1, 2. (1) ?From wanem i impoten blong stap long saed blong Jehova? (2) ?Bambae yumi tokbaot wanem long stadi ya?

I IMPOTEN we yumi stap klosap long Jehova. !Hem nomo i gat bigfala paoa, i waes mo i lavem yumi! Yes i tru, oltaem yumi wantem holemstrong long hem mo stap long saed blong hem. (Ol Sam 96:4-6) Be sam man we oli wosipim God, oli no mekem olsem.

² Long stadi ya, bambae yumi tokbaot eksampol blong sam man we oli talem se oli stap long saed blong Jehova, be long semtaem oli mekem ol samting we Jehova i no laekem nating. Ol gudfala lesen we bambae yumi lanem, oli save halpem yumi blong holemstrong long Jehova.

3. ?From wanem Jehova i traem blong halpem Ken? ?Hem i talem wanem long Ken?

³ Eksampol, traem tingbaot Ken. Hem i no wosipim ol giaman god, be yet Jehova i no glad long wosip blong hem. ?From wanem? From we Jehova i luk ol nogud filing we i stap long hat blong Ken. (1 Jon 3:12) Nao hem i givim woning long Ken se: “Sipos fasin blong yu i stret, bambae mi mi glad long yu, be fasin blong yu i no stret. Mo from samting ya, sin  blong yu i olsem wan wael anamol we i stap klosap long doa, i rere blong kakae yu. Fasin nogud ya i wantem tumas blong winim yu, be yu yu mas winim hem.” (Jenesis 4:6, 7) Jehova i talem klia se hem i save stap long saed blong Ken, sipos Ken i sakemaot ol nogud filing ya mo i jusum blong stap long saed blong hem.

4. Ken i gat janis blong stap long saed blong God, ?be hem i mekem wanem?

⁴ Sipos Ken i jenisim tingting blong hem, Jehova bambae i glad long wosip blong hem. Be Ken i no lesin long God, ale ol nogud tingting mo ol samting we hem i wantem, oli pulum hem blong mekem ol aksen we i no stret. (Jemes 1:14, 15) Taem Ken i yangfala, maet hem i neva tingbaot se bambae hem i agensem Jehova. !Be naoia hem i sakemaot woning blong God, i rebel agensem God, mo i kilim stret brata blong hem i ded!

5. ?Wanem tingting i save mekem se Jehova i no glad long yumi?

⁵ Olsem Ken, tede maet wan Kristin i save talem se hem i stap wosipim Jehova, be hem i no stap mekem ol samting we Jehova i wantem. (Jud 11) Maet hem i stap prij oltaem mo i stap go oltaem long ol miting. Be long semtaem hem i letem ol rabis tingting blong wol, tingting blong gat plante samting, mo filing ya blong no laekem narafala, oli bos long tingting blong hem. (1 Jon 2:15-17; 3:15) Tingting olsem i save pulum man blong mekem sin. Maet ol narafala man oli no save tingting blong yumi o samting we yumi mekem, be Jehova i save. Hem i save sipos yumi no stap fulwan long saed blong hem.—Ridim Jeremaea 17:9, 10.

6. ?Olsem wanem Jehova i halpem yumi blong winim ol slak fasin blong yumi?

⁶ Nating se yumi mekem mastik, be Jehova i no kwik blong lego yumi. Sipos yumi stap folem wan rod we i no stret, Jehova i askem yumi blong, ‘tanem tingting blong yumi mo kambak long hem, nao hem bambae i save kambak long yumi bakegen.’ (Malakae 3:7) Jehova i kasemsave se yumi gat ol slak fasin we yumi stap faet agensem. Be hem i wantem se yumi gohed blong stanap strong mo agensem samting we i nogud. (Aesea 55:7) Sipos yumi mekem olsem, hem i promes se bambae hem i halpem yumi mo i givim paoa long yumi blong yumi winim ol slak fasin blong yumi.—Jenesis 4:7.

7. ?Olsem wanem Solomon i lusum fasin fren blong hem wetem Jehova?

