1. ?Wanem advaes i stap long Filipae 2:3, mo wanem gudfala samting i kamaot taem yumi folem?

YUMI obei long Jehova wetem tingting daon, from we oltaem Jehova i save samting we i gud moa long yumi. (Efes. 4:22-24) Tingting daon i pulum yumi blong mekem samting we Jehova i wantem fastaem, mo blong luk ol narafala se oli hae moa long yumi. From samting ya, yumi fren gud wetem Jehova mo ol brata mo sista.—Ridim Filipae 2:3.

2. ?Ol tok blong aposol Pol oli soemaot wanem, mo bambae yumi tokbaot wanem long stadi ya?

² Be sipos yumi no lukaot gud, fasin blong ol man blong wol we oli praod * mo oli tingbaot olgeta nomo, i save pulum yumi. I luk olsem se samting ya i hapen long sam Kristin bifo, from we aposol Pol i raet long ol Kristin long Rom se: “Mi mi talem long yufala se i no mas gat wan long yufala we i tinghae long hem bitim mak. Yufala i mas gat stret tingting.” (Rom 12:3) Pol i soemaot se yumi mas tinghae long yumi, be sipos yumi gat tingting daon, bambae yumi no bitim mak. Long stadi ya, bambae yumi tokbaot olsem wanem tingting daon i givhan long yumi long tri rod, blong yumi no tinghae long yumi bitim mak: (1) long mared, (2) long ol spesel wok long oganaesesen, mo (3) taem yumi yusum Intenet.

3. ?From wanem i save gat trabol long mared, mo samfala oli mekem wanem?

³ Jehova i stanemap plan blong mared blong i givim glad long hasban mo waef. Be from we yumi evriwan i sinman, samtaem hasban mo waef i gat defdefren tingting. Pol i talem se olgeta we oli mared bambae oli kasem sam trabol. (1 Kor. 7:28) Sam hasban mo waef oli raorao oltaem, mo maet oli ting se i moa gud sipos oli no mared. Sipos oli gat tingting blong wol, bambae oli ting se i moa gud blong divos nomo. Bambae oli harem se i moa impoten we olgeta nomo oli glad.

4. ?Yumi mas sakemaot wanem tingting?

⁴ Yumi mas sakemaot tingting ya se yumi no glad long mared blong yumi. Baebol i tokbaot wan risen nomo blong divos, hemia taem wan long tufala i mekem doti fasin blong seks. (Mat. 5:32) Taswe, taem yumi kasem sam trabol olsem Pol i tokbaot, yumi no mas askem ol kwestin we oli soemaot se yumi praod, olsem: ‘?Mi stap kasem samting we mi nidim long mared ya? ?Mi stap kasem lav we mi sud kasem? ?Bambae mi glad moa sipos mi mared long narafala?’ Makem tok ya mi long ol kwestin ya. Sipos yu letem waes blong wol i pulum yu, bambae yu folem filing blong yu mo yu mekem samting we yu yu wantem, nating se yu brekem mared blong yu. Be waes we i kamaot long God bambae i lidim yu blong ‘yu no tingbaot yu nomo, be yu tingbaot ol narafala man tu.’ (Fil. 2:4) Jehova i wantem se yu lukaot gud long mared blong yu, be yu no brekem. (Mat. 19:6) Hem i wantem se yu tingbaot hem fastaem, be i no yu wan.

5. Folem Efesas 5:33, ?wanem fasin we hasban mo waef i mas gat?

⁵ Hasban mo waef i mas respektem mo lavlavem tufala. (Ridim Efesas 5:33.)  Baebol i talem se yumi mas givim samting long narafala, i bitim we yumi kasem samting. (Wok 20:35) ?Wanem fasin i save givhan long hasban mo waef, blong tufala i respektem mo lavlavem tufala? Hemia tingting daon. Sipos tufala i gat tingting daon, wanwan long tufala bambae i no tingbaot hem nomo, be bambae ‘i lukaot rod blong givhan’ long narawan.—1 Kor. 10:24.

6. ?Yu lanem wanem long ol tok blong Steven mo Stefani?

⁶ Taem Kristin hasban mo waef i gat tingting daon, tufala i glad moa long mared blong tufala. Wan hasban we nem blong hem Steven, i talem se: “Sipos tufala i wok olsem wan tim, bambae tufala i wok tugeta taem i gat problem. Bambae wan i no ting se, ‘?Wanem i moa gud long mi?’ be bambae hem i ting se, ‘?Wanem i moa gud long mitufala?’” Waef blong hem, Stefani, i gat sem tingting, hem i se: “I no gat wan we i wantem stap long sem haos wetem enemi blong hem. Taem mitufala i no agri, mitufala i traem faenemaot stamba blong problem. Biaen, mitufala i prea, mekem risej, mo tokbaot. Mitufala i agensem problem, be mitufala i no agensem mitufala.” Hasban mo waef i glad moa taem tufala i no tinghae bitim mak long tufala.

