1-2. ?Olsem wanem ol tok blong Jehova long Aesea 65:16, 17 i halpem yumi blong no kam slak?

“!YU NO KAM SLAK!” hemia nao stamba tok blong bigfala asembli blong yumi blong 2017. Ol tok blong asembli ya oli soemaot olsem wanem yumi save stanap strong taem yumi fesem ol traem. Naoia fo yia i pas finis, be yumi stap gohed yet blong stanap strong long rabis wol ya.

² ?Wanem sam problem we yu fesem i no longtaem i pas? ?Yu yu lusum wan famle o wan gudfala fren long ded? ?Yu kasem wan sik we bambae i neva kam gud? ?Laef blong yu i had from yu stap kam olfala? ?Yu harem nogud from i gat disasta, vaelens, o ol man oli agensem yu? ?Yu stap safa from COVID-19 o wan narafala sik? !Yumi stap wet long dei ya we olgeta problem ya bambae oli finis, yumi fogetem olgeta, mo bambae oli neva hapen bakegen!—Ridim Aesea 65:16, 17.

3. ?Yumi mas mekem wanem naoia, mo from wanem?

³ Laef naoia i had, mo maet long fiuja yumi mas stanap strong from ol trabol we oli had moa. (Mat. 24:21) Taswe yumi mas gohed blong lanem blong stanap strong moa. ?From wanem? Jisas i talem se: “Sipos yufala i stanap strong, bambae yufala i no lusum laef blong yufala.” (Luk 21:19) Sipos yumi tingbaot olsem wanem ol narafala oli stanap strong long ol trabol we oli sem mak long hemia blong yumi, bambae yumi naf blong stanap strong.

4. ?From wanem yumi talem se Jehova i beswan eksampol blong stanap strong?

⁴ ?Hu i beswan eksampol blong stanap strong? Jehova God. ?Yu yu sapraes long samting ya? Maet, be sipos yu tingting gud long hem, bambae yu kasemsave. Wol ya i stap long paoa blong Devel, mo i fulap long ol trabol. Jehova i gat paoa blong finisim ol trabol ya naoia nomo, be hem i wet long wan stret taem  long fiuja. (Rom 9:22) Mo go kasem we taem ya i kamtru, God blong yumi i gohed blong stanap strong. Naoia bambae yumi tokbaot naen samting we Jehova i stanap strong long olgeta.

5. ?Olsem wanem ol man oli sakem doti long nem blong God, mo hemia i mekem yu yu harem olsem wanem?

⁵ Ol man oli sakem doti long nem blong hem. Jehova i lavem nem blong hem, mo i wantem se evri man i respektem nem ya. (Aes. 42:8) Be long ol 6,000 yia we i pas, ol man oli sakem doti long nem blong hem. (Sam 74:10, 18, 23) Fasin ya i stat long garen blong Iden, taem Devel (we i minim “Man We i Giaman Blong Spolem Nem Blong Narafala”) i talem se God i stap blokem Adam mo Iv blong tufala i no mekem samting blong harem gud. (Jen. 3:1-5) Stat long taem ya, ol man oli stap tok nogud long Jehova se hem i stap blokem ol man blong oli no kasem ol samting we oli rili nidim. Jisas i wari from ol nogud tok ya we i spolem nem blong Papa blong hem. From samting ya nao, Jisas i talem long ol disaepol blong hem blong prea se: “Papa blong mifala long heven, plis yu mekem we nem blong yu i tabu.”—Mat. 6:9.

6. ?From wanem Jehova i letem taem i pas, bifo we hem i pruvum se hem nomo i gat raet blong rul?

