Samfala oli gruap long ol kalja we ol man oli tritim woman se i daon moa long man. Eksampol, Hans, wan eria elda long Bolivia, i talem se: “Sam man oli gruap long wan kalja we ol man oli praod mo oli ting se oli impoten moa i bitim ol woman. Taswe, oli no respektem ol woman.” Shengxian, wan elda long Taewan, i se: “Long ples blong mi, plante man oli ting se ol woman oli no gat raet blong talemaot tingting blong olgeta long ol man. Sipos wan man i talemaot tingting blong wan woman long wan samting, ol fren blong hem bambae oli luklukdaon long hem.” Sam narafala man oli mekem sam defren samting blong soemaot se oli no laekem ol woman. Eksampol, maet oli talem sam fani jok we i daonem ol woman.

Be yumi glad se nomata wanem kalja we man i gruap long hem, be hem i save jenis, mo sakemaot tingting ya se man i impoten moa long woman. (Efes. 4:​22-24) Hem i save mekem olsem, sipos i folem eksampol blong Jehova. Long atikol ya, bambae yumi tokbaot olsem wanem Jehova i tritim ol woman, olsem wanem ol brata oli save folem fasin blong Jehova blong tritim gud ol woman, mo olsem wanem ol elda oli save tekem faswan step blong soemaot respek long ol sista.

?JEHOVA I TRITIM OL WOMAN OLSEM WANEM?

Jehova i soemaot wan gudfala eksampol blong tritim gud ol woman. Hem i wan Papa we i gat sore mo i lavem evri pikinini blong hem. (Jon 3:16) Mo hem i luk ol sista we oli holemstrong long hem se oli sas. Traem luk sam rod we Jehova i soemaot se hem i lavem mo i respektem ol woman.

Hem i tritim ol man mo woman sem mak nomo. Jehova i krietem man mo woman long pija blong  hem. (Jen. 1:27) Hem i no krietem man se i waes moa o gat gudhan moa i bitim woman, o se hem i laekem moa man i bitim woman, nogat. (2 Kron. 19:7) Hem i krietem tufala long wan fasin we tufala tugeta i naf blong kasemsave long ol trutok blong Baebol, mo folem ol gudfala fasin blong hem. Mo tu, Jehova i luk ol man mo woman we oli bilif long hem se oli sem mak nomo, nomata se oli blong laef olwe long paradaes long wol ya, o blong wok olsem ol king mo pris long heven. (2 Pita 1:​1, fut.) Yes, i klia se Jehova i no mekem i gud moa long man i bitim woman.

Hem i lesin long olgeta. Jehova i tingbaot ol filing mo problem we ol woman oli fesem. Eksampol, hem i lesin mo i ansa long ol prea blong Rejel mo Hana. (Jen. 30:22; 1 Saml. 1:​10, 11, 19, 20) Mo tu, Jehova i pulum ol man blong oli raetem long Baebol, stori blong ol man we oli lesin long ol woman. Eksampol, Ebraham i obei, taem Jehova i talem se hem i mas lesin long Sera. (Jen. 21:​12-14) King Deved i lesin long Abigel. Long taem ya, Deved i harem olsem se Jehova nao i sanem Abigel blong i kam toktok long hem. (1 Saml. 25:​32-35) Jisas tu i folem ol fasin blong Papa blong hem, taem i lesin long mama blong hem, Meri. (Jon 2:​3-10) Ol eksampol ya oli soemaot klia se Jehova i respektem ol woman, taem hem i lesin long olgeta.

Hem i trastem olgeta. Eksampol, Jehova i trastem Iv, taem i givim wok ya long hem blong i givhan blong lukaot gud long fulwol ya. (Jen. 1:28) Hemia i soemaot se Jehova i no luk Iv se i daon moa long hasban blong hem, Adam, be hem i olsem patna blong Adam. Mo tu, Jehova i trastem tufala woman profet ya Debora mo Hulda blong givim advaes long ol man blong Hem, inkludum wan jaj mo wan king. (Jaj. 4:​4-9; 2 King 22:​14-20) Tede, Jehova i trastem ol Kristin woman blong oli mekem wok blong hem. Oli mekem wok olsem ol pablisa, paenia, mo misinari. Oli givhan blong disaenem ol samting, bildim mo mentenem ol Haos Kingdom, mo ol bilding blong branj ofis. Sam oli wok long Betel, mo sam narafala long ol rimot translesen ofis. Ol sista ya, oli olsem wan bigfala ami we Jehova i yusum blong mekem wil blong hem. (Sam 68:11) Yes, i klia se Jehova i no luk ol woman se oli slak o se oli no naf.

