1. ?From wanem yumi mas rere blong kasem fasin agens?

LONG naet bifo we Jisas i ded, hem i talem se ol man bambae oli no laekem ol disaepol blong hem. (Jon 17:14) Kam kasem tede, ol man oli gohed blong agensem ol Witnes blong Jehova. (2 Tim. 3:12) Moa we yumi kam klosap long en blong rabis wol ya, moa we ol man bambae oli agensem yumi.—Mat. 24:9.

2-3. (1) ?Setan i yusum wanem tul blong agensem yumi? (2) ?Bambae yumi tokbaot wanem long stadi ya?

² ?Yumi save mekem wanem naoia blong rere from fasin agens? Yumi no mas tingbaot ol rabis samting we i save hapen long yumi. From hemia bambae i mekem yumi fraet mo wari bitim mak. Mo i save blokem yumi blong no moa mekem wok blong Jehova, bifo we yumi kasem trufala fasin agens. (Prov. 12:25; 17:22) Fraet i wan nambawan tul we Setan i yusum blong agensem yumi. (1 Pita 5:8, 9) Taswe, ?yumi save mekem wanem naoia blong stanap strong?

³ Long stadi ya, bambae yumi tokbaot samting we yumi save mekem naoia blong frengud moa wetem Jehova mo from wanem i impoten. Bambae yumi tokbaot olsem wanem blong mekem tingting blong yumi i kam moa strong. Mo tu, bambae yumi tokbaot samting we yumi save mekem taem ol man oli agensem yumi.

4. Folem Hibrus 13:5, 6, ?yumi mas bilif strong long wanem mo from wanem?

⁴ Trastem se Jehova i lavem yu mo bambae hem i neva lego  yu. (Ridim Hibrus 13:5, 6.) Blong plante yia Wajtaoa i talem se: “Man we i savegud God, bambae hem i trastem God taem i gat trabol.” !Hemia i tru tumas! Blong stanap strong taem i gat fasin agens, yumi mas lavem Jehova mo trastem hem fulwan, mo yumi mas bilif strong se hem i lavem yumi.​—Mat. 22:36-38; Jem. 5:11.

5. ?Wanem i save i halpem yu blong kasemsave se Jehova i lavem yu?

⁵ Ridim Baebol evridei. (Jem. 4:8) Taem yu ridim Baebol, i gud yu tingbaot ol gudfala fasin blong Jehova. Traem kasemsave lav blong hem taem yu ridim ol samting we hem i talem mo i mekem. (Eks. 34:6) Maet i had blong samfala oli bilif se God i lavem olgeta, from we i neva gat man i soem lav long olgeta. Sipos yu gat filing ya, i gud evridei yu mekem lis blong ol samting we i soemaot se Jehova i kaen mo i sori long yu. (Sam. 78:38, 39; Rom 8:32) Taem yu tingbaot ol samting we Jehova i mekem blong yu, mo yu tingting dip long samting we yu ridim long Baebol, bambae yu faenemaot plante samting we Jehova i mekem finis blong yu. Moa we yu gat fasin tangkiu from ol samting we Jehova i mekem, moa we bambae yu frengud wetem hem.​—Sam. 116:1, 2.

6. Folem Ol Sam 94:17-19, ?olsem wanem prea i save halpem yu?

⁶ Prea oltaem. Traem tingbaot wan smol boe we papa blong hem i putum han i goraon long hem. Hemia i mekem boe ya i no fraet blong talemaot long papa blong hem, ol samting we i hapen long dei blong hem. Yu tu yu save frengud wetem Jehova, sipos yu prea long hem evridei. (Ridim Ol Sam 94:17-19.) Taem yu prea long Jehova, ‘yu mas talemaot olgeta tingting blong yu’ mo ol samting we i mekem yu fraet mo wari. (Krae 2:19) Long rod ya, bambae yu kasem “pis ya blong God we i bigwan tumas i bitim olgeta save” blong yu. (Fil. 4:6, 7) Moa we yu prea, moa we bambae yu harem se yu kam klosap long Jehova.​—Rom 8:38, 39.

7. ?Olsem wanem fasin ya blong trastem ol promes blong God i save givhan long yumi?

⁷ Trastem se ol blesing blong Kingdom blong God bambae oli kamtru. (Nam. 23:19) Sipos yu no bilif strong long ol promes ya, bambae i isi blong Setan mo ol enjel blong hem oli mekem yu fraet. (Prov. 24:10; Hib. 2:15) ?Olsem wanem blong mekem bilif blong yu long saed blong Kingdom blong God i kam moa strong naoia? I gud yu stadi long ol promes we kingdom blong God bambae i mekem long fiuja, mo from wanem yu bilif strong se oli mas kamtru. ?Olsem wanem samting ya i save givhan? Traem tingbaot brata Stanley Jones we i kalabus seven yia from bilif blong hem. * ?Wanem i halpem hem blong i stanap strong? Hem i talem se: “Mi mi bilif strong long Kingdom blong God mo long ol samting  we kingdom ya bambae i mekem. Taswe i no gat wan man we i save mekem mi mi lego Jehova.” Sipos yu bilif strong long ol promes blong God, bambae yu kam klosap moa long hem mo bambae yu no letem fraet i stopem yu blong mekem wok blong hem.—Prov. 3:25, 26.