⁶ Oli agensem hae rul blong hem. Jehova nao i gat raet blong rul long heven mo long wol, mo rul blong hem nomo i beswan. (Rev. 4:11) Be Devel i traem trikim ol enjel mo ol man blong ting se God i no gat raet ya blong rul. Jehova i no stretem problem ya kwiktaem. Hem i waes, taswe hem i letem plante taem i pas blong ol man oli luksave se taem oli rul long olgeta wan we oli no dipen long God, oli kasem trabol nomo. (Jer. 10:23) From we God i gat longfala tingting, evri man bambae oli luksave se hem nomo i gat raet blong rul, mo se Kingdom blong hem nomo bambae i mekem se fulwol i sef mo i gat pis.

7. ?Hu i rebel agensem Jehova, mo wanem bambae i hapen long olgeta?

⁷ Sam pikinini blong hem oli rebel. Jehova i wokem ol enjel mo ol man we oli stretgud olgeta. Be biaen enjel ya we i rebel, hemia Setan (we i minim “Man Blong Agens”) i pulum Adam mo Iv blong tufala tu i agensem Jehova. Mo sam narafala enjel mo ol man tu oli rebel. (Jud 6) Biaen, nesen blong Isrel we God i jusumaot, olgeta tu oli tanem baksaed long hem mo oli stat blong wosipim ol giaman god. (Aes. 63:8, 10) Jehova i harem nogud tumas. Be hem i stanap strong, mo bambae hem i gohed blong stanap strong kasem taem we bambae hem i distroem ol rebel ya. !Afta long taem ya, Jehova wetem olgeta we oli holemstrong long hem, bambae oli glad from we oli no moa nid blong stanap strong long ol nogud samting we i kamaot long wol ya!

8-9. ?Wanem ol giaman tok we ol man oli talem long saed blong Jehova, mo yumi save mekem wanem?

⁸ Ol giaman tok blong Devel. Setan i talem se gudfala man ya Job mo ol narafala man blong Jehova, oli wosipim God nomo from oli wantem kasem samting. (Job 1:8-11; 2:3-5) Mo kam kasem tede, Devel i gohed blong talem ol giaman tok long saed blong ol man. (Rev. 12:10) Yumi pruvum se Setan i giaman, taem yumi stanap strong long ol traem mo yumi holemstrong long Jehova from yumi lavem Hem. Olsem Job, Jehova bambae i blesem yumi from yumi stanap strong.—Jem. 5:11.

⁹ Setan i yusum ol lida blong giaman skul blong talem se Jehova nao i stamba blong ol nogud samting we i mekem ol man oli safa. Sam man oli talem se taem wan pikinini i ded, God i tekem hem i go long heven from we hem i nidim sam moa enjel. Toktok blong ol  man ya i soemaot se oli no respektem God. Be yumi save se Jehova i wan Papa we i gat lav. Taem yumi kasem wan bigfala sik o wan famle i ded, yumi neva blemem God blong yumi, from yumi bilif se wan dei, olgeta samting ya bambae oli finis. Yumi save talem long ol man we oli glad blong lesin, se Jehova i wan God we i gat lav. Nao Jehova bambae i save givim ansa long man we i tok nogud long hem.—Prov. 27:11.

10. ?Ol Sam 22:23, 24 i soemaot wanem long saed blong Jehova?

¹⁰ Taem ol gudfala man blong hem oli safa. Jehova i wan God we i gat sore. Hem i harem nogud tumas taem hem i luk we yumi safa, maet from ol man oli mekem i nogud long yumi, yumi sik, o from sin we i stap long yumi. (Ridim Ol Sam 22:23, 24.) Jehova i kasemsave taem yumi harem nogud, hem i wantem finisim ol nogud samting ya, mo bambae hem i mekem. (Skelem wetem Eksodas 3:7, 8; Aesea 63:9.) I gat taem i stap kam we ‘hem bambae i ravemaot wota blong ae blong yumi, bambae i no moa gat ded, yumi no moa sore, yumi no moa krae, mo yumi no moa harem nogud long bodi blong yumi.’—Rev. 21:4.

11. ?Jehova i harem olsem wanem taem ol gudfala man blong hem oli ded?