?OLSEM WANEM OL BRATA OLI SAVE FOLEM FASIN BLONG JEHOVA BLONG TRITIM GUD OL WOMAN?

Ol brata, blong faenemaot sipos yumi stap tritim gud ol Kristin sista o nogat, yumi mas jekem gud ol tingting mo aksen blong yumi. Be blong mekem olsem, yumi nidim help. Wan dokta i save yusum wan X-ray masin blong faenemaot sipos hat blong wan man i wok gud o nogat. Long sem fasin, wan gudfala fren mo Tok blong God i save halpem yumi blong faenemaot sipos tingting we yumi gat long ol woman, i mekem Jehova i glad o nogat. ?Yumi save mekem wanem blong kasem help?

Askem wan gudfala fren. (Prov. 18:17) Askem wan fren we yu trastem, i kaen, mo i gat stret tingting se: “?Yu luk se mi mi stap tritim ol sista olsem wanem? ?Yu luk se mi respektem olgeta? ?I gat sam samting we mi save mekem blong tritim gud ol sista?” Sipos hem i talem sam samting we yu mas mekem blong kam gud moa, yu no mas harem nogud o mekem eskius. Be i gud yu rere blong mekem sam jenis.

Stadi long Tok blong God. Beswan rod blong save sipos yumi stap tritim gud ol sista, hemia blong jekem ol tingting mo aksen blong yumi, blong luk sipos i laenap wetem Tok blong God o nogat. (Hib. 4:12) Taem yumi stadi Baebol, yumi luk stori blong ol man we oli tritim gud o tritim nogud ol woman. Ale, yumi save komperem aksen blong olgeta wetem blong yumi. Be yumi mas lukaot se yumi no luk wan vas blong Baebol nomo mo yusum blong sapotem wan rong tingting long saed blong ol woman. I gud yumi jekem plante vas we i tokbaot olsem wanem blong tritim ol woman. Long rod ya, bambae yumi naf blong kasemsave tingting blong God long ol woman. Eksampol, folem 1 Pita 3:​7, hasban i mas ‘ona long waef blong hem from we woman i olsem graonpot we i save brok isi nomo.’ b ?Tok ya i min se woman i daon moa long man, i no waes, o i no naf blong mekem samting olsem man? !Nogat! Traem skelem ol tok blong Pita wetem  ol tok ya long Galesia 3:​26-29, we i se Jehova i jusum ol woman wetem ol man blong oli rul wetem Jisas long heven. Taem yumi stadi Baebol mo yumi askem wan gudfala fren blong i talemaot tingting blong hem long fasin blong yumi blong tritim ol woman, yumi save lanem blong respektem moa ol sista.

?OLSEM WANEM OL ELDA OLI SOEMAOT SE OLI RESPEKTEM OL SISTA?

Ol brata long kongregesen oli save lanem blong tritim ol sista wetem respek, taem oli folem eksampol blong ol elda. ?Olsem wanem ol elda oli soemaot se oli respektem ol sista? Hemia sam samting we oli save mekem.

Oli talem gudfala toktok long ol sista. Aposol Pol i soemaot wan gudfala eksampol blong ol elda oli folem. Long leta we hem i raetem i go long kongregesen long Rom, hem i talem gudfala toktok long saed blong sam sista. (Rom 16:12) I sua se ol sista ya oli glad tumas taem oli ridimaot leta ya blong Pol long kongregesen. Long sem fasin, ol elda mas talem ol gudfala toktok long ol sista from ol gudfala fasin mo wok we oli mekem blong Jehova. Hemia i save mekem ol sista oli haremsave se kongregesen i respektem mo i tinghae long olgeta. Ol gudfala toktok olsem, maet hemia nao stret samting we ol sista oli nidim, blong oli save gohed long wok blong Jehova.—Prov. 15:23.

Taem ol elda oli wantem talem wan gudfala toktok long ol sista, i gud oli tok tru mo stret. ?From wanem? Wan sista we nem blong hem Jessica, i talem se: “Taem ol brata oli talem long wan sista se ‘tangkiu long gudfala wok blong yu,’ hemia i gud. Be mifala i glad moa taem oli talem gudfala tok long mifala from stret samting we mifala i mekem, olsem tijim gud ol pikinini blong oli sidaon kwaet long miting, o go from wan Baebol studen blong i kam long miting.” Taem ol elda oli talem ol gudfala toktok long ol sista from stret samting we oli mekem, oli harem se kongregesen i nidim olgeta mo i tinghae long olgeta.

