STADI 4
Jehova i Blesem Yumi Taem Yumi Traehad Blong Go Long Memoriol
“Yufala i mas gohed blong mekem samting ya oltaem blong tingbaot mi.”—LUK 22:19.
SINGSING 19 Lodsapa
BIGFALA TINGTING a
1-2. ?From wanem evri yia yumi joen long Memoriol?
SAMWE 2,000 yia i pas, Jisas i givim laef blong hem long bihaf blong yumi, blong mekem se yumi save kasem laef we i no save finis. Long naet bifo we Jisas i ded, hem i talem long ol man blong hem blong oli tingbaot sakrefaes ya blong hem, taem oli mekem wan simpol lafet we i gat bred mo waen nomo.—1 Kor. 11:23-26.
2 Yumi obei long oda ya we Jisas i givim, from we yumi lavem hem tumas. (Jon 14:15) Evri yia long ol wik bifo mo afta long Memoriol, yumi soem se yumi glad long samting we Jisas i mekem, taem yumi prea mo tingbaot se ded blong hem i mekem wanem long yumi. Mo tu, yumi glad tumas blong mekem moa long wok blong prij, mo yumi invaetem plante man blong oli joenem yumi long spesel taem ya. Antap long hemia, yumi gat strong tingting blong no letem eni samting i blokem yumi blong joen long Memoriol.
3. ?Bambae yumi tokbaot wanem long stadi ya?
3 Long stadi ya, bambae yumi tokbaot tri rod we ol man blong Jehova oli folem blong tingbaot ded blong Jisas, taem oli: (1) mekem Memoriol long sem fasin we Jisas i mekem, (2) invaetem ol narafala i kam long Memoriol, mo (3) joen long Memoriol nating se oli stap gotru long trabol.
MEKEM MEMORIOL LONG SEM FASIN WE JISAS I MEKEM
4. ?Wanem ol kwestin we oli ansarem evri yia long Memoriol, mo from wanem ansa blong ol kwestin ya i impoten long yumi? (Luk 22:19, 20)
4 Evri yia long Memoriol, yumi lesin long wan Baebol tok we i givim ol klia ansa long plante kwestin. Yumi lanem from wanem yumi nidim ransom mo yumi lanem olsem wanem ded blong wan man nomo i pemaot sin blong evri man. Tok ya i rimaenem yumi se bred mo waen ya i representem wanem, mo se hu nomo i save kakae bred mo dring waen. (Ridim Luk 22:19, 20.) Mo yumi tingting dip long ol blesing we ol man we oli gat hop blong laef olwe long wol bambae oli kasem. (Aes. 35:5, 6; 65:17, 21-23) Yumi no mas ting nating long ol promes ya. Plante bilian man oli no kasemsave long ol samting ya, mo oli no kasemsave tu se sakrefaes blong Jisas i sas tumas. Mo tu, oli no folem stret rod blong mekem Memoriol olsem we Jisas i talem long ol man blong hem blong oli mekem. ?From wanem i olsem?
5. Afta we bighaf blong ol aposol i ded, ?olsem wanem ol man oli stat blong tingbaot ded blong Jisas?
5 Smoltaem afta we plante long ol aposol blong Jisas oli ded, ol giaman Kristin oli stat blong kam long kongregesen. (Mat. 13:24-27, 37-39) Oli stap “twistim ol tijing, blong pulum ol disaepol oli biaen long olgeta.” (Wok 20:29, 30) Wan long “ol tijing” we ol giaman Kristin ya oli twistim, hemia se Jisas i no givim laef blong hem “wan taem nomo mo blong olwe, blong karem sin blong plante man,” olsem we Baebol i talem. Be oli talem se oli mas mekem sakrefaes ya blong hem bakegen mo bakegen. (Hib. 9:27, 28) Tede plante man oli bilivim giaman tijing ya. Oli stap go long jos evri wik o evri dei blong tingbaot ded blong Jisas, we long Katolik jos oli singaot se “Sakrefaes Blong Lames.” b Sam nara jos, oli no tingbaot ded blong Jisas oltaem, mo ol memba blong olgeta oli no kasemsave klia se sakrefaes blong Jisas i minim wanem. Maet samfala oli stap tingting se: ‘?I tru se ded blong Jisas i rili minim se God i save fogivim ol sin blong mi?’ ?From wanem oli askem kwestin olsem? Hemia from we oli harem ol narafala oli talem se God i no save fogivim sin blong olgeta tru long sakrefaes blong Jisas. ?Be olsem wanem ol trufala man blong Jisas, oli halpem ol man blong kasemsave stret mining blong ded blong Jisas, mo stret rod blong tingbaot ded blong hem?
