STADI 3
SINGSING 35 “Ol Samting We Oli Moa Impoten”
Mekem Ol Desisen We Jehova i Glad Long Hem
“Fasin blong fraet long Jehova hem i stat blong waes, mo ol save long saed blong Man Ya We i Tabu We i Tabu, i mekem man i kasemsave samting.”—PROV. 9:10.
BIGFALA TINGTING
Bambae yumi luk olsem wanem blong yusum save, fasin blong kasemsave samting, mo luksave samting blong mekem ol waes desisen.
1. ?Wanem had samting we yumi evriwan i mas mekem?
EVRI dei yumi nidim blong mekem ol desisen. Sam long ol desisen ya oli isi olsem, wanem blong kakae long brekfas o wanem taem blong go slip. Be i gat sam narafala desisen we i had moa. Maet ol desisen ya oli save gat paoa long helt blong yumi, oli save mekem yumi mo famle blong yumi i glad o nogat, o i save gat paoa long wosip blong yumi. Yumi wantem se ol desisen blong yumi oli mekem yumi mo ol famle blong yumi i harem gud. Antap long hemia, yumi hop se ol desisen blong yumi bambae i mekem Jehova i glad.—Rom 12:1, 2.
2. ?Wanem ol samting we i save halpem yumi blong mekem waes desisen?
2 Yu save mekem wan gudfala desisen sipos yu (1) faenemaot moa save, (2) faenemaot tingting blong Jehova long saed wan samting, mo (3) tingting gud long ol desisen blong yu. Long stadi ya, bambae yumi tokbaot ol samting ya wanwan, mo luk olsem wanem yumi save trenem yumi wanwan blong luksave samting.—Prov. 2:11.
FAENEMAOT MOA SAVE
3. Tokbaot from wanem yu nidim blong faenemaot moa save bifo we yu mekem wan desisen.
3 Faswan samting we i save halpem yu blong mekem wan gudfala desisen, hemia blong faenemaot moa save fastaem. ?From wanem hemia i impoten? Traem tingbaot wan man we i go luk dokta from we hem i kasem wan bigfala sik. ?Yu ting se bambae dokta ya i kwik blong givim meresin long sikman ya, we hem i no tekem taem blong jekem hem fastaem o askem ol kwestin long hem? I sua se nogat. Yu tu, bambae yu mekem ol gudfala desisen sipos yu faenemaot moa save fastaem long saed blong samting we yu mas mekem desisen long hem. ?Olsem wanem blong mekem olsem?
4. Folem Ol Proveb 18:13, ?yu save mekem wanem blong faenemaot moa save long saed blong wan samting? (Mo tu, yu luk pija.)
4 Plante taem blong faenemaot moa save long saed blong wan samting, i gud blong askem ol kwestin. Traem tingbaot sipos wan man i invaetem yu blong go long wan lafet. ?Bambae yu go? Sipos yu no save se hu i bos blong lafet ya mo wanem bambae i hapen long taem ya, i gud yu askem long hem ol kwestin olsem: “?Wetaem mo weples bambae oli mekem lafet ya? ?Bambae i gat plante man? ?Hu bambae i lukaot long ol samting we i hapen long lafet ya? ?Hu bambae i stap long lafet ya? ?Bambae oli mekem wanem long taem ya? ?Bambae i gat alkol?” Ansa blong ol kwestin ya bambae i halpem yu blong mekem wan waes desisen.—Ridim Ol Proveb 18:13.
Faenemaot moa save taem yu askem ol kwestin (Haf 4) a
5. ?Yu mas mekem wanem afta we yu faenemaot moa save long saed blong wan samting?
5 Afta we yu faenemaot moa save, i gud blong pijarem taem ya. Eksampol, ?olsem wanem sipos yu save se long lafet ya, bambae i gat sam man we oli no stap folem ol rul blong Baebol, mo bambae i gat alkol be i no gat man blong kontrolem ol samting we bambae i hapen long taem ya? ?Yu yu luksave se lafet ya i save kam wan krangke lafet? (1 Pita 4:3) ?Mo olsem wanem sipos taem blong lafet ya i save spolem program blong yu blong go long miting o wok blong prij? Taem yu tekem taem blong pijarem taem ya, bambae yu naf blong mekem wan gudfala desisen. Be i gat wan narafala samting we yumi mas mekem. Naoia, yu faenemaot evri samting long saed blong lafet ya, ?be wanem tingting blong Jehova long saed ya?—Prov. 2:6.