 Oli lesin long ol sista. Ol elda we oli gat tingting daon, oli luksave se ol sista tu oli gat ol gudfala tingting. Taswe, oli askem tingting blong olgeta long sam samting, mo oli lesin gud taem oli toktok. Taem oli mekem olsem, oli stap enkarejem ol sista mo hemia i mekem i gud long olgeta wan tu. ?From wanem? Gerardo, wan elda we i wok long Betel, i talem se: “Taem mi askem tingting blong ol sista long saed blong wan samting, hemia i givhan long mi blong kam gud moa long wok blong mi. Plante taem, ol sista oli mekem wan wok longtaem moa i bitim ol brata.” Long kongregesen, plante sista oli paenia, taswe oli save plante samting long saed blong ol man long teritori blong olgeta. Wan elda we nem blong hem Bryan, i talem se: “Ol sista oli gat plante gudfala fasin mo gudhan long wan wok, mo hemia nao samting we oganaesesen i nidim. !Taswe, i gud yu askem help long olgeta!”

Ol elda we oli waes, oli no kwik blong sakemaot ol tingting blong ol sista. ?From wanem? Wan elda we nem blong hem Edward, i talem se: “Ol tingting mo ekspiriens blong wan sista i save halpem wan brata blong i luk ful pija blong wan situesen, mo i save halpem hem tu blong wokem fasin ya blong gat sore.” (Prov. 1:5) Mo nating se wan elda i no folem tingting blong wan sista, be hem i save talem tangkiu long hem from i talemaot tingting blong hem, mo i serem save blong hem.

Oli trenem ol sista. Ol elda we oli luksave samting, oli lukaot ol janis blong trenem ol sista. Eksampol, oli save tijim ol sista blong lidim miting blong prij, sipos ol brata we oli baptaes oli no stap. Oli save trenem olgeta blong yusum ol tul o masin, blong oli save givhan long sam projek blong mentenem mo bildim sam bilding blong oganaesesen. Long Betel, ol ovasia oli trenem ol sista blong mekem ol wok olsem mentenens, pem ol samting, akaon, mekem ol program long kompiuta, mo plante moa. Taem ol elda oli trenem ol sista, oli soemaot se long lukluk blong olgeta, ol sista oli naf blong mekem ol wok ya mo oli trastem olgeta.

Plante sista oli yusum trening we oli kasem, blong givhan long ol narafala. Eksampol, sam sista oli yusum trening we oli kasem long konstraksen, blong givhan long ol narafala blong bildim bak haos blong olgeta afta long wan disasta. Ol narafala sista oli yusum trening we oli kasem blong prij long ol pablik ples, blong trenem ol narafala tu blong mekem olsem. ?Wanem tingting blong ol sista long ol elda ya we oli trenem olgeta? Wan sista we nem blong hem Jennifer, i talem se: “Taem mi wok long wan projek blong bildim wan Haos Kingdom, wan brata we i stap lidim ol wok i tekem taem blong trenem mi. Hem i makem ol wok we mi mekem, mo i talem gudfala toktok long mi from. Mi laekem blong wok wetem hem, from mi haremsave se hem i tinghae long mi mo i trastem mi.”

FRUT WE I KAMAOT TAEM OL BRATA OLI TRITIM OL WOMAN OLSEM WE OLI SISTA BLONG OLGETA

!Yumi lavem ol Kristin sista olsem we Jehova i lavem olgeta! Taswe yumi tritim olgeta olsem we yumi famle. (1 Tim. 5:​1, 2) Yumi tinghae long olgeta mo yumi praod blong wok wetem olgeta long wok blong Jehova. Mo yumi glad tumas taem oli haremsave se yumi lavem olgeta mo sapotem olgeta. Wan sista we nem blong hem Vanessa, i se: “Mi talem bigfala tangkiu long Jehova from mi kam pat blong oganaesesen blong hem, we i fulap long ol brata we oli leftemap tingting blong mi bigwan.” Wan sista long Taewan, i se: “Mi talem bigfala tangkiu long Jehova mo oganaesesen blong hem, from oli tinghae long ol woman mo respektem filing blong olgeta. Hemia i mekem bilif blong mi i kam strong moa, mo mi glad moa long nambawan privilej ya blong kam pat blong oganaesesen blong Jehova.”

!I sua se Jehova i glad tumas taem i luk se ol brata oli traehad blong luk mo tritim ol woman olsem we Hem i mekem! (Prov. 27:11) Wan elda long Skotlan we nem blong hem Benjamin, i se: “Plante man long wol tede oli no moa respektem ol woman. Taswe taem ol sista oli kam insaed long Haos Kingdom, yumi wantem oli haremsave se yumi respektem mo lavem olgeta.” I gud yumi evriwan i traehad blong folem eksampol blong Jehova, blong tritim gud ol sista, lavem mo respektem olgeta olsem we i stret blong mekem.—Rom 12:10.