LAEF STORI
Mi Mekem Wok We Mi Mas Mekem
DONALD Ridley i wan loea blong ol Witnes blong Jehova blong bitim 30 yia. Hem i mekem wan impoten wok blong givhan long ol man, blong oli luksave raet we ol Witnes oli gat blong no tekem blad. Hem i givhan long oganaesesen blong i winim plante kot kes long ol saprim kot blong Amerika. Ol fren blong hem oli singaotem hem se Don. Hem i wok had, i gat tingting daon, mo i lego samting we hem nomo i wantem blong givhan long ol narafala.
Long 2019, ol dokta oli faenemaot se Don i kasem wan sik we i no gat meresin blong hem. Sik ya i spolem hem kwiktaem, mo hem i ded long 16 Ogis 2019. Hemia stori blong hem.
Mi mi bon long St. Paul, Minnesota, Amerika, long 1954. Famle blong mi i no rij. I gat faef pikinini long famle, mo mi mi sekenbon. Mifala i Katolik, taswe mi skul long wan Katolik skul, mo mi stap givhan long pris. Be mi gat smol save nomo long Baebol. Mi bilif se i gat wan God we i wokem olgeta samting, be mi no moa laekem jos.
TAEM MI LANEM TRUTOK
Long fas yia we mi stadi blong kam loea long William Mitchell College of Law, tu Witnes blong Jehova i kam prij long mi. Mi stap was, ale tufala i glad blong kambak. Taem tufala i kam, mi askem tufala kwestin ya: “?From wanem ol rabis man oli stap win?” mo “?Olsem wanem ol man oli save glad?” Mi karem buk ya Trutok Blong Soemaot Rod Blong Itenel Laef mo Niu Wol Translesen Baebol, we kava blong hem i grin. Mo tu, mi agri blong stadi long Baebol. !Mi lanem plante samting! Mi sapraes blong lanem se Kingdom blong God i wan gavman we bambae i rulum wol. Mi luksave se rul blong man i nogud, i mekem man i safa, i fulap long kruked fasin, mo i mekem plante trabol.
Long stat blong yia 1982, mi givim laef blong mi long Jehova, mo mi baptaes long Bigfala Asembli ya “Trutok Blong Kingdom,” we oli mekem long wan komuniti senta long St. Paul. Long nekis wik, mi gobak long senta ya blong mekem eksam blong kam loea. Long stat blong Oktoba, mi kasem nius se mi pasem eksam blong mi.
Long Asembli ya “Trutok Blong Kingdom,” mi mitim Mike Richardson, we i wok long Betel long Brooklyn. Hem i talem long mi se oli stanemap wan ligol ofis long hedkwota. Mi tingbaot ol tok blong man Itiopia long Ol Wok 8:36, mo mi stap tingbaot se, ‘?Wanem nao i blokem mi blong mi no save wok long Ligol Ofis?’ Ale, mi aplae blong go long Betel.
Papa mo mama blong mi i no glad we mi kam wan Witnes blong Jehova. Papa i askem long mi se wok long Betel bambae i givhan long mi olsem wanem. Mi talem se hemia wan volontia wok, mo bambae mi kasem 75 dola long wan manis blong pem ol samting we mi nidim.
Mi finis wok, nao long 1984, mi stat blong wok long Betel long Brooklyn. Oli askem long mi blong mi wok long Ligol Ofis. Wok we mi mekem bifo i givhan long mi long wok ya.
WOK BLONG FIKSIMAP STANLEY THEATER
Stanley Theater long taem we oli pem
Long Novemba 1983, oli pem Stanley Theater long New Jersey. Ol brata oli aplae blong kasem pemit blong fiksim ol rop blong lektrik mo ol paep blong wota long bilding ya. Oli eksplenem long ol man we oli givim pemit se oli wantem yusum Stanley Theater olsem wan haos asembli blong ol Witnes blong Jehova. Be folem loa blong taon ya, ol haos wosip oli no save stap long medel blong taon. Taswe, oli no wantem givim pemit. Ol brata oli askem bakegen, be oli no kasem.
