1. ?Yu yu tingbaot se Jehova i olsem wanem?

 ?SAMTAEM yu yu stap tingbaot se Jehova i olsem wanem? Taem yu prea long hem, ?yu tingbaot hem olsem wanem? Nating se yumi no luk Jehova, be Baebol i diskraebem hem long plante defren rod. Baebol i tokbaot hem olsem “wan san mo wan sil” mo “olsem wan faea we i save bonem evri samting.” (Sam 84:11; Hib. 12:29) Long wan vison we Esikel i luk, hem i tokbaot se Jehova i olsem ston ya safaea, i olsem wan aean we i saen, mo i olsem laet blong wan renbo. (Esik. 1:​26-28) Maet ol tok ya oli mekem yumi sapraes, mo yumi harem se yumi nating nomo.

2. ?From wanem maet i had blong yumi kam klosap long Jehova?

² Yumi no save luk Jehova, taswe maet i had blong bilivim se hem i lavem yumi. Samfala oli ting se Jehova i neva save lavem olgeta, from ol nogud samting we i bin hapen long laef blong olgeta. O maet yumi gat wan papa we i neva soemaot lav long yumi. Be Jehova i kasemsave long ol filing blong yumi mo i save from wanem i had blong yumi kam klosap long hem. Taswe blong halpem yumi, hem i yusum Tok blong hem Baebol blong soemaot long yumi se hem i wan God we i lavem man tumas.

3. ?From wanem yumi mas tokbaot moa lav we Jehova i gat?

³ Beswan tok blong diskraebem Jehova hemia lav. (1 Jon 4:8) Jehova hem i lav. Baebol i talem se God hem i lav. Evri samting we Jehova i mekem, hem i mekem from hem i gat lav. Mo hem i soemaot bigfala lav ya, i no long ol man nomo we oli lavem hem, be long olgeta ya tu we oli no lavem hem. (Mat. 5:​44, 45) Long stadi ya, bambae yumi tokbaot moa Jehova mo lav we hem i gat. Sipos yumi kasemsave moa long God, bambae yumi lavem hem moa.

JEHOVA I LAVEM YUMI TUMAS

4. ?Olsem wanem fasin blong Jehova blong lavem man tumas, i mekem yu harem gud? (Mo tu, yu luk pija.)

⁴ “Jehova i lavem man tumas.” (Jem. 5:11) Baebol i komperem  Jehova olsem wan mama we i lavem tumas pikinini blong hem. (Aes. 66:​12, 13) Traem tingbaot wan mama we i lukaot gud long pikinini blong hem. Hem i stap muvmuvum hem antap long ni blong hem, mo i toktok gud long hem blong mekem hem i harem gud. Taem hem i krae o i harem nogud, mama ya i meksua se hem i givim samting we pikinini ya i nidim. Taem yumi harem nogud, yumi save sua se Jehova i lavem yumi. Man blong raetem sam i talem se: “Taem mi wari bitim mak, yu mekem mi harem gud, mo yu mekem tingting blong mi i kwaet.”—Sam 94:19.

5. ?I minim wanem se Jehova i lavem man oltaem?

⁵ Jehova i lavem man oltaem. (Sam 103:8) Hem i no save lego yumi taem yumi mekem wan samting we i rong. Nesen blong Isrel i mekem Jehova i harem nogud plante taem, be taem oli tanem tingting blong olgeta, hem i mekem oli haremsave se hem i stil lavem olgeta. Eksampol, hem i talem long olgeta se: “Long ae blong mi, yu olsem wan sas samting, yu kasem ona, mo mi mi lavem yu.” (Aes. 43:​4, 5) Lav we God i gat, i neva jenis. Taswe, oltaem yumi save dipen long lav blong hem. Nating sipos yumi mekem wan bigfala sin, be Jehova i no save lego yumi. Taem yumi tanem tingting blong yumi mo yumi kambak long Jehova, bambae yumi luksave se hem i lavem yumi yet. Hem i promes se: “Bambae hem i fogif long wan fasin we i bigwan.” (Aes. 55:7) Baebol i talem se taem Jehova i fogivim yumi, hemia i olsem we ‘hem i mekem yumi gat niufala paoa.’—Wok 3:19.

6. ?Sekaraea 2:8 i talem wanem long saed blong Jehova?

