STADI 4
SINGSING 18 Tangkiu From Sakrefaes Blong Jisas
?Ransom i Tijim Yumi Long Wanem?
“God i soemaot lav ya long yumi.”—1 JON 4:9.
BIGFALA TINGTING
Long stadi ya, bambae yumi luk olsem wanem ransom i soemaot ol gudfala fasin blong Jehova God mo Jisas Kraes.
1. ?From wanem i gud we evri yia yumi joen blong mekem Memoriol blong ded blong Kraes?
I SUA se yu tu yu agri se ransom i wan sas presen. (2 Kor. 9:15) From we Jisas i givim laef blong hem from yumi, yu save kam fren blong Jehova God. Mo tu, yu save gat janis ya blong kasem laef olwe. Yumi gat plante risen blong talem tangkiu long Jehova, we hem nao i givim ransom from we hem i lavem yumi tumas. (Rom 5:8) Taswe blong halpem yumi blong gat tangkiu mo no ting nating long ransom ya, Jisas i talem se evri yia, yumi mas mekem Memoriol blong tingbaot ded blong hem.—Luk 22:19, 20.
2. ?Bambae yumi tokbaot wanem long stadi ya?
2 Long yia ya, bambae yumi mekem Memoriol long Sarede 12 Eprel, 2025. I sua se yumi evri wan i plan blong joen long taem ya. Bambae yumi kasem plante gudfala samting, sipos long wik blong Memoriol yumi tekem taem blong tingting dip a long ol samting we Jehova mo Boe blong hem i mekem blong yumi. Long stadi ya, bambae yumi tokbaot samting we ransom i tijim long saed blong Jehova mo Jisas. Mo nekis stadi, bambae yumi luk ol blesing we yumi save kasem from ransom, mo olsem wanem yumi save soemaot se yumi glad long ransom.
?RANSOM I TIJIM WANEM LONG SAED BLONG JEHOVA
3. ?Olsem wanem ded blong wan man nomo i save mekem se plante milian man oli kam fri? (Mo tu, yu luk pija.)
3 Ransom i tijim yumi se Jehova i wan God we i laekem jastis. (Dut. 32:4) ?From wanem yumi talem olsem? Traem tingbaot: Fasin blong Adam blong no obei, i mekem se sin mo ded i kasem yumi. (Rom 5:12) Blong yumi kam fri long sin mo ded, Jehova i sanem Jisas i kam blong i ded mo givim laef blong hem olsem wan ransom. ?Be olsem wanem sakrefaes blong wan man nomo we i stret gud olgeta, i save mekem se plante milian man oli kam fri? Aposol Pol i eksplenem se: “Plante man oli kam ol man blong mekem sin from we wan man ya nomo [Adam] i no obei. Long sem fasin, plante man bambae oli kam stret man from we wan man ya nomo [Jisas] i obei.” (Rom 5:19; 1 Tim. 2:6) Tok blong Pol i soemaot se sin mo ded i kasem yumi, from we wan man we i stret gud olgeta i no bin obei long God. Taswe, yumi nidim wan man we i stret gud olgeta, we i obei long God blong i mekem yumi kam fri long sin mo ded.
Wan man nomo i mekem se sin mo ded i kasem yumi. Mo tru long wan man nomo, yumi kam fri (Haf 3)
4. ?From wanem Jehova i no save letem nomo se ol pikinini blong Adam we hat blong olgeta i stret oli kasem laef olwe?
4 ?I rili nidim blong Jehova i sanem Jisas i kam blong i ded from yumi? ?Jehova i no save letem nomo blong ol pikinini blong Adam we hat blong olgeta i stret oli kasem laef olwe? Long lukluk blong yumi ol man, maet hemia nao beswan rod blong stretem problem ya. Be sipos Jehova i mekem olsem, hemia bambae i soemaot se hem i no gat jastis, mo se hem i ting nating long sin we Adam i mekem. Mo tu hemia bambae i no soemaot nating se Jehova i wan God blong jastis.
5. ?From wanem yumi sua we oltaem Jehova bambae i mekem samting we i stret?
5 ?Olsem wanem sipos Jehova i no givim ransom mo i no soemaot jastis, be i letem ol pikinini blong Adam we oli no stret gud oli laef olwe? Ol man bambae oli save gat tu tingting mo wari se Jehova bambae i no soemaot jastis long ol narafala samting tu. Eksampol, maet oli gat tu tingting se Jehova bambae i no save holemtaet ol promes blong hem. Yumi no nid blong wari long ol samting. ?From wanem? From we Jehova i mekem wan bigfala samting finis from yumi, hem i givim stret boe blong hem blong sevem yumi. Taswe, yumi save sua se oltaem Jehova bambae i mekem samting we i stret.
