1. ?From wanem i waes blong rere gud from ol disasta?

 FASIN blong stap rere i save sevem laef blong yumi. Eksampol, taem i gat wan disasta, plante taem ol man we oli rere gud fastaem oli stap sef mo oli naf blong halpem ol narafala. Wan oganaesesen long Yurop we i stap traem blong halpem ol man i talem se: “Fasin blong rere gud fastaem i save sevem laef blong man.”

2. ?From wanem yumi mas rere from bigfala trabol? (Matiu 24:44)

² “Bigfala trabol” bambae i stat wantaem nomo. (Mat. 24:21) Be hem i defren long ol narafala disasta, from we yumi save se i stap kam. Samwe 2,000 yia bifo, Jisas i wonem ol man blong hem blong oli stap rere from dei ya. (Ridim Matiu 24:44.) Sipos yumi rere gud naoia, bambae i isi blong yumi stanap strong long dei ya mo yumi naf blong halpem ol narafala blong oli mekem sem mak.—Luk 21:36.

3. ?Olsem wanem fasin blong stanap strong, gat sore, mo lav i save halpem yumi blong rere from bigfala trabol?

³ I gat tri fasin we yumi mas wokem we i save halpem yumi blong rere from bigfala trabol. ?Bambae yumi mekem wanem sipos yumi mas talemaot wan strong mesej blong jajmen mo ol man oli agensem yumi? (Rev. 16:21) Yumi mas stanap strong blong yumi save obei long Jehova, mo trastem se bambae hem i protektem yumi. ?Bambae yumi mekem wanem sipos ol brata mo sista oli lusum evri samting blong olgeta? (Hab. 3:17, 18) Yumi mas gat sore blong yumi save givim ol samting we oli nidim. ?Bambae yumi mekem wanem sipos wan grup blong ol nesen i atakem yumi, nao yumi mas laef wetem ol brata mo sista blong sam taem? (Esik. 38:10-12) Yumi mas gat lav blong yumi save gotru long hadtaem ya.

4. ?Olsem wanem Baebol i soemaot se yumi mas gohed blong wokem fasin blong stanap strong, gat sore, mo lav?

⁴ Baebol i enkarejem yumi blong yumi gohed blong wokem fasin blong stanap strong, gat sore, mo lav. Luk 21:19 i talem se:  “Sipos yufala i stanap strong, bambae yufala i no lusum laef blong yufala.” Kolosi 3:12 i talem se, “Yufala i mas werem . . . sore” olsem klos blong yufala. Mo 1 Tesalonaeka 4:9, 10 i talem se: “God i tijim yufala finis, se yufala i mas lavlavem yufala. . . . Be ol brata, mifala i stap pulum yufala blong yufala i gohed moa yet long fasin ya.” Ol tok ya oli raetem i go long ol disaepol we oli soemaot finis fasin blong stanap strong, gat sore mo lav. Be oli mas gohed yet blong wokem ol fasin ya. Mo hemia i sem mak long yumi tede. Blong givhan long yumi, bambae yumi tokbaot olsem wanem ol Kristin bifo oli soemaot ol fasin ya. Biaen bambae yumi luk olsem wanem yumi save folem fasin blong olgeta mo pruvum se yumi rere from bigfala trabol.

5. ?Wanem i givhan long ol Kristin bifo blong oli stanap strong?

⁵ Ol Kristin bifo oli nidim blong stanap strong. (Hib. 10:36) Oli fesem plante problem olsem ol narafala man long taem ya, be tu oli fesem problem from oli ol Kristin. Plante long olgeta, ol lida blong ol man Jiu mo ol haeman blong Rom oli mekem i nogud long olgeta, be antap moa ol famle blong olgeta tu i agensem olgeta. (Mat. 10:21) Mo tu, insaed long kongregesen oli mas meksua se ol giaman tijing blong ol apostasi we oli stap traem blong seraotem kongregesen, i no gat paoa long olgeta. (Wok 20:29, 30) Be oli gohed blong stanap strong. (Rev. 2:3) ?Wanem i givhan long olgeta? Oli tingbaot eksampol blong ol man long Baebol we oli stanap strong olsem Job. (Jem. 5:10, 11) Mo tu, oli prea blong kasem paoa. (Wok 4:29-31) Mo oli gohed blong tingbaot se Jehova bambae i blesem olgeta sipos oli stanap strong.—Wok 5:41.

6. ?Merita i mekem wanem blong stanap strong, mo yumi lanem wanem from?

