1, 2. ?From wanem i gat plante puaman long wol?

TEDE, i had blong ol man oli kasem naf mane, from we i gat tumas fasin we i no stret. I had blong ol yangfala oli faenem wok. Samfala oli putum laef blong olgeta long denja blong kasem wan rij kantri. Be long ol rij kantri, i gat plante puaman tu. Long evri ples long wol, ol rijman oli stap kam rij moa, mo ol puaman oli stap kam pua moa. Ol rijman long wol oli no plante (1 pesen), be ol puaman oli plante tumas (99 pesen). Be sam man blong stadi oli talem se, evri mane we ol rijman oli gat, i sem amaon olsem evri mane we ol puaman long wol oli gat. I klia se sam man oli gat plante moa mane i bitim wanem we oli nidim long ful laef blong olgeta, be plante bilian narafala man oli pua we oli pua. Taswe Jisas i talem se: “Ol puaman oli stap oltaem wetem yufala.” (Mak 14:7) ?From wanem sam man oli rij tumas mo samfala oli pua tumas?

² Jisas i save se Kingdom blong God nomo bambae i jenisim samting ya. Baebol i soemaot se “ol bisnesman” oli haf blong wol blong Setan, olsem politik mo ol giaman skul.  (Revelesen 18:3) Ol man blong God oli no joen nating long politik mo ol giaman skul. Be long saed blong bisnes, plante long olgeta oli mas mekem bisnes blong kasem mane. Taswe oli no save kamaot fulwan.

3. ?Wanem ol kwestin we bambae yumi tokbaot?

³ I gud yumi jekem tingting we yumi gat long mane mo bisnes. Yumi wanwan i save askem se: ‘?Olsem wanem mi save yusum ol rij samting blong mi blong soemaot se mi lavem God? ?Olsem wanem blong no spenem tumas taem blong mekem bisnes? ?Olsem wanem plante man blong God tede oli soemaot se oli trastem hem fulwan?’

4, 5. (1) ?Wanem i hapen long slef long stori blong Jisas? (2) ?Jisas i talem wanem long ol man blong hem?

⁴ Ridim Luk 16:1-9. Stori ya we yumi mas tingting gud long hem, i olsem: Samfala oli talem se wan slef i spolem mane blong masta blong hem. Ale, masta i sakemaot hem. * Be bifo we slef ya i lego wok blong hem, hem i fren gud wetem sam man, we biaen oli save givhan long hem. Jisas i talem se slef ya i “waes.” Hemia i no min se ol disaepol blong hem oli mas mekem i no stret blong oli gat naf samting blong laef, olsem ol man blong wol oli stap mekem. Be Jisas i wantem tijim ol disaepol blong hem long wan impoten samting.

⁵ Jisas i save se plante long ol man blong hem bambae oli olsem slef ya, we i sek se masta i sakemaot hem, nao i fesem hadtaem. Bambae i had blong ol man blong Jisas oli winim mane long wol ya, we i no gat stret fasin long hem. Taswe, hem i talem long olgeta se: “Yufala i mas yusum ol rij samting blong rabis wol ya blong mekem i gud long ol man blong oli kam fren blong yufala.” ?From wanem? From we, taem ol rij samting ya oli finis, tufala fren blong olgeta, hemia Jehova mo Jisas, tufala i ‘save tekem olgeta oli go long ples we i no save lus samtaem.’ ?Yumi lanem wanem?

6. ?I plan blong God se ol man bambae oli kasem plante mane? ?Olsem wanem yumi save?

⁶ Baebol i soemaot klia se, i no plan blong God nating, we ol man oli traehad blong kasem plante mane. Long garen blong Iden, Jehova i givim plante samting long Adam mo Iv, i bitim wanem we tufala i nidim. (Jenesis 2:15, 16) Mo plante yia biaen, taem God i givim tabu spirit long ol man blong hem, “olgeta evriwan oli glad blong serem olting blong olgeta long ol narawan, i no gat wan long olgeta we i talem se samting we hem i gat, i blong hem nomo.” (Ol Wok 4:32) Mo tu, profet Aesea i talem se, i gat taem i stap kam we ol man bambae oli harem gud long evri samting we graon i givim. (Aesea 25:6-9; 65:21, 22) Be go kasem taem ya, ol man blong Jisas oli mas “waes.” Oli mas mekem bisnes long wol ya blong kasem ol samting we oli nidim, be long semtaem, oli mas traehad blong mekem Jehova i glad.