6. ?Olsem wanem ransom i soemaot se Jehova i lavem yumi? (1 Jon 4:9, 10)
6 Ransom i halpem yumi blong kasemsave se Jehova i God blong jastis, mo se hem i lavem yumi tumas. (Jon 3:16; ridim 1 Jon 4:9, 10.) Jehova i givim ransom from we hem i wantem se yumi kasem laef olwe, mo blong yumi save joen long bigfala famle blong hem. Traem tingbaot: Taem Adam i mekem sin, Jehova i sakemaot hem, mo hem i no moa stap insaed long famle blong Hem. From samting ya, taem yumi bon, yumi evriwan i no stap insaed long famle blong Jehova. Be tru long ransom, Jehova i fogivim ol sin blong yumi, mo bambae hem i tekem yumi i kam insaed long bigfala famle blong hem sipos yumi soemaot bilif mo obei long hem. Tede tu, yumi save gat wan gudfala frensip wetem Jehova mo wetem ol man we oli wosipim hem. !I tru nomo se Jehova i lavem yumi tumas!—Rom 5:10, 11.
7. ?Olsem wanem ol samting we Jisas i gotru long hem, i halpem yumi blong kasemsave se Jehova i lavem yumi?
7 Yumi kasemsave se Jehova i lavem yumi, taem yumi tingbaot filing blong hem, taem i luk we Boe blong hem i safa. Setan i talem se i no gat wan man blong God we i save holemstrong long hem, taem hem i kasem trabol. Taswe, blong pruvum se Setan i rong, Jehova i letem blong Jisas i safa bifo we i ded. (Job 2:1-5; 1 Pita 2:21) Jehova i luk taem ol man oli stap jikim Jisas, ol soldia oli wipim hem, mo nilim hem long pos. Biaen, Jehova i luk we Boe blong hem i safa gogo i ded. (Mat. 27:28-31, 39) Jehova i naf blong stopem ol samting ya blong oli no hapen. Eksampol, taem ol man blong agens oli talem se: “Sipos God i laekem hem, i gud hem i sevem hem,” Jehova i save mekem samting ya. (Mat. 27:42, 43) Be sipos God i bin mekem olsem, bambae i neva gat ransom mo bambae yumi no gat hop. Taswe, Jehova i letem Boe blong hem i safa gogo kasem we i pulum laswan win blong hem.
8. ?From wanem yumi sua se Jehova i harem nogud, taem i luk we Boe blong hem i safa? Yu eksplenem. (Mo tu, yu luk pija.)
8 Yumi no mas gat tingting ya se from we God i gat olgeta paoa, hemia i min se hem i no gat filing. God i wokem yumi we yumi gat ol filing. Mo from we God i wokem yumi long pija blong hem, i min se hem tu i gat ol filing. Baebol i tokbaot tu se hem i “harem nogud tumas.” (Sam 78:40, 41) Traem tingbaot stori blong Ebraham mo Aesak. Jehova i talem long Ebraham blong i givim wan pikinini boe ya nomo we hem i gat, olsem sakrefaes i go long Hem. (Jen. 22:9-12; Hib. 11:17-19) Traem tingbaot filing blong Ebraham taem hem i rere blong kilim boe blong hem. I sua se hem i mas harem nogud tumas. Hemia i sem mak long Jehova, i sua se hem i mas harem nogud moa taem i luk ol man oli mekem i nogud long Boe blong hem, mo oli kilim hem i ded.—Yu go long jw.org mo luk video ya Folem Fasin Blong Bilif Blong Olgeta—Ebraham, Pat 2.
Jehova i harem nogud tumas taem i luk Boe blong hem i safa (Haf 8)
9. Folem Rom 8:32, 38, 39, ?yu lanem wanem long saed blong lav blong Jehova?
9 Ransom i tijim yumi se Jehova i lavem yumi moa i bitim ol famle o fren blong yumi. (Ridim Rom 8:32, 38, 39.) Mo i klia se Jehova i lavem yumi moa i bitim we yumi lavem yumi wan. ?Yu yu wantem laef olwe? I sua se yes, be Jehova i wantem moa se yu kasem laef olwe. ?Yu wantem se Jehova i fogivim ol sin blong yu? I sua se yes, be Jehova i wantem moa blong fogivim ol sin blong yu. Wan samting nomo we hem i askem yumi blong mekem, hemia blong akseptem nambawan presen ya we hem i givim. Mo yumi mekem olsem taem yumi soemaot bilif mo yumi obei long hem. Ransom i wan nambawan presen we i soemaot se Jehova i lavem yumi tumas. Mo long niufala wol, bambae yumi lanem plante moa samting we Jehova i mekem blong soemaot se hem i lavem yumi.—Pri. 3:11.