¹¹ Taem ol gudfala fren blong hem oli ded. ?Jehova i harem olsem wanem taem ol gudfala man mo woman we oli holemstrong long hem, oli ded? !Hem i wantem tumas blong luk olgeta bakegen! (Job 14:15) !Traem tingbaot olsem wanem Jehova i rili misim gudfala fren blong hem Ebraham! (Jem. 2:23) Mo Moses we hem i toktok wetem hem “fes tu fes.” (Eks. 33:11) !Mo hem i wantem tumas blong harem Deved mo ol narafala man blong raetem sam, oli sing long ol naesfala singsing blong presem hem! (Sam 104:33) Nating se ol gudfala fren ya blong Jehova oli ded finis, be hem i neva  fogetem olgeta. (Aes. 49:15) Hem i tingbaot evri samting long saed blong olgeta. Baebol i talem se, “long tingting blong hem, olgeta evriwan oli laef nomo.” (Luk 20:38) Wan dei bambae hem i mekem olgeta oli laef bakegen, mo bambae hem i harem ol prea blong olgeta mo i akseptem wosip blong olgeta. Sipos wan we yu lavem hem tumas i ded, ol tok ya oli save leftemap tingting blong yu.

12. ?Wanem i mekem se Jehova i harem nogud tumas?

¹² Trabol we ol rabis man oli mekem long ol narafala. Taem fasin rebel i stat long Iden, Jehova i save se bambae i kam mowas bifo we hem i mekem ol samting oli kam gud. Jehova i no laekem nating rabis fasin, fasin we i no stret, mo vaelens we i stap hapen long wol tede. Oltaem hem i kea long olgeta we oli no strong mo i no gat man blong protektem olgeta, olsem ol pikinini we papa blong olgeta i ded mo ol wido. (Sek. 7:9, 10) Jehova i harem nogud moa taem hem i luk we ol man oli stap spolem ol gudfala man blong hem mo putum olgeta long kalabus. Yu save sua se hem i lavem yufala evriwan we i stap stanap strong wetem hem.

13. ?Wanem rabis fasin we ol man oli stap mekem, mo wanem bambae i hapen long olgeta?

¹³ Ol man oli mekem rabis fasin blong seks. God i wokem ol man blong oli folem fasin blong hem. Be Setan i pulum ol man blong oli mekem ol nogud fasin. Long taem blong Noa, taem God “i luk se ol man oli stap mekem plante nogud samting . . . Jehova i rigret se hem i bin mekem ol man long wol ya mo hem i harem nogud long hat blong hem.” (Jen. 6:5, 6, 11, ftn.) Afta long taem ya, ?wol i kam moa gud? !Nogat! Devel i glad tumas taem i luk we rabis fasin blong seks i kam antap bigwan, olsem enikaen doti fasin blong seks we i hapen bitwin wan man mo woman, mo man wetem man bakegen. (Efes. 4:18, 19) Setan i glad tumas taem hem i pulum wan man we i wosipim Jehova blong i foldaon long sin. Be taem longfala tingting blong Jehova i kasem en blong hem, bambae hem i hem i finisim fulwan ol rabis fasin ya.

14. ?Ol man oli stap mekem wanem long wol?

¹⁴ Ol man oli spolem wol. Taem man i rul, hem i mekem ‘narafala i harem nogud’ mo i no kea long wol mo ol animol we Jehova i putum long han blong ol man. (Pri. 8:9; Jen. 1:28) Sam saentis oli talem se, wok we ol man oli mekem i soemaot se long ol yia we i kam, bambae wan milian moa animol mo plant oli no moa stap. !Hemia nao from wanem ol man oli wari long envaeronmen! Yumi glad tumas we Jehova i promes “blong spolem ol man ya we oli stap spolem wol,” mo mekem wol ya i kam wan paradaes.—Rev. 11:18; Aes. 35:1.

15-16. ?Wanem i mas pulum yumi blong stanap strong wetem Jehova? Talem wan pijatok.

