1. ?Yumi mas gat wanem tingting long saed blong prea?

 YUMI gat wan nambawan blesing blong kam klosap long Krieta blong heven mo wol tru long prea. Traem tingbaot: Yumi save talemaot evri samting we i stap long hat blong yumi long Jehova, long enitaem mo long eni lanwis, we yumi no nid blong mekem wan apoenmen. Yumi save prea long hem taem yumi stap slip long hospital o long kalabus, mo yumi trastem se Papa blong yumi we i lavem yumi bambae i lesin long yumi. Hemia i wan bigfala blesing mo yumi no mas ting nating long hem.

2. ?King Deved i soemaot olsem wanem se hem i tinghae long privilej ya blong prea?

² King Deved i tinghae long privilej ya blong prea. Hem i singsing long Jehova se: “I gud prea blong mi i olsem insens we man i rerem gud long fored blong yu.” (Sam 141:1, 2) Long taem blong Deved, oli yusum tabu insens long tru wosip, mo ol pris oli rerem gud insens ya. (Eks. 30:34, 35) Taswe, ol tok blong Deved oli soemaot se hem i wantem tingting gud long ol samting we bambae hem i talem long Papa blong hem long heven tru long prea. Hemia sem tingting we yumi wantem gat. Yumi wantem se Jehova i glad long ol prea blong yumi.

3. ?Yumi mas gat wanem fasin taem yumi prea, mo from wanem?

³ Taem yumi prea long Jehova, yumi mas gat bigfala respek. Traem tingbaot ol nambawan vison we Aesea, Esikel, Daniel mo Jon oli luk. Ol vison ya oli defdefren, be i gat wan samting i sem mak long olgeta. Ol vison ya oli tokbaot Jehova olsem wan King we i gat bigfala paoa. Aesea i “luk Jehova i stap sidaon long wan tron we i hae mo i stap antap olgeta.” (Aes. 6:1-3) Esikel i luk Jehova i stap sidaon long jariot blong hem  long heven, we raonabaot long hem i gat “wan bigfala laet . . . olsem laet blong wan renbo.” (Esik. 1:26-28) Daniel i luk “Olfala Ya Blong Bifo Olgeta” i wetem ol waet klos mo tron blong hem i laet blong faea nomo. (Dan. 7:9, 10) Mo Jon i luk Jehova i stap sidaon long wan tron, we raonabaot long hem i gat wan renbo i goraon long tron ya mo laet blong hem i saen olsem ston ya emeral. (Rev. 4:2-4) Taem yumi tingbaot se Jehova i gat bigfala paoa i bitim eni narafala samting, hemia i mekem yumi luksave se i wan nambawan blesing blong kam klosap long Jehova tru long prea, mo i impoten we yumi gat bigfala respek taem yumi prea. ?Be yumi mas prea olsem wanem?

4. Folem Matiu 6:9, 10, ?yumi lanem wanem long prea ya we Jisas i tijim long ol aposol blong hem?

⁴ Ridim Matiu 6:9, 10. Long Bigfala Toktok Blong Jisas Antap Long Hil, hem i tijim ol disaepol blong hem blong prea long wan fasin we Jehova i glad long hem. Afta we hem i talem tok ya “taswe yufala i mas prea olsem,” hem i tokbaot ol impoten samting we oli joen wetem stamba tingting blong Jehova: blong mekem nem blong hem i tabu, blong Kingdom blong hem i kam, we bambae i distroem ol enemi blong God, mo ol blesing we hem i promes blong mekem i kamtru long wol mo ol man. Taem yumi tokbaot ol impoten samting ya long ol prea blong yumi, yumi soemaot se wil blong God i impoten long yumi.

5. ?I stret we yumi prea from ol samting we oli joen wetem laef blong yumi?

