1. ?Wanem ol trutok we yu lanem taem yu stat blong stadi Baebol?

 ?YU YU tingbaot yet, samting we yu bin lanem taem yu stat blong stadi Baebol? Maet yu sapraes blong save se God i gat wan nem. Maet yu harem gud tu taem yu faenemaot se God i no stap panisim man long helfaea. Mo yu glad tu blong save se bambae yu luk olgeta we yu lavem olgeta tumas we oli ded oli laef bakegen, mo blong laef wetem olgeta long paradaes long wol ya.

2. Antap long ol trutok blong we yu lanem, ?wanem sam samting we yu mekem blong kam gud moa? (Efesas 5:1, 2)

² Taem yu stadi moa long tok blong God, bambae lav we yu gat long Jehova i kam bigwan moa. Lav ya bambae i pusum yu blong folem wanem we yu lanem. Yu mekem ol gudfala desisen we i folem ol rul blong Baebol. Yu jenisim fasin mo ol aksen blong yu from yu wantem mekem God i glad. Olsem we wan pikinini i folem fasin blong perens blong hem, yu tu yu folem fasin blong Papa blong yu long heven.—Ridim Efesas 5:1, 2.

3. ?Wanem ol kwestin we maet yumi save askem yumi wan?

³ Maet yumi save askem yumi wan se: ‘?Lav we mi gat long Jehova naoia i strong moa i bitim faswan taem we mi kam wan Kristin? ?Stat taem mi baptaes, mi mi traehad moa blong gat sem tingting mo fasin olsem Jehova, speseli blong soemaot lav long ol brata mo sista blong mi?’ Sipos yu luksave se “lav ya we yu gat fastaem” long Jehova mo long ol narafala i no moa strong olsem bifo, yu no mas harem nogud. Sem samting olsem i bin hapen long ol fas Kristin. Be Jisas i no lego olgeta mo bambae hem i no lego yumi tu. (Rev. 2:4, 7) Hem i save se yumi naf blong gat sem lav ya bakegen olsem we yumi gat, taem yumi jes lanem trutok.

4. ?Bambae yumi tokbaot wanem long stadi ya?

 ⁴ Long stadi ya, bambae yumi tokbaot olsem wanem yumi save gohed blong mekem lav we yumi gat long Jehova mo ol narafala i kam strong moa. Biaen bambae yumi luk sam gudfala samting we i save kamaot sipos yumi lavem moa Jehova mo ol brata mo sista.

5-6. ?Wanem ol traem we Pol i fesem taem hem i stap prij? ?Wanem i pulum hem blong i gohed long wok blong Jehova?

⁵ Aposol Pol i harem gud taem i mekem wok blong Jehova, be i no isi oltaem. Plante taem, Pol i mas wokbaot longwe, mo long taem blong hem i no isi blong wokbaot longwe olsem. Samtaem, klosap Pol i ‘lusum laef blong hem long ol reva we oli ron bigwan’ mo “long ol man blong stil.” Mo tu, i gat samtaem we ol enemi blong hem oli kilim hem. (2 Kor. 11:23-27) Mo samtaem ol Kristin brata mo sista tu oli no talem tangkiu from ol samting we Pol i mekem blong halpem olgeta.—2 Kor. 10:10; Fil. 4:15.

⁶ ?Wanem i halpem Pol blong i gohed long wok blong Jehova? Pol i lanem plante gudfala fasin blong Jehova tru long Baebol mo long ol prapa ekspiriens blong hem. Nao hem i trastem se Jehova God i lavem hem. (Rom 8:38, 39; Efes. 2:4, 5) Pol i lavem Jehova tumas. Yes, hem i soemaot se hem i lavem Jehova, taem “i stap gohed yet blong givhan long ol tabu man.”—Hib. 6:10.

7. ?Yumi save mekem wanem blong lavem Jehova moa?

⁷ Lav we yumi gat long Jehova i save kam bigwan moa, taem yumi stadi gud long Tok blong hem. Taem yu ridim Baebol, traem faenemaot se ol vas wanwan oli soemaot wanem long saed blong Jehova. Biaen askem se: ‘?Olsem wanem vas ya i soemaot se Jehova i lavem mi? ?Wanem samting long vas ya we i pulum mi blong lavem Jehova?’

8. ?Olsem wanem prea i save halpem yumi blong lavem Jehova?

⁸ Wan narafala rod blong lav Jehova moa, hemia taem yumi prea evri dei mo talemaot ol filing blong yumi long hem. (Sam 25:4, 5) Jehova bambae i ansa long ol prea blong yumi. (1 Jon 3:21, 22) Wan sista long Esia nem blong Kayla, i talem se: “Fastaem mi lavem Jehova nomo from ol samting we mi lanem long saed blong hem, be taem mi luk olsem wanem hem i ansarem ol prea blong mi, mi lavem hem moa. Hemia i mekem se mi wantem tumas blong mekem ol samting we hem i glad long hem.” b

9. ?Timoti i soemaot olsem wanem se hem i stap traehad moa blong soemaot lav?