⁶ Ridim Sekaraea 2:8. Jehova i lavem yumi tumas, taswe hem i kwik blong kasemsave long ol filing blong yumi mo i wantem protektem yumi. Hem i harem nogud taem i luk we yumi safa. From samting ya, taem yumi prea se: “Yu blokem gud mi, olsem we yu stap blokem pi blong ae blong yu,” Jehova i save ansarem prea blong yumi. (Sam 17:8) Ae i wan haf blong bodi we i impoten tumas. Taswe, taem Jehova i komperem yumi se yumi olsem pi blong ae blong hem, hemia i olsem we hem i stap talem se: ‘Eni man we i spolem yufala, ol man blong mi, i olsem we hem i spolem wan samting we i impoten tumas long mi.’

7. ?From wanem yumi mas trastem moa se Jehova i lavem yumi?

⁷ Jehova i wantem we yu trastem se hem i  lavem yu. Be hem i save se ol nogud samting we i hapen long yumi bifo, oli save mekem yumi ting se hem i neva save lavem yumi. O maet yumi stap fesem wan situesen naoia we i traem fasin blong yumi blong trastem se Jehova i lavem yumi. ?Wanem i save mekem yumi trastem moa se Jehova i lavem yumi? I gud yumi luk naoia, olsem wanem Jehova i soemaot lav long Jisas, ol tabu Kristin, mo long yumi evriwan.

OL SAMTING WE JEHOVA I MEKEM BLONG SOEMAOT SE HEM I GAT LAV

8. ?From wanem Jisas i sua se Papa blong hem i lavem hem?

⁸ Jehova mo Boe blong hem, i bin stap tugeta plante yia moa i bitim evri narafala man. Long ol bilian yia ya we tufala i stap tugeta long heven, tufala i fren gud tugeta mo tufala i lavlavem tufala. Long Matiu 17:​5, Jehova i talemaot klia se hem i lavem Jisas. Jehova i save talem nomo se, ‘Hemia nao man ya we mi glad long hem.’ Be hem i wantem we yumi savegud se hem i lavem Jisas tumas, taswe hem i singaot hem se ‘Pikinini blong mi we mi lavem hem tumas.’ Jehova i praod long Jisas mo long samting we bambae hem i mekem. (Efes. 1:7) Mo Jisas i no gat tu tingting se Jehova i lavem hem o nogat. Hem i sua fulwan se Jehova i lavem hem. Taswe, wetem strong tingting oltaem hem i talemaot se Papa blong hem i lavem hem.—Jon 3:35; 10:17; 17:24.

9. ?Wanem i soemaot se Jehova i lavem tumas ol tabu Kristin? Yu eksplenem. (Rom 5:5)

⁹ Jehova i soemaot lav tu long ol tabu Kristin. (Ridim Rom 5:5.) Makem gud tok ya “soemaot.” Wan buk i tokbaot vas ya se “hem i soemaot lav olsem we i kafsaedem wan smol reva i kam long yumi.” !Hemia wan naesfala pijatok blong soemaot se Jehova i lavem tumas ol tabu Kristin! Ol tabu Kristin oli save gud se ‘God i lavem’ olgeta. (Jud 1) Aposol Jon i tokbaot filing blong olgeta taem hem i raetem se: “!Yufala i luk, Papa i lavem yumi tumas nao i singaot yumi se yumi pikinini blong God!” (1 Jon 3:1) ?Olsem wanem? ?Jehova i lavem nomo ol tabu Kristin? Nogat. Jehova i pruvum se hem i lavem yumi evriwan.

10. ?Wanem bigfala samting we Jehova i mekem blong soemaot se hem i lavem yu?

¹⁰ ?Wanem bigfala samting we Jehova i mekem blong soemaot se hem i gat lav? Hemia ransom. !Ransom i olsem wan pruf se Jehova i lavem ol man moa i bitim eni narafala man! (Jon 3:16; Rom 5:8) Jehova i givim Boe blong hem, mo i letem hem i ded from olgeta man, blong mekem se hem i save fogivim sin blong yumi mo yumi save kam fren blong Hem. (1 Jon 4:10) Taem yumi tingting dip long praes ya we Jehova mo Jisas i givim, yumi naf blong kasemsave olsem wanem tufala i lavem yumi tumas. (Gal. 2:20) Jehova i no givim ransom blong mekem se i gat jastis nomo, be hem i givim presen ya from hem i gat lav. Jehova i pruvum se hem i lavem yumi taem hem i sakrefaesem wan samting we i impoten tumas long hem, hemia Jisas. Jehova i letem Boe blong hem i safa mo i ded long bihaf blong yumi.

11. ?Yumi lanem wanem long Jeremaea 31:3?

