1. ?From wanem yumi save talem se evri samting oli blong Jehova? (Yu luk pija long stat blong stadi.)

!EVRI samting oli blong Jehova! Hem nao i wokem “heven ya we i antap we i antap wetem ol gudgudfala samting blong hem, mo wol ya wetem olgeta samting we i stap long hem.” (Dutronome 10:14; Revelesen 4:11) Jehova nao i wokem man, taswe olgeta man oli blong hem. (Ol Sam 100:3) Nating se i olsem, hem i jusumaot sam man blong oli kam ol man blong hem long wan spesel rod.

2. ?Hu olgeta we Baebol i talem se oli ol spesel man blong God?

² Eksampol, Ol Sam 135 i tokbaot ol gudfala man blong Jehova long Isrel bifo se, oli ‘ol spesel man blong God nomo.’ (Ol Sam 135:4) Mo tu, profet Hosea i talemaot se sam man we oli no laen blong Isrel bambae oli kam ol man blong Jehova. (Hosea 2:23) Profet tok ya i kamtru taem Jehova i stat blong jusum ol man we oli no laen blong Isrel, blong oli rul long heven wetem Kraes. (Ol Wok 10:45; Rom 9:23-26) Olgeta we tabu spirit i makemaot olgeta, oli singaot olgeta se  “wan tabu neson.” Olgeta ya oli “wan grup blong ol man we oli spesel man blong God.” (1 Pita 2:9, 10) ?Be olsem wanem long ol narafala Kristin we oli gat hop blong laef olwe long wol? Jehova i singaot olgeta tu se, “oli man blong mi we mi mi jusumaot olgeta finis.” —Aesea 65:22.

3. (1) ?Tede, hu i gat wan spesel fasin fren wetem Jehova? (2) ?Bambae yumi tokbaot wanem long stadi ya?

³ Tede, “smol grup blong ol sipsip,” we oli gat hop blong laef olwe long heven, mo “ol narafala sipsip,” we oli gat hop blong laef olwe long wol, oli joen wanples blong wosipim Jehova olsem “wan grup nomo.” (Luk 12:32; Jon 10:16) Yumi wantem talem tangkiu long Jehova from spesel fasin fren we yumi gat wetem hem. Long stadi ya, bambae yumi tokbaot olsem wanem yumi save talem tangkiu from spesel blesing ya.

4. ?Olsem wanem blong talem tangkiu long Jehova from we hem i letem yumi blong fren wetem hem? ?Jisas i mekem wanem we i semak olsem?

⁴ Yumi soem se yumi talem tangkiu long Jehova, taem yumi givim laef blong yumi i go long hem mo tekem baptaes. Nao evri man oli save luk se yumi man blong Jehova mo yumi glad blong obei long hem. (Hibrus 12:9) Jisas i mekem wan samting we i semak olsem, taem hem i tekem baptaes. Nating se hem i stap long wan grup we i blong Jehova finis, be yet hem i givim laef blong hem long Jehova. I olsem we hem i talem se: “Mi mi wantem tumas blong mekem ol samting we yu yu wantem.” —Ol Sam 40:7, 8.

5, 6. (1) ?Jehova i talem wanem taem Jisas i baptaes? (2) Tokbaot wan pijatok we i givhan long yumi blong kasemsave filing blong Jehova taem yumi baptaes.

⁵ ?Wanem filing blong Jehova long taem we Jisas i baptaes? Baebol i talem se: “Afta we Jisas i baptaes, wantaem nomo hem i kamaot long wota, mo heven i open nao hem i luk spirit blong God i kamdaon long Jisas olsem wan sotleg. Mo tu, wan voes i kamaot long heven, i talem se: ‘Hemia Pikinini blong mi. Mi mi lavem hem tumas, mo mi glad long hem.’” (Matiu 3:16, 17) Long taem ya Jisas i man blong God finis. Be Jehova i glad taem hem i luk se Jisas i wantem yusum laef blong hem blong mekem wok blong Hem. Long sem fasin, Jehova i glad taem hem i luk se yumi givim laef blong yumi long hem, mo bambae hem i blesem yumi. —Ol Sam 149:4.

⁶ !Evri samting oli blong Jehova finis! Taswe, ?yumi save givim wanem long Jehova? Traem tingbaot wan man we i gat ol naesfala flaoa long yad blong hem. Wan dei smol gel blong hem i tekem wan long ol flaoa ya mo i go givim long hem. Nating se flaoa ya i blong man ya, be hem i glad moa taem gel blong hem i givim flaoa ya long hem. Hemia i soem se gel ya i lavem papa blong hem. Long ae blong papa ya, flaoa we gel ya i givim, i sas moa long ol narafala flaoa long yad. Long sem fasin, Jehova i glad tumas taem yumi rere nomo blong givim laef blong yumi i go long hem. —Eksodas 34:14.

