1. ?Olsem wanem blong spenem taem wetem Jehova?

 YUMI laekem blong spenem taem wetem ol man we yumi kea long olgeta. Eksampol, wan kapol i laekem blong spenem taem tugeta. Ol yangfala oli laekem blong spenem taem wetem ol gudfala fren blong olgeta. Mo yumi evriwan i laekem tumas blong spenem taem wetem ol Kristin brata mo sista blong yumi. Be samting we i moa impoten se yumi laekem blong spenem taem wetem God blong yumi. Yumi mekem olsem taem yumi prea long hem, yumi ridim Tok blong hem, yumi tingting dip long ol plan blong hem mo ol gudfala fasin blong hem. !Yes, i gud tumas blong spenem taem wetem Jehova!—Sam 139:17.

2. ?Wanem i save mekem se i had blong yumi spenem taem wetem Jehova?

² Nating se yumi laekem blong spenem taem wetem Jehova, be samtaem i no isi blong mekem olsem. Yumi gat wan bisi laef, mo hemia i mekem i had blong yumi faenem taem blong mekem ol samting long saed blong spirit. Wok blong yumi, famle blong yumi, mo ol narafala samting we yumi mas mekem oli save tekem tumas taem, nao yumi harem se yumi bisi tumas mo yumi no gat taem blong prea, stadi, mo tingting dip.

3. ?Wanem wan narafala samting we i save kakae taem blong yumi?

³ I gat wan narafala samting we i save kakae taem blong yumi. Sipos yumi no lukaot gud, ol samting we oli no rong  blong yumi mekem oli save stilim taem we yumi save yusum blong kam klosap long Jehova. Eksampol, i gud blong spel mo pleplei. Be sipos yumi spenem tumas taem blong mekem ol samting ya, maet bambae yumi no gat naf taem blong mekem ol samting long saed blong spirit. Yumi mas putum ol samting blong spel mo pleplei i stap long prapa ples blong olgeta.—Prov. 25:27; 1 Tim. 4:8.

4. ?Bambae yumi tokbaot wanem long stadi ya?

⁴ Long stadi ya, bambae yumi tokbaot from wanem yumi mas jusumaot ol samting we oli moa impoten long laef blong yumi. Mo tu, bambae yumi tokbaot from wanem yumi mas yusumgud taem blong yumi wetem Jehova, mo luk gudfala frut we i kamaot from.

5. ?Olsem wanem Efesas 5:15-17 i save halpem wan yangfala blong i jusum beswan laef?

⁵ Jusum beswan laef. Plante taem ol yangfala oli wari from oli wantem save beswan rod blong yusumgud laef blong olgeta. Long wan saed, i gat ol tija mo ol memba blong famle we oli no Witnes, oli enkarejem olgeta blong kasem hae edukesen blong oli save faenem wan gudfala wok mo kasem plante mane. Sipos oli mekem olsem, hemia bambae i kakae taem blong olgeta. Mo long narasaed, i gat ol perens mo ol fren long kongregesen we maet oli enkarejem olgeta blong yusum laef blong olgeta long wok blong Jehova. ?Wanem i save halpem wan yangfala we i lavem Jehova blong i mekem beswan desisen? I gud hem i ridim mo i tingting dip long vas blong Efesas 5:15-17. (Ridim.) Afta we hem i ridim ol vas ya, hem i save askem se: ‘?Wanem nao “samting we Jehova i wantem”? ?Wanem desisen bambae i mekem hem i glad? ?Weswan desisen bambae i halpem mi blong yusumgud taem blong mi?’ Tingbaot se, “ol dei we oli rabis we oli rabis” mo wol ya we Setan i rulum, i no longtaem bambae i lus. Taswe i waes sipos yumi yusum laef blong yumi blong mekem ol samting we i mekem Jehova i glad.

6. ?Meri i jusum wanem, mo from wanem hemia i waes?

