ya, Jehova i givim mana long ol man Isrel blong oli kakae. Ol klos blong olgeta we oli aot wetem long Ijip, i neva brokbrok. (Dut. 8:3, 4) Nating se sam man Isrel oli save gat tingting se ol samting we oli gat i no naf, be Moses i rimaenem olgeta se oli gat evri samting we oli nidim. Jehova bambae i glad sipos yumi lanem blong harem gud long samting we yumi gat, hemia taem yumi glad long smol samting nomo we hem i givim long yumi, yumi luk olsem wan blesing mo talem tangkiu from.

12. ?Wanem i soemaot se Deved i trastem Jehova?

¹² Deved save se Jehova i kea bigwan mo i neva lego olgeta we oli lavem hem. Nating se Deved i stap long denja taem hem i raetem namba 34 Sam ya, be wetem ae blong bilif, hem i luk we “enjel blong Jehova i kamp raon long” hem. (Sam 34:7) Maet Deved i stap tingbaot enjel blong Jehova olsem wan soldia we i kamp long wan open ples mo oltaem i stap wokbaot raon blong protektem hem long ol enemi. Nating se Deved i wan strong man blong faet, mo Jehova i bin promes se bambae hem i kam king, be Deved i no dipen long gudhan blong hem blong slingim wan ston o blong yusum wan naef blong faet, blong kilim ol enemi blong hem. (1 Saml. 16:13; 24:12) Be Deved i trastem God mo i sua se enjel blong Jehova bambae i sevem “olgeta we oli fraet long Hem.” I tru, tede yumi no ekspektem blong Jehova i mekem merikel blong protektem yumi. Be yumi save se olgeta we oli trastem hem, nating se sipos oli ded, be bambae oli gat laef we i no save finis.

13. ?From wanem Gog blong Magog bambae i ting se i isi blong hem i atakem yumi? ?From wanem yumi no nid blong fraet? (Yu luk pija long fran pej.)

¹³ Samting we bambae i hapen i no longtaem, bambae i traem fasin blong yumi blong trastem Jehova. Taem Gog blong Magog, hemia wan grup blong ol nesen oli atakem ol man blong God, maet laef blong yumi bambae i stap long denja. Be yumi mas trastem se Jehova bambae i sevem yumi. Ol nesen bambae oli luk yumi olsem ol sipsip we i no gat man blong protektem olgeta. (Esik. 38:10-12) Mo from we yumi no gat ol tul blong faet, mo yumi no ol man blong faet, bambae oli luk se i isi nomo blong winim yumi. Be from we yumi gat bilif, yumi save se ol enjel blong Jehova oli rere blong protektem yumi. Be ol nesen oli no save samting ya from we oli no gat bilif. !Taswe bambae oli sapraes bigwan, taem ol ami blong Jehova long heven oli kam blong faet blong protektem yumi!—Rev. 19:11, 14, 15.

14. ?Yumi save mekem wanem naoia blong rere from samting we bambae i hapen long fiuja?

¹⁴ ?Yumi save mekem wanem naoia blong rere from samting we bambae i hapen long fiuja? Fastaem, yumi mas gat stret tingting long ol samting we yumi gat, from we wan dei bambae yumi lego ol samting ya biaen. Mo tu, yumi mas glad long wanem samting we yumi gat mo glad se yumi frengud wetem Jehova. Taem yumi save gud God blong yumi, bambae yumi trastem hem moa se hem i save protektem yumi taem Gog blong Magog i atakem yumi.

15. ?From wanem Deved i sua se Jehova bambae i neva lego hem?

¹⁵ Traem luk wan narafala samting we i halpem Deved, mo we i save halpem yumi tu blong rere from ol samting we bambae oli traem yumi. Deved i talem se: “Yu testem mo luk se Jehova i gud, man we i go long hem blong haed, hem i glad.” (Sam 34:8) Ol tok ya oli soemaot klia from wanem Deved i trastem  se Jehova i save halpem hem. Oltaem Deved i trastem Jehova, mo Jehova i neva lego hem. Taem Deved i yang, hem i faet agensem bigfala man Filistia ya Golaeat we i wan strong man blong faet, mo i talem long hem se: “Tede, Jehova bambae i putum yu long han blong mi.” (1 Saml. 17:46) Samtaem biaen, Deved i wok blong king Sol, mo Sol i traem plante taem blong kilim hem i ded. Be “Jehova i stap wetem” Deved. (1 Saml. 18:12) Deved i luk olsem wanem Jehova i givhan long hem bifo, taswe hem i trastem se naoia we hem i stap kasem ol traem ya, Jehova bambae i stil halpem hem.

16. Talem wan eksampol we i soem olsem wanem blong “testem” se Jehova i gud.

¹⁶ Sipos naoia yumi dipen long Jehova blong i lidim yumi, yumi save sua moa se long fiuja bambae hem i halpem yumi. Yumi mas gat bilif mo rere blong trastem Jehova, taem yumi askem spel long bos blong yumi blong yumi save go long asembli, o askem blong i jenisim taem blong wok blong yumi, blong yumi save go long ol miting mo spenem moa taem long wok blong prij. Be sipos bos i no wantem mo i sakemaot yumi long wok, ?bambae yumi trastem Jehova se bambae i neva lego yumi, mo se oltaem bambae hem i givim samting we yumi rili nidim? (Hib. 13:5) Plante brata mo sista we oli mekem wok blong Jehova fultaem, oli ekspiriensem olsem wanem Jehova i bin halpem olgeta taem oli nidim hem. Yes, Jehova i neva lego ol man blong hem.

17. ?Wanem stamba vas blong yia 2022? ?Olsem wanem vas ya bambae i givhan long yumi?

¹⁷ From we Jehova i stap long saed blong yumi, yumi no nid blong fraet from samting we bambae i hapen long fiuja. God blong yumi bambae i neva lego yumi sipos yumi putum Kingdom blong hem long fasples. Taswe blong rimaenem yumi blong rere from samting we bambae i hapen long fiuja, mo blong trastem Jehova se bambae hem i neva lego yumi, Hed Kampani i jusum Ol Sam 34:10 olsem stamba vas blong yia 2022: “Olgeta we oli stap lukaotem Jehova, bambae oli no sot long ol gudfala samting.”