Papa blong mi i wan elda long Yunaeted Jos Blong Kanada, so evri wik hem i stap sanem mi mo sista blong mi blong go long Sande skul, afta mitufala i kam joenem hem long jos sevis long 11 klok long moning. Long aftenun, mitufala i go wetem mama long Haos Kingdom. Mitufala i luksave se tufala relijen ya i defren olgeta.

Mama i tokbaot niufala bilif blong hem long gudfala fren blong hem Bob mo Marion Hutcheson, mo tufala tu i akseptem ol trutok mo kam ol Witnes blong Jehova. Long 1958, Brata mo Sista Hutchesons i tekem mi mo trifala boe blong tufala, blong go long Intenasnal Asembli ya Wil Blong God, we oli mekem blong eit dei long taon blong Niu Yok. Taem mi tingbaot taem ya, mi luksave se i no isi blong oli tekem mi, be hemia wan gudfala memori we bambae mi no save fogetem.

Taem mi kam yangfala, mifala i laef long wan fam blong ol animol, mo mi mi laekem tumas blong lukaot long olgeta. Ale mi gat tingting blong skul blong kam wan dokta blong ol animol. Mama i talemaot samting ya long wan elda long kongregesen. Mo elda ya i rimaenem mi se naoia yumi stap laef long “ol las dei,” mo hem i mekem mi tingbaot se sipos mi spenem plante yia long wan yunivesiti, hemia i save afektem frensip blong mi wetem Jehova. (2 Tim. 3:1) Taswe, mi disaed blong no go long yunivesiti.

 Be mi stap tingting yet se bambae mi mekem wanem afta we mi graduet long hae skul. Nating se evri wiken mi go prij, be mi no rili laekem, mo mi no ting se mi save kam wan paenia. Long semtaem, papa blong mi we i no bilif mo smol brata blong hem, tufala i stap enkarejem mi blong wok fultaem long wan bigfala kampani blong insurens long Toronto. Brata blong papa blong mi i gat wan impoten posisen long wok ya, taswe mi akseptem.

Long Toronto, mi spenem plante taem long wok mo mi joen wetem ol man we oli no Witnes, mo hemia i mekem se mi no stap joen plante long ol miting mo wok blong prij. Fastaem mi mi laef wetem bubu man blong mi we i no wan Witnes, be afta we hem i ded, mi mas faenem wan narafala ples blong stap long hem.

Brata mo Sista Hutchesons, we oli bin tekem mi mi go long asembli long 1958, tufala i olsem perens blong mi. Tufala i talem long mi blong go stap wetem olgeta long haos, mo oli save halpem mi long saed blong spirit. Long 1960, mi baptaes wetem boe blong tufala, John. Afta long taem ya, John i stat blong paenia, mo hemia i pulum mi blong prij moa. Ol brata long kongregesen oli luksave se mi stap gohed gud long saed blong spirit, ale oli putumap mi blong lukaot long Tiokratik Ministri Skul. a

Long 1966, mi maredem Randi Berge. Hem i wan paenia we i wok strong long wok blong prij, mo i glad blong go prij long ples we i gat moa nid. Eria elda blong mifala i soemaot se i intres long mitufala mo i enkarejem mitufala blong go givhan long kongregesen blong Orillia, Ontario. So mitufala i pakemap olting blong mitufala mo mitufala i muv i go.

Taem mitufala i kasem Orillia, mi joenem Randi long wok blong fultaem paenia. !Taem mi luk se hem i glad long wok ya, mi tu mi glad! Mo taem mi stap traehad blong kam wan gudfala paenia, mi harem gud blong yusum Baebol mo luk olsem wanem ol man oli kasemsave long trutok. I wan nambawan blesing blong halpem wan gudfala kapol  long Orillia blong mekem sam jenis long laef blong tufala mo kam ol man blong Jehova.

Taem mitufala i go long Toronto blong visit, mi mitim Arnold MacNamara, we i stap lidim wok long Betel. Ale hem i askem sipos mitufala i laekem blong mekem wok blong spesel paenia. Kwiktaem nomo mi talem se: “!Yes, be i no long Quebec!” Mi talem olsem from nogud tingting blong ol man Kanada we oli toktok Inglis i rili gat paoa long mi. Olgeta ya oli gat nogud tingting long saed blong ol man long provins blong Quebec we oli toktok Franis. Long taem ya, ol man oli stap protes agensem gavman mo oli wantem se provins blong Quebec i kam independen, i no wan pat blong Kanada.

Be Arnold i ansa se: “Naoia branj ofis i stap sanem ol spesel paenia i go nomo long Quebec.” Ale, kwiktaem nomo mi agri blong go. Mi save finis se Randi i intres tumas blong go prij long ples ya. !Biaen nomo mi luksave se hemia beswan desisen we mitufala i mekem long laef!