⁶ Yumi tu yumi save stanap strong, sipos yumi stadi mo tingting dip oltaem long ol stori long Baebol mo long ol buk blong yumi, we oli tokbaot ol man we stanap strong. Hemia nao samting we Merita, wan sista long Albania i mekem, nao hem i naf blong stanap strong taem famle blong hem i agensem hem. Hem i se: “Stori blong Job long Baebol i enkarejem mi bigwan, nating se hem i no save se hu nao i stamba blong ol problem blong hem, be hem i talem se: ‘!Go kasem we mi ded, bambae mi no lego fasin blong mi blong holemstrong long God!’ (Job 27:5) Mi stap tingbaot se Job i kasem plante moa problem i bitim mi, mo mi save from wanem mi kasem ol problem ya, be Job hem i no save nating se hu i stamba blong ol problem blong hem.”

7. Nating se yumi no fesem ol bigfala problem naoia, ?be yumi mas lanem blong mekem wanem?

⁷ Yumi save gohed blong stanap strong moa taem yumi prea oltaem mo talemaot ol wari blong yumi long Jehova. (Fil. 4:6; 1 Tes. 5:17) Nating se yu no fesem ol bigfala problem tede, be ?yu yu prea mo yu askem help blong Jehova taem yu harem nogud, yu gat tu tingting, mo yu no save wanem blong mekem? Sipos yu prea oltaem long Jehova blong i halpem yu taem yu fesem ol smosmol problem naoia, bambae yu no fraet blong mekem sem mak taem yu fesem ol bigfala problem long fiuja. Olsem nao, bambae yu sua fulwan se hem i savegud wetaem mo olsem wanem blong givhan long yu.—Sam 27:1, 3.

8. ?Yumi lanem wanem long eksampol blong Mira? (Jemes 1:2-4) (Mo tu, yu luk pija.)

⁸ Bambae yumi naf blong stanap strong long bigfala trabol, sipos yumi lanem naoia blong stanap strong long ol trabol we yumi fesem tede. (Rom 5:3) ?From wanem yumi talem olsem? Plante brata mo sista oli talem se evri taem we oli stanap strong long wan trabol, hemia i halpem olgeta blong oli stanap strong long nekis wan. Mo taem Jehova i halpem olgeta blong stanap strong, oli bilif strong moa se Jehova i rere  mo i wantem tumas blong halpem olgeta. Mo from we oli bilif long Jehova, oli naf blong stanap strong long nekis trabol. (Ridim Jemes 1:2-4.) Mira, wan paenia long Albania, i luksave se fasin blong hem blong stanap strong long ol trabol bifo, i givhan long hem blong stanap strong tu naoia. Hem i talem se samtaem hem i harem se ol trabol blong hem oli plante moa i bitim ol narafala. Be taem hem i tingbaot olsem wanem Jehova i bin sapotem hem long ol 20 yia we i pas, hem i stap talem long hem wan se: ‘Gohed blong holemstrong. Jehova i bin halpem yu blong stanap strong long plante trabol, so yu no mas stop blong mekem wok blong hem.’ Yu tu yu save tingbaot olsem wanem Jehova i bin halpem yu blong stanap strong. Mo i gud yu trastem se evritaem we yu stanap strong, Jehova i luk mo bambae hem i blesem yu. (Mat. 5:10-12) Biaen taem bigfala trabol i stat, bambae yu naf blong stanap strong mo bambae yu gat strong tingting blong gohed blong stanap strong.

9. ?Olsem wanem kongregesen blong Antiok long Siria i soemaot sore?

⁹ Traem tingbaot samting we i hapen long ol Kristin long Judia, taem oli fesem hadtaem long saed blong kakae. Taem kongregesen blong Antiok long Siria i harem nius ya, oli sore tumas long ol brata mo sista long Judia. Taswe, oli tekem aksen blong givhan long olgeta. Oli “mekem desisen se olgeta wanwan bambae oli givim samting we oli naf blong givim, blong oli sanem i go long ol brata we oli stap long Judia, blong givhan long olgeta.” (Wok 11:27-30) Nating se ol brata mo sista ya oli stap longwe, be ol Kristin long Antiok oli gat strong tingting blong givhan long olgeta.—1 Jon 3:17, 18.

10. ?Long wanem rod yumi save soemaot sore long ol brata mo sista we oli fesem wan disasta? (Mo tu, yu luk pija.)

