1. ?Ol samting we oli stap hapen tede oli pruvum wanem?

 TAEM yu luk ol samting we oli stap hapen long wol tede, ?yu yu faenem i had blong gat stret tingting? Ol famle oli no moa lavlavem olgeta olsem fastaem, fasin blong ol man i kam raf, oli tingbaot olgeta nomo, mo oli kros bitim mak. Plante man oli faenem i had blong trastem ol haeman. Be ol samting we oli stap hapen i mekem yumi sua se i no longtaem ol samting bambae oli kam gud. ?From wanem? From we fasin blong ol man i laenap gud wetem profet tok we Baebol i talem se bambae i kamtru long ol “ol las dei.” (2 Tim. 3:1-5) I no gat wan man i save talem se profet tok ya i no kamtru, mo profet tok ya we i kamtru i pruvum se Kraes Jisas i stap olsem King finis long Kingdom blong God. Be profet tok ya i wan nomo long ol profet tok we i tokbaot Kingdom. Sipos yumi stadi long ol narafala profet tok we oli bin kamtru long ol yia we oli pas, bambae bilif blong yumi i kam strong moa.

2. ?Bambae yumi tokbaot wanem long stadi ya, mo from wanem? (Tokbaot pija long fran pej.)

² Long stadi ya bambae yumi tokbaot (1) wan profet tok we i halpem yumi blong kasemsave wetaem Kingdom i stat blong rul, (2) ol profet tok we oli halpem yumi blong kasemsave se Jisas i rul finis long Kingdom blong God, mo (3) ol profet tok we i soemaot olsem wanem Kingdom blong God bambae i distroem ol enemi blong hem. Bambae yumi luk se ol profet tok ya oli joen gud wanples olsem gem ya pasel, we i soemaot  klia ples we yumi stap long hem, long ol taem we Jehova i makemaot finis blong ol samting oli hapen.

3. ?Profet tok ya long Daniel 7:13, 14, i mekem yumi sua long wanem?

³ Profet tok we i stap long Daniel 7:13, 14 i mekem yumi sua se Kraes Jisas bambae i beswan Rula long Kingdom blong God. Ol man long olgeta nesen bambae oli glad blong mekem “wok blong hem,” mo bambae i no gat wan narafala Rula i tekem ples blong hem. I gat wan narafala profet tok long buk blong Daniel we i talemaot se Jisas bambae i stat blong rul long Kingdom, long en blong wan period blong seven taem. ?Olsem wanem? ?I posibol blong save wetaem stret Jisas i kam King?

4. Eksplenem olsem wanem Daniel 4:10-17, i givhan long yumi blong save stret taem we Kraes i stat blong rul. (Luk futnot tu.)

⁴ Ridim Daniel 4:10-17. Ol “seven taem” ya i minim wan period blong 2,520 yia. Period ya i stat long yia 607 B.K.T. taem ol man Babilon oli tekemaot laswan king long Jerusalem we i rul long nem blong Jehova. Mo period ya i finis long yia 1914 K.T. taem Jehova i putumap Jisas “man ya we i gat raet,” blong i rul olsem King long Kingdom blong God. *—Esik. 21:25-27.

5. ?Profet tok long saed blong “seven taem” i givhan long yumi olsem wanem?

⁵ ?Olsem wanem profet tok ya i givhan long yumi? Sipos yumi kasemsave profet tok ya long saed blong “seven taem,” hemia bambae i mekem yumi sua se Jehova bambae i mekem ol promes blong hem oli kamtru long stret taem. Jehova i makemaot wan stret taem blong mekem Jisas i kam King. Mo hem i mekem samting ya i kamtru long stret taem we hem i makemaot. Taswe, yumi save se bambae hem i mekem ol narafala profet tok blong hem tu oli kamtru long stret taem we hem i makemaot. !Yes, dei blong Jehova ‘bambae i no let!’—Hab. 2:3.

6. (1) ?Wanem i pruvum se Kraes i rul finis long heven? (2) ?Olsem wanem profet tok ya long Revelesen 6:2-8, i mekem yumi sua long ol pruf ya?

⁶ Klosap long en blong laef blong Jisas long wol, hem i talemaot sam samting we bambae i halpem ol man blong hem, blong oli save stret taem we hem i stat blong rul long heven. Sam long ol samting we hem i talem, hemia faet, kakae i sot, mo graon i seksek. Hem i talem tu se bambae i gat ol strong sik “olbaot long wol,” mo COVID-19 pandemik i wan long olgeta. Baebol i tokbaot ol samting ya olsem “saen” we i soemaot se Kraes i stap. (Mat. 24:3, 7; Luk 21:7, 10, 11) Bitim 60 yia afta we Jisas i ded mo i gobak long heven, hem i givim moa save long aposol Jon long saed blong ol samting we bambae oli hapen. (Ridim Revelesen 6:2-8.) Mo olgeta samting ya oli hapen stat long taem we Jisas i kasem paoa long Kingdom long 1914.

7. ?From wanem ol samting oli kam moa nogud, taem Jisas i kam King?

