1-2. ?From wanem yumi talem se wan Kristin i olsem wan stori haos? (1 Korin 15:58)

 LONG en blong ol yia 1970, oli wokem wan bigfala bilding we i gat 60 stori long Tokyo, Japan. Ol man oli stap tingting se olsem wanem nao stori haos ya i save gohed blong stanap, from we long ples ya i gat plante etkwek. ?Wanem nao sikret blong hem? Ol man oli wokem bilding ya long wan fasin we i save stanap strong, mo i ben we i no brok taem i gat ol bigfala etkwek. Ol Kristin oli olsem stori haos ya. ?From wanem yumi talem olsem?

² Wan Kristin i mas stanap strong we i no gat wan samting i muvum hem, mo i rere blong jenisim tingting blong hem blong i save obei oltaem long ol loa blong Jehova, mo mekem samting we i laenap wetem tingting blong hem. (Ridim 1 Korin 15:58.) Hem i “rere blong obei” mo i holemstrong long Jehova. Mo tu, hem i mas “rere blong lego prapa tingting blong hem,” taem wan situesen i jenis. (Jem. 3:17) Wan Kristin we i gat ol fasin ya i lukaot gud blong i no strik tumas o kaen tumas. Long stadi ya bambae yumi tokbaot olsem wanem yumi save stanap strong we i no gat samting i muvum yumi. Mo tu, bambae yumi tokbaot faef rod we Setan i yusum blong mekem i had long yumi blong obei long Jehova, mo lanem olsem wanem blong stanap strong agensem ol samting.

3. ?Wanem ol loa we Jehova i givim we i stap long Ol Wok 15:28, 29?

³ Oltaem Bigfala Man Ya Blong Givim Loa, hemia Jehova, i stap givim loa long ol man blong hem we i isi blong oli kasemsave. (Aes. 33:22) Eksampol, hed kampani long faswan handred yia i tokbaot tri rod we ol Kristin oli save folem blong oli save stanap strong: (1) taem oli stap longwe long ol aedol mo oli wosipim  Jehova nomo, (2) taem oli obei long loa ya se blad i tabu, mo (3) taem oli obei long loa ya blong stap longwe long enikaen doti fasin blong seks. (Ridim Ol Wok 15:28, 29.) ?Tede, olsem wanem ol Kristin oli save obei long Jehova saed blong ol trifala samting ya?

4. ?Olsem wanem yumi soemaot se yumi wosipim Jehova nomo? (Revelesen 4:11)

⁴ Yumi no wosipim ol aedol, be yumi wosipim Jehova nomo. Jehova i talem long ol man Isrel se oli mas wosipim hem nomo. (Dut. 5:6-10) Mo long taem we Devel i traem Jisas, Jisas i talem klia se yumi mas wosipim Jehova nomo. (Mat. 4:8-10) From samting ya, yumi no wosipim ol aedol. Mo tu, yumi no wosipim ol man. Eksampol, yumi no tritim ol lida blong skul, ol man blong politik, ol man blong spot, ol akta, o ol man blong miusik, olsem se oli ol god. Yumi sapotem Jehova mo yumi wosipim hem nomo, from we hem nao i “mekem olgeta samting.”—Ridim Revelesen 4:11.

5. ?From wanem yumi obei long loa ya blong Jehova se laef mo blad i tabu?

⁵ Yumi obei long loa ya blong Jehova se laef mo blad i tabu. ?From wanem? From we Jehova i talem se laef i stap long blad, mo hemia i wan sas presen we hem i givim long yumi. (Lev. 17:14) Faswan taem we Jehova i letem ol man blong oli kakae ol animol, hem i talem long olgeta se oli no mas kakae blad. (Jen. 9:4) Mo hem i talem samting ya bakegen taem hem i givim Loa blong Moses long ol man Isrel. (Lev. 17:10) Mo tu, long faswan handred yia hem i pulum hed kampani blong talem long olgeta Kristin se oli “no mas kakae blad.” (Wok 15:28, 29) Tede, yumi gohed blong obei long loa ya, taem yumi wantem mekem desisen long saed blong ol medikol tritmen. b

6. ?Yumi mas mekem wanem blong laef blong yumi i laenap wetem tingting blong Jehova?

⁶ Yumi gat strong tingting blong obei long loa blong stap longwe long enikaen doti fasin blong seks. (Hib. 13:4) Aposol Pol i talem klia se yumi mas “kilimaot” ol haf blong bodi blong yumi, hemia i min se yumi mas mekem bes blong yumi blong sakemaot eni rong tingting. Yumi mas lukaot gud blong no lukluk o mekem eni samting we i save pulum yumi blong mekem enikaen doti fasin blong seks. (Kol. 3:5; Job 31:1) Taem wan samting i traem pulum yumi blong mekem i no stret, yumi mas kwik blong sakemaot eni tingting o aksen we i save spolem frensip blong yumi wetem God.

