1-2. ?Wanem ol trabol we ol man blong Jehova oli save fesem?

 TAEM wan nogud samting i hapen long yumi, laef blong yumi i save jenis kwiktaem nomo. Eksampol, wan gudfala brata we nem blong hem Luis a i faenemaot se hem i gat wan kansa. Mo dokta i talem se hem i save laef blong sam manis nomo. Monika mo hasban blong hem, tufala i bisi long wok blong Jehova. Be wan dei, Monika i faenemaot se blong plante yia hasban blong hem we i wan elda, i stap mekem sam samting we i no stret. Olivia, we i wan singel sista, i mas aot long haos blong hem from i gat wan strong hariken i stap kam. Taem hem i kambak, hem i luk se hariken ya i distroem gud haos blong hem. Ol eksampol ya oli soemaot se laef blong ol man ya i jenis kwiktaem nomo. ?Olsem wanem? ?Yu tu yu bin fesem sam samting olsem we kwiktaem nomo i jenisim laef blong yu fulwan?

² Yumi ol man blong Jehova, yumi tu yumi stap fesem ol hadtaem o yumi kasem ol sik, sem mak olsem evri narafala man. Antap long hemia, yumi mas stanap strong from ol man oli no laekem yumi, oli save agensem yumi o spolem yumi. Nating se i olsem, Jehova i no blokem ol trabol ya blong oli no kasem yumi, be hem i promes blong halpem yumi. (Aes. 41:10) Wetem help blong Jehova, yumi save gohed blong stap glad, mekem ol gudfala desisen, mo gohed blong holemstrong long hem nomata se yumi fesem ol had situesen. Long stadi ya, bambae yumi tokbaot fo samting we Jehova i mekem blong halpem yumi, taem yumi fesem ol had situesen long laef. Mo tu, bambae yumi tokbaot samting we yumi mas mekem blong kasem help we Jehova i givim.

 JEHOVA BAMBAE I LUKAOT GUD LONG YU

3. Taem yumi fesem wan bigfala problem, ?maet i had blong yumi mekem wanem?

³ Samting we i had. Taem yumi fesem wan bigfala trabol, maet i had blong yumi gat klia tingting mo mekem ol desisen. ?From wanem? From we maet hat blong yumi i soa tumas, mo tingting blong yumi i foldaon from yumi wari. Long taem ya maet yumi konfius mo yumi no save wanem blong mekem. Makem filing blong tufala sista ya we yumi tokbaot finis, we tufala i fesem ol trabol. Olivia i talem se: “Afta we hariken i distroem haos blong mi, mi harem se mi no gat hop, mo mi harem nogud tumas.” Monika we hasban blong hem i no stap tru long hem, i talem se: “Mi harem se hat blong mi i brok. I had blong mekem ol wok we mi stap mekem evri dei. Mi neva ting se samting olsem i save hapen long mi.” ?Olsem wanem Jehova i promes blong halpem yumi taem yumi harem nogud tumas?

4. Folem Filipae 4:​6, 7, ?Jehova i promes blong givim wanem long yumi?

⁴ Samting we Jehova i mekem. Hem i promes blong givim samting we Baebol i talem se “pis ya blong God.” (Ridim Filipae 4:​6, 7.) Pis ya, i save kwaetem tingting mo hat blong yumi, mo yumi kasem pis ya from yumi fren gud wetem Jehova. Pis ya “i bigwan tumas i bitim olgeta save blong yumi,” mo hem i gud moa i bitim wanem we yumi save tingbaot. ?I hapen long yu finis se yu prea plante long Jehova, mo biaen yu sapraes se tingting blong yu i kam kwaet? Yu harem olsem from we Jehova nao i givim “pis ya blong God” long yu.

5. ?Olsem wanem pis ya blong God i lukaot gud long tingting mo hat blong yumi?

⁵ Filipae japta 4 vas 7 i talem tu se pis ya God “bambae i lukaot gud,” o i protektem “hat mo tingting blong yufala.” Grik tok we oli tanem i kam “lukaot gud,” oli yusum blong tokbaot ol soldia we oli stap gad long wan taon, blong ol enemi oli no kam insaed. Ol man we oli laef long wan taon we ol soldia oli gad long hem, oli slip gud from oli save se ol soldia oli protektem olgeta. Long sem fasin, taem pis ya blong God i lukaot gud long hat mo tingting blong yumi, yumi no fraet from yumi save se yumi sef. (Sam 4:8) Olsem Hana, nating sipos situesen blong yumi i no jenis kwiktaem, be yumi save harem yet se yumi gat pis long tingting. (1 Saml. 1:​16-18) Mo taem tingting blong yumi i kwaet, plante taem i isi blong tingting gud mo mekem ol waes desisen.

