STADI 5
SINGSING 108 God i Soem Lav Oltaem
?Wanem Ol Blesing We Yumi Kasem From We Jehova i Lavem Yumi?
“Kraes Jisas i kam long wol blong sevem ol man we oli stap mekem sin.”—1 TIM. 1:15.
BIGFALA TINGTING
Long stadi ya, bambae yumi luk ol blesing we yumi kasem from ransom mo olsem wanem yumi save soemaot long Jehova se yumi glad long ransom.
1. ?Yumi save mekem wanem blong Jehova i glad?
TRAEM tingbaot se yu givim wan spesel presen long wan man we yu lavem hem, presen ya i naes mo hem i save yusum. !Bambae yu harem nogud sipos yu luk se hem i putum presen ya long wan storum mo hem i no moa tingbaot blong yusum! Be i sua se bambae yu glad sipos hem i yusum presen ya mo i talem tangkiu long yu from. ?Yumi lanem wanem? Jehova i givim Boe blong hem blong i ded from yumi. Taswe, i sua se Jehova i glad tumas taem hem i luk we yumi soemaot se yumi glad long nambawan presen ya, mo from lav blong hem we i pusum hem blong givim ransom.—Jon 3:16; Rom 5:7, 8.
2. ?Bambae yumi tokbaot wanem long stadi ya?
2 Taem ol yia oli pas, maet bambae yumi stat blong ting nating long nambawan presen ya ransom. Mo hemia i olsem we yumi putum presen ya we God i givim, long wan storum mo yumi no moa tingbaot nating. Be blong no letem samting ya i hapen, oltaem yumi mas gohed blong tingbaot samting we God mo Kraes i mekem blong yumi. Mo stadi ya bambae i givhan long yumi blong mekem samting ya. Taswe, naoia bambae yumi tokbaot ol blesing we yumi stap kasem tede from ransom, mo ol blesing we bambae yumi kasem long fiuja. Mo tu, bambae yumi tokbaot olsem wanem yumi soemaot se yumi glad long lav we Jehova i soemaot long yumi, long ol wik bifo mo afta long Memoriol.
OL BLESING WE YUMI KASEM NAOIA
3. ?Wanem blesing we yumi kasem naoia from ransom?
3 Tede, yumi stap kasem blesing finis from ransom sakrefaes blong Kraes. Eksampol, ransom i mekem se Jehova i save fogivim ol sin blong yumi. Jehova i no nid blong fogivim yumi, be hem i wantem tumas blong mekem olsem. Man blong raetem sam i soemaot se hem i glad long fasin blong Jehova blong fogivim man, hem i se: “From yu, O Jehova, yu yu gud mo yu rere blong fogif.”—Sam 86:5; 103:3, 10-13.
4. ?Jehova i givim ransom from hu? (Luk 5:32; 1 Timoti 1:15)
4 Maet sam long yumi oli save harem se i no stret we Jehova i fogivim olgeta. I tru, i no stret we God i fogivim yumi. Aposol Pol i kasemsave se ‘i no stret nating blong ol man oli singaot hem se aposol.’ Be hem i gohed i se: “From kaen fasin blong God, mi mi kam wan aposol.” (1 Kor. 15:9, 10) Taem yumi tanem tingting from ol sin blong yumi, Jehova i fogivim yumi. ?From wanem? I no from we yumi gat raet blong kasem fasin fogif, be from we Jehova i lavem yumi. Sipos yu harem nogud se i no stret we Jehova i fogivim yu, i gud yu tingbaot se Jehova i givim ransom i no blong ol man we oli neva mekem sin, be blong ol sin man we oli tanem tingting blong olgeta.—Ridim Luk 5:32; 1 Timoti 1:15.
5. ?I gat wan long yumi we i save talem se hem i gat raet blong Jehova i sore long hem? Yu eksplenem.