7. ?Yumi mas gat strong tingting blong mekem wanem, mo from wanem?

⁷ Jehova i wantem se yumi ‘obei long hem long fulhat blong yumi.’ (Rom 6:17) Oltaem ol samting we hem i askem yumi blong mekem, oli blong givhan long yumi mo yumi no save jenisim ol loa blong hem. (Aes. 48:17, 18; 1 Kor. 6:9, 10) Yumi gat strong tingting blong mekem Jehova i glad mo soemaot se yumi gat sem tingting olsem man ya blong raetem Sam we i se: “Mi mi mekem tingting blong mi i strong blong mi obei long ol rul blong yu, oltaem nomo, gogo kasem we mi ded.” (Sam 119:112) Nating se i olsem, Setan bambae i traehad blong mekem se yumi no moa stanap strong. ?Wanem sam long ol rod we hem i yusum?

8. ?Olsem wanem Setan i yusum fasin agens blong mekem yumi no moa stanap strong?

⁸ Fasin agens. Setan i yusum ol man blong mekem i nogud long yumi mo spolem filing blong yumi, blong mekem se yumi no moa holemstrong. Mak blong hem i blong “kakae” yumi, mo distroem frensip blong yumi wetem Jehova. (1 Pita 5:8) Long taem blong ol faswan  Kristin, ol man oli tok strong long olgeta, oli wipim olgeta, mo oli kilim olgeta from we oli gat strong tingting blong stanap strong. (Wok 5:27, 28, 40; 7:54-60) Tede, Setan i gohed yet blong yusum fasin agens. Yumi luk samting ya i stap hapen long Rasia mo long ol narafala kantri, we ol man blong agens oli stap mekem i nogud o atakem ol brata mo sista long plante defren rod.

9. Talem wan eksampol from wanem yumi mas lukaot gud long ol trabol we maet yumi no luksave.

⁹ Ol trabol we yumi no luksave. Setan i no yusum fasin agens nomo, be hem i yusum “ol giaman trik” tu. (Efes. 6:11) Traem tingbaot eksampol blong wan brata we nem blong Bob, we i slip long hospital from we bambae hem i gat wan bigfala operesen. Hem i talem long ol dokta se nomata wanem i hapen, bambae hem i neva akseptem blad transfusen. Dokta i agri mo i respektem desisen blong hem. Be long naet bifo we oli katem hem, afta we evri famle blong hem i gobak long haos, wan narafala dokta i kam luk Bob. Hem i talem long Bob se bambae oli no givim blad long hem, be bambae oli holemtaet sam i stap redi, sipos oli nidim. Maet dokta ya i ting se Bob bambae i jenisim tingting blong hem from we famle blong hem i no stap. Be Bob i stanap strong, hem i talem se bambae hem i no akseptem blad nating, nomata wanem i hapen.

10. ?From wanem i nogud blong yumi lesin long tingting blong ol man blong wol? (1 Korin 3:19, 20)

¹⁰ Tingting blong ol man blong wol. Sipos yumi gat tingting olsem ol man blong wol, hemia bambae i mekem yumi gowe long Jehova mo long ol loa blong hem. (Ridim 1 Korin 3:19, 20.) Plante taem “waes blong wol ya” i pulum ol man blong oli no obei long ol loa blong God. Sam Kristin long Pegamam mo Tuatira oli letem fasin blong ol man we oli stap mekem rabis fasin mo oli wosipim aedol i gat paoa long olgeta. Jisas i tok strong long tufala kongregesen ya from we oli stap mekem enikaen doti fasin blong seks. (Rev. 2:14, 20) Tede, ol man raonabaot long yumi oli save traem pulum yumi blong gat rong tingting olsem olgeta. Ol memba blong famle mo ol fren, maet oli save traem mekem yumi gat tingting ya se yumi strik tumas, mo oli traem pulum yumi blong brekem ol loa blong Jehova. Eksampol, maet oli save talem se i no impoten blong yumi mekem ol gudfala fasin, mo se ol rul blong Baebol oli olfala finis.

11. ?Yumi mas lukaot long wanem taem yumi stap stanap strong?