7. ?Jisas i givim wanem advaes long Luk 16:10-13?

⁷ Ridim Luk 16:10-13. Slef long stori ya blong Jisas i fren gud wetem sam  man, we biaen oli save givhan long hem. Be Jisas i no wantem se yumi fren gud wetem hem mo Jehova blong kasem samting nomo. Hem i wantem tijim yumi se yumi mas lukaot gud olsem wanem yumi yusum ol rij samting. Long rod ya, yumi soemaot se yumi lavem God. ?Olsem wanem yumi yusum gud ol rij samting?

8, 9. Tokbaot samfala we oli stap yusum gud ol rij samting blong olgeta.

⁸ Yumi yusum gud ol rij samting taem yumi givim presen mane blong sapotem wok blong prij long fulwol, we Jisas i tokbaot. (Matiu 24:14) Wan gel long India, i stap putum ol smosmol mane blong hem long wan tin. Hem i no moa pem ol pleplei, from hem i wantem fulumap tin ya, mo givim olsem presen mane blong sapotem wok blong prij. Wan narafala brata long India we i gat wan plantesen blong ol kokonas, hem tu i mekem ‘fasin we i waes.’ Hem i givim kokonas i fri nomo, long olgeta we oli wok long ofis blong tanem ol buk i go long lanwis Malaelam. Hem i harem se taem hem i mekem samting ya, i olsem se hem i givim presen mane. Ol brata long Gris tu oli stap givim olif oel, jis, mo sam narafala kakae, long Betel.

⁹ Wan brata long Sri Lanka i letem ol brata oli yusum haos blong hem blong mekem miting mo asembli long hem, mo olgeta we oli mekem wok blong Jehova fultaem oli slip long haos ya tu. Taem brata ya i mekem olsem, hem i no winim mane, be ol pablisa we oli no gat mane, oli glad tumas long help blong hem. Mo tu, long wan narafala kantri we gavman i blokem wok blong prij, ol brata oli yusum ol haos blong olgeta olsem ol Haos Kingdom. Nao ol paenia wetem ol narafala we oli no gat mane, oli no nid blong rentem wan haos miting.

10. ?Taem yumi glad blong givim presen, hemia i save givhan long yumi olsem wanem?

¹⁰ Ol stori ya oli soemaot se ol man blong God oli lukaot gud “long smol samting.” (Luk 16:10) Oli yusum ol rij samting blong olgeta blong givhan long ol narafala. Olgeta ya we oli fren gud wetem Jehova, ?oli harem olsem wanem taem oli mekem olsem? Oli glad tumas, from we oli save se taem oli givim presen, oli stap hivimap “ol rij samting we oli tru” long heven. (Luk 16:11) Wan sista we i glad blong givim presen mane oltaem, i talem se taem ol yia oli pas, fasin blong hem i stap jenis. Hem i se: “Taem mi glad blong givim presen mane, mi glad moa blong fogivim narafala mo soemaot longfala tingting. Mi glad tu blong lesin long advaes, mo tingting blong mi i no foldaon tumas taem ol samting i gorong.” Plante narafala tu oli luk se taem oli glad blong givim presen, hemia i givhan long olgeta long sam narafala fasin.—Ol Sam 112:5; Ol Proveb 22:9.

11. (1) ?Olsem wanem yumi “waes” taem yumi givim presen? (2) ?Olsem wanem ol man blong God oli kasem ol Baebol mo buk? (Yu luk pija long stat blong stadi.)

