1. Folem 3 Jon 3, 4, ?wanem i mekem yumi glad?

APOSOL Jon i glad tumas taem ol man we hem i givhan long olgeta blong lanem trutok, oli gohed blong holemstrong long Jehova. Plante samting i traem olgeta, mo Jon i traehad blong mekem bilif blong ol Kristin ya i strong moa, from we oli olsem ol pikinini blong hem. Long sem fasin, yumi glad tumas taem ol pikinini blong yumi mo ol man we yumi givhan long olgeta blong oli kam long trutok, oli givim laef blong olgeta long Jehova mo oli gohed blong wosipim hem.—Ridim 3 Jon 3, 4.

2. ?Ol leta we Jon i raetem oli mekem wanem long ol Kristin?

² Long yia 98, i luk olsem se Jon i stap long Efesas o klosap long taon ya. Ating hem i go long ples ya afta we hem i aot long kalabus long aelan blong Patmos. Samwe long taem ya, tabu spirit i pulum hem blong i raetem trifala leta blong hem. Ol leta ya oli pulum ol Kristin blong oli gohed blong bilif strong long Jisas mo wokbaot long trutok.

3. ?Wanem ol kwestin we bambae yumi ansarem?

³ Jon i laswan long ol aposol we oli laef, mo hem i wari from we ol man blong apostasi oli stap pulum olgeta long kongregesen. * (1 Jon 2:18, 19, 26) Ol man blong apostasi oli talem se oli save God, be oli no obei long ol loa blong hem. I gud yumi tokbaot ol advaes we God i pulum Jon blong i raetem. Bambae yumi ansarem trifala kwestin ya: ?Wokbaot long trutok i minim wanem? ?Wanem i save pulumaot yumi long trutok? ?Yumi save mekem wanem blong givgivhan long yumi blong gohed long trutok?

4. Folem 1 Jon 2:3-6 mo 2 Jon 4, 6, ?wokbaot long trutok i minim wanem?

⁴ Sipos yumi wantem wokbaot long trutok, yumi mas kasem save long trutok blong Baebol. Mo tu, yumi mas “folem ol loa blong [Jehova],” i min se yumi obei long olgeta. (Ridim 1 Jon 2:3-6; 2 Jon 4, 6.) Jisas i soemaot gudfala eksampol blong obei long Jehova. Taswe, blong obei long Jehova, yumi mas folemgud eksampol blong Jisas.—Jon 8:29; 1 Pita 2:21.

5. ?Yumi mas bilif strong long wanem?

⁵ Sipos yumi wantem gohed blong wokbaot long trutok, yumi mas bilif strong se Jehova i God blong trutok, mo se evri samting we hem i talem long Tok blong hem Baebol, i tru. Mo tu, yumi mas bilif strong se Jisas i Mesaea we God i jusumaot. Tede, plante man oli no ting se Jisas i King long Kingdom blong God. Jon i givim woning se “plante man blong giaman” bambae oli trikim olgeta we oli no bilif strong long trutok long saed blong Jehova mo Jisas. (2 Jon 7-11) Hem i talem se: “Man we i stap talem se Jisas i no Kraes, hem nao i man blong giaman.” (1 Jon 2:22) Wan rod nomo blong no letem ol man oli giaman long yumi, hemia blong stadigud long Tok blong God. Sipos yumi mekem olsem, bambae yumi savegud Jehova mo Jisas. (Jon 17:3) Long rod ya nomo, bambae yumi save bilif strong se yumi gat trutok.

6. ?Wanem i save pulum ol yangfala Kristin?

⁶ Olgeta Kristin, antap moa ol yangfala, oli mas lukaot gud se waes blong wol i no pulum olgeta. (1 Jon 2:26) Aleksia, * wan sista blong Franis we i gat 25 yia, i talem se: “Taem mi stap long skul, tijing blong evolusen mo waes blong wol, i mekem tingting blong mi i fasfas. Samtaem mi wantem bilif long ol tijing ya. Be mi harem se mi no save lesin nomo long samting we ol tija oli talem long mi, mi mas faenemaot samting we Jehova i talem.” Aleksia i stadi long buk ya Life—How Did It Get Here? By Evolution or by Creation?  Smoltaem biaen, hem i no moa gat tu tingting. Hem i talem se: “Mi pruvum se samting we Baebol i talem i tru. Mo mi luksave se sipos mi folem ol advaes blong hem, bambae mi glad mo mi gat pis.”

7. ?Yumi no mas mekem wanem? ?From wanem?