⁷ Solomon i frengud wetem Jehova taem hem i yang. Jehova i givim bigfala waes long Solomon mo i givim wan impoten wok long hem, hemia blong wokem naesfala tempol long Jerusalem. Be Solomon i lusum fasin fren blong hem wetem Jehova. (1 King 3:12; 11:1, 2) Loa blong God i talem se wan king “i no mas gat plante woman blong hem, from we sipos hem i tekem plante woman, bambae ol woman ya oli tanem tingting blong hem i gowe long Hae God.” (Dutronome 17:17) Solomon i no obei long loa ya. !Hem i gat 700 waef mo 300 narafala woman! (1 King 11:3) Plante long olgeta oli no blong Isrel mo oli wosipim ol giaman god. Solomon i no obei tu long loa ya se oli no mas maredem ol woman blong narafala kantri. —Dutronome 7:3, 4.

8. ?Olsem wanem Solomon i mekem samting we i no stret?

⁸ Sloslo Solomon i no moa laekem ol loa blong Jehova. Hem i mekem ol samting  we i no stret. Hem i wokem ol olta blong mekem wosip long ol giaman god ya, Astate mo Kemos, mo hem i joen wetem ol waef blong hem blong wosipim ol god ya. !Mo tu, Solomon i wokem ol olta long wan hil we i stap long fored blong Jerusalem, ples we hem i bin wokem haos tempol long hem! (1 King 11:5-8; 2 King 23:13) Maet Solomon i ting se sipos hem i gohed blong givim sakrefaes long Jehova long haos tempol, Jehova bambae i no wantem save long ol nogud samting ya we hem i mekem.

9. ?Wanem i hapen taem Solomon i no lesin long ol woning blong God?

⁹ Be Jehova i no jes lego ol sin oli go olsem nomo. Baebol i talem se: ‘Hae God i kros tumas long Solomon, from we hem i stap mekem wosip long ol narafala god.’ Yes, God i bin wantem blong halpem Solomon. Mo “hem i kamtru long King Solomon tu taem finis, mo i givim strong tok long hem, se bambae i no mekem wosip long ol narafala god, be hem i girap, i gowe long hem, i no obei long hem nating.” From samting ya, God i no moa glad long hem mo i no moa sapotem hem. Jehova i no moa letem ol laen blong Solomon blong oli rul long ful neson blong Isrel, mo oli bin gat plante nogud problem blong plante handred yia.—1 King 11:9-13.

10. ?Wanem i save spolem fasin fren blong yumi wetem Jehova?

¹⁰ Sipos yumi jusum ol fren we oli no kasemsave o respektem ol rul blong God, bambae oli save spolem tingting blong yumi mo fasin fren blong yumi wetem  Jehova. Maet ol fren olsem oli stap long kongregesen, be oli no frengud wetem Jehova. O maet hemia olgeta we oli no wosipim Jehova, olsem ol famle blong wol, ol man raonabaot, ol fren long wok, no ol fren long skul. Sipos yumi spenem taem wetem ol man we oli no folem ol rul blong Jehova, bambae oli save spolem tingting blong yumi nao yumi no moa frengud wetem Jehova.

11. ?Olsem wanem blong jusum gud ol fren blong yumi?

¹¹ Ridim 1 Korin 15:33. Plante man oli gat sam gudfala fasin. Mo olgeta we oli no wosipim Jehova maet oli no stap mekem ol nogud samting. Ating yu save sam man olsem. ?Be i min se yu save fren wetem olgeta? ?Oli save spolem fasin fren blong yu wetem Jehova? ?Oli halpem yu blong kam klosap long God? ?Oli tingbaot wanem se i moa impoten? ?Oli stap tokbaot wanem? ?Oli tokbaot moa klos, mane, teknoloji, pleplei, mo sam moa narafala samting? ?Oltaem oli tingbaot se oli moa impoten long narafala? ?Oli laekem blong talem ol doti tokplei? Jisas i givim woning se: “Taem man i tok, hem i stap talemaot ol samting we hat blong hem i fulap long hem.” (Matiu 12:34) Sipos yu luksave se ol man we yu spenem taem wetem olgeta, oli stap spolem fasin fren blong yu wetem Jehova, yu mas tekem aksen. Yu no mas spenem tumas taem wetem olgeta, mo sipos yu luk se i stret, yu stop blong fren wetem olgeta. —Ol Proveb 13:20.

12. (1) ?Jehova i talem wanem long ol man Isrel afta we oli aot long Ijip? (2) ?Ol man Isrel oli talem wanem taem Jehova i askem olgeta blong oli wosipim hem nomo?