¹¹ Olsem we yumi luk finis, Jehova i no harem nomo se hem i lavem yumi, be hem i talemaot tu se hem i lavem yumi. (Ridim Jeremaea 31:3.) Jehova i pulum yumi kam long hem from we hem i lavem yumi. (Skelem wetem Dutronome 7:​7, 8.) I no gat wan samting o wan man i save tekemaot yumi long lav ya blong hem. (Rom 8:​38, 39) ?Naoia we yu save se Jehova i lavem yu, yu harem olsem wanem? Ridim Ol Sam 23, mo luk filing we Deved i gat, taem hem i save se Jehova i lavem hem, mo olsem wanem hemia i save gat paoa long yu tu.

 ?YU YU HAREM OLSEM WANEM TAEM YU SAVE SE JEHOVA I LAVEM YU?

12. ?Ol Sam 23 i tokbaot wanem?

¹² Ridim Ol Sam 23:​1-6. Long Ol Sam 23, Deved i talemaot se hem i trastem se Jehova i lavem hem mo i lukaotgud long hem. Deved i tokbaot gudfala frensip we hem i gat wetem Jehova we i Man Blong Lukaot Long Sipsip. Deved i harem se hem i sef, taem hem i letem Jehova i lidim hem, mo hem i dipen fulwan long Jehova. Deved i save se long ful laef blong hem Jehova bambae i soemaot se i lavem hem. ?Wanem i mekem Deved i sua olsem?

13. ?From wanem Deved i sua se Jehova i stap lukaot gud long hem?

¹³ “Bambae mi no sot long wan samting.” Deved i haremsave se Jehova i lukaot gud long hem, from we oltaem Jehova i givim samting we hem i nidim. Mo tu, Deved i save se Jehova i fren blong hem mo se Jehova i glad long hem. From samting ya, hem i sua se nomata wanem i save hapen long hem long fiuja, Jehova bambae i gohed blong lukaot gud long hem mo givim samting we hem i nidim. Deved i trastem se Jehova i lavem hem mo bambae i lukaot gud long hem. Hemia i mekem se hem i no wari, be hem i hapi mo i glad long samting we hem i gat.—Sam 16:11.

14. ?Olsem wanem Jehova i soemaot se hem i stap lukaot gud long yumi?

¹⁴ Jehova i lavem yumi mo i lukaot gud long yumi, speseli taem ol nogud samting oli hapen long laef blong yumi. Claire, a we i wok long Betel bitim 20 yia, i no save olsem wanem blong halpem famle blong hem taem oli fesem ol trabol. Papa blong hem i kasem strok, wan long ol sista blong hem i disfelosip, mo famle blong hem i lusum smol bisnes we oli gat, mo haos  blong olgeta. ?Olsem wanem Jehova i lukaot gud long olgeta? Claire i se: “Jehova i luk trabol we mifala i fesem mo i meksua se oltaem famle blong mi i gat samting we oli nidim evri dei. !Plante taem, Jehova i givim plante moa samting i bitim wanem we mifala i tingbaot! Oltaem mi tingbaot olsem wanem Jehova i halpem mifala mo bambae mi neva fogetem lav ya blong hem. Ol gudfala memori ya oli mekem se mi save gohed long wok blong Jehova, taem ol narafala trabol i hapen long laef blong mi.”

15. ?Wanem i mekem Deved i harem gud? (Mo tu, yu luk pija.)

¹⁵ “Hem i stap mekem mi mi harem gud.” Samtaem, Deved i harem nogud from ol trabol mo ol traem we hem i stap fesem. (Sam 18:​4-6) Be taem hem i save se Jehova i lavem hem mo i stap lukaot gud long hem, hemia i mekem hem i harem gud. Jehova i lidim fren blong hem we i taet, i go long “ples we i gat gras” mo “ol ples blong spel we i gat wota.” From samting ya, Deved i kasem paoa bakegen mo i naf blong gohed long wok blong Jehova.—Sam 18:​28-32.

16. ?Olsem wanem lav we Jehova i gat i mekem yu harem gud?

¹⁶ Tede tu i sem mak, “fasin blong Jehova blong lavem man oltaem nao i mekem se yumi no lus olgeta,” taem yumi fesem ol traem mo trabol long laef blong yumi. (Krae. 3:22; Kol. 1:11) Tingbaot eksampol blong Rachel. Hem i harem nogud tumas taem hasban blong hem i lego hem mo Jehova, long taem blong COVID-19 pandemik. ?Jehova i mekem wanem blong halpem hem? Hem i talem se: “Jehova i mekem mi haremsave se hem i lavem mi. Hem i givim ol gudfala fren we oli spenem taem wetem mi, oli karem kakae blong mi, sanem ol gudfala mesej mo ol vas blong leftemap tingting blong mi, smael long mi, mo oli gohed blong rimaenem mi se Jehova i stap lukaot gud long mi. Oltaem mi talem tangkiu long Jehova, from hem i givim wan bigfala famle long mi we oli lavem mi.”