6. ?Yumi save mekem wanem blong kasem pis ya blong God? (Mo tu, yu luk pija.)

⁶ Samting we yumi mas mekem. Taem yumi wari, i gud yumi singaot i go long Jehova blong i lukaot gud long yumi. ?Yumi mekem  samting ya olsem wanem? Yumi mas prea long hem gogo yumi harem se yumi gat pis ya blong God. (Luk 11:9; 1 Tes. 5:17) Luis we yumi tokbaot hem finis, i eksplenem olsem wanem hem mo waef blong hem Ana, tufala i naf blong dil wetem situesen blong tufala, taem tufala i harem se bambae hem i laef blong sam manis nomo. Hem i talem se: “Long taem ya, i had blong mekem ol desisen long saed blong helt, mo ol narafala samting. Be long hadtaem ya, mitufala i gat pis from we mitufala i prea.” Luis mo waef blong hem i talem se tufala i prea oltaem, mo askem strong long Jehova blong i givim pis long tingting blong tufala, i mekem hat blong tufala i kam kwaet, mo i givim waes long tufala blong mekem ol gudfala desisen. Mo tufala i harem se Jehova i halpem tufala. Sipos yu stap gotru long wan hadtaem, i gud yu prea oltaem, mo bambae yu haremsave se pis ya blong Jehova i lukaot gud long hat mo tingting blong yu.—Rom 12:12.

JEHOVA BAMBAE I MEKEM YU STAP STRONG YU NO JENIS

7. ?Yumi save gat wanem filing taem yumi fesem wan hadtaem?

⁷ Samting we i had. Taem yumi gotru long wan hadtaem, ol filing, tingting, mo aksen blong yumi oli olbaot. I olsem wan sip we strong win i stap saksakem hem i go olbaot. Ana we yumi tokbaot hem finis i talem se afta we Luis i ded, ol filing blong hem oli olbaot nomo. Hem i talem se: “Samtaem mi harem nogud gogo mi stat blong sore long mi wan. Mo tu, mi kam kros from hem i ded.” Narafala taem, hem i harem se hem i stap hem wan, mo i kros taem hem i mas mekem ol desisen long saed blong ol samting we Luis nao i bin stap mekem. Mo samtaem, hem i harem olsem se hem i stap long wan solwota we i gat strong win. Long taem olsem, ?olsem wanem Jehova i stap halpem yumi?

8. Folem Aesea 33:​6, ?Jehova i mekem yumi sua long wanem?

⁸ Samting we Jehova i mekem. Hem i mekem yumi sua se bambae hem i mekem yumi stap strong yumi no jenis. (Ridim Aesea 33:6.) Taem wan sip i fesem wan strong win long solwota, maet wef i stat blong saksakem hem i go olbaot. Be blong holemtaet sip blong i no muvmuv, maet plante sip oli gat tu longfala spesel fin long saed saed blong olgeta. Tufala fin ya i givhan long sip blong i no muvmuv tumas, nao ol pasenja oli save harem se oli sef mo enjoem trip blong olgeta. Be tufala fin ya i save wok gud nomo taem sip i stap ron. Long sem fasin, Jehova bambae i mekem yumi stap strong yumi no jenis, taem yumi gohed blong mekem wok blong hem nating se yumi fesem hadtaem.

9. ?Olsem wanem ol tul blong risej oli save halpem yumi blong gat stret tingting? (Mo tu, yu luk pija.)