Long fas wik we mi wok long Betel, ol brata oli tekem kes ya i go long kot. From we mi wok tu yia long wan kot haos long St. Paul, Minnesota, mi save gud ol kes olsem. Wan long ol loea blong mifala i talem se ol man oli stap yusum Stanley Theater long ol defdefren samting, olsem blong wajem ol muvi o konset. Taswe, ?from wanem i no stret blong yusum ples ya blong mekem wosip? Kot i talem se ol loa blong taon ya oli no respektem raet we yumi gat blong mekem wosip. Kot i mekem desisen se ol man ya oli mas givim pemit long ol brata. Stat long taem ya, mi luksave se Jehova i stap yusum ol loa blong kantri blong blesem wok blong hem. Mi mi glad tumas we mi gat janis blong joen long wok ya.
Ol brata oli statem wan bigfala wok blong fiksimap bilding ya. I no wan yia yet, oli mekem graduesen blong namba 79 klas blong Gilead long Haos Asembli ya, hemia long 8 Septemba 1985. Mi harem se i wan bigfala blesing blong joen long Ligol Ofis mo givhan long wok blong Kingdom. Mi glad moa long wok ya i bitim wok blong loea we mi mekem bifo. Long taem ya, mi no save se Jehova bambae i givim plante moa wok long mi.
RAET BLONG YUMI BLONG NO TEKEM BLAD
Long ol yia 1980, ol dokta oli no respektem raet blong ol Witnes we oli bigman finis, blong no tekem blad. I had moa long ol woman we oli gat bel, from we plante jaj oli ting se ol mama oli no gat raet blong mekem desisen long blad. Oli talem se sipos wan mama i no tekem blad, maet hem i save ded, nao pikinini i no moa gat mama.
Long 29 Disemba 1988, Sista Denise Nicoleau i lusum plante blad afta we hem i bonem boe blong hem. From we laef blong hem i stap long denja, dokta i talem se hem i mas tekem blad. Be Sista Nicoleau i no wantem. Long nekis moning, ol dokta oli go luk jaj blong kasem raet blong givim blad long hem. Jaj i no givim janis long Sista Nicoleau mo hasban blong hem blong talem tingting blong tufala, mo i no talem tu se i givim raet long ol dokta blong oli givim blad long hem.
Long Fraede, 30 Disemba, ol dokta oli givim blad long Sista Nicoleau nating se hasban mo ol famle we oli stap oli no agri. Long sapa, polis i arestem sam famle mo sam elda we oli stanap raon long bed blong Sista Nicoleau, blong traem blokem ol dokta blong oli no givim blad. Long moning blong 31 Disemba, oli tokbaot long TV, niuspepa, mo radio blong New York mo Long Island, se ol polis oli arestem olgeta.
Mi wetem Philip Brumley taem mitufala i yangfala
Long Mande moning, mi toktok wetem Milton Mollen, jaj blong wan kot we i hae moa. Mi eksplenem klia se jaj i no bin givim janis long sista mo hasban blong hem blong talemaot tingting blong tufala. Jaj Mollen i singaot mi mi go long ofis blong hem long sapa ya, blong tokbaot problem ya mo ol loa we oli joen wetem kes ya. Philip Brumley we i ovasia blong mi, i kam wetem mi. Jaj i askem long loea blong hospital tu blong i kam. Storian blong mifala i hot lelebet. Taswe, Brata Brumley i raetem wan smol not long mi blong talem se mi mas “slodaon.” Hemia i wan gudfala advaes, from we mi stap toktok strong blong pruvum se loea blong hospital i rong.
Stat long lef i go long raet: Richard Moake, Gregory Olds, Paul Polidoro, Philip Brumley, mi, mo Mario Moreno—ol loea we oli go long Saprim Kot blong Amerika from kes blong Watchtower agensem Village of Stratton.—Yu luk Wekap! blong 8 Jenuware 2003 long Inglis.
Wan aoa biaen, Jaj Mollen i talem se fas samting blong tokbaot tumoro, hemia kes ya. Taem mifala i rere blong aot long ofis blong hem, hem i talem se loea blong hospital i gat “bigfala wok blong mekem tumoro.” Hemia i min se bambae i no isi long loea blong hospital blong pruvum se ol dokta oli gat raet blong givim blad. I olsem we Jehova i stap leftemap tingting blong mi se mifala i save winim kes ya. Mi mi sapraes blong luk se Jehova i stap yusum mifala blong mekem samting we hem i wantem.
