1. ?Yangfala i mas jusum wanem? ?Wanem i save givhan long hem blong i no fraet? (Yu luk pija long stat blong stadi.)

YANGFALA, ating bambae yu agri se bifo we yu go long wan trip, i waes blong mekem wan plan, mo save ol ples we yu wantem go long olgeta. Laef i olsem wan trip, we yu mas mekem plan blong hem. Mo stret taem blong mekem plan ya, hemia taem yu yangfala yet. Be i no isi. Wan gel we nem blong hem Heta, i talem se: “Yu mas jusum ol samting we bambae yu mekem long ful laef blong yu. Taem mi tingbaot samting ya, mi mi fraet.” !Be i no nid blong fraet! Yu traem tingbaot tok ya blong Jehova se: ‘!Mi mi God blong yu! !Yu no seksek! !Mi bambae mi mekem yu yu strong! !Mi bambae mi givhan long yu!’—Aesea 41:10.

2. ?Olsem wanem yu save se Jehova i wantem we yu yu gat wan hapi laef?

² Jehova i talem se yu mas waes taem yu mekem plan blong fiuja blong yu. (Prija 12:1; Matiu 6:20) Hem i wantem se yu gat wan hapi laef. Yumi luksave samting ya, from ol gudfala samting we hem i wokem we yumi save luk, harem, mo  testem. Jehova i lukaot gud long yumi long plante narafala rod tu. Hem i givim advaes long yumi, mo i tijim yumi long ol gudfala fasin we yumi mas folem. Taem ol man oli no wantem harem ol waes advaes blong hem, hem i no glad. Hem i talem long olgeta se: “Yufala i stap mekem ol fasin we i nogud . . . bambae yufala i sem bigwan. Be ol man blong wok blong mi . . . bambae oli harem gud, oli glad. Bambae olgeta oli hapi, we oli stap singsing from.” (Aesea 65:12-14) Taem yumi mekem ol waes desisen long laef blong yumi, yumi mekem Jehova i glad.—Ol Proveb 27:11.

3. ?Jehova i wantem se yu mekem wanem?

³ ?Wanem plan we Jehova i wantem se yu folem? Jehova i wokem yu blong yu save hem mo yu mekem wok blong hem, olsem nao, bambae yu hapi. (Ol Sam 128:1; Matiu 5:3) Ol anamol oli kakae, dring, mo mekem pikinini nomo. Be Jehova i no wantem se yu gat wan laef olsem. Yu mas gat gudfala plan we i mekem se yu gat wan risen blong laef mo yu hapi. Jehova, hem i “God blong lav,”mo “God ya we i hapi.” Mo hem i mekem man blong i “tekem fasin blong hem.” (2 Korin 13:11; 1 Timoti 1:11; Jenesis 1:27) Sipos yu folem fasin blong hem blong lavem narafala, bambae yu hapi. Baebol i talem se: “Man i harem gud moa taem hem i givim samting long narafala, i bitim we hem i kasem samting.” (Ol Wok 20:35) ?Yu yu luksave samting ya? Hemia wan stamba trutok. Taswe, Jehova i wantem se ol plan blong yu long fiuja oli soemaot se yu lavem hem mo ol narafala.—Ridim Matiu 22:36-39.

4, 5. ?Wanem i mekem Jisas i hapi?

⁴ Ol yangfala, Jisas i givim wan nambawan eksampol long yufala. Taem hem i pikinini, ating hem i pleplei mo i hapi. Hemia i stret nomo, from we Baebol i talem se i gat wan “taem blong man i harem gud” mo wan “taem blong man i danis.” (Prija 3:4) Mo tu, Jisas i stadi long ol hanraet blong Baebol, blong kam klosap long Jehova. Taem hem i gat 12 yia, ol tija long haos tempol oli sapraes tumas “long save blong hem mo long ol ansa blong hem.”—Luk 2:42, 46, 47.

