1-3. (1) ?Wetaem oli raetem Sam 147? (2) ?Taem yumi stadi long Sam ya, yumi lanem wanem?

YUMI presem wan man taem yumi laekem samting we hem i talem o i mekem. !I gat plante samting blong presem Jehova from! Yumi presem hem from bigfala paoa blong hem we yumi luk long ol nambawan samting we hem i wokem. Yumi presem hem from we hem i lavem yumi tumas, nao i sanem Pikinini blong hem blong i ded olsem wan ransom sakrefaes.

² Taem yumi ridim Sam 147, yumi luksave se man we i raetem Sam ya i wantem tumas blong presem Jehova. Mo hem i pulum ol narafala tu blong oli presem God.—Ridim Ol Sam 147:1, 7, 12.

³ Yumi no save hu nao i raetem Sam ya. Be ating man ya i stap laef long taem ya we ol man Isrel oli aot long kalabus long Babilon, nao oli gobak long Jerusalem. (Ol Sam 147:2) Man ya i presem Jehova from we ol man blong hem oli save wosipim hem bakegen long kantri blong olgeta. Sam ya i tokbaot plante risen blong presem Jehova. ?Wanem ol risen ya? ?Yu yu gat wanem risen blong singaot ‘Haleluia’ no ‘!Presem Ja!’?—Ol Sam 147:1, NW futnot.

4. Taem King Sirus i letem ol man Isrel oli go fri, ?oli harem olsem wanem? ?From wanem?

⁴ Traem tingbaot filing blong ol man Isrel taem oli stap kalabus long Babilon. Ol man we oli tekem olgeta oli go kalabus, oli jikim olgeta, oli talem se: “Yufala i singsing long wan sing blong Saeon blong mifala i harem.” Be ol man Isrel oli no glad, oli no wantem singsing. Taon blong olgeta, Jerusalem, we i mekem olgeta oli glad bitim ol narafala samting, i lus finis. (Ol Sam 137:1-3, 6) Oli harem nogud, mo oli nidim man blong mekem olgeta oli harem gud bakegen. Olsem Baebol i talem, Jehova nao i givhan long olgeta. ?Hem i givhan olsem wanem? King Sirus blong Pesia i ansa long kwestin ya, taem hem i winim Babilon, nao i talem se: “Bifo, haos blong [Jehova] i stap long Juda, long taon ya Jerusalem, mo naoia wok blong wokem haos ya bakegen, hem i putum long han blong mi.” Mo tu, Sirus i talem long ol man Isrel se: “I gud yufala evriwan we yufala i man blong hem, yufala i gobak long taon ya. Hae God i God blong yufala, mo prea blong mi we hem bambae i stap wetem yufala.” (2 Kronikel 36:23) !Tok ya i mas mekem ol man Isrel long Babilon oli harem gud!

5. ?Man blong raetem Sam 147 i talem se Jehova i stap mekem wanem?

⁵ Jehova i mekem neson blong Isrel i harem gud bakegen, be antap long samting ya, hem i mekem olgeta wanwan oli harem gud. I sem mak tede. Man we i raetem Sam 147 i talem se, Jehova “i stap mekem olgeta we oli harem nogud, oli harem gud bakegen, mo i stap fasem ol soa blong olgeta.” (Ol Sam 147:3) Taem yumi sik no tingting blong yumi i foldaon, Jehova i tingbaot yumi. Hem i wantem mekem yumi harem gud bakegen, olsem we hem i fasem ol soa blong yumi. (Ol Sam 34:18; Aesea 57:15) Hem i givim waes mo paoa, blong yumi save stanap strong, nomata wanem trabol yumi kasem.—Jemes 1:5.

6. ?Sam 147:4 i tijim yumi long wanem? (Yu luk pija long stat blong stadi.)

⁶ Nao man blong raetem Sam ya i lukluk i go antap long skae, mo i talem se Jehova “i makem namba blong ol sta, mo i putum nem blong olgeta wanwan.” (Ol Sam 147:4) Man ya i luk ol sta, be hem i no save hamas sta oli stap. Tede, ol saentis oli talem se i gat plante bilian sta we yumi save luk. !Be i gat plante plante bilian sta bakegen we yumi no save luk! Ol man oli no save kaontem ol sta ya, be Jehova i save hamas sta i stap, mo i putum nem blong olgeta wanwan. (1 Korin 15:41) God ya we i save gud evri sta, i save gud yu tu. !Oltaem hem i save se yu stap wea, yu harem olsem wanem, mo i save ol samting we yu nidim!

7, 8. (1) ?Jehova i kasem save wanem? (2) Yu talem wan stori we i soemaot se Jehova i sore long ol man.

⁷ Jehova i kasem save long ol problem blong yu, mo hem i gat paoa blong givhan long yu. (Ridim Ol Sam 147:5.) Maet yu harem se ol problem blong yu oli bigwan tumas mo yu no naf blong winim. God i save se yumi no naf blong mekem plante  samting, “i stap tingbaot we yumi kamaot long asis nomo.” (Ol Sam 103:14) From we yumi sinman, yumi mekem ol semfala mastik bakegen mo bakegen, mo tingting blong yumi i save foldaon from. Yumi sore from ol nogud tok we yumi talem, no from yumi wantem mekem samting we i no stret, no from we yumi jalus. Nating se Jehova i no gat slak fasin, be hem i kasem save fulwan long filing blong yumi.—Aesea 40:28.