FAENEMAOT TINGTING BLONG JEHOVA
6. Folem Jemes 1:5, ?from wanem yumi mas prea blong Jehova i halpem yumi?
6 Askem Jehova blong i halpem yu blong kasemsave long tingting blong hem. Jehova i promes blong givim waes, blong yumi naf blong luksave se desisen blong yumi bambae i mekem hem i glad o nogat. Hem i ‘glad blong givim waes ya long olgeta man, mo hem i no save daonem man we i askem long hem.’—Ridim Jemes 1:5.
7. ?Olsem wanem blong faenemaot tingting blong Jehova? Talem wan eksampol.
7 Afta we yu askem Jehova blong i lidim yu, i gud yu traem faenemaot ansa blong hem. Eksampol, traem tingbaot se taem yu stap travel mo yu lusum rod, maet bambae yu askem wan man we i laef long eria ya blong i halpem yu. ?Be bambae yu aot long hem bifo we hem i ansa long yu? I sua se nogat. Bambae yu lesin gud taem hem i stap eksplenem ol rod long yu. Long sem fasin, afta we yu askem waes long Jehova, i gud yu traem faenemaot ol loa mo ol stamba trutok blong Baebol we i stret long desisen blong yu. Eksampol, taem yu stap tingting se bambae yu joen long lafet ya we yumi tokbaot antap o nogat, maet i gud blong tingbaot samting we Baebol i talem long saed blong ol rabis lafet, ol rabis fren, mo tingting ya blong putum Kingdom fasples long ol samting we yu nomo yu wantem.—Mat. 6:33; Rom 13:13; 1 Kor. 15:33.
8. ?Yu save mekem wanem sipos yu nidim help blong faenemaot ol save we yu nidim? (Mo tu, yu luk pija.)
8 Sam samtaem, maet yumi nidim we narafala i halpem yumi blong faenemaot ol save we yumi nidim. Long taem olsem, yumi save askem advaes long wan brata o sista we i gat ekspiriens. Be tu, yumi mas mekem prapa risej blong yumi. Yumi gat plante gudfala save we i stap long ol buk blong yumi olsem, Buk Blong Risej mo Ol Vas Blong Givhan Long Kristin Laef. Tingbaot se mak blong yumi, hemia blong mekem wan desisen we bambae i mekem Jehova i glad.
Faenemaot tingting blong Jehova (Haf 8) b
9. ?Olsem wanem yumi save mekem wan desisen we Jehova i glad long hem? (Efesas 5:17)
9 ?Olsem wanem yumi save mekem wan desisen we Jehova i glad long hem? Fastaem, yumi mas save gud Jehova. Baebol i talem se: “Ol save long saed blong Man Ya We i Tabu We i Tabu, i mekem man i kasemsave samting.” (Prov. 9:10) Yes, yumi kasemsave samting taem yumi save gud ol fasin blong Jehova, stamba tingting blong hem, mo ol samting we hem i laekem o i no laekem. Taswe, i gud yu askem yu wan se: ‘?Folem ol samting we mi save long saed blong Jehova, wanem desisen we mi save mekem we bambae i mekem hem i glad?’—Ridim Efesas 5:17.
10. ?Wanem stamba trutok blong Baebol we i moa impoten i bitim kastom o kalja we yumi gruap long hem?
10 Blong mekem Jehova i glad, samtaem yumi mas mekem samting we bambae i mekem ol famle mo fren blong yumi oli harem nogud. Eksampol, maet sam perens oli fosem gel blong olgeta blong i maredem wan man we i gat plante sas samting, o wan man we i save givim bigfala mane long olgeta from gel ya, nating se man ya i no gohed gud long saed blong spirit. I tru, oli wantem faenem wan man we bambae i lukaot gud long gel blong olgeta, ?be man ya bambae i naf blong halpem gel ya blong i gohed gud long saed blong spirit? ?Wanem tingting blong Jehova? Yumi faenem ansa long Matiu 6:33. Long vas ya, Jisas i pulum ol Kristin blong oli gohed blong ‘lukaot Kingdom fastaem.’ Nating se yumi ona long ol perens blong yumi mo yumi respektem ol man long komuniti, be samting we i moa impoten hemia blong mekem Jehova i glad.
TINGTING GUD LONG DESISEN WE BAMBAE YU MEKEM
11. Folem Filipae 1:9, 10, ?wanem fasin i save halpem yu blong tingting gud long desisen we bambae yu mekem?
11 Afta we yu faenemaot ol stamba trutok blong Baebol we i stret long desisen blong yu, i gud yu tekem taem blong tingting gud long desisen we bambae yu mekem. (Ridim Filipae 1:9, 10) Fasin luksave bambae i givhan long yu blong faenemaot samting we bambae kamaot from ol desisen blong yu. Samtaem i isi blong mekem wan desisen, be i no evri desisen we i isi. Fasin luksave bambae i halpem yu blong mekem ol waes desisen, nating se i had.