6. ?Long yia 1872, wan grup blong ol Baebol studen oli kasemsave wanem?
6 Samwe long yia 1870, wan grup blong ol Baebol studen we Charles Taze Russell nao i lukaot long olgeta, oli stat blong stadi gud long ol vas blong Baebol. Oli wantem save trutok long saed blong sakrefaes blong Jisas se i rili minim wanem, mo samting we oli mas mekem blong tingbaot ded blong hem. Long yia 1872, oli kasemsave se Jisas i givim laef blong hem olsem wan ransom blong olgeta man. Mo oli no kipim save ya blong olgeta nomo, be oli talemaot samting ya long evri man, tru long ol buk, nius pepa, mo ol magasin. Mo smoltaem afta, oli stat blong joen wanples evri yia blong mekem Memoriol olsem we ol fas Kristin oli stap mekem.
7. ?Olsem wanem risej we ol Baebol studen oli mekem i givhan long yumi tede?
7 Tede, yumi harem gud long ol samting we ol Baebol studen ya oli stadi long hem long ol yia we i pas. ?From wanem? From we Jehova i halpem yumi blong kasemsave se sakrefaes blong Jisas i minim wanem, mo se bambae i mekem wanem blong yumi mo blong olgeta man long wol. (1 Jon 2:1, 2) Yumi lanem tu we Baebol i tokbaot se i gat tu defren kaen hop blong ol man we oli mekem samting we i stret long ae blong God. Wan smol haf blong ol man bambae oli laef long heven wetem wan bodi we i no save kam roten samtaem, mo plante narafala milian man bambae oli laef olwe long wol ya. Yumi kam klosap long Jehova taem yumi tingbaot se hem i lavem yumi tumas, mo taem yumi tingbaot ol gudfala samting we yumi save kasem from sakrefaes blong Jisas. (1 Pita 3:18; 1 Jon 4:9) Taswe olsem ol gudfala brata ya blong yumi bifo, yumi wantem invaetem ol narafala blong oli joenem yumi blong mekem Memoriol, folem stret rod we Jisas i bin talem long ol man blong hem.
INVAETEM OL NARAFALA I KAM LONG MEMORIOL
?Yu save mekem wanem blong joen fulwan long kampen blong Memoriol? (Haf 8-10) e
8. ?Ol man blong Jehova oli mekem wanem blong invaetem ol narafala i kam long Memoriol? (Yu luk pija.)
8 Blong plante yia, ol man blong Jehova oli stap invaetem ol narafala i kam long Memoriol. Long yia 1881, i gat wan anaonsem long wan Wajtaoa we i invaetem ol brata mo sista blong oli kam long wan spesel miting we bambae i stap long haos blong wan brata long Allegheny, Pennsylvania. Samtaem biaen, wanwan kongregesen i stat blong mekem Memoriol. Long Maj 1940, oli talemaot long ol pablisa se oli save invaetem eni man long teritori we i soem intres. Long 1960, hemia faswan taem we Betel i givim ol invetesen we oli printim i go long ol kongregesen. Stat long taem ya, oli stap serem plante bilian invetesen blong Memoriol. ?From wanem yumi stap wok had blong invaetem ol narafala?
9-10. ?Hu i kasem gudfala samting taem yumi traehad blong invaetem ol man i kam long Memoriol? (Jon 3:16)
9 Wan risen from wanem yumi invaetem ol narafala blong joenem yumi long Memoriol, hemia from we yumi wantem se oli save trutok long saed blong samting we Jehova mo Jisas i mekem blong yumi evriwan. (Ridim Jon 3:16.) Yumi hop se samting we oli luk mo oli harem long taem blong Memoriol, bambae i pulum olgeta blong lanem moa mo blong oli kam ol man blong Jehova. Be hemia i givhan long ol narafala tu.