7. Taem wan brata i kasem spesel wok long oganaesesen, ?hem i mas gat wanem fasin?

⁷ I wan bigfala blesing blong mekem enikaen wok blong Jehova. (Sam 27:4; 84:10) Taem wan brata i glad blong mekem spesel wok long ogenaesesen blong Jehova, hemia i gud tumas. Baebol i talem se: “Sipos wan man i wantem tumas blong mekem wok ya blong lukaot long kongregesen, hem i stap wantem wan gudfala wok.” (1 Tim. 3:1) Be taem hem i kasem wok ya, hem i no mas tinghae bitim mak long hem wan. (Luk 17:7-10) Hem i mas wantem blong wok blong ol narafala wetem tingting daon.—2 Kor. 12:15.

8. ?Yumi lanem wanem long stori blong Diotrefes, Usia, mo Absalom?

⁸ Baebol i givim woning long yumi, taem hem i tokbaot sam man we oli tinghae long olgeta bitim mak. Diotrefes i flas, nao hem i wantem kam “lida” blong kongregesen. (3 Jon 9) Usia i praod, taswe hem i mekem wan wok we Jehova i no givim raet long hem blong mekem. (2 Kron. 26:16-21) Absalom i wantem kam king, nao i switim ol man blong oli sapotem hem. (2 Saml. 15:2-6) Ol stori ya oli soemaot klia se Jehova i no glad long ol man we oli wantem se narafala i leftemap olgeta. (Prov. 25:27) Ol man we oli praod mo oli wantem se man i leftemap olgeta, bambae oli kasem trabol nomo.—Prov. 16:18.

9. ?Jisas i soemaot wanem eksampol?

⁹ Be Jisas i defren long ol man ya we yumi jes tokbaot. Baebol i talem se: “Bifo olgeta, hem i olsem God nomo, be hem i no wantem tekem posisen blong God blong talem se hem i sem mak long God.” (Fil. 2:6) Nating se Jehova nomo i gat moa paoa bitim Jisas, be Jisas i no tinghae bitim mak long hem wan. Hem i talem long ol disaepol se: “Man we i mekem hem i daon moa long yufala evriwan, hem i hae moa.” (Luk 9:48) !I wan bigfala blesing blong wok wetem ol paenia, ol man blong givhan, ol elda, mo ol eria elda, we oli folem  gudfala fasin blong Jisas blong gat tingting daon! Taem yumi gat tingting daon, yumi givhan long ogenaesesen blong Jehova blong i gat lav ya we i makemaot ol man blong hem.—Jon 13:35.

10. ?Olsem wanem sipos yu ting se ol elda oli no stap stretem ol problem long kongregesen?

¹⁰ ?Olsem wanem sipos yu ting se i gat sam problem long kongregesen mo ol elda oli no stap stretem olgeta? I nogud yu komplen, i moa gud yu gat tingting daon mo yu sapotem olgeta we oli stap lidim yumi. (Hib. 13:17) I gud yu askem se: ‘?Ol problem ya oli bigwan olsem mi mi tingbaot? ?Hem i stret taem blong stretem olgeta? ?Mi mi gat raet blong stretem olgeta? ?Mi stap traehad blong mekem kongregesen i joen gud, o mi stap leftemap mi nomo?’

11. Folem Efesas 4:2, 3, ?wanem gudfala frut i kamaot taem yumi gat tingting daon?

¹¹ Jehova i glad moa taem man i gat tingting daon i bitim we hem i gat gudhan blong mekem samting. Mo hem i glad moa taem yumi joen gud i bitim we yumi mekem plante wok. Taswe, yu mas traehad oltaem blong mekem wok blong Jehova wetem tingting daon. Nao bambae yu givhan long kongregesen blong i joen gud. (Ridim Efesas 4:2, 3.) Joen oltaem long wok blong prij. Lukaot rod blong givhan long ol narafala mo mekem i gud long olgeta. Singaot ol narafala oli kam long haos blong yu, hemia olgeta tu we oli no gat posisen long kongregesen. (Mat. 6:1-4; Luk 14:12-14) Olgeta long kongregesen bambae oli makem tingting daon blong yu i bitim gudhan we yu gat long wan wok.

12. ?Baebol i talem wanem long saed blong ol fren?