⁵ Taem Jisas i kam bigwan, hem i hapi from we hem i mekem samting we God i wantem. Wan long ol samting ya hemia se, Jisas i mas “talemaot gud nius long ol puaman,” mo talemaot “long ol blaenman se bambae oli lukluk.” (Luk 4:18) Jisas i glad blong mekem olsem. Ol Sam 40:8 i tokbaot filing blong hem, se: “God blong mi. . . . Mi mi wantem tumas blong mekem ol samting we yu yu wantem.” Jisas i harem gud tumas blong tijim ol man long saed blong Papa blong hem. (Ridim Luk 10:21.) Wan dei, Jisas i tokbaot tru wosip long wan woman, nao biaen, hem i talem long ol disaepol blong hem se: “Kakae blong mi i blong mekem ol samting we hemia we i sanem mi i wantem, mo blong mi finisim wok we hem i givim long mi.” (Jon 4:31-34) From we Jisas i mekem ol wok we oli soemaot se hem i lavem God mo ol narafala, hem i hapi. Sipos yu yu mekem olsem, yu tu bambae yu hapi.

6. ?From wanem i gud blong tokbaot plan blong yu long ol narafala?

 ⁶ Plante brata mo sista oli stat long wok blong paenia taem oli yangfala. Samting ya i mekem olgeta oli hapi. I gud yu tokbaot ol plan blong yu long olgeta. Baebol i talem se: “Man we i stap holem ol gudfala advaes we ol man oli givim long hem, bambae laef blong hem i save gohed gud, be man we i tanem baksaed long ol advaes olsem, ol plan blong hem bambae oli foldaon.” (Ol Proveb 15:22) Ating ol brata mo sista ya bambae oli talem se, wok blong paenia i save tijim yu long plante samting, we oli save givhan long ful laef blong yu. Jisas i lanem plante samting taem hem i stap wetem Papa blong hem long heven. Mo taem hem i prij long wol, hem i lanem plante moa samting. Hem i serem gud nius wetem ol narafala, mo i holemstrong long God long ol trabol we hem i kasem. Ol samting ya i givim bigfala glad long hem. (Ridim Aesea 50:4; Hibrus 5:8; 12:2) Naoia, bambae yumi tokbaot from wanem wok blong paenia i save mekem yu yu hapi.

7. ?From wanem plante yangfala oli laekem wok blong pulum man i kam disaepol?

⁷ Jisas i talem se yumi mas go ‘pulum ol man oli kam disaepol’ mo tijim olgeta. (Matiu 28:19, 20) Sipos yu plan blong mekem wok ya, bambae yu gat wan gudfala laef we i givim ona long God. Be yu nidim taem blong kam gud long wok ya, olsem ol narafala wok. Wan brata we nem blong hem Timoti, i stat long wok blong paenia taem hem i yangfala. Hem i talem se: “Mi mi laekem wok blong paenia. Long rod ya, mi save soemaot se mi lavem Jehova. Fastaem, mi no save statem wan Baebol stadi. Be biaen, mi muv i go long wan narafala ples, nao long fas manis, mi statem sam Baebol stadi. Wan long olgeta i kam long Haos Kingdom. Taem mi mekem kos blong tu manis long Skul Blong Ol Brata We Oli No Mared, oli sanem mi mi go long wan narafala ples bakegen, nao mi statem fo Baebol stadi. * Mi mi laekem tumas blong tijim ol man, from we mi luk olsem wanem tabu spirit i jenisim fasin blong olgeta.”—1 Tesalonaeka 2:19.

8. ?Sam yangfala oli mekem wanem blong oli save prij long plante moa man?

⁸ Sam yangfala oli lanem wan narafala lanwis. Traem tingbaot Jekob long Not Amerika. Hem i talem se: “Taem mi gat seven yia, plante pikinini long klas blong mi oli blong Vietnam. Mi wantem tokbaot Jehova long olgeta, ale mi lanem lanwis blong olgeta. Mi skelem Wajtaoa long lanwis Vietnam wetem Wajtaoa long Inglis, nao samting ya i givhan bigwan long mi. Mo tu, mi gat plante fren long kongregesen we oli toktok lanwis Vietnam. Taem mi gat 18 yia, mi mekem wok blong paenia. Biaen, mi go long Skul Blong Ol Brata We Oli No Mared. Ol samting we mi lanem long skul ya i givhan bigwan long mi, taem mi joen long wan grup we oli toktok lanwis Vietnam. Mi wan nomo mi elda long grup ya. Plante man Vietnam oli sapraes we mi save toktok lanwis blong olgeta. Taem mi prij long olgeta, oli singaot mi mi kam insaed, mo mi statem plante Baebol stadi. Sam long olgeta oli gohed gud gogo oli baptaes.”—Skelem Ol Wok 2:7, 8.