⁷ Sipos waes blong wol i pulum yumi, sloslo yumi save stat blong gat tu fes. Be ol Kristin, nating se oli yangfala o olfala, oli no mas gat tu fes. Jon i soemaot se yumi no save wokbaot long trutok mo long semtaem yumi mekem ol rabis fasin. (1 Jon 1:6) Sipos yumi wantem se God i glad long yumi naoia mo long fiuja, yumi mas tingbaot se hem i stap luk yumi. Yumi save haedem ol sin long ol man, be Jehova i luk evri samting.—Hib. 4:13.

8. ?Yumi mas sakemaot wanem?

⁸ Yumi mas sakemaot tingting we ol man oli gat long sin. Aposol Jon i talem se: “Sipos yumi talem se: ‘Yumi no gat sin,’ yumi stap giaman nomo long yumi.” (1 Jon 1:8) Long taem blong Jon, ol man blong apostasi oli talem se man i save frengud wetem God, nating se hem i gohed blong mekem sin. Tede, ol man raonabaot long yumi oli gat sem tingting. Plante man oli talem se oli bilif long God, be oli no gat tingting blong God long sin, speseli long doti fasin blong seks. Fasin we Jehova i talem se i no stret, ol man oli talem se hemia jus blong wanwan man.

9. ?From wanem i gud we ol yangfala oli folem ol advaes blong Baebol?

⁹ Samtaem i had blong ol yangfala Kristin oli sakemaot tingting blong ol fren blong olgeta long skul o long wok, long saed blong ol doti fasin blong seks. Hemia nao samting we i hapen long Aleksanda. Hem i talem se: “Sam gel oli traem pulum mi blong mi slip wetem olgeta. Oli talem se from we mi no gat gelfren, ating mi wan man blong slip wetem  man bakegen.” Sipos samting ya i hapen long yu, yu mas tingbaot se taem yu gohed blong folem ol advaes blong Baebol, yu no save sem, yu gat gudfala helt, yu gat pis long tingting blong yu, mo yu frengud wetem Jehova. Mo evri taem we yu winim wan samting we i traem yu, bambae i moa isi blong mekem i stret. Mo tu, yu mas tingbaot se rong tingting we ol man blong wol oli gat long saed blong seks, i kamaot long Setan. Taswe, taem yu no letem tingting blong wol i pulum yu, yu save ‘winim Man ya we i rabis.’—1 Jon 2:14.

10. ?1 Jon 1:9 i halpem yumi olsem wanem, blong tingting i no stikim yumi?

¹⁰ Yumi save se Jehova i gat raet blong talem wanem fasin i stret mo i no stret, mo yumi traehad blong no mekem sin. Be taem yumi mekem wan sin, yumi mas prea mo talemaot long Jehova. (Ridim 1 Jon 1:9.) Mo sipos yumi mekem wan bigfala sin, yumi mas go luk ol elda we Jehova i putumap olgeta blong oli lukaot long yumi. (Jem. 5:14-16) Be yumi no mas gohed blong harem nogud tumas from ol mastik we yumi mekem. ?From wanem? From we Papa blong yumi we i lavem yumi, i givim Pikinini blong hem olsem ransom sakrefaes, blong fogivim ol sin blong yumi. Jehova i no giaman taem hem i talem se bambae hem i fogivim ol man we oli tanem tingting blong olgeta. Taswe yumi save mekem wok blong Jehova we tingting blong yumi i no stikim yumi.—1 Jon 2:1, 2, 12; 3:19, 20.

11. ?Yumi mas mekem wanem blong ol giaman tingting oli no spolem yumi?

¹¹ Yumi mas sakemaot tingting blong ol man blong apostasi. Stat long taem we Kristin kongregesen i stanap, Setan i yusum plante man blong giaman blong mekem ol man blong God oli gat tu tingting.  Taswe yumi mas luksave samting we i tru mo samting we i giaman. * Ol enemi blong yumi oli save yusum Intenet o sosial media blong mekem se yumi no moa trastem Jehova mo lavem ol brata mo sista. !Yu mas tingbaot se ol giaman toktok ya oli kamaot long Setan, mo yu mas sakemaot olgeta!—1 Jon 4:1, 6; Rev. 12:9.

12. ?From wanem yumi mas mekem bilif blong yumi i strong long ol trutok we yumi lanem?

¹² Sipos yumi wantem winim Setan, yumi mas bilif strong long Jisas mo wok blong hem blong mekem stamba tingting blong God i kamtru. Mo tu, yumi mas trastem gudfala slef we i waes, we Jehova i stap yusum blong lidim yumi. (Mat. 24:45-47) Yumi mekem bilif blong yumi i strong moa taem yumi stadi Baebol oltaem. Bilif blong yumi i save kam olsem wan tri we rus blong hem i godaon we i godaon. Hemia samting we Pol i talem taem hem i raetem leta long kongregesen long Kolosi, i se: “Olsem we yufala i agri finis long Masta Kraes Jisas, ale yufala i mas gohed blong wokbaot wetem hem . . . bilif blong yufala long hem i mas mekem yufala i strong, mo yufala i stanap strong olsem wan tri we rus blong hem i stap dip insaed long graon, mo bilif blong yufala i mas kam strong moa oltaem.” (Kol. 2:6, 7) Sipos yumi traehad blong mekem bilif blong yumi i strong, bambae Setan mo ol man blong hem oli no save pulumaot yumi.—2 Jon 8, 9.