Afta we mi mo Randi wetem wan narafala kapol i spenem faef wik blong lanem Franis, mifala i go long Rimouski, we hem i samwe 540 kilometa long not is blong Montreal. Wan taem long miting, mi stap ridimaot sam anaonsmen long saed blong wan asembli. Long riding ya, mi sud talem se bambae yumi gat plante “deleget blong Ostria” be mi girap mi talem se bambae yumi gat plante “deleget blong ostrij.” Yes, mifala i gat plante samting yet blong lanem.

Long Rimouski, mifala i joen wetem fo strong singel sista mo Brata mo Sista Huberdeaus wetem tu gel blong tufala. Brata mo Sista Huberdeaus i stap rentem wan bigfala haos, mo evri paenia we oli laef long haos ya oli givhan blong pem rent. Mifala i singaot bigfala haos ya se Waet Haos, from we fored blong haos ya i waet mo i gat ol bigfala waet pos. Plante taem i gat 12 o 14 man i laef long haos ya. Olsem ol narafala spesel paenia, mi mo Randi i stap go prij long moning, aftenun, mo long sapa, so mitufala i glad from oltaem i gat man we i save folem mitufala i go prij, iven long ol sapa we ples i kolkol.

Mitufala i fren gud wetem ol gudfala paenia ya, mo oli kam olsem famle blong mitufala. Samtaem mifala i sidaon raon long faea o mifala i gat wan dei blong kuk tugeta. Wan long ol brata i save plei miusik, so long ol Sarede naet, plante taem mifala i singsing mo danis.

!I gat gudfala frut i kamaot long teritori blong Rimouski! Long faef yia nomo, mifala i glad blong luk we sam Baebol studen oli gohed gud kasem we oli baptaes, mo luk we kongregesen i gru i kasem klosap 35 pablisa.

Long Quebec, mifala i kasem trening blong kam ol gudfala man blong prij. Mifala i luk olsem wanem Jehova i halpem mifala blong prij mo i givim ol tul we mifala i nidim. Mo tu, mifala i lanem blong lavem ol man we oli toktok Franis, iven lanwis mo kalja blong olgeta. Mo hemia i mekem mifala i laekem ol narafala kalja tu.—2 Kor. 6:13.

Biaen, mitufala i sapraes we branj i askem mitufala blong muv i go long taon blong Tracadie, we i stap long is saed blong New Brunswick. Be naoia i gat wan problem, from mitufala i jes saenem wan kontrak blong rentem wan apatmen, mo mi mekem wan kontrak tu wetem wan komiti blong skul, blong mi save go wanwan taem blong tij. Antap long hemia, sam Baebol stadi blong mifala oli jes kam pablisa mo mifala i stap bildim wan Haos Kingdom.

Long ful wiken, mitufala i prea from samting ya  mo mitufala i go visitim taon ya Tracadie. Taon ya i defren olgeta long Rimouski. Be mitufala i disaed se from we Jehova i wantem se mitufala i go long ples ya, bambae mitufala i go. Mitufala i traem Jehova mo mitufala i luk we hem i tekemaot ol samting we oli blokem mitufala. (Mal. 3:10) Be olsem oltaem, from we Randi i fren gud wetem Jehova, i no tingbaot hem wan, mo i gat gudfala tingting, hemia i mekem se i isi blong mitufala i muv i go long taon ya.

Long niufala kongregesen ya i gat wan elda nomo, hemia Robert Ross. Hem i bin paenia long ples ya wetem waef blong hem, Linda. Mo afta we tufala i gat fasbon pikinini blong tufala, tufala i disaed blong stap nomo long ples ya. Nating se tufala i stap lukaot long smol boe blong tufala, be fasin blong tufala blong welkamem gud mitufala mo wok strong long wok blong prij, i rili enkarejem mitufala bigwan.

Afta we mitufala i paenia blong tu yia long Tracadie, mitufala i sapraes blong kasem wan invetesen blong mekem wok blong eria elda. Blong seven yia, mitufala i visitim ol eria we oli toktok Inglis, mo biaen oli sanem mitufala i gobak long Quebec blong visitim ol brata sista we oli toktok Franis. Distrik elda blong mifala long Quebec, Léonce Crépeault, i talem ol gudfala toktok from ol tok blong mi. Be oltaem bambae hem i askem long mi se: “?Olsem wanem ol tok ya oli save givhan moa long ol man?” b Kwestin ya i halpem mi blong mekem ol tok blong mi oli kam isi moa, blong ol man oli naf blong kasemsave.