¹¹ Samtaem yumi save gat tingting ya se ol instraksen we Jehova i givim, oli no klia tumas. Mo samtaem yumi wantem “go bitim mak blong ol tok ya we oli raetem finis.” (1 Kor. 4:6) Hemia nao samting we ol lida blong skul long taem blong Jisas oli stap mekem. Oli stap ademap ol prapa rul blong olgeta long Loa we i stap finis, mo oli mekem i had blong ol man oli obei long ol rul ya. (Mat. 23:4) Jehova i givim ol klia daereksen long yumi tru long Baebol mo oganaesesen blong hem. Mo yumi no gat eni risen blong ademap sam moa samting antap long ol instraksen ya we hem i givim. (Prov. 3:5-7) Taswe, yumi no mas go bitim mak blong ol tok ya we oli raetem finis we i stap long Baebol, o mekem ol rul blong ol brata mo sista oli folem long saed blong ol samting we Baebol i no tokbaot.

12. ?Olsem wanem Setan i yusum “ol giaman tok we i blong nating nomo”?

¹² Ol giaman tok. Setan i yusum “ol giaman tok we i blong nating nomo” mo “ol tingting blong wol” blong lidim ol man oli go krangke mo mekem oli seraot. (Kol. 2:8) Long faswan handred yia, hem i yusum waes blong wol we i kamaot long tingting blong man nomo, ol tijing blong ol man Jiu we i no stanap long Baebol,  mo tijing ya se ol Kristin oli mas folem Loa blong Moses. Ol giaman tok ya oli pulum tingting blong ol man i gowe long Jehova we hem nao i Stamba blong waestok. Tede, Setan i yusum ol lida blong politik blong spredem ol giaman stori we oli no gat pruf mo ol giaman ripot tru long media mo sosol netwok. Mo i gat plante stori olsem long taem blong COVID-19 pandemik. c Ol Witnes blong Jehova we oli lesin long ol advaes we i kamaot long oganaesesen blong yumi oli harem gud from we oli no nid blong wari olsem ol man we oli stap lesin long ol giaman infomesen ya.—Mat. 24:45.

13. ?From wanem yumi mas lukaot gud long ol samting oli we save pulum tingting blong yumi?

¹³ Ol samting we oli save pulum tingting blong yumi. Oltaem yumi mas tingbaot “ol samting we oli moa impoten.” (Fil. 1:9, 10) Taem wan samting i pulum tingting blong yumi, hemia i save mekem se yumi westem plante taem mo paoa blong yumi. Sipos yumi letem ol samting blong laef, olsem kakae, dring, spel mo pleplei, mo wok oli kam moa impoten long laef blong yumi, hemia i save pulum tingting blong yumi i gowe long ol samting we oli moa impoten. (Luk 21:34, 35) Antap long hemia, evri dei yumi stap harem mo ridim plante nius blong ol protes mo ol bisnes blong politik. Yumi mas lukaot gud se ol nius ya oli no pulum tingting blong yumi, from sipos no bambae yumi stat blong tekem saed long tingting mo hat blong yumi. Setan i yusum olgeta rod ya we yumi tokbaot finis antap blong mekem se yumi no moa gat strong tingting blong mekem samting we i stret. Taswe naoia i gud yumi luk olsem wanem yumi save winim ol traem ya mo stanap strong.

14. ?Wanem wan samting we i save halpem yumi blong gohed blong stanap strong long saed blong Jehova?

¹⁴ Tingbaot from wanem yu givim laef blong yu long Jehova mo tekem baptaes. Yu mekem ol samting ya from yu wantem stap long saed blong Jehova. Traem tingbaot bakegen samting we i bin halpem yu blong trastem se yu faenem trutok. Yu stat blong save moa Jehova, yu respektem, mo yu lavem hem olsem Papa blong yu long heven. Bilif blong yu i kam strong moa, mo hemia i pulum yu blong tanem  tingting blong yu. Yu lego ol nogud fasin we yu stap mekem mo yu mekem laef blong yu i laenap wetem tingting blong hem. Yu harem gud moa from yu haremsave se God i fogivim yu. (Sam 32:1, 2) Yu joen long ol Kristin miting, mo yu stat tokbaot long ol narafala ol nambawan samting we yu bin lanem. From we yu bin givim laef blong yu mo yu baptaes, naoia yu stap wokbaot long rod blong laef, mo yu gat strong tingting blong gohed blong wokbaot long rod ya.—Mat. 7:13, 14.

15. ?Olsem wanem fasin ya blong stadi mo tingting dip, i save halpem yu?