⁷ ?From wanem ol samting oli kam moa nogud taem Jisas i kam King? Revelesen 6:2 i tokbaot wan impoten samting, hemia se taem Jisas i kam King long Kingdom blong God, faswan samting we hem i mekem, hemia wan faet. ?Agensem hu? Agensem Devel mo ol dimon blong hem. Folem Revelesen japta 12,  Setan i lusum faet ya, nao oli sakemaot hem wetem ol dimon blong hem oli kamdaon long wol. Setan i kros tumas long ol man, from samting ya, hem i stat blong mekem ‘trabol long graon.’—Rev. 12:7-12.

8. Taem yumi luk we ol profet tok long saed blong Kingdom oli kamtru, ?hemia i givhan long yumi olsem wanem?

⁸ ?Olsem wanem ol profet tok ya oli givhan long yumi? Ol samting long wol mo fasin blong ol man we i stap jenis, i halpem yumi blong luksave se Jisas i kam King finis. So, i bitim we yumi harem nogud taem yumi luk we ol man oli tingbaot olgeta wan mo oli raf, yumi mas tingbaot se aksen blong olgeta i mekem profet tok blong Baebol i kamtru. !Yes, Kingdom i rul finis! (Sam 37:1) Mo tu, bambae yumi luk se wol ya bambae i kam moa nogud taem yumi stap kam klosap moa long Amagedon. (Mak 13:8; 2 Tim. 3:13) Be yumi wantem talem tangkiu long Papa blong yumi long heven, from we hem i givhan long yumi blong kasemsave from wanem i gat plante trabol long wol.

9. ?Olsem wanem profet tok long Daniel 2:28, 31-35, i tokbaot laswan wol paoa, mo wetaem wol paoa ya i stat blong rul?

⁹ Ridim Daniel 2:28, 31-35. Yumi luk we profet tok ya tu i stap kamtru tede. Drim blong Nebukadnesa i makem samting we bambae i hapen “long las haf blong ol dei,” afta we Kraes i stat blong rul. Ol enemi blong Jisas long wol, hemia i inkludum tu laswan wol paoa ya we Baebol i tokbaot hem olsem ‘leg ya daon we i aean mo klei.’ Wol paoa ya i stap rul finis, hem i stat blong rul long Wol Wo I, taem Briten mo Yunaeted Stet i stat blong wok tugeta, we hemia nao Inglan mo Amerika. Mo tu, statiu ya we Nebukadnesa i  luk long drim blong hem i talemaot tu samting long saed blong wol paoa ya we i defren long ol narafala kingdom we oli rul bifo long hem.

10. (1) ?Yumi makem wanem tede long wol paoa ya Inglan mo Amerika, we i laenap gud wetem profet tok we Daniel i talemaot? (2) ?Yumi mas blokem wanem denja? (Yu luk “ !Lukaot Gud Blong No Kam Olsem Klei!”)

¹⁰ Faswan samting se, wol paoa ya Inglan mo Amerika, i no olsem ol narafala wol paoa we oli rul bifo long hem, from we hem i no strong olsem gol o silva, be hem i aean we i miks wetem klei. Klei i pijarem “pikinini blong ol man,” o ol man olbaot. (Dan. 2:43, fut.) Tede, yumi luksave klia se ol man blong eleksen, ol man we oli stap leftemap raet blong ol man, ol man we oli stap protes, mo ol man blong sapotem raet blong ol man we oli wok, oli mekem i had blong ol lida blong wol paoa ya, oli mekem samting we oli wantem.

11. ?Wanem narafala samting long profet tok blong Daniel we i mekem yumi harem gud mo i givim hop?

¹¹ Seken samting se, Inglan mo Amerika we i olsem leg long bigfala statiu ya, hem i laswan wol paoa we Baebol i tokbaot. Bambae i no gat wan narafala politik paoa i tekem ples blong hem. Be bambae hem i foldaon long Amagedon taem Kingdom blong God i smasem hem wetem ol narafala gavman blong man. *—Rev. 16:13, 14, 16; 19:19, 20.

12. ?Profet tok blong Daniel i pruvum wan narafala samting, mo olsem wanem hemia i mekem yumi harem gud mo i givim hop?

¹² ?Olsem wanem profet tok ya i givhan long yumi? Profet tok blong Daniel i givim moa pruf se yumi stap laef long taem blong en. Bitim 2,500 yia bifo, Daniel i tokbaot se afta long wol paoa ya Babilon, fo narafala wol paoa bambae oli rul long ol man blong God. Mo tu hem i talemaot se Wol Paoa ya Inglan mo Amerika bambae i laswan long olgeta. Hemia i givim hop mo i leftemap tingting blong yumi se i no longtaem, Kingdom blong God bambae i distroem olgeta gavman blong man, mo hem nomo bambae i rul long olgeta ples long wol.—Dan. 2:44.

13. ?“Namba 8 king” mo “ol ten king” we Revelesen 17:9-12 i tokbaot, oli pijarem wanem mo olsem profet tok ya i kamtru?