12-13. ?Olsem wanem fasin luksave i save halpem yu blong mekem wan desisen long saed blong wok?
12 Traem tingbaot se yu stap lukaotem wan wok blong sapotem famle blong yu, nao yu faenem tu defren wok. Ale, yu tingtingbak long ol save we yu faenemaot, olsem wok ya i wanem kaen wok, program blong hem, hamas taem we bambae yu tekem blong kasem ples blong wok, mo sam moa narafala samting olsem. Tufala wok ya i laenap wetem ol stamba trutok blong Baebol. Maet yu laekem wan moa long narawan, from we hemia wan wok we yu laekem blong mekem o from we bambae yu kasem bigfala mane from. Be i gat wan narafala samting blong tingbaot bifo we yu mekem desisen.
13 Eksampol, ?tufala wok ya bambae i spolem program blong yu blong go long ol miting? ?Bambae oli kakae taem we yu gat blong givim samting we famle blong yu i nidim long saed blong filing mo spirit? Sipos yu askem ol kwestin olsem, bambae yu naf blong putum “ol samting we oli moa impoten” long fasples, olsem wosip blong yu mo ol samting we famle blong yu i nidim, i bitim we yu traehad blong kasem moa mane. Biaen yu save mekem wan desisen we Jehova bambae i blesem yu from.
14. ?Olsem wanem fasin luksave mo lav bambae i halpem yumi blong no mekem narafala i stambol?
14 Fasin luksave bambae i givhan long yumi tu blong tingbaot se ol desisen blong yumi oli save gat paoa long ol narafala. Taswe, bambae yumi naf blong blokem ol samting we i save “mekem narafala man i stambol.” (Fil. 1:10) Hemia i impoten taem yumi mekem prapa desisen blong yumi long saed blong klos mo hea. Eksampol, maet yumi laekem wan stael blong klos o hea. ?Be olsem wanem sipos ol narafala insaed o aotsaed long kongregesen oli harem nogud from stael ya? Fasin luksave bambae i halpem yumi blong respektem filing blong olgeta. Lav bambae i pulum yumi blong tingbaot “ol narafala man” mo blong yumi gat tingting daon. (1 Kor. 10:23, 24, 32; 1 Tim. 2:9, 10) Nao bambae yumi naf blong mekem desisen we i soemaot se yumi lavem mo respektem ol narafala.
15. ?Yu mas mekem wanem bifo we yu mekem wan impoten desisen?
15 Sipos yu gat wan bigfala desisen blong mekem, i gud yu tingbaot frut we bambae i kamaot from desisen ya. Jisas i talem se yumi mas “kaontem praes blong ol samting” fastaem. (Luk 14:28) I gud yu tingbaot hamas taem mo samting we yu nidim, mo traehad we bambae yu mekem blong desisen ya i go gud. Long sam desisen, maet yu mas askem long famle blong yu blong oli talem samting we olgeta wanwan oli save mekem blong sapotem desisen ya. ?From wanem hemia i impoten? From we hemia i save halpem yu blong luksave sipos yu save jenisim sam samting blong desisen ya i go gud, o maet i moa waes blong mekem wan narafala desisen. Mo taem yu askem tingting blong ol famle blong yu mo yu lesin gud long olgeta, bambae oli glad blong halpem yu blong mekem desisen ya i go gud.—Prov. 15:22.
MEKEM WAN DESISEN WE BAMBAE I GO GUD
16. ?Wanem ol rod we bambae i halpem yu blong mekem se desisen blong yu i go gud? (Mo tu, yu luk bokis ya “ ?Olsem Wanem Blong Mekem Ol Waes Desisen.”)
16 Sipos yu folem ol rod ya we yumi tokbaot antap, naoia yu rere blong mekem wan waes desisen. Yu gat ol save we yu nidim, mo yu faenemaot ol stamba trutok blong Baebol we bambae i halpem yu blong mekem wan desisen we Jehova i glad long hem. Naoia yu save askem Jehova blong i halpem yu blong mekem desisen blong yu i go gud.
17. ?Wanem impoten samting we i save halpem yu blong mekem ol gudfala desisen?
17 Nating se yu bin mekem plante gudfala desisen finis, be yu mas tingbaot se blong mekem ol gudfala desisen, yu no mas dipen long prapa save o ekspiriens blong yu, be yu mas dipen long waes blong Jehova. Hem nomo i save givim trufala save, fasin blong kasemsave samting, mo luksave samting. Ol fasin ya oli kamaot from waes. (Prov. 2:1-5) Jehova i save halpem yu blong mekem ol desisen we bambae i mekem hem i glad.—Sam 23:2, 3.
SINGSING 28 Man We i Fren Blong Jehova