⁶ Jusum samting we i moa impoten. Blong yusumgud taem blong yumi, samtaem yumi mas mekem wan desisen bitwin tu samting we maet tufala i no rong. Yumi makem samting ya long taem we Jisas i go visitim Meri mo Mata. Mata i glad tumas se Jisas i visitim olgeta, nao hem i rerem wan bigfala kakae. Be Meri i sidaon klosap long Jisas mo i stap lesin long ol tijing blong hem. Samting we Mata i mekem i no rong, be Jisas i talem se Meri i “jusum samting we i beswan.” (Luk 10:38-42) Afta we sam taem i pas, maet Meri i fogetem samting we oli kakae long taem ya, be yumi sua se bambae hem i neva fogetem samting we hem i lanem long Jisas. Meri i tinghae long smol taem ya we hem i spenem wetem Jisas, mo long sem fasin, yumi tu yumi tinghae long taem we yumi spenem wetem Jehova. ?Olsem wanem blong yusumgud taem blong yumi?

7. ?From wanem i impoten blong prea, stadi, mo tingting dip?

⁷ Luksave se prea, stadi, mo fasin blong tingting dip, oli haf blong wosip blong yumi. Taem yumi prea, yumi stap toktok long Papa blong yumi long heven we i lavem yumi tumas. (Sam 5:7) Taem yumi stadi Baebol, yumi stap kasem ol “save blong God,” we hem nao i Stamba blong olgeta waes tok. (Prov. 2:1-5) Taem yumi tingting dip, yumi tingbaot ol gudfala fasin blong Jehova mo ol samting we hem i wantem mekem blong yumi. Hemia nao beswan rod blong yusum gud taem blong yumi.  ?Be wanem i save halpem yumi blong mekem olsem?

8. ?Yumi lanem wanem long stori blong Jisas we i spenem taem long draeples?

⁸ Sipos i posibol, jusum wan ples we i kwaet. Tingbaot eksampol blong Jisas. Bifo we hem i statem minista wok blong hem, hem i spenem 40 dei long draeples. (Luk 4:1, 2) Ples ya i kwaet, taswe hem i save prea long Jehova, mo tingting dip long samting we Jehova i wantem hem blong mekem. I sua se samting ya i halpem Jisas blong rere blong fesem samting we bambae i traem hem. ?Olsem wanem eksampol blong Jisas i save halpem yu? Sipos yu gat wan bigfala famle, maet i had blong faenem wan ples we i kwaet long haos. Sipos i olsem, maet yu save lukaotem wan ples we i kwaet aotsaed. Hemia nao samting we Julie i mekem taem hem i wantem spenem taem blong prea long Jehova. Hem mo hasban blong hem oli laef long wan smol apatmen long Franis, mo i had blong hem i spenem taem hem wan, we i no gat wan samting i distebem hem. Julie i talem se: “Evri dei, mi go wokbaot long pak. Long ples ya, mi save stap mi wan, mi tingting gud mo toktok long Jehova.”

9. ?Olsem wanem Jisas i soem se hem i tinghae long frensip blong hem wetem Jehova?

⁹ Jisas i gat wan bisi laef. Taem hem i stap long wol, plante taem ol man oli biaenem hem long evri ples we hem i go, mo oli wantem stap wetem hem. Wantaem, “olgeta man long taon ya oli kam hivap long doa” blong luk hem. Jisas i tinghae long frensip blong hem wetem Jehova, taswe oltaem hem i meksua se hem i gat taem blong prea long Jehova. Bifo we san i kam antap, “hem i go long wan ples we i no gat man long hem” blong i save spenem taem hem wan wetem Papa blong hem.—Mak 1:32-35.

10-11. Folem Matiu 26:40, 41, ?Jisas i talem long ol disaepol blong oli mekem wanem, be wanem i hapen?

¹⁰ Long naet bifo we Jisas i ded, hem i lukaotem wan ples we i kwaet blong hem i save tingting dip mo prea. Mo hem i faenem ples ya long garen blong Getsemane. (Mat. 26:36) Long taem ya, Jisas i talem wan impoten samting long ol disaepol blong hem long saed blong prea.

¹¹ Traem luk samting we i hapen. Taem oli kamtru long garen blong Getsemane, maet hemia i medel naet finis. Jisas i askem long ol aposol blong oli “gohed blong wekap,” mo hem i aot i go prea. (Mat. 26:37-39) Be taem hem i stap prea, olgeta oli slip. Taem Jisas i luk we oli stap slip, hem i talem bakegen long olgeta se: “Yufala i mas gohed blong lukaot gud oltaem mo yufala i mas prea oltaem.” (Ridim Matiu 26:40, 41.) Hem i luksave se olgeta tu oli wari tumas mo oli taed. Jisas i sore long olgeta mo i kasemsave se “bodi  [blong olgeta] i slak.” Jisas i aot tu taem bakegen blong go prea, mo taem hem i kambak, hem i luk we ol disaepol blong hem oli stap slip be oli no prea.—Mat. 26:42-45.