¹³ Ridim Revelesen 17:9-12. Bigfala faet ya blong Wol Wo I, i mekem wan narafala profet tok long saed blong ol las dei i kamtru. Ol lida blong wol oli wantem putum pis long fulwol. So long Jenuware 1920, oli putumap Ligofnesen we biaen long Oktoba 1945, Yunaeted Nesen i tekem ples blong hem. Ol oganaesesen ya oli “namba 8 king,” be hem i no wan wol paoa. Hem i kasem paoa from we ol gavman oli sapotem hem. Baebol i tokbaot ol gavman ya olsem “ten king.”

14-15. (1) ?Revelesen 17:3-5 i tokbaot wanem long saed blong “Bigfala Babilon”? (2) ?Wanem i stap hapen long ol man we oli sapotem ol giaman skul?

¹⁴ Ridim Revelesen 17:3-5. Long wan vison, God i soemaot long aposol Jon, wan prostitut, hemia “Bigfala Babilon” we i pijarem olgeta giaman skul long wol. ?Olsem wanem vison ya i kamtru? Longtaem finis i kam, olgeta giaman skul oli wok tugeta wetem ol gavman blong wol mo oli sapotem gud olgeta. Be i no longtaem, Jehova bambae i putum long hat blong ol politik paoa ya “blong oli mekem samting we hem i wantem.” ?Wanem bambae i kamaot from? Ol politik paoa ya, hemia “ol ten king,” bambae oli tanemraon long ol giaman skul mo oli distroem gud olgeta.—Rev. 17:1, 2, 16, 17.

¹⁵ ?Olsem wanem yumi save se i no longtaem Bigfala Babilon bambae i lus? Blong ansa long kwestin ya, i gud blong tingbaot se  long olfala taon blong Babilon bifo, ol wota blong Yufretes Reva oli protektem gud hem. Buk blong Revelesen i tokbaot plante milian man we oli sapotem Bigfala Babilon se oli olsem “ol wota” we oli protektem hem. (Rev. 17:15) Be hem i talem tu se ol wota ya bambae oli “kam drae,” we hemia i soemaot se olgeta giaman skul bambae oli lusum plante man we oli sapotem olgeta. (Rev. 16:12) Tede, profet tok ya i stap kamtru from we plante man oli no moa go long ol jos, mo oli lukluk i go long ol narafala ples blong traem faenem rod blong stretem ol problem blong olgeta.

16. Taem yumi save olsem wanem oli putumap Yunaeted Nesen mo olsem wanem Bigfala Babilon bambae i lus, ?hemia i givhan long yumi olsem wanem?

¹⁶ ?Olsem wanem ol profet tok ya oli givhan long yumi? Fasin we ol man we oli folem blong putumap Yunaeted Nesen, mo fasin ya we plante man oli no moa sapotem ol giaman skul, i pruvum se yumi stap laef long ol las dei. Nating se plante man oli no moa sapotem Bigfala Babilon, be hemia i no samting we bambae i mekem se oganaesesen ya i lus fulwan. Be olsem we yumi tokbaot finis, Jehova bambae i putum long hat blong ol “ten  king,” hemia ol politik paoa we oli stap sapotem Yunaeted Nesen, “blong oli mekem samting we hem i wantem.” Ol nesen ya bambae oli distroem Bigfala Babilon, long wan fasin we i mekem fulwol i sapraes. * (Rev. 18:8-10) Taem Bigfala Babilon i lus, hemia bambae i afektem fulwol mo maet i mekem se ol man oli fesem hadtaem. Be long saed blong ol man blong God, i gat tu risen we i mekem se oli glad. !Ol enemi blong Jehova God bambae oli no moa stap, mo i no longtaem Jehova bambae i mekem yumi kam fri long rabis wol ya!—Luk 21:28.

17-18. (1) ?Olsem wanem yumi save gohed blong mekem bilif blong yumi i strong? (2) ?Bambae yumi tokbaot wanem long nekis stadi?

¹⁷ Daniel i talemaot se “tru save bambae i kam plante.” !Mo hemia nao samting we i stap hapen tede! Yumi kasemsave plante profet tok long saed blong taem we yumi laef long hem naoia. (Dan. 12:4, 9, 10) Ol profet tok ya oli stret mo oli mekem se yumi gat bigfala respek long Jehova mo long Tok blong hem. (Aes. 46:10; 55:11) Taswe, i gud yumi gohed blong mekem bilif blong yumi i strong taem yumi stadi long Baebol, mo yumi halpem ol narafala blong oli fren gud wetem Jehova. Jehova bambae i protektem ol man we oli trastem hem fulwan, mo bambae hem i mekem se oli “gohed blong gat pis.”—Aes. 26:3.

¹⁸ Long nekis stadi, bambae yumi luk sam profet tok we i tokbaot Kristin kongregesen long taem blong en. Olsem we bambae yumi lanem, ol profet tok ya tu oli pruvum se yumi stap laef long ol las dei. Mo bambae yumi luk moa pruf se Jisas we i King blong yumi naoia, i stap lidim ol man we oli holemstrong long hem.