Wan asaenmen blong mi we bambae mi neva fogetem, hemia blong lukaot long saed blong kakae, long taem blong Intenasnal Asembli ya “Bilif i Win,” we oli holem long Montreal long 1978. Long taem ya, mifala i ekspektem 80,000 man, mo mifala i mas folem niufala arenjmen long saed blong kakae. Evri samting i niu, olsem ol tul blong yusum, ol kakae, mo fasin blong rerem ol kakae ya. Mifala i gat klosap 20 bigfala aebokis, be samtaem oli no wok. Bifo we faswan dei blong asembli i stat, mifala i no save go insaed long stadium blong rerem ol samting. Mifala i mas wet kasem medel naet, from i gat wan spot i stap gohed. !Mo mifala i mas stat blong onem ol oven bifo we san i girap, blong rerem ol samting blong dring ti! Mifala i taed tumas, be mi lanem plante samting long ol brata mo sista we mifala i wok tugeta, oli wok had, oli bigman long ol Kristin fasin, mo oli glad oltaem. Kam kasem tede,  mifala i fren gud yet. !I wan nambawan blesing blong stap long impoten asembli ya long Quebec, from hemia wan provins we i gat bigfala fasin agens bitwin ol yia 1940 mo 1960!

Long taem blong bigfala asembli long Montreal, mi bin lanem plante samting long ol narafala elda. Blong wan yia, David Splane, we naoia i stap wok long Hed Kampani, i bin mekem wok ya blong lukaot long asembli. Be long wan narafala asembli, oli askem mi blong mekem wok ya, mo David i rili sapotem gud mi.

Long 2011, afta long 36 yia we mi mo Randi i mekem wok blong eria elda, mi kasem wan invetesen blong kam wan tija long Skul Blong Ol Elda. Blong tu yia, mitufala i slip long 75 defren bed, be ol sakrefaes ya oli no blong nating. Long en blong evri wik, ol elda oli glad tumas from oli harem se Hed Kampani i tingbaot olgeta mo i wantem se oli gohed blong fren gud wetem Jehova.

Biaen, mi tij long Skul Blong Kingdom Ivanjelis. Plante taem ol studen oli taed mo oli wari from oli gat plante samting blong mekem. Long wan dei, oli mas sidaon seven aoa long klas, evri sapa oli mas spenem tri aoa blong mekem ol homwok, mo oli gat fo o faef asaenmen blong mekem evri wik. Mi mo narafala tija blong skul ya i eksplenem long olgeta se oli nidim help blong Jehova, sipos no oli no save mekem ol samting ya. Ol studen oli sapraes blong luk se taem oli dipen long Jehova, oli naf blong mekem plante moa samting i bitim wanem we oli tingbaot, mo hemia wan samting we bambae mi neva fogetem.

Fasin blong mama blong intres long ol narafala, i halpem ol Baebol stadi blong hem blong oli gohed gud, mo hemia i givhan long papa tu blong i jenisim tingting blong hem long saed blong trutok. Tri dei afta we mama i ded, mifala i sapraes se papa i kam lesin long wan pablik tok long Haos Kingdom, mo i gohed blong go long ol miting long ol 26 yia afta. Nating se Papa i neva baptaes, be ol elda oli talem long mi se oltaem hem i faswan blong kam long ol miting evri wik.

Mama i soemaot wan nambawan eksampol long mifala ol pikinini. Trifala sista blong mi mo ol hasban blong olgeta oli mekem wok blong Jehova fultaem. Tu long ol sista blong mi i wok long branj ofis, wan long Potugal mo wan long Haiti.

Naoia mi mo Randi i mekem wok blong spesel paenia long Hamilton, Ontario. Taem mitufala i mekem wok blong eria elda, mitufala i glad blong folem ol narafala i go long ol visit mo Baebol stadi blong olgeta. Be naoia mitufala i glad tumas blong luk ol Baebol stadi blong mitufala oli stap gohed gud. Mo taem mitufala i fren gud wetem ol brata mo sista long niufala kongregesen blong mitufala, mitufala i glad tumas blong luk olsem wanem Jehova i stap sapotem olgeta long ol gudtaem mo hadtaem.

Taem mitufala i tingting bak, mitufala i harem gud tumas se plante brata mo sista oli soem intres long mitufala. Naoia mitufala traem blong ‘tingbaot oltaem’ ol narafala, mo enkarejem olgeta blong oli mekem bes blong olgeta long wok blong Jehova. (2 Kor. 7:6, 7) Eksampol, long wan famle, mama, boe, mo gel, evriwan oli mekem wok blong Jehova fultaem. Ale, mi askem long papa blong olgeta sipos hem i stap tingbaot blong paenia wan dei, mo hem i ansa se hem i stap sapotem trifala we i paenia. So mi askem hem se: “?Yu yu save sapotem olgeta moa i bitim Jehova?” Mi stap enkarejem hem blong kasem sem glad ya we olgeta oli stap kasem. Sikis manis afta, hem i kam wan paenia.

Bambae mi mo Randi i gohed blong “tokbaot . . . long nekis jeneresen” ol “gudgudfala wok” blong Jehova, mo mitufala i hop se bambae olgeta tu oli glad mekem wok blong hem olsem mitufala.—Sam 71:17, 18.