¹⁰ Tede, yumi tu yumi save soemaot sore taem yumi harem se ol brata mo sista blong yumi oli fesem wan disasta o wan narafala trabol. Yumi kwik blong givhan taem yumi askem ol elda sipos yumi save joen long wan projek, taem yumi givim presen mane blong sapotem wok blong Kingdom long fulwol o taem yumi prea from olgeta we oli fesem wan disasta. b (Prov. 17:17) Eksampol, long 2020 Hed Kampani i putumap bitim 950 Komiti We i Givhan Long Taem Blong Disasta, blong halpem olgeta we oli nidim help long taem blong COVID-19 pandemik. Yumi glad tumas long ol brata mo sista we oli joen long rilif wok ya. Olgeta oli lavem tumas ol brata mo sista, taswe oli go givim ol samting we oli nidim long saed blong bodi, mo halpem olgeta blong oli gohed blong wosipim Jehova. Mo long sam ples, oli fiksimap o bildim ol haos blong ol brata mo sista mo ol ples blong wosip.—Skelem Wetem 2 Korin 8:1-4.

11. ?Olsem wanem yumi ona long Jehova taem yumi soemaot sore?

¹¹ Afta long wan disasta, taem yumi soemaot sore long ol brata mo sista, ol narafala oli makem wok we yumi mekem. Eksampol, long 2019, Hariken Dorian i distroem gud wan Haos Kingdom long Bahamas. Taem ol brata oli wantem bildim bak Haos Kingdom ya, oli askem wan kampani blong wan man we i no Witnes se sipos hem i kam mekem wok we oli nidim, bambae oli pem hem hamas. Man ya i talem long olgeta se: “Mi glad nomo blong kam wok mo givim ol tul mo ol masin fri nomo long yufala, mi jes wantem blong mekem samting ya blong oganaesesen blong yufala. Mi glad tumas blong luk we yufala i tingbaot ol fren blong yufala.” Bighaf blong ol man long wol oli no save Jehova. Be plante long olgeta oli luk ol wok we ol Witnes blong Jehova oli mekem  blong halpem ol narafala. !Yumi glad tumas blong save se taem yumi soemaot sore long ol narafala, hemia i save pulum ol man blong oli wantem tumas blong save Jehova we i gat “bigfala sore”!—Efes. 2:4.

12. ?Olsem wanem fasin blong soemaot sore tede, i rerem yumi from bigfala trabol? (Revelesen 13:16, 17)

¹² ?From wanem bambae yumi nidim blong soemaot sore long taem blong bigfala trabol? Baebol i soemaot se olgeta we oli no wantem sapotem gavman blong wol ya bambae oli fesem ol trabol naoia mo long taem blong bigfala trabol. (Ridim Revelesen 13:16, 17.) Maet ol brata mo sista blong yumi oli nidim help blong kasem ol samting we oli nidim blong stap laef. Taem King blong yumi Kraes Jisas i kam blong jajem ol man, yumi wantem se hem i luk yumi se yumi stap soemaot sore mo bambae hem i invaetem yumi blong “tekem Kingdom.”—Mat. 25:34-40.

13. Folem Rom 15:7, ?olsem wanem ol Kristin bifo oli soemaot lav bitwin olgeta?

¹³ Lav i wan impoten mak blong ol Kristin bifo. ?Be i isi oltaem blong oli soemaot lav? Traem tingbaot kongregesen blong Rom. Sam oli man Jiu mo oli gruap wetem tijing ya se oli mas obei long Loa blong Moses, be ol narafala oli kamaot long ol defren nesen mo oli gruap wetem ol defren kastom. Sam Kristin oli bin wok olsem ol slef, mo sam narafala nogat. Mo maet samfala oli bos long sam slef. Taswe, ?olsem wanem ol Kristin ya oli gohed blong soemaot lav long olgeta, nating se oli gat defdefren bakgraon? Aposol Pol i talem long olgeta blong oli ‘welkamem olgeta.’ (Ridim Rom 15:7.) ?Hem i minim wanem? Tok we oli tanem i kam “welkamem” i min se yumi kaen long narafala o invaetem hem i kam long haos o i kam gudfala fren blong yumi. Eksampol, Pol i talem long Filimon olsem wanem blong welkamem slef ya Onesimas, taem i talem se: “Yu tekembak hem.” (Flm. 17) Prisila mo Akwila “i tekem [Apolos]” we i no save gud plante samting long saed blong God, i kam long haos blong tufala. (Wok 18:26) Nating se ol Kristin ya oli defdefren, be oli no letem samting ya i seraotem olgeta o blokem olgeta blong welkamem ol narafala.

14. ?Olsem wanem Anna mo hasban blong hem i soemaot lav?

