BAEBOL i tokbaot plante man we oli “gat filing olsem yumi.” (Jem. 5:17) Eksampol, yumi naf blong kasemsave samting we Pol i talem long Rom 7:21-24, we i se: “Taem mi wantem mekem samting we i stret, be tingting blong mekem i nogud, hem tu i stap long mi . . . !Mi mi no glad nating!” Ol tok ya blong Pol oli mekem yumi haremgud blong save se hem tu i stap faet agensem ol nogud filing olsem yumi.

Be Pol i tokbaot sam narafala filing tu. Olsem long Galesia 2:20, hem i talem se Jisas i “lavem mi, nao i givim laef blong hem from mi.” ?Yu yu gat sem filing olsem Pol? Ating i no oltaem.

Sipos yumi gohed blong harem nogud from ol mastik we yumi bin mekem, bambae i had blong bilivim se Jehova i lavem mo i fogivim yumi, mo i had blong tingbaot sakrefaes blong Jisas olsem wan presen. ?Be i tru we Jisas i wantem blong yumi tingbaot ransom olsem wan presen? Sipos yes, ?wanem i save halpem yumi? I gud yumi tokbaot ansa blong tufala kwestin ya.

Yes, Jisas i wantem we yumi tingbaot sakrefaes blong hem olsem wan presen. ?Olsem wanem yumi save samting ya? Traem tingbaot stori ya long Luk 23:39-43. Wan man i hang long pos long saed blong Jisas. Hem i talem se hem i sori from ol nogud samting we hem i bin mekem. I luk olsem se man ya i bin mekem wan nogud samting, from we ol kriminol nao oli stap hangem olgeta long pos. From we hem i wari tumas, hem i plis long Jisas se: “Taem yu go long Kingdom blong yu, yu tingbaot mi.”

?Jisas i mekem wanem? Traem tingbaot soa we Jisas i filim taem i hem i tanem hed blong hem blong luk man ya. Nating se Jisas i harem nogud, be hem i tanem hem, i smael long man ya mo i se: “Tru mi talem long yu tede, bambae yu stap wetem mi long Paradaes.” Maet Jisas i save talem nomo se ‘Pikinini blong man i kam blong givim laef blong hem olsem wan ransom, blong pembak plante man oli go fri.’ (Mat. 20:28) Be Jisas i no mekem olsem, hem i toktok stret long man ya. Hem i toktok kaen mo i yusum ol tok olsem “yu” mo “mi.” Mo hem i talem long man ya se bambae hem i laef long paradaes long wol ya.

Jisas i mekem man ya i kasemsave se hem i save harem gud long sakrefaes ya blong hem. Sipos Jisas i gat sori long wan kriminol we i no gat janis blong mekem wok blong God, hemia i min se hem i gat sore long wan Kristin we i mekem wok blong God. ?Wanem i save halpem yumi blong bilif se sakrefaes blong Jisas i save givhan long yumi, nating se bifo yumi mekem plante nogud samting?

Wok blong prij i mekem Pol i tingbaot se Jisas i ded from hem. ?Hemia i minim wanem? Pol  i eksplenem se: “Mi mi talem tangkiu long Masta blong yumi Kraes Jisas we i givim paoa long mi, from we hem i luk mi se mi stret blong hem i givim wan wok blong hem long mi, nating se bifo mi mi stap tok nogud long God, mo mi stap ronem mo kilim ol man blong hem, mo mi no gat respek nating long ol narafala.” (1 Tim. 1:12-14) Wok we Jisas i givim long Pol i mekem hem i sua se Jisas i sori, i lavem, mo i trastem hem. Long sem fasin, Jisas i givim wok blong prij long yumi. (Mat. 28:19, 20) ?Olsem wanem wok blong prij i halpem yumi blong tingbaot se Jisas i ded from yumi?

Albert we i disfelosip blong klosap 34 yia mo i kambak long Jehova i eksplenem se: “Oltaem mi stap tingbaot ol nogud samting we mi bin mekem. Be wok blong prij i mekem mi harem se hemia wok we Jisas i givim long mi, olsem aposol Pol. Mi mi glad, mi gat stret tingting long saed blong mi wan, laef blong mi, mo fiuja blong mi.”—Sam. 51:3.

Bifo we Alan i lanem trutok, hem i mekem plante nogud samting. Hem i talem se: “Mi stap tingbaot yet ol nogud samting we mi bin mekem long ol narafala. Mo samtaem, hemia i mekem mi mi harem nogud bitim mak. Be mi talem tangkiu long Jehova, from we hem i yusum mi blong talemaot gud nius long ol narafala we olgeta tu oli stap mekem ol nogud samting. Mo taem mi luk we oli glad long samting we oli harem, hemia i mekem mi mi tingbaot gudfala fasin mo lav blong Jehova.”

Wok blong prij i givhan long yumi blong mekem mo tingbaot ol gudfala samting. Mo i mekem yumi sua se Jisas i sori, i trastem, mo i lavem yumi.

Naoia we yumi stap yet long rabis wol ya blong Setan, bambae yumi gohed blong harem nogud from ol samting we yumi bin mekem. ?Wanem i save halpem yumi blong winim ol filing ya?

Jean we i stap harem nogud oltaem from fasin blong laef blong hem bifo, i talem se: “Mi glad se ‘God i hae moa long hat blong yumi.’” (1 Jon 3:19, 20) Olsem Jean, yumi haremgud blong save se Jehova mo Jisas oli kasemsave se yumi sinman. Yumi mas tingbaot se presen ya ransom i no blong ol man we oli stret gud, be hem i blong ol sinman we oli tanem tingting blong olgeta.—1 Tim. 1:15.

Taem yumi prea mo tingting dip long fasin we Jisas i soem long ol sin man mo taem yumi mekem bes blong yumi long wok blong prij, yumi sua fulwan se presen ya ransom i save givhan long yumi wanwan. Taem yumi mekem olsem, yumi save gat sem filing ya olsem Pol, we i se: Jisas i “lavem mi, nao i givim laef blong hem from mi.”