5 I no gat wan long yumi we i harem se Jehova i mas fogivim hem, from we hem i mekem wok blong Jehova blong plante yia finis. I tru, Jehova i tingbaot ol gudfala wok we yumi bin mekem. (Hib. 6:10) Be hem i givim Boe blong hem olsem wan presen, be i no olsem wan pei blong ol samting we yumi mekem long wok blong Hem. Sipos yumi gat rong tingting ya se yumi gat raet blong Jehova i fogivim yumi o tritim yumi long wan spesel fasin, hemia i olsem we yumi stap talem se yumi no nidim ransom.—Skelem wetem Galesia 2:21.
6. ?From wanem Pol i wok had long wok blong Jehova?
6 Pol i save se i no stret we God i fogivim hem. ?Be from wanem hem i wok had long wok blong Jehova? Hem i mekem olsem i no blong traem pulum Jehova blong i fogivim hem, be blong soemaot se hem glad we Jehova i kaen mo i sore long hem. (Efes. 3:7) Olsem Pol, yumi gohed blong wok strong long wok blong Jehova, i no blong mekem se hem i sore long yumi be blong soemaot se yumi glad long fasin ya blong hem.
7. ?Wanem narafala blesing we yumi kasem naoia from ransom? (Rom 5:1; Jemes 2:23)
7 Wan narafala blesing we yumi kasem naoia from ransom, hemia se yumi save kam klosap long Jehova, mo fren gud wetem hem. a Olsem we yumi tokbaot long laswan stadi, taem yumi bon, yumi no fren gud yet wetem God. Be from ransom, yumi save haremgud long “pis wetem God” mo kam klosap long hem.—Ridim Rom 5:1; Jemes 2:23.
8. ?From wanem yu glad long nambawan samting ya we Jehova i givim hemia prea?
8 Traem tingbaot wan spesel samting we yumi save mekem from we yumi fren gud wetem Jehova, hemia se yumi save prea i go long hem. Jehova i harem prea blong ol man blong hem taem oli stap long wan grup, be hem i lesin tu long prea we ol man blong hem wanwan oli mekem long hem. Prea i save mekem hat blong yumi i kwaet mo i givim pis long tingting. Be i no hemia nomo, prea i save mekem se yumi fren gud moa wetem Jehova tu. (Sam 65:2; Jem. 4:8; 1 Jon 5:14) Taem Jisas i stap long wol, oltaem hem i prea from we hem i save se Jehova bambae i lesin long hem mo hemia bambae i mekem se hem i gohed blong fren gud wetem Papa blong hem. (Luk 5:16) !Yumi glad tumas se sakrefaes blong Jisas i mekem se yumi save fren gud wetem Jehova, mo yumi save toktok long hem tru long prea!
OL BLESING WE YUMI SAVE KASEM LONG FIUJA
9. ?Wanem blesing we ol gudfala man blong Jehova bambae oli kasem long fiuja from ransom?
9 ?Wanem blesing we ol gudfala man blong Jehova bambae oli kasem long fiuja from ransom? Bambae oli kasem laef we i no save finis. Plante man oli ting se samting ya i no save hapen, from we blong plante taosen yia finis ol man oli stap ded. Be stamba tingting blong Jehova, hemia blong ol man oli laef olwe. Sipos Adam i no bin mekem sin, bambae i no gat wan man i save gat tingting ya se yumi no save laef olwe. Nating se naoia ol man oli gat tingting ya se yumi no save laef olwe, be yumi sua se samting ya bambae i hapen from we Jehova i givim wan hae praes finis, hemia laef blong Boe blong hem blong i mekem samting ya i kamtru.—Rom 8:32.
10. ?Wanem blesing we ol tabu Kristin mo ol narafala sipsip oli stap wet from?