12. ?Wanem i save halpem yumi blong prea nating se samtaem yumi wari tumas o taed?

¹² Jusum wan gudfala taem. Samtaem maet yumi wari tumas o yumi taed, nao yumi no prea. Sipos samting olsem i bin hapen long yu, yu no mas harem nogud, from i gat sam narafala tu we oli olsem. ?Be yu save mekem wanem? Samfala we oli gat fasin ya blong prea long Jehova long en blong dei, oli faenem se i moa gud blong prea eli moa long taem we oli no taed tumas. Samfala oli faenemaot se sipos oli wantem tingting gud taem oli prea, oli mas stap long wan posisen we i stret, olsem taem oli sidaon o nildaon. ?Be olsem wanem sipos yu harem se yu no save prea, from we tingting blong yu i wari tumas o i foldaon? Talemaot ol filing ya blong yu long Jehova. Yu save sua se Papa ya we i gat sore, bambae i kasemsave long yu.—Sam 139:4.

13. ?Olsem wanem ol divaes blong yumi oli save distebem yumi?

¹³ No letem samting i pulum tingting blong yu taem yu stap stadi. I no prea nomo we i save givhan long yumi blong mekem frensip blong yumi wetem Jehova i kam strong. Fasin blong stadi long Tok blong God mo go long ol miting blong kongregesen, hemia tu i save halpem yumi blong kam klosap long God. ?I gat sam narafala samting we yu save mekem blong yusumgud taem we yu spenem blong stadi mo go long ol miting? Askem yu wan se: ‘?Wanem i pulum tingting blong mi taem mi stap long miting o taem mi stap traem blong stadi?’ ?Maet yu kasem wan kol, imel, o teks mesej long fon blong yu o long wan narafala divaes? Tede plante bilian man oli gat ol divaes ya. Sam man blong mekem risej oli talem se sipos yumi gat wan fon klosap long yumi, hemia i save distebem yumi taem yumi traem blong tingting gud. Wan profesa we i stadi long tingting blong man i talem se: “Tingting blong yu i no stap long samting we yu stap mekem, be i stap long wan defren samting.” Plante taem long ol asembli, oli talem blong yumi daonem volium blong divaes blong yumi, blong i no distebem narafala. ?Yumi save mekem sem mak taem yumi stap yumi wan, blong ol divaes blong yumi oli no distebem yumi mo stilim taem blong yumi wetem Jehova?

14. Folem Filipae 4:6, 7, ?olsem wanem Jehova bambae i halpem yumi blong tingting gud?

 ¹⁴ Askem Jehova blong i halpem yu blong tingting gud. Sipos yu stap mekem prapa stadi blong yu o yu stap long miting, mo yu luksave se tingting blong yu i stap flae, askem Jehova blong i halpem yu. Sipos yu wari, bambae i had blong yu putum tingting blong yu i stap long ol samting long saed blong spirit, we hemia nao ol samting we oli impoten blong yu mekem. I gud yu prea long Jehova blong i givim pis ya we bambae i lukaotgud long hat mo “tingting” blong yu.—Ridim Filipae 4:6, 7.

15. ?Wanem gudfala samting i kamaot taem yumi spenem taem wetem Jehova?

¹⁵ Sipos yu tekem taem blong toktok, blong lesin, mo blong tingbaot Jehova, hemia bambae i givhan bigwan long yu. ?Bambae i givhan long yu olsem wanem? Faswan, bambae yu mekem ol gudfala desisen. Baebol i talem long yumi se “man we i stap wokbaot wetem man we i waes, bambae hem i kam waes.” (Prov. 13:20) Taswe, sipos yumi spenem taem wetem Jehova, we hem i Stamba blong olgeta waes tok, bambae yumi kam waes moa. Bambae yu kasemsave moa olsem wanem blong mekem hem i glad, mo olsem wanem blong no mekem ol samting we i save mekem hem i harem nogud.