10 Yumi invaetem olgeta ya tu we oli no moa mekem wok blong Jehova. Yumi mekem olsem from yumi wantem rimaenem olgeta se God i stil lavem olgeta. Plante oli akseptem invetesen blong yumi mo yumi glad tumas taem yumi luk olgeta. Taem oli kam long Memoriol, hemia i mekem oli tingbaot bakegen glad we oli bin gat, taem oli stap mekem wok blong Jehova long ol yia we i pas. Traem luk eksampol blong Monica. c Long taem blong COVID-19 pandemik, hem i stat blong prij bakegen. Afta we hem i joenem Memoriol long 2021, hem i talem se: “Memoriol ya i rili spesel long mi. Afta long ol 20 yia we i pas, hemia i faswan taem bakegen we mi prij long ol man mo invaetem olgeta i kam long Memoriol. Mi mekem bes blong mi blong invaetem ol narafala, from mi glad tumas long samting we Jehova mo Jisas i mekem blong mi.” (Sam 103:1-4) Nomata se ol man oli akseptem invetesen blong yumi o no gat, be yumi mekem bes blong yumi blong invaetem olgeta i kam long Memoriol, from yumi save se Jehova i glad taem yumi traehad blong yumi mekem olsem.
11. ?Olsem wanem Jehova i blesem yumi taem yumi traehad blong invaetem ol man i kam long Memoriol? (Hagae 2:7)
11 Jehova i blesem yumi bigwan taem yumi traehad blong invaetem ol man i kam long Memoriol. Long 2021, nating se i gat sam restriksen from COVID-19 pandemik, be yet i gat 21,367,603 man we oli joen long Memoriol. !Hemia i dabolem namba blong ol Witnes blong Jehova raon long wol! I tru, Jehova i no intres long namba blong ol man we oli joen long Memoriol. Be hem i intres long wanwan man. (Luk 15:7; 1 Tim. 2:3, 4) Yumi sua se Jehova i yusum wok ya blong yumi invaetem ol narafala, blong yumi save faenem ol man we hat blong olgeta i stret.—Ridim Hagae 2:7.
JOEN LONG MEMORIOL NATING SE I GAT SAMTING I BLOKEM YUMI
Jehova i blesem yumi taem yumi traehad blong mekem Memoriol (Haf 12) f
12. ?Wanem sam samting we i save mekem i had long yumi blong mekem Memoriol? (Yu luk pija.)
12 Jisas i talemaot se long ol las dei bambae yumi fesem plante trabol, olsem famle i agensem yumi, ol man i ronem mo kilim yumi, ol wo, ol strong sik, mo plante moa. (Mat. 10:36; Mak 13:9; Luk 21:10, 11) Samtaem, ol situesen ya oli save mekem se i had blong yumi mekem samting blong tingbaot ded blong Jisas. ?Sam brata mo sista oli mekem wanem blong winim ol trabol ya mo olsem wanem Jehova i halpem olgeta?
13. ?Olsem wanem Jehova i blesem Artem from strong tingting we hem i gat mekem Memoriol taem hem i stap kalabus?
13 Kalabus. Ol brata blong yumi we oli stap kalabus from bilif blong olgeta, oli mekem bes blong olgeta blong oli save mekem Memoriol. Traem luk eksampol blong Artem. Long 2020, long ol wik bifo mo afta long Memoriol, hem i stap long wan smol rum long kalabus we faef prisena i save stap long hem. Nating se hem i stap long kalabus long taem ya, be hem i tekem eni samting we hem i gat blong yusum olsem bred mo waen blong mekem Memoriol. Mo tu hem i plan blong mekem tok blong Memoriol hem wan. Be ol man we oli stap long semfala rum wetem hem, oli stap smok mo oli swea plante. ?So hem i mekem wanem? Hem i askem olgeta sipos oli save stop blong swea mo smok jes blong wan aoa nomo. Artem i sapraes tumas taem ol man ya oli agri se bambae oli no smok o swea long taem blong Memoriol. Artem i talem se: “Mi askem sipos mi save tokbaot Memoriol long olgeta.” Nating we oli talem se oli no wantem harem eni samting long saed blong Memoriol, be afta we oli luk mo oli harem ol samting we Artem mekem blong tingbaot Memoriol, oli askem plante kwestin long hem.