10 Nating se laef olwe i wan blesing we bambae i kamtru long fiuja, Jehova i wantem se yumi tingbaot laef ya naoia. Ol tabu Kristin oli stap wet long nambawan laef ya long heven we bambae oli joen wetem Jisas blong rulum wol. (Rev. 20:6) Ol narafala sipsip, oli stap wet blong laef long wol ya we bambae ol man oli no moa safa mo harem nogud. (Rev. 21:3, 4) ?Yu yu wan long ol narafala sipsip we yu gat hop ya blong laef olwe long wol? !Blesing ya i no daon moa long blesing ya blong laef olwe long heven! Jehova i wokem yumi ol man blong laef long wol. Taswe, i sua se bambae yu harem gud tumas blong laef olwe long wol.
11-12. ?Wanem sam blesing blong Paradaes we yumi save tingbaot? (Mo tu, yu luk pija.)
11 Traem tingbaot se laef bambae i olsem wanem taem yu laef long paradaes long wol ya. Bambae yu no nid blong wari long saed blong sik o ded. (Aes. 25:8; 33:24) Jehova bambae i givim evri gudfala samting we yu wantem. ?Yu yu wantem mekem wanem? ?Yu wantem stadi long ol animol? ?Yu wantem lanem blong plei long wan instramen? ?Yu wantem lanem blong dro? I sua se long paradaes, i nidim ol man we oli save olsem wanem blong wokem ol plan blong haos, bildim ol haos, mo ol man blong wok long garen. Mo tu, bambae i nidim ol man blong planem mo rerem ol kakae, wokem ol tul, mo lukaot gud long ol naesfala garen. (Aes. 35:1; 65:21) Taem yu laef olwe, bambae yu gat moa taem blong mekem ol samting ya.
12 !Long taem ya bambae yumi glad tumas blong welkamem olgeta we oli laef bakegen! (Wok 24:15) Mo tu, traem tingbaot bambae yu glad tumas blong save Jehova moa taem yu stadi long ol samting we hem i wokem. (Sam 104:24; Aes. 11:9) !Be samting we i gud moa, hemia se bambae yumi neva save mekem sin bakegen, mo bambae yumi haremgud blong wosipim Jehova! ?Olsem wanem? ?Bambae yu lego ol nambawan blesing ya blong mekem “sin we i save mekem [yu] harem gud blong smoltaem nomo”? (Hib. 11:25) !I sua se nogat! Ol blesing ya oli gud moa long ol samting we yumi save kasem long wol ya naoia. Tingbaot se bambae yu no wet long Paradaes ya olwe, from we i no longtaem bambae hem i kam wan ples we bambae yu laef long hem evri dei. !Ol samting ya oli save kamtru from we Jehova i lavem yumi, mo hem i givim nambawan presen ya hemia Boe blong hem, blong i ded from yumi.
?Wanem ol blesing long Paradaes we yu stap wet from? (Haf 11-12)
SOEMAOT SE YU GLAD WE JEHOVA I LAVEM YU
13. ?Olsem wanem yumi soemaot se yumi glad we Jehova i lavem yumi? (2 Korin 6:1)
13 ?Olsem wanem blong soemaot se yumi glad we Jehova i givim ransom? Hemia taem yumi putum wok blong hem i stap fasples long laef blong yumi. (Mat. 6:33) Tingbaot se Jisas i ded blong “mekem se olgeta we oli laef, oli no moa laef blong mekem samting we olgeta nomo oli wantem, be blong mekem samting we man ya we i ded mo i laef bakegen, i wantem.” (2 Kor. 5:15) Yes, yumi wantem mekem bes blong yumi blong soemaot se yumi glad long kaen fasin we Jehova i soemaot long yumi.—Ridim 2 Korin 6:1.
14. ?Olsem wanem yumi soemaot se yumi trastem ol tok blong Jehova?
14 Yumi soemaot tu se yumi glad we Jehova i lavem yumi, taem yumi trastem mo folem ol tok blong hem. ?Yumi mekem samting ya olsem wanem? Taem yumi gat ol desisen blong mekem, olsem long saed blong edukesen o wok, yumi mas tingbaot samting we Jehova i wantem yumi blong mekem. (1 Kor. 10:31; 2 Kor. 5:7) Taem yumi mekem desisen folem bilif we yumi gat long Jehova, hemia bambae i mekem se bilif mo frensip blong yumi wetem Jehova i kam strong moa. Mo tu, hop we yumi gat i kam strong moa.—Rom 5:3-5; Jem. 2:21, 22.