⁵ Long nekis haf blong prea blong Jisas, hem i soemaot se yumi save prea from ol samting we oli joen wetem laef blong yumi. Yumi save prea long Jehova blong i givim kakae long yumi we i naf blong wan dei, blong i fogivim yumi from ol sin blong yumi, blong i protektem yumi taem ol samting oli traem yumi, mo tekemaot yumi long man ya we i rabis. (Mat. 6:11-13) Taem yumi askem ol samting ya long Jehova, yumi soemaot se yumi wantem we hem i halpem yumi mo yumi wantem mekem hem i glad.

6. ?Yumi mas prea nomo from ol samting we Jisas i talem long ol prea blong hem? Eksplenem.

⁶ Jisas i no ekspektem ol man blong hem blong oli yusum ol sem tok olsem we hem i yusum long prea blong hem. Long ol  narafala prea blong Jisas, hem i tokbaot ol defren samting we oli impoten long hem long taem ya. (Mat. 26:39, 42; Jon 17:1-26) Long sem fasin, yumi save prea from eni samting we yumi wari from. Taem yumi gat wan desisen blong mekem, yumi save prea blong Jehova i givim waes mo fasin blong kasemsave samting, long yumi. (Sam 119:33, 34) Taem yumi mas mekem wan wok we i had, yumi save prea blong Jehova i givim save mo fasin blong luksave samting, long yumi. (Prov. 2:6) Ol perens oli save prea from ol pikinini blong olgeta, ol pikinini oli save prea from ol perens, mo yumi evriwan i save prea from ol Baebol studen mo olgeta we yumi prij long olgeta. Be taem yumi prea, yumi no mas askem nomo blong Jehova i halpem yumi.

7. ?From wanem yumi mas presem Jehova taem yumi prea?

⁷ Yumi mas tingbaot blong presem Jehova long ol prea blong yumi. I stret nomo we yumi presem God blong yumi, from we hem i ‘gud mo i rere blong fogif.’ Mo tu, hem i gat ‘sore mo i kaen, i no save kros kwik mo fasin blong hem blong lavem man oltaem i bigwan tumas, mo hem i holem promes blong hem oltaem.’ (Sam 86:5, 15) Yes, yumi gat plante gudfala risen blong presem Jehova, from we hem nomo i gat olgeta paoa mo from ol bigfala wok we hem i mekem.

8. ?Wanem sam samting we yumi save talem tangkiu long Jehova from? (Ol Sam 104:12-15, 24)

⁸ Antap long fasin ya blong presem Jehova tru long ol prea blong yumi, yumi mas talem tangkiu long hem from ol nambawan samting we hem i givim. Eksampol, yumi save talem tangkiu from ol naesfala kala blong flaoa we yumi luk, mo ol naesfala kakae we yumi kakae, mo naesfala kampani blong ol gudfala fren. Papa blong yumi we i lavem yumi, i givim ol samting ya mo plante moa blong mekem yumi hapi. (Ridim Ol Sam 104:12-15, 24.) Mo antap long ol samting ya, yumi mas talem tangkiu long Jehova tu from plante gudfala kakae long saed blong spirit we hem i givim, mo nambawan hop we yumi gat long fiuja.

9. ?Yumi save mekem wanem blong yumi no foget blong talem tangkiu long Jehova? (1 Tesalonaeka 5:17, 18)

⁹ I isi nomo blong yumi fogetem blong talem tangkiu long Jehova from ol samting we  hem i mekem blong yumi. ?Wanem i save halpem yumi blong tingbaot blong talem tangkiu? Yu save mekem wan lis blong ol samting we yu bin askem long Jehova, mo biaen yu save jekem blong luk olsem wanem Jehova i bin ansarem ol prea blong yu, nao yu save mekem wan prea blong talem tangkiu from. (Ridim 1 Tesalonaeka 5:17, 18.) Traem tingbaot: Yumi glad mo yumi harem gud taem ol narafala oli talem tangkiu long yumi. Long sem fasin, taem yumi tingbaot blong talem tangkiu long Jehova from we hem i ansarem ol prea blong yumi, hemia i mekem hem i glad. (Kol. 3:15) ?Wanem narafala impoten samting we yumi save talem tangkiu long God from?