¹² Jehova i wantem se yumi harem gud blong joen wetem ol famle mo fren. (Sam 133:1) Jisas tu i gat ol gudfala fren. (Jon 15:15) Baebol i tokbaot olsem wanem ol trufala fren oli save halpem yumi. (Prov. 17:17; 18:24) Baebol i talem tu se yumi no mas stap yumi nomo, be yumi mas joen wetem ol narafala. (Hib. 10:24, 25) Taswe samfala oli ting se i gud oli gat plante fren long Intenet. Be yumi mas lukaot gud.

13. ?From wanem samfala oli harem nogud taem oli lukluk ol foto long Intenet?

¹³ Ol man oli faenemaot se olgeta we oli spenem plante taem blong lukluk ol komen mo foto we ol narafala oli postem, tingting blong olgeta i save foldaon mo oli harem se oli stap olgeta nomo. ?From wanem? From we plante man oli postem ol foto we oli soemaot nomo ol gudtaem long laef blong olgeta. Oli jusum ol foto blong olgeta, ol fren blong olgeta, mo ol naes ples we oli visitim. Man we i luk ol foto ya i save ting se laef blong hem i nogud, i no olsem laef blong ol narafala. Wan sista we i gat 19 yia i talem se: “Mi harem nogud taem mi luk se ol narafala oli gat gudtaem long wiken be mi mi stap nomo long haos.”

14. ?Olsem wanem advaes long 1 Pita 3:8 i save givhan long yumi?

¹⁴ I tru se Intenet i wan gudfala rod blong storian wetem ol famle mo ol fren. ?Be yu luk se plante foto we ol man oli postem long Intenet oli blong leftemap olgeta nomo? I olsem we oli stap talem se, “Traem luk mi.” Mo tu, samfala oli raetem ol komen we oli doti o oli no soemaot respek. Hemia tu i defren olgeta long tingting daon mo lav we ol Kristin oli mas gat.—Ridim 1 Pita 3:8.

15. ?Olsem wanem Baebol i givhan long yumi, blong yumi no leftemap yumi?

¹⁵ Sipos yu stap postem ol foto mo komen long Intenet, i gud yu askem se: ‘?Ol narafala oli save ting se mi flas? ?Oli save  jalus?’ Baebol i talem se: “Evri samting we oli stap long wol, olsem ol samting we bodi i wantem, mo ol samting we ae i wantem, mo fasin ya we man i flas from ol samting we hem i gat mo i soemaot, oli no kamaot long Papa, be oli kamaot long wol.” (1 Jon 2:16) Wan Baebol i tanem tok ya se “man i flas,” i kam “man i wantem we narafala i ting se hem i impoten.” Be ol Kristin oli no wantem se narafala i leftemap olgeta. Oli folem advaes ya blong Baebol se: “I gud yumi no kam flas, mo yumi no traem blong winim yumi, mo yumi no jalus.” (Gal. 5:26) Sipos yumi gat tingting daon, bambae yumi no folem fasin blong ol man blong wol we oli leftemap olgeta.

16. ?From wanem yumi no mas praod?

¹⁶ Ol man we oli praod oli no gat “stret tingting,” taswe yumi mas gat tingting daon. (Rom 12:3) Oli raorao oltaem mo oli flas. Tingting mo fasin blong olgeta i mekem se oli spolem olgeta bakegen wetem ol narafala tu. Oli mas jenisim tingting blong olgeta, sipos no, Setan bambae i blaenem tingting blong olgeta nao i kam nogud. (2 Kor. 4:4; 11:3) Man we tingting blong hem i stap daon, hem i gat stret tingting. Hem i no ting se hem i impoten tumas, be hem i luk ol narafala se oli gud moa long hem. (Fil. 2:3) Hem i save se “God i agensem ol man we tingting blong olgeta i antap tumas, be hem i kaen tumas long olgeta we oli mekem tingting blong olgeta i stap daon.” (1 Pita 5:5) Olgeta we oli gat stret tingting oli no wantem kam enemi blong Jehova.

17. ?Yumi mas mekem wanem blong gat tingting daon oltaem?

¹⁷ Sipos yumi wantem gat tingting daon oltaem, yumi mas folem advaes ya blong Baebol blong ‘tekemaot olfala fasin mo ol wok we oli joen wetem, mo werem niufala fasin.’ Hemia i no isi. Yumi mas stadi long fasin blong Jisas mo traehad blong folemgud. (Kol. 3:9, 10; 1 Pita 2:21) Sipos yumi mekem olsem, bambae i gat gudfala frut. Taem yumi gat tingting daon, famle i glad moa, yumi givhan blong mekem kongregesen i joen gud, mo yumi no yusum Intenet blong leftemap yumi. Antap moa, yumi mekem Jehova i glad, mo bambae hem i blesem yumi.