⁹ Sam yia afta we Pol i kam wan Kristin, hem i mitim wan gudfala yangfala man nem blong hem Timoti. Timoti i lavem Jehova mo i lavem ol man. Pol i talem long olgeta long Filipae se: “I no gat narafala man long ples ya we i gat sem tingting we [Timoti] i gat, we hem i stap tingbaot yufala tumas.” (Fil. 2:20) Pol i no stap tokbaot gudhan we Timoti i gat blong oganaesem ol samting o se hem i wan gudfala man blong tij, be hem i makem se Timoti i lavem ol brata mo sista tumas. I sua se kongregesen we Timoti bambae i visitim, bambae oli glad tumas long visit blong hem.—1 Kor. 4:17.

10. ?Olsem wanem Anna mo hasban blong hem i soemaot se tufala i lavem ol brata mo sista?

¹⁰ Yumi tu yumi save faenem ol rod blong halpem ol brata mo sista. (Hib. 13:16) Tingbaot ekspiriens blong Anna, we yumi bin tokbaot long laswan stadi. Afta long wan strong  hariken, hem mo hasban blong hem oli visitim haos blong wan Witnes famle mo oli faenemaot se hariken i bin spolem ruf blong haos blong olgeta. From samting ya famle ya i no gat ol klin klos. Anna i talem se: “Mifala i tekem klos blong olgeta, wasem, aeanem, mo foldem gud mo tekem i gobak long olgeta. Long mifala, hemia i jes wan smol samting nomo, be fasin blong mifala i mekem se mifala i kam ol gudfala fren kam kasem tede.” Lav we Anna mo hasban i gat long ol brata mo sista i pusum tufala blong halpem olgeta.—1 Jon 3:17, 18.

11. (1) ?Ol narafala oli harem olsem wanem taem yumi soemaot se yumi lavem olgeta? (2) Folem Ol Proveb 19:17, ?wanem tingting blong Jehova taem yumi soem lav?

¹¹ Taem yumi kaen mo yumi soemaot lav long ol narafala, plante taem oli luksave se yumi stap traehad blong folem fasin blong Jehova. Mo maet yumi no luksave, be i sua se oli glad long ol gudfala fasin we yumi soemaot. Kayla we yumi tokbaot hem finis, i tingbaot yet fasin blong ol brata mo sista we oli halpem hem. Hem i se: “Mi mi glad tumas long ol gudfala sista ya we oli tekem mi mi go long wok blong prij. Oli kam from mi long haos, oli invaetem mi blong kakae wetem olgeta mo oli dropem bak mi long haos we mi sef nomo. Naoia mi luksave se oli rili traehad blong mekem ol samting ya, be yet oli mekem from oli gat lav.” I tru i no evriwan we bambae oli talem tangkiu long yumi from samting we yumi mekem blong olgeta. Kayla i tokbaot olgeta we oli halpem se: “Mi wis sipos mi save mekem sam gudfala samting blong olgeta from kaen fasin we oli soemaot long mi, be sore tumas mi no save ples we oli laef long hem. Nating se i olsem, Jehova i save mo mi prea se bambae hem i blesem olgeta long bihaf blong mi.” Kayla i tru. Jehova i makem evri smosmol samting we yumi mekem blong kaen long ol narafala. Hem i luk samting we yumi  mekem olsem wan sakrefaes o wan kaon we bambae hem i pembak yumi from.—Ridim Ol Proveb 19:17.

12. ?Olsem wanem ol brata oli save soemaot se oli lavem kongregesen? (Mo tu, yu luk pija.)

¹² Sipos yu wan brata, ?olsem wanem yu save soemaot lav long ol narafala mo halpem olgeta? Wan yangfala brata nem blong hem Jordan i askem wan elda se hem i save mekem wanem moa blong halpem kongregesen. Elda ya i talem ol gudfala toktok long hem from ol traehad we hem i mekem finis, mo hem i talem sam samting we hem i save mekem blong kam gud moa. Eksampol, hem i talem se Jordan i save kam eli long Haos Kingdom blong welkamem ol narafala, ansa long ol miting, prij oltaem wetem grup blong hem, mo lukaot ol rod blong halpem ol narafala. Taem Jordan i mekem ol samting ya, hem i lanem ol niufala samting, be tu hem i lanem blong lavem moa ol brata mo sista. Jordan i lanem se taem wan brata i kam wan man blong givhan, hem i no jes stat blong halpem ol narafala, be hem i gohed blong halpem ol narafala.—1 Tim. 3:8-10, 13.

13. ?Wanem i pulum Christian blong mekem wok blong elda bakegen?

