Taem ol Kristin oli stap tingbaot olsem wanem bambae oli protektem olgeta, oli mas folem ol tok blong Baebol. Baebol i soemaot se i rong blong yusum enikaen masket, blong protektem yumi long ol narafala man. Yu traem tingbaot:

Long tingting blong Jehova, laef i tabu. Deved i talem long Jehova se: “Yu yu stamba blong laef.” (Ol Sam 36:9) Taswe, sipos wan Kristin i wantem protektem hem mo olting blong hem, bambae i no jusum wan rod we i save mekem se hem i gat fol long fes blong God from ded blong wan man.—Dutronome 22:8; Ol Sam 51:14.

I tru se enikaen samting we man i yusum blong protektem hem, i save mekem se hem i gat fol long fes blong God from ded blong wan man. Be i isi moa blong kilim man i ded wetem masket, nating se yumi minim nomo no i wan aksiden. * Sipos yu poenem masket long wan rabis man, maet hem i seksek taem i luk masket ya, nao i girap agensem yu. Long taem olsem, wan long yutufala i save ded.

Long naet bifo we Jisas i ded, hem i talem long ol man blong hem se oli mas tekem naef blong olgeta. Be oli no karem naef ya blong protektem olgeta. (Luk 22:36, 38) Jisas i wantem tijim ol man blong hem long wan impoten samting: Nating se bambae oli fesem ol man we oli karem ol tul blong faet, be oli no mas givim kil long olgeta no traem kilim olgeta i ded. (Luk 22:52) Taem Pita i yusum naef blong hem blong givim kil long man blong wok blong hae pris, Jisas i talem long hem se: “Yu putumbak naef blong faet blong yu long ples blong hem.” Nao Jisas i talem wan stamba trutok we i stap lidim ol Kristin tede tu, i se: “Man we i yusum naef blong faet, hem bambae i ded long naef blong faet.”—Matiu 26:51, 52.

Maeka 4:3 i talem se ol man blong God bambae oli ‘hamarem ol naef blong faet blong olgeta oli kam aean blong digim graon, mo ol spia bambae oli kam huknaef.’ Ol man oli save se ol tru Kristin oli no stap faet, be oli folem ol tok we God i pulum aposol Pol blong raetem, se: “Sipos wan man i mekem i nogud long yufala, yufala i no mas givimbak fasin ya long hem.” (Rom 12:17, 18) Nating se Pol i fesem plante trabol we i putum laef blong hem long denja, olsem “ol man blong stil,” be hem i no brekem ol tok blong Baebol blong protektem hem. (2 Korin 11:26) Hem i trastem God, mo hem i bilif se ol waes advaes blong Baebol ‘i save givhan moa long hem, i winim ol tul blong faet.’—Prija 9:18.

Laef i sas moa i bitim mane mo olting. Baebol i talem se: “Man i save gat plante samting, be ol samting ya oli no save givim laef long hem.” (Luk 12:15) Taswe, sipos yumi toktok kwaet long wan stilman we i poenem masket long yumi, be hem i no wantem lesin, bambae yumi folem advaes blong Jisas, se: “Yu no mas agensem ol rabis man.” Maet hemia i min se, yumi letem hem i karem ol samting we hem i wantem. (Matiu 5:39, 40; Luk 6:29) * Mo tu, i gud yumi no pulum ae blong  ol stilman. Sipos yumi ‘flas from ol samting we yumi gat mo yumi soemaot,’ ating ol rabis man bambae oli wantem stilim olting blong yumi. (1 Jon 2:16) Mo tu, i gud ol man raonabaot long yumi oli save se yumi Witnes blong Jehova mo yumi no stap faet, hemia i save protektem yumi.—Ol Proveb 18:10.

Ol Kristin oli no wantem mekem narafala i foldaon. (Rom 14:21) Sam brata mo sista bambae oli sek sipos oli faenemaot se wan brata i gat wan masket blong protektem hem long ol narafala man. Maet i no agensem loa blong gat wan masket, be from we yumi lavem ol brata mo sista, bambae yumi no mekem wan samting we oli save foldaon from.—1 Korin 10:32, 33; 13:4, 5.

Ol Kristin oli mas soemaot gudfala eksampol. (2 Korin 4:2; 1 Pita 5:2, 3) Sipos wan Kristin i gat masket blong protektem hem long ol narafala man, ol elda bambae oli givim advaes blong Baebol long hem. Be sipos hem i mekem desisen blong holem masket ya, hem i no soemaot gudfala eksampol. Taswe, hem i no save mekem wok long kongregesen. I sem mak long wan Kristin we, long wok blong hem, i mas holem wan masket. I moagud hem i traem faenem wan narafala wok. *

Ol Kristin oli mas mekem prapa desisen blong olgeta long wanem rod we bambae oli yusum blong protektem olgeta, famle blong olgeta, mo olting blong olgeta, mo weples bambae oli wok. Be ol desisen ya oli mas laenap wetem Baebol. God blong yumi we i waes, i givim ol advaes ya from we hem i lavem yumi. Taswe, ol Kristin we oli fren gud wetem Jehova, oli no gat wan masket long haos blong olgeta blong protektem olgeta long ol narafala man. Oli save se sipos oli trastem God mo folem ol advaes blong hem long Baebol, long fiuja bambae oli stap sef blong olwe.—Ol Sam 97:10; Ol Proveb 1:33; 2:6, 7.