Mifala i wok let long naet blong rerem samting we bambae mifala i talem long nekis moning. From we kot haos i stap klosap long Betel long Brooklyn, bighaf blong mifala long Ligol Ofis i wokbaot nomo i go. Fo jaj i lesin long samting we mifala i talem, nao oli mekem desisen se ol dokta oli no sud givim blad long Sista Nicoleau. Hae kot i talem se jaj i no gat raet blong letem dokta i givim blad long man, bifo we i harem tingting blong man ya. Hemia i agensem raet blong ol man.
Smoltaem afta, kot blong New York we i hae moa, i talemaot bakegen raet we Sista Nicoleau i gat blong no tekem blad. Hemia faswan long fo kot kes blong blad we mi gat janis blong wok long olgeta, long ol defren hae kot long Amerika. (Yu luk bokis ya “ Sam Kot Kes We Yumi Winim.”) Mi mi gat blesing ya tu blong wok wetem ol narafala loea long Betel, long ol kot kes blong divos, graon, haos, mo hu i gat raet blong lukaot long pikinini.
MI MARED MO MI GAT PIKININI
Mi wetem waef blong mi, Denise
Taem mi mitim Denise, hem i divos mo i lukaot long tri pikinini. Hem i wok blong kasem mane, mo i mekem wok blong paenia. Mi laekem strong tingting blong hem long wok blong Jehova, nating se hem i kasem plante trabol. Long 1992 mi go long Bigfala Asembli ya “Ol Man Blong Karem Laet” long New York, mo mi askem Denise blong mi frenem hem. Wan yia biaen, mitufala i mared. Waef blong mi i wan presen we i kam long Jehova, from we oltaem hem i putum Jehova long fasples, mo hem i glad oltaem. Denise i mekem i gud tumas long mi long olgeta yia we mitufala i stap tugeta.—Prov. 31:12.
Taem mitufala i mared, ol pikinini oli gat 11, 13, mo 16 yia. Mi wantem kam wan gudfala papa, taswe mi ridim mo folem ol advaes long ol buk blong yumi we oli tokbaot ol step papa. Samtaem i no isi, be mi glad se naoia ol pikinini oli luk mi olsem wan gudfala fren mo papa blong olgeta. Haos blong mifala i open long ol fren blong ol pikinini blong mitufala, mo mitufala i glad tumas long kampani blong ol yangfala ya.
Long 2013, mi mo Denise i go long Wisconsin blong lukaot long ol olfala papa mo mama blong mitufala. Mi sapraes se wok blong mi long Betel i no finis yet. Oli askem long mi blong mi givhan sam samtaem long Ligol Ofis olsem wan volontia.
LAEF BLONG MI I JENIS
Long Septemba 2018, mi luksave se mi stap kliarem trot blong mi oltaem. Wan dokta i jekem mi be i no faenem wan samting. Biaen wan nara dokta i talem se i gud blong mi go luk wan spesel dokta. Long Jenuware 2019, spesel dokta ya i talem long mi se, i luk olsem mi gat wan kaen sik (progressive supranuclear palsy) we smol man nomo oli kasem, mo sloslo sik ya bambae i spolem ful bodi blong mi.
Tri dei biaen, taem mi joen long wan spot we mi laekem tumas, mi foldaon mo mi brekem han blong mi. Mi mekem spot ya long ful laef blong mi mo mi save gud. Taswe taem mi foldaon, mi luksave se mi no moa save kontrolem gud bodi blong mi. Mi sek se sik ya i stap kam mowas kwiktaem nomo, mo i mekem se i had blong mi toktok, muvmuv, mo solemdaon kakae.
Mi glad tumas blong yusum save blong mi olsem wan loea, blong givhan smol long wok blong Kingdom. Mi glad we mi save raetem plante atikol long ol magasin blong ol dokta, loea, mo jaj, mo mi gat janis blong toktok long ol konfrens raon long wol, blong pruvum se ol Witnes blong Jehova oli gat raet blong no tekem blad. Mi gat sem tingting olsem Luk 17:10 we i talem se: ‘Mi slef nomo, mi man nating. Samting we mi mekem, hemia nao wok we mi mas mekem.’