⁸ ?Samtaem yu tu yu haremsave se paoa blong Jehova i stap givhan long yu, taem yu kasem trabol? (Aesea 41:10, 13) Hemia samting we i hapen long wan paenia we nem blong Kyoko. Taem hem i muv i go long wan narafala ples, tingting blong hem i foldaon. Be hem i haremsave se Jehova i stap givhan long hem, from we i gat plante brata mo sista long niufala kongregesen ya we oli kasem save filing blong hem. I olsem we Jehova i stap talem long hem se: “Mi lavem yu, i no from we yu yu wan paenia nomo, be from we yu yu gel blong mi, mo yu givim laef blong yu long mi. !Mi wantem se yu harem gud long laef blong yu olsem wan Witnes blong mi!” ?Yu yu tingbaot wan samting we Jehova i mekem long yu, we i soemaot se “man i no save makem waes blong hem”?

9, 10. ?Fastaem, Jehova bambae i givim wanem? Talem wan stori.

⁹ Yumi evriwan i nidim kakae, klos, mo ples blong slip. Maet yu wari se bambae yu no gat naf kakae. Be Jehova i mekem se graon i naf blong givim kakae long yumi evriwan, wetem “ol pikinini blong pijin” tu we oli krae blong man i fidim olgeta. (Ridim Ol Sam 147:8, 9.) Sipos Jehova i givim kakae long ol pijin, yumi save se bambae hem i givim samting we yumi nidim.—Ol Sam 37:25.

¹⁰ Fastaem, Jehova bambae i givim samting we i moa impoten, hemia ol samting we yumi nidim blong mekem bilif blong yumi i strong. Mo tu, hem i save givim ‘pis ya we i bigwan tumas i bitim olgeta save blong yumi.’ (Filipae 4:6, 7) Mutso mo woman blong hem i luksave olsem wanem Jehova i halpem tufala. Long 2011, i gat wan bigfala taetel wef long Japan, nao tufala i mas klaem i go antap long ruf blong haos blong sevem laef blong tufala. Tufala i lusum klosap evri samting blong tufala. Tufala i stap ful naet long wan rum antap long haos, we i dak mo i kolkol. Long moning, tufala i traem faenem wan samting we i save leftemap tingting blong tufala. Tufala i faenem wan buk nomo, hemia 2006 Yearbook of Jehovah’s Witnesses. Mutso i tanem ol pej, nao hem i luk wan pej we i talem se, “Ol Bigbigfala Taetel Wef We Oli Kilim Plante Man i Ded.” Pej ya i tokbaot wan etkwek long Samatra long 2004, we i mekem bigfala taetel wef i kamso. Taem tufala i ridim stori blong ol brata mo sista, tufala i krae. Tufala i harem se Jehova i stap givim stret samting we tufala i nidim. Jehova i givhan long tufala long plante narafala rod tu. Ol brata long ol narafala ples long Japan oli givim kakae mo klos. Be samting we i mekem tufala i strong moa, hemia taem ogenaesesen blong God i sanem ol brata blong visitim kongregesen blong tufala. Mutso i talem se: “Mi harem olsem se Jehova i stap klosap long mifala wanwan, mo i stap lukaot gud long mifala. !Hemia i mekem mifala i harem gud tumas!” Fastaem, Jehova bambae i givim samting we yumi nidim blong mekem bilif blong yumi i strong, nao biaen, bambae hem i givim kakae, klos, mo ol narafala samting.

11. ?Olsem wanem yumi save kasem help blong Jehova?

¹¹ Jehova “i stap leftemap olgeta we tingting blong olgeta i stap daon.” Hem i lavem yumi, mo hem i rere oltaem blong halpem yumi. (Ol Sam 147:6) ?Olsem wanem yumi save kasem help blong hem? Yumi mas fren gud wetem hem. Blong fren gud wetem hem, yumi mas mekem tingting blong yumi i stap daon. (Sefanaea 2:3) Ol man we tingting blong olgeta i stap daon, oli trastem Jehova blong i stretem ol samting we i no stret, mo i finisim ol trabol we i mekem ol man oli safa. Jehova i glad long ol man we oli gat tingting daon.

12, 13. (1) ?Blong kasem help blong God, yumi mas ronwe long wanem? (2) ?Jehova i glad moa long hu?

¹² Jehova i stap “flatemgud ol man nogud i godaon long graon.” (Ol Sam 147:6) !Yumi no wantem se hem i mekem olsem long yumi! Yumi wantem we Jehova i  soemaot se hem i lavem yumi. Taswe, yumi mas agensem ol fasin we Jehova i agensem. (Ol Sam 97:10) Hemia ol samting olsem ol nogud fasin long saed blong seks. Yumi mas ronwe long eni samting we i save pulum yumi blong mekem ol nogud fasin ya, olsem ol rabis pija. (Ol Sam 119:37; Matiu 5:28) Maet yumi mas faet strong, be i no blong nating nomo. Jehova bambae i blesem yumi.