 ¹¹ Yumi soemaot se yumi “waes” taem yumi yusum ol rij samting blong sapotem ol narafala long wok blong prij. Nating se yumi no save mekem wok blong paenia no muv i go long ples we i nidim moa man blong prij, be yumi stap givhan long ol narafala. (Ol Proveb 19:17) Presen mane we yumi givim, i givhan blong wokem ol buk, mo blong mekem wok blong prij i gohed long ol pua kantri, we plante man oli stap kam long trutok. Long plante ples olsem Kongo, Madagaska, mo Ruwanda, ol Baebol oli sas tumas. Praes blong wan Baebol, hemia pei we man i kasem blong wok wan ful wik no wan ful manis. Plante taem, ol brata oli mas jus, se bambae oli pem wan Baebol no oli pem kakae blong famle blong olgeta. Be blong meksua se “evriwan i gat naf,” ogenaesesen blong Jehova i yusum presen mane blong tanem ol Baebol mo blong givimaot fri long evri memba blong famle, mo long olgeta we oli stadi Baebol. (Ridim 2 Korin 8:13-15.) Long rod ya, olgeta we oli givim presen mo olgeta we oli kasem presen tu, oli kam fren blong Jehova.

12. ?Ebraham i soemaot olsem wanem se hem i trastem God?

¹² Yumi save kam fren blong Jehova taem yumi lukaotem “ol rij samting we oli tru,” be yumi no mekem bisnes tumas. Hemia nao samting we Ebraham i mekem. Jehova i talem long hem blong i lego ol rij samting long taon ya, Uru, mo i go stap long haos tapolen. Ebraham i obei from we hem i wantem kam fren blong Jehova. (Hibrus 11:8-10) Oltaem hem i trastem God, i bitim ol rij samting. (Jenesis 14:22, 23) Jisas i pulum ol man blong oli gat bilif olsem Ebraham. Hem i talem long wan yangfala man we i rij se: “Sipos yu wantem kam stret gud olgeta, yu go salemaot olgeta samting blong yu, mo yu givim mane blong hem long ol puaman, nao bambae yu gat ol gudgudfala samting long heven. Mo yu kam, yu biaen long mi.” (Matiu 19:21) Sore tumas, yangfala man ya i no gat bilif olsem Ebraham. Be sam narafala man oli trastem God.

13. (1) ?Pol i givim wanem advaes long Timoti? (2) ?Olsem wanem yumi folem advaes blong Pol?

¹³ Timoti i gat strong bilif. Pol i singaot hem se “wan gudfala soldia blong Kraes Jisas,” mo i talem se: “Sipos wan soldia i wantem se man we i putum hem long wok ya i glad, hem i no save mekem ol prapa bisnes blong hem.” (2 Timoti 2:3, 4) Ol man blong Jisas tede, we moa long wan milian long olgeta oli mekem wok blong Jehova fultaem, oli folem advaes ya blong Pol. Oli no letem ol rij samting blong wol ya i pulum olgeta. Oli tingbaot se: “Sipos yu kaon long wan man, bambae yu kam slef blong hem.” (Ol Proveb 22:7) Setan i wantem se yumi spenem olgeta taem mo paoa blong yumi blong wok blong kasem mane. Samfala oli tekem bigfala lon long bang blong  pem wan haos, wan trak, ol kos, mo lafet blong mared. Yumi mas lukaot gud, sipos no, bambae yumi wok had blong plante yia blong pembak wan bigfala kaon. Yumi soemaot se yumi waes taem yumi no mekem laef blong yumi i fasfas, yumi no gat kaon, mo yumi no spenem mane olbaot. Long rod ya, yumi save mekem moa long wok blong God, i bitim we yumi kam slef blong ol rij samting blong wol.—1 Timoti 6:10.

14. ?Yumi mas gat strong tingting blong mekem wanem? Talem sam stori.

¹⁴ Sipos yumi wantem se laef blong yumi i no fasfas, yumi mas putum Kingdom blong God long fasples. Wan brata mo woman blong hem, tufala i gat wan bigfala bisnes we tufala i stap winim plante mane from. Be tufala i wantem mekem wok blong paenia, olsem we tufala i bin mekem bifo. Ale tufala i salem bisnes blong tufala, wetem bot mo plante narafala sas samting. Nao tufala i fulumap pepa blong go wok long wol hedkwota long Warwick, New York. Tufala i glad tumas, from we tufala i save joen plante wik wetem gel blong tufala mo man blong hem we tufala i wok long Betel, mo tu wetem papa mo mama blong brata ya we tufala i joen blong bildim hedkwota. Wan narafala sista we i mekem wok blong paenia long Yunaeted Stet, i faenem wan haftaem wok long bang. Ol bos oli glad tumas long wok blong hem, nao oli talem se sipos hem i wok fultaem, bambae oli givim pei we i tri taem antap. Be hem i no tekem wok ya, from we, sipos hem i wok fultaem, bambae hem i no save spenem plante taem long wok blong prij. Hemia stori blong samfala we oli lego plante samting blong putum Kingdom i stap long fasples. Taem yumi mekem sem mak, yumi soemaot se yumi wantem tumas blong fren gud wetem God, mo yumi laekem ol rij samting we oli tru, i bitim ol rij samting blong wol.