⁹ Samting we yumi mas mekem. Taem yu harem  se ol nogud filing oli kam fulap long yu, i gud yu mekem bes blong yu blong gohed long gudfala program blong yu long saed blong spirit. I tru se maet bambae yu no save mekem plante samting olsem bifo, be tingbaot se Jehova i no ekspektem yu blong mekem moa long wanem we yu no naf blong mekem. (Skelem wetem Luk 21:​1-4.) Mo tu, i gud yu makemaot taem blong mekem prapa stadi blong yu mo tingting dip. ?From wanem? Jehova i yusum oganaesesen blong hem, blong givim ol nambawan atikol mo video we i save halpem yumi blong kontrolem ol filing blong yumi, taem yumi stap gotru long wan hadtaem. Blong faenem ol save we yu nidim, yu save yusum ol tul olsem JW Library^®app, Watch Tower Publications Index, mo Buk Blong Mekem Risej. Monika we yumi tokbaot hem finis i talem se, hem i yusum ol tul blong risej ya taem hem i stat blong harem se filing blong harem nogud i kam strong long hem. Eksampol, hem i risej long tok ya “kros.” Sam narafala taem, hem i risej long tok ya “trikim man blong spolem hem” o “stap tru.” Biaen hem i rid gogo kasem we hem i harem gud. Hem i talem se: “Taem mi stat blong mekem risej, mi harem se mi wari bitim mak. Be taem mi gohed blong rid, mi harem olsem se Jehova i kam mo i hagem mi. Taem mi stap rid, mi luksave se Jehova i kasemsave long evri filing we mi gat, mo i halpem mi.” Help ya we Jehova i givim, i save givhan long yu blong kontrolem ol filing blong yu gogo kasem we yu harem se tingting blong yu i kwaet mo yu gat pis.—Sam 119:​143, 144.

JEHOVA BAMBAE I SAPOTEM YU

10. ?Yumi save harem olsem wanem afta we yumi fesem wan hadtaem?

¹⁰ Samting we i had. Sipos wan nogud samting i hapen long yumi, maet sam dei bambae yumi harem se tingting mo bodi blong yumi i slak. Maet yumi gat filing olsem wan man blong resis we i kasem kil, we fastaem hem i ron spid, be naoia hem i no moa save wokbaot gud. Maet i had blong yumi mekem ol samting olsem bifo, o yumi no moa intres blong mekem ol samting we i mekem yumi glad. Olsem Elaejah, maet yumi harem se i had blong girap. Yumi wantem slip nomo. (1 King 19:​5-7) ?Be Jehova i promes blong mekem wanem taem yumi harem se yumi slak?

11. ?Wanem narafala samting we Jehova i mekem blong halpem yumi? (Ol Sam 94:18)

¹¹ Samting we Jehova i mekem. Hem i promes blong sapotem yumi. (Ridim Ol Sam 94:18.) Wan man blong resis we i kasem kil, i nidim wan samting blong sapotem hem blong i save wokbaot olbaot. Long sem fasin, yumi tu yumi  nidim help, blong yumi save gohed strong long wok blong Jehova. Long ol taem olsem, Jehova i promes se: “Mi, Jehova God blong yu, mi stap holem raethan blong yu, mi nao mi stap talem long yu se: ‘Yu no fraet. Mi bambae mi halpem yu.’” (Aes. 41:13) Hemia nao help we King Deved i kasem. Taem hem i fesem ol traem mo ol enemi, hem i talem long Jehova se: “Raethan blong yu i stap sapotem mi.” (Sam 18:35) ?Be olsem wanem Jehova i stap sapotem yumi?

12. ?Jehova i save yusum hu blong halpem yumi taem yumi slak?

¹² Plante taem, Jehova i stap sapotem yumi, taem i pulum ol narafala blong oli halpem yumi. Eksampol, wan taem, taem Deved i harem se hem i slak, fren blong hem Jonatan i visitim hem blong leftemap tingting blong hem mo mekem hem i strong. (1 Saml. 23:​16, 17) Jehova i mekem sem samting tu long Elaejah, hem i jusum Elisa blong i go givhan long hem. (1 King 19:​16, 21; 2 King 2:2) Tede, Jehova i save yusum ol famle, ol fren, o ol elda blong sapotem yumi. I tru se taem yumi harem nogud, yumi no wantem joen wetem ol narafala, yumi wantem stap yumi wan nomo, mo hemia i nomol. ?Be yumi save mekem wanem blong Jehova i halpem yumi?

13. ?Yumi mas mekem wanem blong Jehova i save halpem yumi? (Mo tu, yu luk pija.)