¹⁵ Stadi mo tingting dip long Tok blong God. Wan tri i save stanap strong sipos rus blong hem i go dip long graon. Long sem fasin, yumi save stanap strong sipos yumi bilif strong moa long Tok blong God. Taem wan tri i gru, ol rus blong hem oli stap go dip moa long graon mo oli stap spred i go longwe moa. Taem yumi stadi mo tingting dip, yumi stap mekem bilif blong yumi i kam strong moa. Mo yumi trastem moa se ol rod blong Jehova oli beswan. (Kol. 2:6, 7) Tingbaot olsem wanem ol instraksen, ol advaes mo ol samting we Jehova i mekem blong protektem ol man blong hem long taem bifo, i halpem olgeta. Eksampol, Esikel i stap luklukgud taem wan enjel i stap mesarem tempol ya we hem i luk long wan vison. Vison ya i mekem Esikel i strong, be tu i tijim yumi blong obei long ol rul blong Jehova long saed blong tru wosip. d (Esik. 40:1-4; 43:10-12) Yumi tu, yumi save kasem gudfala samting taem yumi tekem taem blong stadi mo tingting dip long ol dip trutok blong Baebol.

16. From we hat blong Bob i stap strong, ?olsem wanem hemia i protektem hem? (Ol Sam 112:7)

¹⁶ Mekem hat blong yu i stap strong. King Deved i talem se bambae hem i gohed oltaem blong lavem Jehova taem hem i singsing se: “O God, hat blong mi i stap strong yet.” (Sam 57:7) Yumi save mekem hat blong yumi i stap strong tu taem yumi trastem Jehova fulwan. (Ridim Ol Sam 112:7.) Traem luk olsem wanem samting ya halpem Bob, we yumi tokbaot hem finis. Taem hem i harem se bambae oli kipim sam blad i stap sipos oli nidim, kwiktaem nomo hem i talem se sipos oli traem blong givim blad long hem, bambae hem i ronwe long hospital. Biaen, Bob i talem se: “Mi mi no wari  mo mi no gat tu tingting nating long wanem we i save hapen.”

17. ?Yumi save lanem wanem long ekspiriens blong Bob? (Mo tu, yu luk pija.)

¹⁷ Hat blong Bob i stap strong from we hem i mekem desisen longtaem finis, bifo we hem i go long hospital. Faswan samting se, hem i wantem tumas blong mekem Jehova i glad. Namba tu samting, hemia se hem i stadi gud long Baebol mo ol buk we oli tokbaot se laef mo blad i tabu. Nambatri samting, hem i sua fulwan se sipos hem i folem ol daereksen blong Jehova, bambae Jehova i blesem hem. Yumi tu, yumi save mekem hat blong yumi i stap strong nomata se yumi fesem wanem kaen traem.

18. ?Olsem wanem eksampol blong Barak i halpem yumi blong trastem Jehova? (Yu luk pija long fran pej.)

¹⁸ Trastem Jehova. Traem luk olsem wanem Barak i win, from we hem i trastem daereksen blong Jehova. Long taem ya, ol man Isrel oli no rere blong faet from oli no gat ol tul blong faet. Be Jehova i talem long Barak blong i go mo i faet agensem Siseraha we i komanda blong ami blong ol man Kenan, wetem bigfala blong hem we oli gat ol tul blong faet. (Jaj. 5:8) Woman profet ya Debora i talem long Barak blong i godaon long levelples blong i faet agensem Siseraha mo ol 900 jariot blong hem. I klia se bambae i had blong ol man Isrel oli faet agensem ol jariot ya we oli spid long levelples. Nating se i olsem, Barak i obei. Taem ol soldia blong Isrel oli aot long hil ya Taboro oli kamdaon, Jehova i mekem bigfala ren i foldaon. Nao ol jariot blong Siseraha oli stak long sofmad mo Jehova i mekem Barak i win. (Jaj. 4:1-7, 10, 13-16) Long sem fasin, Jehova bambae i mekem yumi win sipos yumi trastem hem, mo yumi folem ol daereksen we hem i givim long yumi tru long oganaesesen blong hem.—Dut. 31:6.

19. ?From wanem yu wantem gohed blong stanap strong?

¹⁹ From we yumi laef long rabis wol ya, bambae yumi gohed nomo blong faet blong yumi save stanap strong. (1 Tim. 6:11, 12; 2 Pita 3:17) I gud yumi gat strong tingting blong no letem fasin agens, ol trabol we yumi no luksave, tingting blong ol man blong wol, ol giaman tok, mo ol samting we oli save pulum tingting blong yumi, oli mekem yumi no moa stanap strong. (Efes. 4:14) Be yumi mas gohed blong stanap strong, lavem Jehova oltaem, mo obei long ol komanmen blong hem. Long semtaem yumi no mas mekem i strong long ol narafala. Long nekis stadi, bambae yumi tokbaot olsem wanem Jehova mo Jisas oli soemaot beswan eksampol long fasin ya blong no mekem i strong long ol narafala.