17. ?From wanem Deved i “no fraet se wan samting i save spolem” hem?

¹⁷ “Mi no fraet se wan samting i save spolem mi.” Plante taem laef blong Deved i stap long denja, mo hem i fesem plante strong enemi. Be from we hem i save se Jehova i lavem hem, hem i harem se hem i sef mo se Jehova i stap protektem hem. Deved i haremsave se Jehova i stap wetem hem long evri situesen we hem i fesem, mo hemia i mekem tingting blong hem i kwaet. Taswe, hem i singsing se: “[Jehova] i tekemaot mi long olgeta samting we i mekem mi mi fraet.” (Sam 34:4) Nating se samtaem Deved i fraet, be hem i naf blong winim fraet ya from we hem i save se Jehova i lavem hem.

18. Taem yu save se Jehova i lavem yu, ?olsem wanem hemia i givhan long yu taem yu fraet?

¹⁸ Taem yumi save se Jehova i lavem yumi,  ?olsem wanem hemia i givhan long yumi taem yumi fesem ol situesen we i mekem yumi fraet? Wan paenia we nem blong Susi, i tokbaot filing we hem mo hasban blong hem i gat taem boe blong tufala i kilim hem wan i ded. Hem i se: “Taem wan nogud samting i hapen long laef blong yu, yu harem nogud mo yu fraet se sam moa nogud samting bambae i hapen long yu. Be lav we Jehova i gat, i mekem yumi harem se yumi sef mo se Jehova i stap protektem yumi.” Rachel, we yumi tokbaot hem finis, i se: “Wan naet, taem mi harem nogud bitim mak, mi wari mo mi fraet, mi krae strong i go long Jehova. Stret long taem ya, Jehova i mekem hat mo tingting blong mi i kwaet olsem we wan mama i mekem long bebi blong hem, nao mi save slip. Bambae mi neva fogetem taem ya.” Wan elda we nem blong Tasos, i spenem fo yia long kalabus from hem i no wantem joen long ami. ?Be olsem wanem hem i luksave se Jehova i lavem hem mo i lukaot gud long hem? Hem i se: “Jehova i givim moa samting long mi i bitim wanem we mi nidim. Hemia i mekem mi sua se mi save trastem hem fulwan. Mo tu, Jehova i yusum spirit blong hem blong mekem se mi stap glad nating se mi stap long rabis kalabus ya. Mo hemia i halpem mi blong luk se sipos mi trastem moa Jehova bambae mi haremsave moa se hem i lavem mi. Taswe, mi stat blong mekem wok blong fultaem paenia long kalabus.”

KAM KLOSAP LONG GOD WE I LAVEM YU

19. (1) ?Sipos yumi save se Jehova i lavem yumi, bambae yumi talem wanem long ol prea blong yumi? (2) ?Weswan long ol vas ya we yu laekem moa? (Yu luk bokis ya “ Ol Tok We i Halpem Yumi Blong Haremsave Se Jehova i Lavem Yumi.”)

¹⁹ !Ol ekspiriens we yumi tokbaot oli pruvum se Jehova, “God ya we i God blong lav,” i stap wetem yumi! (2 Kor. 13:11) Hem i intres long yumi wanwan. Yumi sua se “fasin blong Hem blong lavem man oltaem i protektem” yumi. (Sam 32:10) Taem yumi luk olsem wanem Jehova i lukaot gud moa long yumi, bambae yumi kam klosap moa long hem. Yumi no fraet blong kam long hem mo talemaot long hem se yumi wantem we hem i soemaot lav long yumi. Yumi save talemaot olgeta wari blong yumi long hem, mo trastem se hem i kasemsave long ol filing blong yumi, mo i wantem halpem yumi.—Sam 145:​18, 19.

20. ?Olsem wanem lav we Jehova i gat, i pulum yumi kam klosap long hem?

²⁰ Long wan dei we i kolkol, yumi harem gud blong kam klosap long wan faea blong stap wom. Long sem fasin, yumi kam klosap long Jehova blong harem gud long lav blong hem. Nating se lav blong Jehova i strong, be i save mekem man i harem gud tu. Taswe, yu mas glad from we Jehova i lavem yu. Mo biaen yumi evriwan i save talem se: !“Mi mi lavem Jehova”!—Sam 116:1.