¹⁴ Yumi tu yumi save soemaot lav long ol brata mo sista, taem yumi fren gud mo spenem taem wetem olgeta. Plante taem hemia i save pulum olgeta tu blong oli lavem yumi. (2 Kor. 6:11-13) Tingbaot ekspiriens blong Anna mo hasban blong hem. Smoltaem afta we tufala i muv i go long Wes Blong Afrika blong mekem wok blong misinari, COVID-19 pandemik i stat. Taswe tufala i no save joen wetem niufala kongregesen blong tufala. ?Be olsem wanem kapol ya i soemaot lav long olgeta? Tufala i yusum video konfrens blong kontaktem ol brata mo sista long ples ya, mo talem long olgeta se tufala i wantem tumas blong savegud olgeta. Hemia i rili tajem hat blong ol brata mo sista ya, mo hemia i pulum olgeta blong oli stat blong ring mo sanem mesej long tufala. ?From wanem kapol ya i mekem olsem? Anna i talem se: “Ol brata mo sista oli soemaot lav long mi mo famle blong mi long ol gudtaem mo hadtaem tu, mo hemia i tajem hat blong mi. Taswe, mi tu mi wantem soemaot lav long ol narafala.”

15. ?Yumi lanem wanem long eksampol blong Vanessa? (Mo tu, yu luk pija.)

¹⁵ Plante long yumi oli stap go long wan kongregesen we i gat ol brata mo sista we oli gat ol defdefren bakgraon, mo oli gat ol defren tingting mo fasin. Yumi save lavem olgeta moa, taem yumi tingbaot nomo ol gudfala fasin blong olgeta. Wan sista nem blong hem Vanessa, we i laef long Niusilan, i faenem i had blong fren gud wetem samfala long kongregesen  blong hem. Be biaen, hem i disaed blong traem spenem moa taem wetem olgeta i bitim we hem i stap longwe long olgeta. Mo taem hem i mekem olsem, hem i faenemaot ol gudfala fasin blong olgeta we Jehova i lavem olgeta from. Hem i talem se: “Taem hasban blong mi i stat blong mekem wok blong eria elda, mitufala i spenem taem wetem plante moa brata mo sista we oli gat ol defdefren tingting mo fasin, mo mi luk se i isi moa blong joen gud wetem olgeta. Naoia mi laekem ol defdefren kaen man. Jehova tu i laekem ol man we oli kamaot long ol defdefren kantri mo bakgraon, taswe hem i letem olgeta blong oli wosipim hem.” Taem yumi lanem blong luk ol narafala olsem we Jehova i luk olgeta, yumi pruvum se yumi lavem olgeta.—2 Kor. 8:24.

16. ?From wanem lav i impoten long taem blong bigfala trabol? (Mo tu, yu luk pija.)

¹⁶ Lav i wan impoten fasin we yumi nidim long taem blong bigfala trabol. Taem bigfala trabol i stat, ?olsem wanem Jehova bambae i protektem yumi? Tingbaot instraksen we Jehova i talem long ol man blong hem, taem ami blong Babilon i kam atakem olgeta, hem i se: “Ol man blong mi, yufala i go insaed long ol rum blong yufala we i stap insaed olgeta, mo yufala i stap insaed, yufala i satem doa. Yufala i haed smoltaem gogo kasem we kros blong God i godaon.” (Aes. 26:20) Maet i luk olsem se bambae yumi folem sem instraksen ya long taem blong bigfala trabol. ‘Rum we i stap insaed olgeta’ maet i minim ol kongregesen blong yumi. Long taem blong bigfala trabol, Jehova i promes se bambae hem i protektem yumi, sipos yumi gohed blong wosipim hem wetem ol brata mo sista. !Taswe, yumi mas traehad naoia blong lavem moa ol brata mo sista, from we hemia i save sevem laef blong yumi!

17. Sipos yumi rere naoia, ?bambae yumi naf blong mekem wanem long taem blong bigfala trabol?

¹⁷ “Bigfala dei blong Jehova” bambae i mekem ol man oli safa. (Sef. 1:14, 15) Ol man blong Jehova tu bambae oli safa. Be sipos yumi rere naoia, bambae yumi naf blong stap kwaet mo givhan long ol narafala. Mo bambae yumi save stanap strong long eni trabol we yumi fesem. Taem ol brata mo sista oli safa, bambae yumi mekem bes blong yumi blong givhan long olgeta. Mo yumi mekem olsem, taem yumi soemaot sore mo yumi givim samting we oli nidim. Mo sipos yumi lanem naoia blong lavem ol brata mo sista, bambae yumi save lavem olgeta tu long fiuja. Nao long rod ya, Jehova bambae i blesem yumi, i mekem yumi laef long wol we yumi no moa tingbaot ol disasta mo trabol we yumi kasem.—Aes. 65:17.