¹³ ?Olsem wanem sipos yu no moa mekem wok blong man blong givhan o wan elda? Tingbaot se Jehova i no fogetem ol wok we yu bin mekem, mo lav we i pusum yu blong mekem wok blong hem. (1 Kor. 15:58) Mo hem i luk tu lav we yu gohed blong soemaot. Wan brata nem blong hem Christian i harem nogud taem hem i no moa mekem wok blong elda. Be hem i talem se: “Mi disaed se bambae mi mekem evri samting we mi naf blong mekem long wok blong Jehova, nating se mi wan elda o nogat.” Sam taem i pas oli putumap hem bakegen olsem wan elda. Christian i talem se: “Mi fraet smol blong mekem wok ya bakegen. Be mi tingbaot se sipos Jehova i wantem  we mi mekem wok blong elda bakegen, bambae mi mekem from we mi lavem hem mo mi lavem ol brata mo sista.”

14. ?Yu lanem wanem long toktok blong wan sista long Jojia?

¹⁴ Ol man blong Jehova oli soemaot lav tu long ol neba blong olgeta. (Mat. 22:37-39) Eksampol, wan sista we nem blong hem Elena, we i stap long kantri blong Jojia i se: “Fastaem, samting we i pusum mi blong prij hemia lav we mi gat long Jehova. Be taem lav ya i kam bigwan moa, lav we mi gat long ol narafala tu i kam bigwan moa. Mi traem blong tingbaot ol problem we oli fesem mo wanem topik we i save tajem hat blong olgeta. Taem mi tingbaot samting ya moa, hemia i mekem se mi wantem halpem olgeta.”—Rom 10:13-15.

15-16. Folem pija, ?yumi kasem wanem blesing taem yumi soem lav long ol narafala?

¹⁵ Taem yumi soemaot lav long ol brata mo sista, i no olgeta nomo we oli kasem gudfala samting from. Afta we COVID-19 pandemik i stat, wan brata nem blong hem Paolo mo waef blong hem, oli halpem plante olfala sista blong oli lanem blong yusum ol elektronik divaes blong olgeta blong oli save prij long ol narafala. Wan sista we fastaem i faenem i had blong yusum divaes blong hem, naoia hem i save yusum, mo hem i naf blong invaetem ol famle blong hem blong joen long Memoriol. !Sikisti long olgeta oli joenem Memoriol tru long video konfrens! Sista ya mo famle blong hem oli kasem gudfala samting from traehad  blong Paolo mo waef blong hem. Biaen, sista ya i raet i go long Paolo se: “Tangkiu blong tijim mifala ol olfala. Bambae mi neva fogetem olsem wanem Jehova i kea long mifala, mo traehad we yu mekem blong halpem mifala.”

¹⁶ Ol ekspiriens olsem, i tijim Paolo long wan impoten lesen. Hemia i mekem hem i tingbaot se lav i moa impoten i bitim save o gudhan we man i gat. Hem i talem se: “Bifo, mi mi mekem wok blong eria elda. Be tede, mi luksave se nating we ol brata mo sista maet oli fogetem ol tok blong mi, be bambae oli tingbaot yet ol samting we mi mekem blong givhan long olgeta.”

17. ?Hu moa bambae i kasem gudfala samting taem yumi soemaot lav?

¹⁷ Taem yumi soemaot lav long ol narafala, yumi kasem plante gudfala samting long ol rod we yumi no ekspektem. Jonathan, we i laef long Niusilan, i luksave se samting ya i tru. Long wan sarede aftenun, hem i luk wan paenia brata i stap prij hem wan nomo long rod, long hot san. Ale, Jonathan i mekem desisen blong wok wetem paenia ya long ol sarede aftenun. Long taem ya, hem i no luksave se samting we hem i mekem bambae i givhan long hem. Jonathan i talem se: “Long taem ya, mi mi no laekem wok blong prij. Be taem mi luk gudhan blong brata ya blong prij, mo gudfala frut we hem i kasem long wok ya, hemia i pulum mi blong laekem wok blong prij. Mo tu, brata ya i kam gudfala fren blong mi we i halpem mi blong mi glad long wok blong prij, mi kam bigman long saed blong spirit, mo mi kam klosap moa long Jehova.”

18. ?Jehova i wantem se yumi mekem wanem?

¹⁸ Jehova i wantem se yumi evriwan i gohed blong lavem hem moa mo ol narafala. Olsem we yumi lanem, yumi save mekem lavem Jehova moa, taem yumi ridim mo tingting dip long Tok blong hem, mo prea oltaem. Yumi save mekem lavem moa ol brata mo sista, taem yumi mekem samting blong givhan long olgeta. Taem lav blong yumi i kam bigwan moa, bambae yumi kam klosap moa long Jehova, mo long ol Kristin brata mo sista. !Mo tu, bambae yumi fren gud blong olwe!