7. ?Olsem wanem Malakae i givhan long yumi blong save filing blong Jehova long saed blong ol man we oli glad blong mekem wok blong Hem?

⁷ Ridim Malakae 3:16. ?From wanem i impoten we yu givim laef blong yu long Jehova mo yu tekem baptaes? I tru se  taem yu bon, yu blong Jehova finis. Be Jehova i glad moa taem yu givim laef blong yu long hem, mo yu luk hem olsem King blong yu. (Ol Proveb 23:15) Jehova i save olgeta we oli glad blong mekem wok blong hem, mo hem i raetemdaon nem blong olgeta ya long wan “buk.”

8, 9. ?Yumi mas mekem wanem sipos yumi wantem se nem blong yumi i stap long “buk” blong Jehova?

⁸ Sipos yumi wantem se nem blong yumi i stap long “buk” blong Jehova, yumi mas mekem sam samting. Malakae i talem se yumi mas ona long Jehova mo tingting dip long nem blong Hem. !Sipos yumi wosipim wan narafala god o wan narafala samting, nem blong yumi bambae i no stap long buk blong Jehova! —Eksodas 32:33; Ol Sam 69:28.

⁹ Taswe i no naf nomo we yumi promes blong mekem wil blong Jehova mo yumi baptaes. Hemia ol samting we yumi mekem wan taem nomo, be yumi mas wosipim Jehova oltaem long laef blong yumi. Long evri samting we yumi mekem long laef blong yumi, oltaem yumi mas soemaot se yumi stap obei long Jehova. —1 Pita 4:1, 2.

10. ?Wanem i soemaot se ol man we oli wosipim Jehova oli defren?

¹⁰ Long las stadi, yumi lanem se Ken, Solomon, mo ol man Isrel oli talem se oli wosipim Jehova be oli no holemstrong long hem. Hemia i tijim yumi se, i no naf nomo blong talem se yumi wosipim Jehova. Yumi mas agensem rabis fasin mo laekem ol gudfala fasin. (Rom 12:9) Jehova i talem se bambae ol man oli luksave ol stret man mo ol man nogud. Hem i se: ‘Ol stret man oli stap mekem wok blong mi. Be ol man nogud, oli no stap mekem wok blong mi.’ —Malakae 3:18.

11. ?From wanem ol man oli mas luksave klia se yumi wosipim Jehova?

¹¹ !Yumi talem tangkiu long Jehova from we hem i jusum yumi olsem ol man blong hem! Ol man oli mas luksave klia se yumi stap long saed blong Jehova. (Matiu 5:16; 1 Timoti 4:15) I gud yu askem se: ‘?Ol narafala oli luk mi se mi obei fulwan long Jehova? ?Mi mi glad blong talemaot long ol man se mi wan Witnes blong Jehova?’ Jehova bambae i no glad sipos yumi sem blong talem long narafala se, yumi ol man blong hem. —Ol Sam 119:46; ridim Mak 8:38.

12, 13. ?Samfala oli mekem wanem we i mekem i had blong ol narafala oli luksave se oli ol Witnes?

¹² Sore tumas, sam Witnes oli folem “spirit blong wol.” From samting ya, oli sem mak long ol man we oli no wosipim Jehova. (1 Korin 2:12) “Spirit blong wol” i pulum man blong tingbaot samting we hem nomo i wantem. (Efesas 2:3) Eksampol, nating se yumi kasem plante advaes long fasin blong werem klos, be yet samfala oli no obei. Oli werem ol klos we i taet tumas mo i soemaot bodi, long taem we ol Kristin oli joen wanples. O oli mekem hea blong olgeta long wan stael we i narakaen. (1 Timoti 2:9, 10) From  samting ya, maet i had blong ol narafala oli luksave se oli ol Witnes. —Jemes 4:4.

¹³ I gat sam narafala samting tu we sam Witnes oli mekem we i sem mak long ol man blong wol. Eksampol, taem i gat wan lafet o pati, samfala oli danis mo mekem sam fasin we i no stret blong wan Kristin i mekem. Samfala oli postem ol foto blong olgeta wan, mo oli talem ol komen we i soemaot se oli tingbaot moa ol samting blong bodi. Maet oli no kasem fasin stretem long Kristin kongregesen from wan bigfala sin, be samting we oli mekem i save spolem tingting blong ol brata mo sista we oli traehad blong stap defren long wol. —Ridm 1 Pita 2:11, 12.

14. ?Yumi mas mekem wanem blong protektem fasin fren blong yumi wetem Jehova?