9. ?Wok blong pulum man i kam disaepol, i tijim yu long wanem?

⁹ Wok blong pulum man i kam disaepol,  i tijim yu blong yu wok had, yu toktok long ol man long fasin we i kaen mo i waes, mo yu gat strong tingting. (Ol Proveb 21:5; 2 Timoti 2:24) Be bigfala samting we i givim glad, hemia taem yu yu naf blong yusum Baebol blong soemaot se bilif blong yu i tru. Mo tu, wok ya i tijim yu blong yu kam klosap moa long Jehova mo yu wok gud wetem hem.—1 Korin 3:9.

10. Nating se i had blong faenem wan man we i wantem stadi, ?from wanem yumi evriwan i save glad?

¹⁰ Long ples blong yu, maet i no gat plante man we oli wantem stadi Baebol, be yu save kasem glad yet long wok blong prij. Kongregesen i wok olsem wan tim blong pulum ol man oli kam disaepol. Maet wan brata no sista nomo i faenem wan man we biaen i kam disaepol, be yumi evriwan i save glad, from we yumi bin joen long wok blong prij long taem ya. Wan brata we nem blong hem Brandon, i mekem wok blong paenia blong naen yia, be smol man nomo oli stadi wetem hem. Hem i talem se: “Mi mi laekem wok blong prij from we hemia samting we Jehova i wantem se yumi mekem. Mi mi statem wok blong paenia afta we mi finisim skul. Mi glad blong leftemap tingting blong ol yangfala brata long kongregesen, mo blong luk we oli gohed gud. Afta we mi go long Skul Blong Ol Brata We Oli No Mared, mi muv i go long wan narafala ples. Mi no faenem wan man yet we i gohed gud gogo i baptaes, be sam narafala oli faenem. Mi mi glad se mi mekem plan blong joen fultaem long wok ya blong pulum ol man oli kam disaepol.”—Prija 11:6.

11. ?Plante yangfala oli gat janis blong mekem wanem wok?

¹¹ Ol yangfala oli gat janis blong mekem plante samting long wok blong Jehova. Samfala oli joen long wok blong bildim ol haos wosip. I nidim yet, plante handred niufala Haos Kingdom. Taem yu joen wetem ol brata mo sista long wok ya we i leftemap nem blong Jehova, yu kasem bigfala glad. Mo yu lanem plante samting tu. Yu lan blong wok long fasin we i sef, mo blong obei long olgeta we oli stap lidim wok ya.

12. ?Olsem wanem wok blong paenia i save openem rod blong mekem plante narafala wok?

¹² Wan brata we nem blong hem Kevin, i talem se: “Stat long taem we mi mi smol, mi wantem mekem wok blong Jehova fultaem. Taem mi gat 19 yia, mi stat long wok blong paenia. Blong sapotem mi long wok ya, mi wok haftaem blong wan brata we i bildim ol haos. Mi lanem olsem wanem blong putum ruf, ol windo, mo ol doa. Afta long wan disasta, mi wok tu yia wetem wan tim we i bildim bakegen ol Haos Kingdom mo ol haos blong ol brata. Nao mi harem nius se oli nidim sam brata long Saot Afrika. Mi fulumap pepa, mo oli singaot mi mi go. Naoia, mi stap goraon long ol defdefren ples long Afrika blong bildim ol Haos Kingdom. Tim blong mifala i olsem wan famle. Mifala i slip long sem haos, joen wanples blong stadi  long Baebol, mo wok wanples. Mo tu, mi laekem prij evri wik wetem ol lokol brata. Ol plan we mi mekem taem mi smol yet, oli openem plante rod blong kasem glad, we mi no tingbaot nating.”

13. ?From wanem plante yangfala oli hapi blong wok long Betel?