14. ?Olsem wanem ol man blong Jehova oli mekem Memoriol nating se i gat COVID-19 pandemik?
14 COVID-19 pandemik. Long taem blong COVID-19 pandemik, ol man blong Jehova oli no save joen wanples blong mekem Memoriol. Be hemia i no stopem olgeta blong mekem Memoriol. d Ol kongregesen we oli gat akses long intenet, oli mekem Memoriol tru long video konfrens. ?Be olsem wanem long olgeta we oli no gat akses long intenet? Long sam kantri, ol branj ofis oli mekem ol arenjmen blong ol man oli save wajem ol tok long TV, o lesin long radio. Mo tu, ol branj ofis oli rikodem ol tok long bitim 500 lanwis, blong olgeta we oli stap long ol eria we i longwe we longwe, olgeta tu oli save mekem Memoriol. Mo ol brata oli mekem arenjmen blong oli save pasem ol rikoding ya i go long olgeta we oli nidim.
15. ?Yu yu lanem wanem long eksampol blong Sue?
15 Famle i agens. Samfala oli faenem i had blong mekem Memoriol from we famle i agensem olgeta. Traem luk eksampol blong wan Baebol studen we nem blong hem Sue. Long 2021, long dei bifo long Memoriol, Sue i talem long Baebol tija blong hem se bambae hem i no save joen long Memoriol, from we famle blong hem i agensem hem. Baebol tija blong hem i ridim Luk 22:44. Mo i eksplenem long hem se taem yumi stap gotru long sam trabol, yumi mas folem eksampol blong Jisas taem yumi prea i go long Jehova mo trastem hem fulwan. Long nekis dei, Sue i rerem bred mo waen blong Memoriol mo i wajem spesel tok blong moning wosip long jw.org. Long sapa, taem hem i stap hem wan long rum blong hem, hem i joen long Memoriol tru long telefon. Biaen, Sue i teksem Baebol tija blong hem mo i talem se: “Yu enkarejem mi bigwan yestede. Mi mekem evri samting we mi naf blong mekem blong joen long Memoriol, mo Jehova i halpem mi. !Mi no save olsem wanem blong tokbaot glad mo tangkiu we mi gat!” ?Yu ting se Jehova i save halpem yu sipos yu stap gotru long semfala traem olsem?
16. ?From wanem yumi sua se Jehova bambae i blesem yumi taem yumi traehad blong joen long Memoriol? (Rom 8:31, 32)
16 Jehova i tinghae long yumi taem yumi traehad blong mekem Memoriol blong ded blong Jisas. Yumi save sua se bambae hem i blesem yumi, taem yumi soemaot se yumi glad from samting we hem i mekem blong yumi. (Ridim Rom 8:31, 32.) Taswe, yumi wantem gat strong tingting blong joen long Memoriol long yia ya. Mo long ol wik bifo mo afta long Memoriol, yumi wantem mekem bes blong yumi blong mekem moa long wok blong Jehova.
SINGSING 18 Tangkiu From Sakrefaes Blong Jisas
a Long Tusde 4 Eprel 2023, plante milian man raon long wol bambae oli joen wanples blong mekem Memoriol blong ded blong Kraes. Plante man, maet hemia faswan taem we bambae oli joen long wan miting olsem. Olgeta we oli no moa mekem wok blong Jehova mo oli no moa go long Memoriol blong plante yia, bambae oli stap long taem ya tu. Samfala maet i gat sam samting we i save blokem olgeta blong joen long taem ya, be yet bambae oli stap. Nomata se situesen blong yu i olsem wanem, be yu save sua se Jehova i bambae glad tumas se yu mekem traehad blong stap long taem ya.
b Ol man ya oli bilif se long taem we oli tingbaot ded blong Jisas, bred mo waen i jenis i kam stret bodi mo blad blong Jisas. Oli ting se oli stap sakrefaesem bodi mo blad blong Jisas evritaem, taem wan man i kakae bred mo dring waen long taem ya.
c Mifala i jenisim sam nem.
d Yu luk haf ya tu we i stap long jw.org “2021 Memorial Commemoration.”