8. ?Olsem wanem fasin ya blong go oltaem long ol miting i save givhan long yumi? Yu eksplenem.

⁸ Go oltaem long ol miting. Ol miting oli halpem yumi blong kam klosap moa long Jehova mo blong yumi stanap strong taem i gat fasin agens. (Hib. 10:24, 25) Taswe sipos yumi letem ol smosmol samting nomo oli blokem yumi naoia blong no go long ol miting, ?wanem bambae i hapen sipos gavman i putum tabu long wosip blong yumi? Taem yumi gat strong tingting naoia blong go long ol miting, bambae yumi no stop blong go long ol miting taem gavman i blokem wosip blong yumi. Mo tu, bambae yumi gohed nomo blong obei long God, taem gavman i putum tabu o ol man oli agensem yumi.​—Wok 5:29.

9. ?From wanem i gud blong lanem ol vas blong Baebol baehat?

⁹ Lanem baehat ol vas we yu laekem. (Mat. 13:52) Yumi no naf blong tingbaot evri vas, be Jehova i save yusum tabu spirit blong mekem yumi tingbaot ol vas ya. (Jon 14:26) Wan brata we i kalabus long Is Jemani mo oli putum hem wan long wan rum, i talem se: “!Mi mi glad tumas se long taem ya mi lanem plante vas baehat! Nating se mi stap mi wan, be oltaem mi bisi blong tingbaot ol samting we Baebol i tokbaot.” Ol vas ya oli halpem brata ya blong i stap klosap long Jehova​—mo i stanap strong kasem en.

10. ?From wanem yumi mas lanem ol singsing baehat?

¹⁰ Lanem ol singsing baehat mo yu sing long olgeta blong presem Jehova. Taem Pol mo Saelas i stap kalabus long Filipae, tufala i sing long ol singsing we oli save baehat. (Wok 16:25) Traem tingbaot ol brata mo sista long Soviet Yunion we oli go kalabus long Saebiria, ?wanem i halpem olgeta blong stanap strong? Sista Mariya Fedun i talem se: “Mifala i sing long ol singsing we mifala i save long sing buk blong yumi.” Hem i talem se ol singsing ya oli leftemap tingting blong olgeta mo oli harem se oli stap klosap long Jehova. ?Yu tu yu harem se bilif blong yu i kam strong moa, taem yu sing long ol singsing blong kingdom we yu laekem tumas? !I gud yu stat naoia blong lanem baehat ol singsing ya!​—Yu luk bokis ya “ Plis Givim Strong Tingting.”

11-12. (1) Folem 1 Samuel 17:37, 45-47, ?wanem i mekem se Deved i gat strong tingting? (2) ?Yumi lanem wanem long stori blong Deved?

¹¹ Blong stanap strong taem i gat fasin agens, yu nidim strong tingting. ?Be olsem wanem sipos yu harem se yu no gat strong tingting? Yu mas tingbaot se strong tingting i no dipen long saes, paoa, mo save blong yu. Traem tingbaot Deved taem hem i go blong faet agensem Golaeat. Long tingting blong Golaeat, Deved i nating nomo, hem i no gat paoa, mo hem i no gat ol tul blong faet. I tru, Deved i no iven gat wan naef blong faet. Be, hem i gat strong tingting mo hemia i mekem se hem i no fraet blong go faet agensem bigfala flas man ya.

¹² ?Wanem i mekem se Deved i gat strong tingting? Hem i bilif strong se Jehova i stap wetem hem. (Ridim 1 Samuel 17:37, 45-47.) Deved i no tingbaot se Golaeat i bigwan olsem wanem. Be hem i tingbaot se long lukluk blong Jehova, Golaeat i wan smol man nomo. ?Yumi lanem wanem long stori ya? Yumi tu yumi save gat strong tingting sipos yumi bilif strong se Jehova i stap wetem yumi, mo se ol enemi blong yumi oli smol nomo long lukluk blong Jehova. (2 Kron. 20:15; Sam. 16:8) Taswe, ?olsem wanem yumi save gat strong tingting naoia, bifo we yumi kasem fasin agens?

13. ?Olsem wanem yumi save gat strong tingting? Yu eksplenem.

¹³ Yumi save gat strong tingting naoia, taem yumi talemaot gud nius blong Kingdom long ol narafala. ?From wanem? From we wok blong prij i halpem yumi blong trastem Jehova, mo winim fasin ya blong fraet long man. (Prov. 29:25) Traem tingbaot, ol masel blong yumi oli kam strong taem yumi mekem eksasaes. Long sem fasin, tingting blong yumi i save kam strong moa taem yumi prij long ol haos wanwan, long ol pablik ples, taem yumi tekem janis, mo long ol bisnes haos. Sipos yumi gat strong tingting blong prij naoia, bambae yumi rere moa blong prij taem gavman i putum tabu long wok blong yumi.​—1 Tes. 2:1, 2.