¹² Yumi save lanem lesen long samting we i hapen afta we Jehova i mekem ol man Isrel oli fri long Ijip. Taem ol man Isrel oli kam wanples long fored blong Hil ya Sinae, Jehova i soemaot hem long olgeta, long wan fasin we i defren. Oli luk wan dak klaod, laetning mo smok, mo oli harem tanda mo wan bigfala noes olsem we man i blu long pupu. (Eksodas 19:16-19) Biaen oli harem we Jehova i talemaot se, hem i ‘no save letem olgeta oli mekem wosip long ol narafala god.’ Hem i promes se bambae hem i no lego olgeta we oli lavem hem mo oli obei long ol tok blong hem. (Ridim Eksodas 20:1-6.) Jehova i stap talemaot long ol man Isrel se sipos oli stap long saed blong hem, bambae hem i stap wetem olgeta. Sipos yu bin stap long taem ya, ?bambae yu harem olsem wanem taem yu harem ol tok ya blong Jehova? Ating bambae yu ansa olsem ol man Isrel we oli talem se: ‘Bambae mifala i mekem evri samting we yu i talem.’ (Eksodas 24:3) Be i no longtaem, wan samting i hapen we i traem fasin blong ol man Isrel blong holemstrong long God. ?Wanem samting ya?

13. ?Wanem i traem fasin blong ol man Isrel blong holemstrong long God?

¹³ Ol man Isrel oli fraet long paoa blong God, taem hem i soemaot hem long olgeta, ale Moses nomo i go antap long Hil ya Sinae mo i toktok wetem Jehova long bihaf blong olgeta. (Eksodas 20:18-21) Be Moses i no kambak kwiktaem long kamp blong olgeta. I olsem se i no gat man blong lidim ol man Isrel. ?Bambae oli mekem wanem? Maet ol man Isrel oli no lukluk i go long Jehova, be oli lukluk moa i go long Moses. Tingting blong olgeta i trabol nao oli talem long Eron se: “Moses ya i tekemaot yumi long Ijip, i lidim  yumi i kam long ples ya, be naoia yumi no moa save wanem i mekem hem. Mifala i wantem yu yu wokem wan god blong yumi, blong i lidim yumi.” —Eksodas 32:1, 2.

14. ?Wanem krangke tingting we ol man Isrel oli gat? ?Mo Jehova i mekem wanem?

¹⁴ Ol man Isrel oli save se i no stret blong wosipim ol aedol. (Eksodas 20:3-5) !Be oli girap oli mekem wosip long wan bul we oli wokem long gol! Oli no obei long tok blong Jehova, mo oli gat krangke tingting ya se, nating we oli no obei long Jehova, be oli stap yet long saed blong Jehova. Mo tu, Eron i singaot wosip we oli mekem long bul ya se: ‘!Wan lafet blong ona long Jehova!’ ?Jehova i mekem wanem? Hem i talem long Moses se, ol man ya “oli tanem baksaed finis” mo oli lego rod we mi “talem long olgeta blong oli folem.” Jehova i kros tumas long olgeta mo hem i gat tingting blong spolem ful neson blong Isrel. —Eksodas 32:5-10.

15, 16. ?Olsem wanem Moses mo Eron i soemaot se tufala i stap long saed blong Jehova? (Yu luk pija long stat blong stadi.)

¹⁵ Be Jehova i wan God we i gat sore. Hem i jusum blong no spolem ful neson ya. Hem i givim janis bakegen long ol man Isrel blong oli jusum blong stap long saed blong hem. (Eksodas 32:14) Taem Moses i luk ol man oli stap singsingaot, oli singsing mo danis long fored blong aedol ya, hem i go smasem aedol ya mo i granem i kam paoda. Biaen hem i singaot se: ‘!Man we i stap yet long saed blong Jehova, hem i mas kam long ples ya! Nao ol laen blong Livae oli girap, oli go stanap’ klosap long Moses. —Eksodas 32:17-20, 26.

¹⁶ Eron nao i bin wokem aedol ya, be hem i tanem tingting blong hem, mo ol Livaet tu oli tanem tingting blong olgeta, mo oli jusum blong stap long saed blong Jehova. Ol gudfala man ya oli soemaot klia se oli no tekem saed wetem ol man we oli mekem sin. Hemia wan waes desisen, from we biaen, plante taosen man we oli wosipim aedol ya, oli ded. Be olgeta we oli stap long saed blong Jehova, oli laef, mo Jehova i promes blong blesem olgeta. —Eksodas 32:27-29.