¹³ Samfala oli mekem wok blong paenia gogo, oli go wok long Betel. Oli kasem bigfala glad from we evri wok we oli mekem long Betel i blong Jehova. Oli givhan blong wokem ol Baebol mo ol buk we oli tijim ol man long trutok. Wan brata we i wok long Betel, nem blong hem Jastin, i talem se: “Taem mi mi gat naen yia, mi mekem plan se bambae mi kam wan paenia. Taem mi finisim skul, mi statem wok ya. Mi gohed blong wan yia haf, nao oli singaot mi mi go long Betel. Long ples ya, oli tijim mi blong mi yusum ol masin blong printim ol buk mo magasin, mo biaen, mi mekem wok ya blong putum program long ol kompiuta. Long Betel, mi glad blong harem ol nius blong wok blong prij we i stap gohed long fulwol. Mi mi laekem tumas wok ya, from we i givhan blong pulum ol man oli kam klosap long Jehova.”

14. ?Yu save mekem wanem naoia blong yu rere blong prij fultaem?

¹⁴ ?Yu save mekem wanem naoia blong yu rere blong prij fultaem? Blong gohed gud long wok blong Jehova, yu mas gat ol  gudfala Kristin fasin. Taswe, i gud yu stadi Baebol oltaem, yu tingting dip, mo yu talemaot bilif blong yu long ol miting. Taem yu stap yet long skul, yu save traehad blong kam gud moa blong talemaot gud nius long ol narafala. Yu mas traehad blong intres long ol man. Yu mekem olsem, taem yu askem kwestin long kaen fasin blong faenemaot tingting blong olgeta, nao yu lesin gud long ansa blong olgeta. Mo tu, yu soemaot se yu glad blong mekem ol wok, olsem klinim mo fiksimap Haos Kingdom. Jehova i glad long olgeta we oli gat tingting daon, mo oli rere blong wok. (Ridim Ol Sam 110:3; Ol Wok 6:1-3) Aposol Pol i singaot Timoti blong joen wetem hem long wok blong misinari, from we ol brata “oli stap talem se Timoti i wan gudfala man.”—Ol Wok 16:1-5.

15. ?Yu save mekem wanem blong faenem wan wok, we i givhan long yu blong paenia?

¹⁵ Bighaf long olgeta we oli mekem wok blong God fultaem, oli mas wok tu blong pem ol samting we oli nidim. (Ol Wok 18:2, 3) Maet yu save mekem wan sot kos we bambae i givhan long yu, blong yu faenem wan haftaem wok. Yu save tokbaot plan blong yu wetem eria elda mo sam narafala paenia, mo yu askem advaes long olgeta. Afta, yu mekem samting we Baebol i talem. “Yu askem long Hae God blong i lukluk gud long ol plan blong yu,” nao “wok blong yu bambae i save gohed gud.”—Ol Proveb 16:3; 20:18.

16. ?Olsem wanem wok blong paenia i save rerem yu from ol narafala wok long fiuja?

¹⁶ Jehova i wantem tumas se yu yu gat wan hapi laef long fiuja. (Ridim 1 Timoti 6:18, 19.) Taem yu mekem wok blong God fultaem wetem ol narafala paenia, sloslo bambae yu kam bigman long tingting mo long ol Kristin fasin. Mo tu, plante we oli mekem wok blong paenia taem oli yangfala, oli luk se ol samting we oli lanem i givhan bigwan taem oli mared. Plante long olgeta we oli paenia bifo we oli mared, oli gohed nomo long wok ya afta we oli mared.—Rom 16:3, 4.

17, 18. ?Olsem wanem ol plan oli joen wetem samting we yu yu wantem?

¹⁷ Ol Sam 20:4 i talem se: “[Jehova] bambae i givim olgeta samting long yu we yu yu wantem, mo hem bambae i mekem yu yu win long olgeta plan blong yu.” Taem yu mekem plan blong fiuja blong yu, yu mas tingbaot fastaem se, yu wantem yusum laef blong yu blong mekem wanem. Nao yu tingbaot ol samting we Jehova i stap mekem long taem blong yumi, mo samting we yu yu naf blong mekem long wok blong hem. Nao yu mekem wan plan we bambae Jehova i glad long hem.

¹⁸ Sipos yu yusum laef blong yu blong mekem wok blong Jehova fultaem mo ona long hem, bambae yu hapi. Bambae yu “luk long Hae God blong i mekem yu yu glad, nao bambae hem i givim long yu ol samting we yu yu wantem tumas.”—Ol Sam 37:4.