15. Long ol wik bifo mo afta long Memoriol, ?olsem wanem yumi save soemaot se yumi glad?
15 I gat wan narafala rod tu blong soemaot se yumi glad we Jehova i lavem yumi. Hemia taem yumi mekem bes blong yumi long ol wik bifo mo afta long memoriol, blong soemaot long Jehova se yumi glad tumas long ransom we hem i givim. Taem yumi stap mekem plan blong joen long Memoriol, i gud yumi invaetem ol narafala tu blong oli save joen. (1 Tim. 2:4) Eksplenem gud ol samting we bambae oli hapen long taem blong Memoriol, long olgeta we yu invaetem olgeta blong kam. Yu save soem long olgeta tufala video ya ?From Wanem Jisas i Ded? mo Tingbaot Ded Blong Jisas we i stap long jw.org. Ol elda oli mas meksua se oli invaetem olgeta ya tu we oli no moa joen long ol miting mo wok blong prij. !Traem tingbaot, olgeta long heven mo long wol bambae oli glad tumas sipos sam long ol sipsip blong Jehova we oli lus oli kambak! (Luk 15:4-7) Long taem blong Memoriol, i gud yumi welkamem yumi. Be antap moa, i gud yumi welkamem gud ol niuwan o olgeta we oli no moa joen long Memoriol blong longtaem. !Yumi wantem se oli haremgud taem oli kam long Memoriol!—Rom 12:13.
16. ?From wanem i gud yumi mekem moa long wok blong Jehova long ol wik bifo mo afta long Memoriol?
16 ?Yu save mekem moa long wok blong Jehova long ol wik bifo mo afta long Memoriol? Sipos yu mekem olsem, hemia wan gudfala rod blong soemaot se yu glad long olgeta samting we God mo Kraes i mekem blong yumi. Taem yumi joen moa long wok blong Jehova, bambae yumi luk olsem wanem hem i stap sapotem yumi, nao bambae yumi trastem hem moa. (1 Kor. 3:9) Mo tu, i gud yu folem gud program blong Baebol Riding Blong Memoriol we i stap long buklet ya, Stadi Gud Long Ol Tok Blong Baebol Evri Dei o long miting wokbuk. Maet yu save jusum blong yusum ol vas ya blong mekem prapa stadi blong yu.
17. ?Wanem nao i mekem Jehova i glad? (Mo tu, yu luk bokis ya “ Ol Rod Blong Soemaot Se Yumi Glad We Jehova i Lavem Yumi.”)
17 I tru, maet bambae yu no save mekem evri samting we yumi tokbaot long stadi ya. Tingbaot se Jehova i no skelem samting we yu save mekem wetem wanem we narafala i mekem, from we hem i luk samting we i stap long hat blong yu. Hem i glad tumas taem hem i luk we yu soemaot se yu glad tumas long nambawan presen we hem i givim, hemia ransom.—1 Saml. 16:7; Mak 12:41-44.
18. ?From wanem yumi glad long Jehova God mo Jisas Kraes?
18 Ransom nomo i mekem se Jehova i save fogivim ol sin blong yumi, yumi fren gud wetem hem, mo yumi gat hop ya blong laef olwe. I gud we oltaem yumi soemaot se yumi glad we Jehova i lavem yumi, from we lav ya nao i pulum hem blong i givim ol blesing ya long yumi. (1 Jon 4:19) Mo tu, i gud yumi soemaot se yumi glad long Jisas, we hem i lavem yumi tumas taswe hem i givim laef blong hem long bihaf blong yumi.—Jon 15:13.
SINGSING 154 Lav Blong Olwe