?RANSOM I TIJIM WANEM LONG SAED BLONG JISAS?
10. (1) ?From wanem Jisas i wari tumas long saed blong ded blong hem? (2) ?Olsem wanem Jisas i leftemap nem blong Jehova? (Mo tu, yu luk bokis ya “ Jisas i Holemstrong Mo Hemia i Leftemap Nem Blong Jehova.”)
10 Jisas i tingbaot moa gudnem blong Papa blong hem. (Jon 14:31) Hem i wari se ol man bambae oli spolem gudnem blong Papa blong hem, taem oli jajem hem se hem i wan kriminol, mo se hem i stap tok nogud long God. Hemia nao from wanem hem i prea se: “Papa blong mi, sipos i gat rod, plis yu tekemaot kap ya long mi.” (Mat. 26:39) Taem Jisas i gohed blong holemstrong long Jehova go kasem we hem i ded, hem i pruvum se ol tok we Setan i talem long saed blong Papa blong hem, oli no tru.
11. ?Olsem wanem Jisas i soemaot se hem i lavem tumas ol man? (Jon 13:1)
11 Ransom i tijim yumi tu se Jisas i kea bigwan long ol man, antap moa long ol disaepol blong hem. (Prov. 8:31; ridim Jon 13:1.) Eksampol, Jisas i save se sam samting we hem i kam blong mekem long wol ya i no isi, mo wan long ol samting ya hemia se bambae hem i ded long wan fasin we i nogud olgeta. Nating se i olsem, Jisas i mekem olgeta samting ya, i no from we Jehova i talem se hem i mas mekem, be from we hem i lavem ol man. Hemia nao from wanem hem i tekem taem blong prij long ol man, i tijim olgeta, mo i halpem olgeta. Mo tu, long dei we bambae Jisas i ded, hem i tekem taem blong wasem leg blong ol aposol blong hem, i tijim olgeta, mo i leftemap tingting blong olgeta. (Jon 13:12-15) Mo taem Jisas i stap hang long pos, hem i toktok long wan kriminol mo i mekem hem i gat hop, mo i askem Jon blong i lukaot long mama blong hem. (Luk 23:42, 43; Jon 19:26, 27) Yes, Jisas i no soemaot lav ya nomo long taem we hem i ded, be hem i soemaot samting ya long ful laef blong hem.
12. ?Olsem wanem Jisas i stap halpem yumi naoia?
12 I tru se Kraes “i ded wan taem nomo mo blong olwe,” be hem i gohed yet blong mekem plante samting blong yumi. (Rom 6:10) ?Hem i mekem wanem? Hem i gohed blong yusum taem mo paoa blong hem blong givim plante gudfala samting long yumi, we yumi save kasem from ransom. Traem tingbaot sam long ol samting we hem i stap bisi blong mekem. Hem i mekem wok olsem King, Hae Pris, mo hem i hed blong kongregesen. (1 Kor. 15:25; Efes. 5:23; Hib. 2:17) Hem i lukaot long wok ya blong hivimap ol tabu Kristin mo bigfala hip blong ol man, mo wok ya bambae i finis bifo long en blong bigfala trabol. b (Mat. 25:32; Mak 13:27) Mo tu, hem i stap yusum gudfala slef we i waes blong givim ol kakae long saed blong spirit we yumi nidim long ol las dei ya. (Mat. 24:45) Mo long Wan Taosen Yia Rul blong hem, bambae hem i gohed blong givim ol samting we yumi nidim. !I tru nomo we Jehova i givim Boe blong hem blong i givhan long yumi!
GOHED BLONG LANEM OL NIUFALA SAMTING
13. ?Olsem wanem yu save gohed blong lanem plante moa samting long saed blong lav we God mo Kraes i gat long yumi?