10. Folem 1 Pita 2:21, ?from wanem yumi mas talem tangkiu long Jehova from we hem i sanem Jisas i kam long wol?

¹⁰ Ridim 1 Pita 2:21. Yumi sud talem tangkiu long Jehova from hem i sanem Boe blong hem we hem i lavem tumas, blong i tijim yumi. Yumi lanem plante samting long saed blong Jehova, mo olsem wanem blong mekem hem i glad, taem yumi stadi long laef blong Jisas. Sipos yumi soemaot se yumi bilif long sakrefaes blong Kraes, yumi save fren gud wetem Jehova mo gat pis wetem Hem.—Rom 5:1.

11. ?From wanem yumi prea tru long nem blong Jisas?

¹¹ Yumi talem tangkiu long Jehova from yumi save prea long hem tru long Boe blong hem. Jehova i yusum Jisas olsem rod blong ansa long ol prea blong yumi. Jehova i lesin mo i ansarem ol prea blong yumi, taem yumi sanem ol prea ya tru long nem blong Jisas. Jisas i eksplenem se: “Nomata wanem samting we yufala i askem long nem blong mi, mi bambae mi mekem, olsem nao Pikinini i leftemap nem blong Papa.”—Jon 14:13, 14.

12. ?Wanem narafala risen blong talem tangkiu long Jehova from Boe blong hem?

¹² Jehova i yusum ransom sakrefaes blong Jisas blong fogivim ol sin blong yumi. Baebol i tokbaot Jisas olsem ‘hae pris blong yumi, we i stap long heven, i stap sidaon long raetsaed blong tron blong Man Ya We i Hae Olgeta.” (Hib. 8:1) Jisas i ‘helpa blong yumi we i stap wetem Papa.’ (1 Jon 2:1) !Yumi talem tangkiu long Jehova from we hem i givim wan nambawan Hae Pris we i kasemsave long ol slak fasin blong yumi, mo i “stap toktok oltaem long bihaf blong yumi”! (Rom 8:34; Hib. 4:15) Yumi ol sinman, taswe sipos i no gat sakrefaes blong Jisas, yumi no save kam klosap long Jehova tru long prea. !Ating bambae yu agri se, taem yumi tingbaot nambawan presen ya we Jehova i givim long yumi, hemia Boe blong hem, yumi luksave se ol samting we yumi mekem blong talem tangkiu long Jehova, oli no naf!

13. Long naet bifo we Jisas i ded, ?hem i soemaot olsem wanem se hem i lavem ol disaepol blong hem?

¹³ Long naet bifo we Jisas i ded, hem i mekem wan longfala prea from ol disaepol blong hem, i askem long Papa blong hem blong i “protektem olgeta long man ya we i rabis.” (Jon 17:15) !Yes, Jisas i gat lav! Nating se hem i save se i no longtaem bambae hem i safa bigwan, be hem i wari yet from ol aposol blong hem.

14. ?Yumi soemaot olsem wanem se yumi lavem ol brata mo sista?

¹⁴ Yumi folem fasin blong Jisas, taem yumi no tingbaot nomo wanem we yumi nidim, be yumi prea oltaem from ol brata mo sista blong yumi. Taem yumi mekem olsem, yumi stap obei long komanmen ya blong Jisas, blong lavlavem yumi, mo yumi soemaot long Jehova se yumi lavem tumas ol brata mo sista. (Jon 13:34) Taem yumi prea from ol brata mo  sista, hemia i no blong nating. Baebol i talem se “taem we stret man i krae i go long God, prea ya i gat paoa blong givhan.”—Jem. 5:16.

15. ?From wanem ol brata mo sista oli nidim we yumi prea from olgeta?