¹⁴ Ol samting blong wol oli pulum man blong mekem “ol samting we bodi i wantem, mo ol samting we ae i wantem, mo fasin ya we man i flas from ol samting we hem i gat mo i soemaot.” (1 Jon 2:16) Yumi ol man blong Jehova, taswe yumi defren. Yumi “sakemaot ol fasin we God i no laekem, mo ol rabis samting blong wol ya we ol man oli wantem,” mo yumi “trenem yumi blong yumi laef wetem stret tingting, mo blong yumi gat ol fasin we oli stret, mo blong yumi holemstrong long God taem yumi stap long wol ya.” (Taetas 2:12) Evri samting we yumi mekem long laef, mo fasin blong yumi blong toktok, kakae, dring, werem klos, mo wok, i mas soemaot klia long evriwan se yumi ol man blong Jehova. —Ridim 1 Korin 10:31, 32.

15. ?From wanem yumi mas kaen mo lavem ol narafala Kristin?

¹⁵ Taem yumi mekem i gud long ol brata mo sista blong yumi, yumi soemaot se  yumi tinghevi long spesel fasin fren we yumi gat wetem Jehova. Olgeta oli ol man blong Jehova, olsem yumi nomo. Nao sipos yumi tingbaot samting ya, oltaem bambae yumi soem kaen fasin long olgeta mo yumi lavem olgeta. (1 Tesalonaeka 5:15) ?From wanem samting ya i impoten? Jisas i talem long ol man blong hem se: “Sipos yufala i lavlavem yufala, bambae olgeta man oli save se yufala i disaepol blong mi.” —Jon 13:35.

16. ?Olsem wanem Loa blong Moses i mekem yumi kasemsave lav we Jehova i gat long ol man blong hem?

¹⁶ Loa blong Moses i givim wan eksampol we i givhan long yumi blong kasemsave, olsem wanem blong mekem i gud long ol narafala long kongregesen. Long tempol blong Jehova bifo, i gat sam samting we oli save yusum nomo long taem blong wosip. Loa i eksplenem klia olsem wanem ol Livaet oli mas kea long ol samting ya, mo man we i no obei long loa ya, i save lusum laef blong hem. (Namba 1:50, 51) Sipos Jehova i keagud long ol samting we ol man oli yusum long taem blong wosip, be hem i kea moa long fasin we ol man oli mekem long ol man blong hem. Hem i letem yumi save se yumi sas long ae blong hem, taem hem i talem se: “Taem wan man i kilim yufala, i olsem we man ya i kilim ae blong mi stret.” —Sekaraea 2:8.

17. ?Jehova i ‘stap lesin mo i harem’ wanem?

¹⁷ Malakae i talem se Jehova i ‘stap lesin mo i harem ol samting’ we ol man oli talem o mekem long ol man blong hem. (Malakae 3:16) Jehova “i save ol man blong hem.” (2 Timoti 2:19) Hem i save evri samting we yumi mekem mo talem. (Hibrus 4:13) Taem yumi no kaen long ol brata mo sista blong yumi, Jehova i  save. Be yumi save tu se Jehova i luk yumi taem yumi singaot narafala i kam long haos blong yumi, yumi givhan long narafala, yumi fogivim narafala mo yumi kaen long narafala. —Hibrus 13:16; 1 Pita 4: 8, 9.

18. ?Olsem wanem blong talem tangkiu long Jehova from we hem i jusum yumi olsem ol man blong hem?

¹⁸ Yumi wantem talem tangkiu long Jehova from we yumi stap olsem ol man blong hem. Yumi save se beswan desisen we yumi mekem, hemia taem yumi givim laef blong yumi long Jehova. Nating se yumi laef “long medel blong ol man we oli rabis mo oli no stret,” be yet ‘yumi no gat poen mo yumi no gat rong,’ mo yumi saen “olsem ol laet long wol.” (Filipae 2:15) Taswe yumi gat strong tingting blong no mekem eni samting we Jehova i no laekem. (Jemes 4:7) Mo yumi lavem mo respektem ol brata sista blong yumi, from we olgeta tu oli man blong Jehova. —Rom 12:10.

19. ?Olsem wanem Jehova i givim pei long ol man blong hem?

¹⁹ Baebol i promes se: ‘Jehova bambae i no save lego ol man blong hem.’ (Ol Sam 94:14) Hemia wan klia pruf. Nomata wanem i hapen, Jehova bambae i stap wetem yumi. Nating sipos yumi ded, bambae hem i neva fogetem yumi. (Rom 8:38, 39) “Sipos yumi laef, yumi laef blong ona long Jehova. Mo sipos yumi ded, yumi ded blong ona long Jehova. Taswe sipos yumi laef no yumi ded, be yumi man blong Jehova.” (Rom 14:8) Yumi glad mo yumi stap wet long taem ya we Jehova bambae i mekem ol fren mo famle blong yumi oli laef bakegen long ded. (Matiu 22:32) Mo tede, yumi stap kasem plante nambawan presen long Papa blong yumi. Baebol i talem se: ‘Ol man blong neson we Jehova i God blong olgeta, we hem i jusumaot olgeta blong oli man blong hem, olgeta ya oli save harem gud.’ —Ol Sam 33:12.