13 Sipos yu gohed blong tingting dip long ol samting we Jehova mo Jisas i mekem blong yu, bambae yu save lanem plante moa samting long saed blong lav we tufala i gat long yumi. Maet long ol wik bifo mo afta long Memoriol, yu save tekem taem blong ridim wan o ol fofala Gospel ya. Be i no gud yu traem ridim plante japta wantaem, i gud yu rid sloslo mo traem faenem sam moa risen from wanem yumi mas lavem Jehova mo Jisas. Mo i gud yu serem ol samting we yumi lanem wetem ol narafala.
14. ?Olsem wanem fasin blong mekem risej i save halpem yumi? (Ol Sam 119:97) (Mo tu, yu luk pija.)
14 Sipos yu stap long trutok plante yia finis, maet bambae yu wantem save sipos i gat sam niufala samting yet we yu save lanem long saed blong jastis mo lav blong God, mo ransom. Blong talem stret, oltaem bambae i gat plante niufala samting blong lanem long saed ya mo plante moa narafala topik. Taswe, ?yu save mekem wanem? I gud yu ridim mo stadi long ol gudfala save blong Baebol we oli stap long ol buk blong yumi. Sipos yu ridim wan samting long Baebol we yu no kasemsave long hem, i gud yu mekem risej. Mo long fuldei, yu save tingting dip long samting we yu stadi long hem mo samting we yu lanem long saed blong Jehova, Boe blong hem, mo long lav we tufala i gat long yu.—Ridim Ol Sam 119:97 mo futnot.
Nating sipos yumi stap plante yia long trutok, yumi save gohed blong lanem plante niufala samting long saed blong ransom mo talem tangkiu from (Haf 14)
15. ?From wanem yumi mas gohed blong traem faenem ol niufala samting long Baebol?
15 Yu no mas harem nogud sipos yu no faenem wan niufala save o samting taem yu ridim Baebol o mekem risej. Yu mas tingbaot se yu yu olsem wan man we i stap traehad blong faenem gol. Plante taem, wan man we i stap lukaotem gol i mas spenem plante aoa o dei bifo we hem i faenem wan smol pis gol. Be hem i no givap, from we evri smosmol pis blong gol we hem i faenem, oli sas long ae blong hem. Be samting we i sas moa i bitim gol, hemia ol niufala samting we yumi lanem long Baebol. (Sam 119:127; Prov. 8:10) Taswe i gud yu gat longfala tingting mo gohed long program blong yu blong ridim Baebol.—Sam 1:2.
16. ?Olsem wanem yumi save folem eksampol blong Jehova mo Jisas?
16 Taem yu stadi, i gud blong tingbaot olsem wanem yu save mekem samting we yu lanem i wok long laef blong yu. Eksampol, yu save folem fasin blong Jehova we hem i gat jastis, taem yu mekem i sem mak long olgeta man. Folem fasin blong Jisas we i lavem Papa blong hem mo ol narafala, taem yu rere blong mekem samting we Jehova i wantem mo yu halpem ol narafala nating se i no isi. Mo tu, yu save folem eksampol blong Jisas, taem yu tokbaot long ol narafala ol nambawan samting we Jehova i mekem blong yumi, nao olgeta tu oli save bilif long ransom.
17. ?Bambae yumi tokbaot wanem long nekis stadi?
17 Taem yumi gohed blong lanem samting long saed blong ransom, bambae lav we yumi gat long Jehova mo Jisas i kam strong moa. Nao bambae tufala i lavem yumi moa. (Jon 14:21; Jem. 4:8) Taswe i gud yumi yusum evri samting we Jehova i givim, blong lanem moa long saed blong ransom. Long nekis stadi, bambae yumi luk sam moa blesing we yumi save kasem from ransom, mo olsem wanem blong soemaot se yumi glad we Jehova i lavem yumi.
SINGSING 107 God i Soemaot Eksampol Blong Lav
a MINING BLONG TOKTOK: “Tingting dip” i min se yu tingting gud long wan topik mo yu traem faenemaot moa save long saed blong topik ya.
b Samting we Pol i talem long Efesas 1:10 long saed blong hivimap “olgeta samting long heven,” i defren long samting we Jisas i talem long Matiu 24:31 mo Mak 13:27 long saed blong hivimap “ol man we hem i jusumaot.” Pol i stap tokbaot taem ya we Jehova i jusumaot olgeta we bambae oli rul wetem Jisas. Be Jisas i stap tokbaot taem ya we bambae hem i hivimap ol laswan tabu Kristin we oli stap yet long wol, mo i tekem olgeta i go antap long heven long taem blong bigfala trabol.