¹⁵ Ol brata mo sista oli nidim we yumi prea from olgeta, from we oli stap fesem plante defren trabol. Yumi save askem Jehova blong i halpem olgeta blong oli stanap strong taem oli sik, oli fesem disasta, wo, fasin agens, o ol narafala hadtaem. Yumi save prea tu from ol brata mo sista we oli wok had blong givhan long olgeta we oli gat nid. Maet yu save samfala we oli fesem ol hadtaem olsem. ?Olsem wanem? ?Yu save talem nem blong olgeta long ol prea blong yu? Yumi soemaot se yumi lavem ol brata mo sista, taem yumi askem Jehova blong i halpem olgeta blong oli stanap strong.

16. ?From wanem yumi mas prea from olgeta we oli lidim yumi?

¹⁶ Olgeta we oli lidim kongregesen oli glad tumas taem yumi prea from olgeta, mo ol prea olsem oli save givhan long olgeta. Aposol Pol i save se hem i nidim we ol narafala oli prea from hem. Hem i talem se: “Yufala i mas prea from mi tu, blong taem mi openem maot blong mi blong toktok, bambae mi naf blong talemaot tabu tokhaed ya we i joen wetem gud nius, we mi no fraet nating.” (Efes. 6:19) Tede tu plante brata oli wok had blong lidim gud yumi. Yumi soemaot se yumi lavem olgeta, taem yumi askem Jehova blong i blesem wok blong olgeta.

17-18. ?Wetaem maet oli askem yumi blong prea, mo yumi mas tingbaot wanem?

¹⁷ Samtaem, narafala i save askem yumi blong prea. Eksampol, maet wan sista i gat wan Baebol stadi, nao i askem sista we i folem hem blong mekem wan prea. Be from we sista ya i no save gud studen, maet hem i glad moa blong prea long en blong stadi. Long rod ya, bambae hem i save samting we hem i mas talem, taem hem i prea from studen ya.

¹⁸ Maet oli askem wan brata blong prea long miting blong prij o long miting blong kongregesen. Hemia i wan blesing, be brata ya i mas tingbaot se miting ya i blong wanem. Prea i no wan taem blong givim advaes long kongregesen o blong mekem anaonsmen. Long ol miting  blong kongregesen, i gat faef minit blong singsing mo prea. Taswe, brata we i mekem prea, i no mas talem “plante toktok,” speseli sipos hem i mekem faswan prea blong statem miting.—Mat. 6:7.

19. ?Wanem bambae i halpem yumi blong rere from dei blong jajmen blong Jehova?

¹⁹ Yumi mas mekem prea i kam wan impoten samting long laef blong yumi, taem yumi stap kam klosap moa long dei blong jajmen blong Jehova. Jisas i talem se: “Taswe, yufala i mas stap wekap, mo oltaem yufala i mas prea blong yufala i save ronwe long olgeta samting ya we oli mas kamtru.” (Luk 21:36) Yes, sipos yumi prea oltaem, bilif blong yumi bambae i strong mo bambae yumi rere taem dei blong jajmen blong God i kamtru.

20. ?Olsem wanem ol prea blong yumi oli olsem insens we i smel gud?

²⁰ ?Yumi tokbaot wanem kam kasem naoia? Yumi bin luk se yumi mas tinghae long blesing ya we yumi gat blong prea. Impoten samting we yumi mas prea from, hemia ol samting we oli joen wetem stamba tingting blong Jehova. Yumi mas talem tangkiu tu long God from Boe blong hem, rul blong Kingdom blong hem, mo yumi mas prea from ol brata mo sista blong yumi. Jehova i wantem se yumi prea tu from ol samting we yumi nidim long saed blong bodi mo spirit. Taem yumi tingting gud long ol samting we yumi wantem tokbaot long ol prea blong yumi, yumi soemaot se yumi tinghae long blesing ya blong prea. Taem yumi mekem olsem, ol tok blong yumi oli olsem insens we i smel gud i go long Jehova, mo i mekem “Hem i glad.”—Prov. 15:8.