¹⁵ Traem tingbaot ol trabol ya we blong plante taosen yia, Papa blong yumi long heven i stap stanap strong long olgeta. (Yu luk bokis ya “ ?Jehova i Stanap Strong Long Wanem?”) Jehova i save finisim rabis wol ya enitaem nomo. !Be longfala tingting blong hem i givhan bigwan long yumi! Traem tingbaot pijatok ya. Wan dokta i talem long wan hasban mo waef se bebi blong tufala bambae i handikap taem i bon. Mo long laef blong hem bambae hem i safa mo i ded we i yang nomo. Nating se i olsem, perens ya i jusum blong letem bebi ya i bon, nating se bambae i had blong lukaot long hem. From we tufala i lavem bebi ya, bambae tufala i stanap strong mo mekem bes blong tufala blong givim evri samting we bebi ya i nidim.

¹⁶ Long sem fasin, olgeta man we oli kamaot biaen long Adam mo Iv oli no stretgud olgeta.  Be Jehova i lavem olgeta mo i kea long olgeta. (1 Jon 4:19) Jehova i no olsem perens long pijatok ya, from we hem i naf blong finisim fasin safa we ol man oli stap fesem. Hem i putum wan stret taem finis blong finisimgud olgeta kaen sik we i mekem man i safa. (Mat. 24:36) ?Yu no ting se lav we Jehova i gat long yumi, i mas pulum yumi blong stanap strong wetem hem?

17. ?Olsem wanem ol tok long Hibru 12:2, 3 i enkarejem yumi blong gohed blong stanap strong?

¹⁷ Jehova i beswan eksampol blong stanap strong. Jisas tu i folem fasin blong Papa blong hem blong stanap strong. Taem Jisas i stap long wol, hem i stanap strong taem ol man oli tok nogud long hem, oli mekem hem i sem, mo oli nilim hem long pos blong i ded from yumi. (Ridim Hibru 12:2, 3.) Eksampol blong Jehova blong stanap strong i givim paoa long Jisas blong stanap strong. Mo hemia i save givim paoa long yumi tu.

18. ?Olsem wanem 2 Pita 3:9 i halpem yumi blong kasem save from wanem Jehova i gat longfala tingting?

¹⁸ Ridim 2 Pita 3:9. Jehova i save stret taem blong finisim rabis wol ya. Longfala tingting blong hem i givim janis long plante milian man blong oli save wosipim hem mo presem hem. Olgeta evriwan ya oli glad se from we Jehova i stanap strong longtaem, hemia i givim janis long olgeta blong oli bon, oli lanem blong lavem hem, mo oli givim laef blong olgeta i go long hem. Jehova bambae i soemaot se desisen blong hem blong stanap strong i stret nomo, taem hem i blesem ol milian man ya we oli stanap strong kasem en.

19. ?Yumi mas gat strong tingting blong mekem wanem, mo bambae yumi kasem wanem?

¹⁹ Tru long eksampol blong Jehova, yumi lanem blong stanap strong we yumi glad nomo. Nomata wanem problem mo fasin safa we Setan i mekem, Jehova i gohed blong stap olsem wan “hapi God.” (1 Tim. 1:11) Yumi tu, yumi save gohed blong stap glad, taem yumi stap wet long taem ya we Jehova bambae i mekem nem blong hem i tabu, i soemaot se hem i gat raet blong rul, i finisim ol rabis fasin, mo i flatemgud ol problem we yumi stap fesem. I gud yumi gat strong tingting blong stanap strong mo holemtaet glad, taem yumi save se Papa blong yumi long heven tu i stap stanap strong. Sipos yumi mekem olsem, ol tok ya bambae oli kamtru long yumi wanwan, we i talem se: “Man we i stap gohed blong stanap strong long ol trabol, hem i glad, from we taem God i agri long hem, bambae hem i kasem praes blong laef we Jehova i promes blong givim long olgeta we oli gohed blong lavem Hem.”—Jem. 1:12.