¹³ Be yumi no save faet long prapa paoa blong yumi, yumi mas dipen long Jehova. ?Jehova bambae i glad sipos yumi trastem ol samting we ol man oli trastem? Nogat. Jehova i no glad long ‘ol hos we oli strong blong mekem wok.’ ?I stret we yumi dipen long paoa blong yumi no long ol narafala man? Nogat. Jehova i no glad long ‘ol soldia we oli no fraet nating.’ (Ol Sam 147:10) Taswe, yumi mas prea oltaem blong Jehova i halpem yumi, mo yumi mas plis long hem blong i givhan long yumi, blong yumi winim ol slak fasin. Jehova i no save kam taed blong harem ol prea blong yumi. “Hem i glad moa long ol man we oli stap ona long hem, mo long olgeta we oli stap trastem hem.” (Ol Sam 147:11) Yumi save se bambae hem i givhan long yumi blong yumi winim ol nogud fasin we oli pulum yumi, from we hem i lavem yumi mo hem i no save lego yumi.

14. ?Man blong raetem Sam 147 i sua long wanem samting?

¹⁴ Jehova i promes se bambae i givhan long yumi taem yumi gat problem. Man blong raetem Sam 147 i tingbaot olsem wanem Jehova i givhan long ol man Isrel we oli gobak long Jerusalem. Man ya i singsing se: “Hem i stap mekem ol doa blong stonwol blong yumi i strong we i strong, mo i stap blesem yumi evriwan. Hem i stap mekem kantri blong yumi i stap kwaet.” (Ol Sam 147:13, 14) Man blong raetem Sam ya i harem se hem i stap sef, from we Jehova i mekem ol doa blong stonwol oli strong we i strong. From samting ya, hem i sua se Jehova bambae i protektem ol man blong hem.

15-17. (1) ?Ol problem oli save mekem wanem long yumi? ?Jehova i yusum wanem blong givhan long yumi? (2) Talem wan stori we i soemaot se tok blong God i stap “kam hareap” blong givhan long yumi.

¹⁵ Maet yu stap wari from ol problem  blong yu, be Jehova i save givim waes long yu. Man blong raetem Sam 147 i talem se God “i sanem ol tok blong hem i kam long wol. Ol tok ya i kam hareap.” (NW) Nao hem i tokbaot sno, wota blong naet we i kam aes, mo ol ston blong aes. Hem i talem se: “I no gat man i save stap gud long koltaem ya we hem i stap sanem i kam.” Be hem i talem se taem Jehova “i tok, win i blu, nao ol aes ya i ronaot, i kam wota.” (Ol Sam 147:15-18) God blong yumi i save evri samting, i save mekem eni samting, mo i kontrolem ol ston blong aes mo sno. Taswe, hem i save givhan long yu tu blong yu winim enikaen problem.

¹⁶ Tede, Jehova i yusum Baebol blong lidim yumi. Man we i raetem Sam 147 i talem se tok blong Jehova i stap “kam hareap” blong givhan long yumi. God i lidim yumi long rod we i stret mo long taem we i stret. Yu traem tingbaot olsem wanem Baebol wetem ol buk blong “gudfala slef we i waes,” oli givhan long yu. Antap long hemia, i gat JW Brodkasting, jw.org, ol elda, mo ol brata mo sista long kongregesen. (Matiu 24:45) ?Yu yu luk long laef blong yu se Jehova i kam hareap blong givhan long yu?

¹⁷ Wan sista we nem blong Simon, i luksave se Baebol i givhan long laef blong hem. Hem i harem olsem se hem i gud blong nating nomo, mo Jehova i no glad long hem. Be taem tingting blong hem i foldaon, hem i prea blong askem help blong Jehova, mo i gohed blong stadi Baebol. Hem i talem se: “Long evri problem we mi kasem, mi haremsave se Jehova i stap givim paoa long mi mo i lidim mi.” Hemia i givhan long Simon blong gat gudfala tingting.

18. ?Yumi kasem wanem bigfala blesing tede? ?Wanem sam risen we yu yu gat blong “!Presem Ja!”?

¹⁸ Man we i raetem Sam ya, i save se Jehova i jusum ol man Isrel bifo blong oli kam ol man blong hem. I no gat wan narafala neson we God i givim “tok blong hem” long olgeta, mo i eksplenem “ol rod blong hem” long olgeta. (Ridim Ol Sam 147:19, 20.) Tede, God i putum nem blong hem long yumi nomo. Hemia wan bigfala blesing. Mo tu, yumi glad tumas se yumi save hem, mo yumi gat Tok blong hem blong lidim yumi, mo yumi save fren gud wetem hem. Olsem man we i raetem Sam 147, yumi gat plante risen blong “!Presem Ja!” mo pulum ol narafala tu blong oli mekem olsem.