14-15. ?Yumi lanem wanem long stori blong sista Nancy Yuen mo Valentina Garnovskaya?

¹⁴ Yumi save lanem plante samting long stori blong tu sista we oli gat strong tingting. Nancy Yuen i longfala samwe long 1.5 m, be hem i gat strong tingting. * Hem i no wantem  stop blong talemaot gud nius. From samting ya, oli putum hem long kalabus blong bitim 20 yia long Jaena. Ol polis we oli kwestinim hem oli talem se hem i “stronghed moa” i bitim ol narafala stronghed long kantri blong olgeta.

¹⁵ Valentina Garnovskaya tu i kalabus long Rasia blong 21 yia be long 3 defren taem. * ?From wanem? From we hem i gat strong tingting blong prij, mo ol polis oli talem se hem i “wan denjeres kriminol.” ?Wanem i mekem se tufala sista ya i gat strong tingting? Tufala i bilif strong se Jehova i stap wetem tufala.

16. ?Yumi mas mekem wanem blong gat strong tingting?

¹⁶ Olsem we yumi bin tokbaot, blong gat strong tingting, yumi no mas dipen long prapa paoa blong yumi mo long samting we yumi naf blong mekem. Be, yumi mas bilif se Jehova i stap wetem yumi mo bambae hem i faet long saed blong yumi. (Dut. 1:29, 30; Sek. 4:6) Hemia nao samting we i save mekem yumi gat strong tingting.

17-18. Folem Jon 15:18-21, ?Jisas i wonem yumi long saed blong wanem? Yu eksplenem.

¹⁷ Yumi glad taem narafala i respektem yumi, be yumi no mas ting nating long yumi wan taem narafala i no laekem yumi. Jisas i talem se: “Sipos ol man oli no laekem yufala nating from we yufala i man blong mi, mo oli ronem yufala, oli stap spolem mo daonem nem blong yufala se yufala i nogud, yufala i mas glad.” (Luk 6:22) ?Jisas i minim wanem?

¹⁸ Jisas i no minim se ol Kristin bambae oli glad taem narafala i agensem olgeta. Defren olgeta, hem i stap wonem yumi from samting we i save hapen. Yumi no man blong wol ya. Yumi stap folem ol tijing blong Jisas mo yumi stap talemaot gud nius blong Kingdom. Mo from samting ya, ol man blong wol ya oli no laekem yumi. (Ridim Jon 15:18-21.) Yumi wantem mekem Jehova i glad. Sipos ol man oli no laekem yumi from we yumi lavem Jehova, hemia i problem blong olgeta.

19. ?Olsem wanem yumi save folem eksampol blong ol aposol?

¹⁹ Yu no mas letem ol samting we ol man oli  mekem o oli talem, i mekem yu sem from we yu yu wan Witnes. (Mae. 4:5) Yumi save lanem blong no fraet, taem yumi tingbaot samting we ol aposol oli mekem, smoltaem afta we ol man oli kilim Jisas i ded. Ol aposol oli savegud se ol lida blong skul oli no laekem olgeta nating. (Wok 5:17, 18, 27, 28) Nating se i olsem, evri dei oli go long haos tempol mo long ol pablik ples blong talemaot gud nius. (Wok 5:42) Oli no letem fraet i blokem olgeta. Yumi save folem eksampol blong olgeta taem yumi talemaot long ol man long ples blong wok, long skul, o long ol neba blong yumi, se yumi Witnes blong Jehova.​—Wok 4:29; Rom 1:16.

20. ?From wanem ol aposol oli glad nating se ol man oli no laekem olgeta?

²⁰ ?From wanem ol aposol oli glad? Oli glad from we oli save se oli mekem samting we Jehova i wantem, taswe ol man oli no laekem olgeta. (Luk 6:23; Wok 5:41) Aposol Pita i talem se: “Sipos samtaem ol man oli mekem yufala i safa from we yufala i stap mekem ol samting we i stret, yufala i glad.” (1 Pita 2:19-21; 3:14) Taem yumi kasem save se ol man oli no laekem yumi from we yumi mekem samting we i stret, bambae yumi no letem fraet i blokem yumi blong mekem wok blong Jehova.

21-22. (1) ?Yu save mekem wanem naoia blong rere from fasin agens? (2) ?Bambae yumi tokbaot wanem long nekis stadi?

²¹ Yumi no save stret taem we bambae ol man oli agensem yumi o wetaem gavman bambae i putum tabu long wok blong prij. Nating se i olsem, yumi save se naoia i taem blong yumi frengud moa wetem Jehova, yumi mekem tingting blong yumi i kam moa strong, mo yumi no harem nogud taem narafala i no laekem yumi. Taem yumi rere naoia, hemia bambae i halpem yumi blong gohed blong mekem wok blong Jehova long fiuja.

²² ?Be olsem wanem sipos gavman i putum tabu long wosip blong yumi? Long nekis stadi, bambae yumi tokbaot ol rul blong Baebol we oli save halpem yumi blong gohed blong mekem wok blong Jehova, nating se gavman i putum tabu.