16. ?Olsem wanem yumi kam ol gudfala tija taem yumi spenem taem wetem Jehova?

¹⁶ Nambatu, bambae yu kam wan gudfala tija. Taem yumi stadi Baebol wetem wan man, mak blong yumi i blong halpem hem blong i kam klosap long Jehova. Taem yumi gohed blong toktok wetem Papa blong yumi long heven, lav blong yumi long hem bambae i gru i kam strong, mo bambae yumi naf blong tijim studen blong yumi blong hem tu i lavem Jehova. Traem tingbaot eksampol blong Jisas. Oltaem hem i tokbaot Jehova se i kaen mo i gat lav, mo hemia i halpem ol disaepol blong oli lavem Jehova tu.—Jon 17:25, 26.

17. ?From wanem prea mo fasin blong stadi i halpem yumi blong gat strong bilif?

¹⁷ Nambatri, bilif blong yumi bambae i kam strong moa. Traem luk samting we i hapen taem yu askem God blong i lidim yu, i mekem yu harem gud, o i sapotem yu. Evritaem taem we Jehova i ansarem ol prea blong yu, bilif blong yu bambae i kam strong moa. (1 Jon 5:15) ?Wanem moa i save givhan? Stadi yu wan. Tingbaot se “man i save bilif nomo afta we hem i harem tok.” (Rom 10:17) Nating se i olsem, blong gat strong bilif, yumi mas mekem sam moa samting i bitim we yumi lanem samting nomo. ?Yumi save mekem wanem?

18. Tokbaot from wanem yumi mas tingting dip.

 ¹⁸ Yumi mas tingting dip long samting we yumi stap lanem. Traem luk eksampol blong man we i raetem Ol Sam 77. Hem i wari bitim mak from hem i ting se Jehova i no moa glad long hem wetem ol narafala man Isrel. Mo long naet hem i no save slip, from we hem i wari tumas. (Vas 2-8) ?Ale, hem i mekem wanem? Hem i talem long Jehova se: “Bambae mi tingting dip long olgeta wok blong yu mo mi tingting gud long ol fasin blong yu blong mekem samting.” (Vas 12) I tru se man blong raetem sam i savegud ol samting we Jehova i bin mekem blong ol man blong hem bifo, be yet, hem i stap tingting se: “?God i foget blong kaen long mifala? ?No kros blong hem i mekem se hem i no moa gat sore?” (Vas 9) Man blong raetem sam i tingting dip long ol wok blong Jehova mo fasin blong Jehova we i soem sore long ol man blong hem bifo. (Vas 11) ?Wanem i kamaot from? Man blong raetem sam i sua fulwan se Jehova bambae i neva lego ol man blong hem. (Vas 15) Long sem fasin, bilif blong yu bambae i kam strong moa taem yu tingting dip long ol samting we Jehova i bin mekem long ol man blong hem, mo long ol samting we hem i bin mekem long yu wan.

19. ?Wanem moa i hapen taem yumi spenem taem wetem Jehova?

¹⁹ Namba fo samting we i moa impoten, hemia se bambae yu lavem Jehova moa. Lav bambae i pulum yu blong obei long Jehova, blong rere blong lego sam samting blong mekem hem i glad, mo blong stanap strong tru long eni traem. (Mat. 22:37-39; 1 Kor. 13:4, 7; 1 Jon 5:3) !I no gat wan samting we i sas moa i bitim gudfala frensip ya we yumi gat wetem Jehova!—Sam 63:1-8.

20. ?Yu save mekem wanem blong yu gat taem blong prea, stadi, mo tingting dip?

²⁰ Tingbaot se prea, stadi, mo fasin blong tingting dip, oli haf blong wosip blong yumi. Taswe olsem Jisas, yumi wantem faenem wan kwaet ples blong spenem taem wetem Jehova. Blokem eni samting we i save distebem yu. Askem Jehova blong i halpem yu blong tingting gud taem yu mekem ol samting long saed blong spirit. Sipos yu yusumgud taem blong yu naoia, Jehova bambae i blesem yu, mo i mekem yu kasem laef olwe long niufala wol ya blong God.—Mak 4:24.