15. ?Wanem ol rij samting we oli mekem yumi glad moa?

¹⁵ Taem yumi gat plante rij samting, hemia i no min se God i blesem yumi. Jehova i blesem olgeta we oli mekem “ol gudfala wok,” mo oli “kam rij long fasin ya.” (Ridim 1 Timoti 6:17-19.) Traem tingbaot wan sista we nem blong Lusia. Hem i faenemaot se i nidim moa man blong prij long Albania. * Ale, long 1993, hem i lego Itali i go long Albania. Hem i no gat wok, be hem i trastem Jehova se bambae i givim samting we hem i nidim. Hem i lanem lanwis, mo i givhan long 60 man blong oli kam man blong Jehova. Long ples blong yumi, maet yumi no kasem frut olsem. Be evri samting we yumi mekem blong givhan long ol narafala blong oli save Jehova mo kam fren blong hem, oli olsem ol rij samting we yumi no save fogetem.—Matiu 6:20.

16. (1) ?Wanem bambae i hapen long ol rij samting blong wol ya? (2) From samting ya, ?yu no mas mekem wanem?

¹⁶ Jisas i talem se ol rij samting blong wol ya, bambae oli finis. Hem i no talem se ‘sipos oli finis,’ be hem i talem se ‘taem oli finis.’ (Luk 16:9) Long sam kantri, oli klosem sam bang finis, mo i gat bigfala trabol long saed blong mane. Be i no longtaem, bambae i kam mowas. Politik, ol giaman skul, mo ol bisnes blong  wol ya blong Setan, bambae oli lus. Profet Esikel mo Sefanaea i tokbaot gol mo silva we i sas tumas naoia, se bambae i kam olsem samting nating nomo. (Esikel 7:19; Sefanaea 1:18) Traem tingbaot sipos yu laef kasem en blong wol, nao yu luksave se yu bin wok moa from ol rij samting blong rabis wol ya, i bitim ol rij samting we oli tru. ?Bambae yu harem olsem wanem? Ating bambae yu harem olsem wan man we i wok ful laef blong hem blong kasem mane, be long en blong hem, i faenemaot se oli pem hem wetem ol giaman mane nomo. (Ol Proveb 18:11) !Yu no mastik long samting ya! !Ol rij samting blong wol ya, bambae oli lus! Taswe, yu no mas mestem janis blong yusum ol rij samting blong yu, blong fren gud wetem Jisas mo Jehova. Samting we yumi mekem blong Jehova mo Kingdom blong hem, i givim trufala glad.

17, 18. ?Ol fren blong God bambae oli kasem wanem blesing?

¹⁷ Taem Kingdom blong God i kam, bambae yumi no moa rentem haos mo mekem lon. Bambae yumi no moa pem kakae, mo bambae yumi no moa nid blong go luk dokta mo pem meresin. Ol fren blong Jehova bambae oli yusum ol gudgudfala samting blong wol. Bambae yumi yusum gol, silva, mo ol narafala sas ston, from we oli naes tumas, be i no blong mekem wan man i kam rij. Bambae yumi yusum ol wud, ston, mo aean we oli beswan, blong bildim ol naesfala haos. Ol fren blong yumi bambae oli givhan long yumi from we oli wantem nomo, be i no blong kasem pei. Bambae yumi serem ol gudgudfala samting we i stap long wol ya.

¹⁸ Hemia sam nomo long ol nambawan blesing we bambae yumi kasem, sipos yumi fren gud wetem Jehova mo Jisas. Ol man blong Jehova long wol ya bambae oli singaot wetem glad, taem oli harem Jisas i talem se: “Yufala we Papa blong mi i blesem yufala, yufala i kam tekem Kingdom ya we i stap rere finis blong yufala, stat long taem we ol man oli stat blong bon long wol.”—Matiu 25:34.