¹³ Samting we yumi mas mekem. Yumi mas traehad blong no stap yumi wan, from hemia i save mekem se yumi stat blong tingbaot yumi wan nomo, mo ol problem blong yumi. Mo tu, hemia i save blokem yumi blong mekem ol gudfala desisen. (Prov. 18:1) I tru, yumi evriwan i nidim blong stap yumi wan samtaem, speseli taem wan nogud samting i hapen long yumi. Be sipos yumi mekem olsem longtaem, maet yumi no save kasem help long ol man we Jehova i yusum blong sapotem yumi. Taswe nating se i had, i gud yumi akseptem help blong ol famle, ol fren, mo ol elda. Luk olgeta olsem rod we Jehova i yusum blong sapotem yu.—Prov. 17:17; Aes. 32:​1, 2.

JEHOVA BAMBAE I MEKEM YU HAREM GUD

14. ?Wanem sam situesen we i save mekem yumi fraet?

¹⁴ Samting we i had. Samtaem, maet yumi save fesem wan situesen we i mekem yumi fraet. Long Baebol, sam gudfala man blong God oli talem se i gat sam taem we oli harem nogud, oli fraet long ol enemi, mo oli fesem sam narafala traem. (Sam 18:4; 55:​1, 5) Long sem fasin, yumi tu yumi save fesem fasin agens long skul, long wok, long famle, o long gavman.  Maet yumi gat wan sik we i mekem yumi fraet blong ded. Long ol taem olsem, yumi save kam olsem ol pikinini we oli harem se i no moa gat rod. ?Be Jehova i mekem wanem blong halpem yumi long taem olsem?

15. ?Ol tok blong Ol Sam 94:​19, i mekem yumi sua long wanem?

¹⁵ Samting we Jehova i mekem. Hem i promes blong mekem yumi harem gud mo mekem tingting blong yumi i kwaet. (Ridim Ol Sam 94:19.) Tok blong sam ya i mekem yumi tingbaot wan smol gel we i fraet, mo i no save slip from noes blong bigfala ren mo tanda. Be papa blong hem i kam, i karem hem gogo i slip. Nating se ren mo tanda ya i gohed yet, be hem i glad mo i harem se hem i sefgud long han blong papa blong hem. Yes, taem yumi fesem wan trabol we i mekem yumi fraet, yumi nidim we Papa blong yumi long heven i karem yumi long han blong hem, gogo kasem we yumi harem se tingting blong yumi i kwaet. ?Olsem wanem Jehova i save mekem olsem long yumi?

16. ?Yumi mas mekem wanem blong Jehova i save mekem yumi harem gud? (Mo tu, yu luk pija.)

¹⁶ Samting we yumi mas mekem. Oltaem yumi mas spenem taem wetem Jehova, yumi prea long hem, mo ridim Tok blong hem. (Sam 77:​1, 12-14) Olsem nao, taem yu harem se yu wari, faswan tingting we i kam long yu, hemia blong lukluk i go long Papa blong yu long heven. Talemaot long Jehova, samting we i mekem yu fraet mo ol wari blong yu. Biaen letem hem i yusum Tok blong hem blong toktok long yu mo mekem yu harem gud. (Sam 119:28) Maet yu luk se i gat sam buk blong Baebol we i save leftemap tingting blong yu taem yu fraet. Eksampol, maet yu luk se buk blong Job, Ol Sam, Ol Proveb, mo ol tok blong Jisas long Matiu japta 6, i save leftemap tingting blong yu. Taem yu prea mo ridim Baebol, bambae yu harem gud.

17. ?Yumi save sua long wanem?

¹⁷ Yumi save sua se oltaem Jehova bambae i lukaot gud long yumi, taem yumi fesem wan hadtaem. Bambae yumi neva stap yumi wan. (Sam 23:4; 94:14) Jehova i promes blong lukaot gud long yumi, mekem yumi stap strong yumi no jenis, sapotem yumi, mo mekem yumi harem gud. Aesea 26:3 i tokbaot Jehova se: “Bambae yu lukaot gud long olgeta we oli dipen long yu fulwan. Bambae yu mekem we oli gohed blong gat pis, from we olgeta oli trastem yu.” Taswe i gud yu trastem Jehova, mo mekem samting we yu naf blong mekem blong Jehova i save halpem yu. Sipos yu mekem olsem, bambae yu gat paoa bakegen, nating se yu stap fesem ol hadtaem.