13. ?Yumi no mas sapraes long wanem? ?From wanem?

¹³ Yumi no mas sapraes se wol i no laekem yumi. (1 Jon 3:13) Jon i talem se “fulwol i stap long paoa blong Man ya we i rabis.” (1 Jon 5:19) Taem en i kam klosap moa, Setan i stap kam kros moa. (Rev. 12:12) Hem i yusum ol trik olsem ol doti fasin blong seks, mo ol giaman tok blong ol man blong apostasi, be i no hemia nomo. Hem i pulum ol man blong oli agensem yumi tu. Setan i save se hem i gat smoltaem nomo blong stopem wok blong prij mo mekem yumi lego bilif. Taswe yumi no sapraes se long sam kantri, gavman i putum tabu long wok blong yumi. Nating se i olsem, ol brata mo sista oli stanap strong. !Hemia i soemaot se nomata wanem samting we Setan i mekem, yumi save win!

14. ?Olsem wanem yumi save halpem ol brata mo sista blong oli stap long trutok?

¹⁴ Sipos yumi wantem halpem ol brata mo sista blong oli stap long trutok, yumi mas soemaot sore long olgeta. (1 Jon 3:10, 11, 16-18) Yumi mas lavlavem yumi, i no long gudtaem nomo, be long hadtaem tu. ?Yu yu save wan brata o sista we wan famle blong hem i ded, mo i nidim we yumi givhan mo leftemap tingting blong hem? ?O yu harem nius blong samfala we oli lusum ol samting blong olgeta long wan disasta, mo oli nidim we yumi wokem Haos Kingdom o haos blong olgeta bakegen? Yumi soemaot lav mo sore long ol brata mo sista, i no long toktok blong yumi nomo, be long samting we yumi mekem tu.

15. Folem 1 Jon 4:7, 8, ?yumi mas mekem wanem?

¹⁵ Taem yumi lavlavem yumi, yumi stap folem fasin blong Papa blong yumi, Jehova. (Ridim 1 Jon 4:7, 8.) Wan impoten rod blong soemaot lav hemia blong  fofogivim yumi. Maet wan brata o sista i mekem yumi harem nogud. Sipos yumi gat lav, bambae yumi fogivim hem mo fogetem mastik blong hem. (Kol. 3:13) Samting ya i hapen long wan brata we nem blong hem Aldo. Wan brata we Aldo i respektem, i talem wan tok we i daonem ol man ples blong hem. Aldo i talem se, “Oltaem mi prea long Jehova blong i halpem mi blong mi no kros long brata ya.” Be Aldo i mekem wan narafala samting tu. Hem i askem long brata blong i prij wetem hem. Taem tufala i prij, Aldo i eksplenem samting we i mekem hem i harem nogud tumas. Hem i gohed se, “Brata i talem sore, mo voes blong hem i soemaot se hem i sore tumas long samting we hem i mekem. Biaen, mitufala i fren gud bakegen.”

16-17. ?Yumi mas gat strong tingting blong mekem wanem?

¹⁶ Aposol Jon i lavem tumas ol brata mo sista, mo i wantem se bilif blong olgeta i strong. Yumi luksave samting ya long ol advaes we hem i raetem long trifala leta blong hem. !Yumi glad tumas se ol man mo woman we oli gat fasin olsem Jon, bambae oli rul wetem Jisas long heven!—1 Jon 2:27.

¹⁷ I gud yumi folem ol advaes we yumi tokbaot. Yumi mas gat strong tingting blong wokbaot long trutok, mo obei long Jehova long evri samting we yumi mekem. Yumi mas stadi mo trastem Tok blong hem. Yumi mas mekem bilif blong yumi i strong long Jisas. Sakemaot waes blong wol mo tingting blong ol man blong apostasi. Yumi no mas letem wol i pulum yumi blong yumi gat tu fes mo blong mekem sin. Yumi mas folem ol gudfala fasin blong Jehova. Mo yumi halpem ol brata mo sista blong oli gohed gud taem yumi fogivim olgeta we oli mekem yumi harem nogud, mo givhan long olgeta we oli kasem trabol. Sipos yumi mekem olsem, bambae yumi gohed blong wokbaot long trutok, nating se i no isi.