17. ?Yumi lanem wanem long tok we Pol i raetem blong eksplenem stori ya?

¹⁷ ?Yumi lanem wanem lesen? Aposol Pol i talem se: “Ol samting ya oli stap olsem ol eksampol long yumi,” blong yumi “no mas wosipim ol aedol.” Pol i eksplenem se ol stori olsem, “oli raetem blong givim woning long yumi ya we yumi stap laef long wan taem we en i klosap. Man we i ting se hem i stap stanap strong, hem i mas lukaot blong bambae hem i no foldaon.” (1 Korin 10:6, 7, 11, 12) Pol i makemgud se, olgeta we oli wosipim Jehova oli save mekem samting we i no stret, be maet oli ting se Jehova i glad long olgeta yet. Man we i wantem stap olsem fren blong Jehova mo i talem se hem i holemstrong long Jehova, samtaem hem i save mekem samting we Jehova i no glad long hem. —1 Korin 10:1-5.

18. ?Wanem tingting i save mekem se yumi gowe long Jehova? ?Mo wanem frut blong hem?

 ¹⁸ Ol man Isrel oli wari taem oli luk se Moses i no kamdaon kwik long hil ya Sinae, olsem we oli stap tingbaot. Sipos en blong wol ya i no kam kwik olsem we yumi stap tingbaot, maet yumi tu yumi save wari olsem. Maet yumi stat blong ting se nambawan fiuja we Jehova i promes blong givim, i stap longwe yet o maet i no tru. Ale maet yumi stat blong tingbaot ol samting we yumi nomo i wantem, be i no ol samting we Jehova i wantem. Sipos yumi no lukaotgud, sloslo yumi save gowe long Jehova mo mekem ol samting we yumi neva ting se bambae yumi mekem.

19. ?Oltaem yumi mas tingbaot wanem mo from wanem?

¹⁹ Jehova i wantem se yumi obei fulwan mo wosipim hem nomo. (Eksodas 20:5) ?From wanem hem i askem samting ya long yumi? From we hem i lavem yumi. Sipos yumi no mekem samting we Jehova i askem, bambae yumi stap mekem samting we Setan i wantem, mo Setan bambae i spolem yumi. Pol i talem se: “Yufala i no save gohed blong dring long kap blong Jehova mo tu long kap blong ol rabis spirit. Yufala i no save gohed blong sidaon blong kakae long “tebol blong Jehova” mo tu long tebol blong ol rabis spirit.” —1 Korin 10:21.

20. ?Olsem wanem Jehova i givhan long yumi taem yumi mekem mastik?

²⁰ Ken, Solomon, mo ol man Isrel, olgeta evriwan oli gat janis blong tanem tingting blong olgeta mo jenisim fasin blong olgeta. (Ol Wok 3:19) I klia nomo se, Jehova i no kwik blong lego ol man blong hem taem oli mekem mastik. Traem tingbaot, hem i fogivim Eron. Tede i semak, Jehova i givim ol gudfala woning long yumi blong givhan long yumi blong no mekem ol nogud samting. Hem i yusum Baebol, ol buk mo magasin, mo ol narafala Kristin. Taem yumi obei gud long ol woning blong Jehova, yumi sua fulwan se bambae hem i sore long yumi.

21. ?Yumi mas mekem wanem taem i gat wan samting i traem fasin fren blong yumi wetem Jehova?

²¹ I gat risen from wanem Jehova i kaen long yumi. (2 Korin 6:1) Hem i givim janis long yumi blong ‘sakemaot ol fasin we hem i no laekem, mo ol rabis samting blong wol ya we ol man oli wantem.’ (Ridim Taetas 2:11-14.) Long wol ya, oltaem bambae i gat ol samting we oli traem fasin fren blong yumi wetem Jehova. Taswe, yumi mas gat strong tingting blong stap long saed blong Jehova, mo tingbaot se: “Oltaem yumi mas tinghevi long hem, mo yumi mas onagud long hem, mo yumi mas mekem ol samting we hem i talem.” —Dutronome 10:20.