1. ?Wanem tingting blong yu long trutok?

 YUMI ol man blong Jehova, yumi laekem trutok we i stap long Baebol. Yumi bilif long ol tok we Baebol i talem. (Rom 10:17) Mo yumi bilif se Jehova i stanemap Kristin kongregesen olsem “wan bigfala pos, mo i stap blokem trutok ya blong i stap gud.” (1 Tim. 3:15) Mo tu, yumi glad blong stap aninit long “olgeta we oli stap lidim” yumi taem oli eksplenem klia ol trutok blong Baebol, mo givim ol gudfala advaes we i laenap wetem tingting blong God.—Hib. 13:17.

2. Folem Jemes 5:​19, ?wanem i save hapen long yumi afta we yumi lanem trutok?

² Afta we yumi akseptem trutok mo wok we oganaesesen blong Jehova i mekem blong lidim yumi, i gat sam samting yet we i save pulum yumi i gowe. (Ridim Jemes 5:19.) Setan i wantem tumas blong mekem se yumi no moa trastem Baebol o ol advaes we yumi kasem long oganaesesen blong Jehova.—Efes. 4:14.

3. ?From wanem yumi mas holemstrong long trutok? (Efesas 6:​13, 14)

³ Ridim Efesas 6:​13, 14. I no longtaem, Devel Setan bambae i yusum ol giaman tok blong lidim olgeta nesen oli agensem Jehova. (Rev. 16:​13, 14) Mo tu, Setan bambae i traehad moa blong lidim ol man blong Jehova oli go krangke. (Rev. 12:9) Taswe, i impoten we yumi trenem yumi wan blong luksave olsem wanem trutok i defren long ol giaman tok, mo obei  long trutok. (Rom 6:17; 1 Pita 1:22) !Hemia i impoten from we i save halpem yumi blong laef tru long bigfala trabol!

4. ?Bambae yumi tokbaot wanem long stadi ya?

⁴ Long stadi ya, bambae yumi tokbaot tu fasin we i save halpem yumi blong luksave trutok we i kamaot long Baebol, mo folem ol advaes we yumi kasem long oganaesesen blong Jehova. Biaen, bambae yumi tokbaot tri samting we yumi mas mekem blong yumi save gohed blong holemstrong long trutok.

OL FASIN WE I SAVE HALPEM YUMI BLONG LUKSAVE TRUTOK

5. ?Olsem wanem fasin blong fraet long Jehova i halpem yumi blong luksave trutok?

⁵ Fraet long Jehova. Taem yumi wokem fasin ya blong fraet long Jehova, bambae yumi lavem hem moa. Mo bambae yumi no wantem mekem wan samting we i save mekem Jehova i harem nogud from. Yumi wantem tumas blong luksave samting we i stret mo i rong, luksave trutok mo ol giaman tok, blong yumi save mekem Jehova i glad. (Prov. 2:​3-6; Hib. 5:14) Mo tu, yumi no wantem letem fasin ya blong fraet long man i kam strong moa long yumi, i bitim lav we yumi gat long Jehova. From we plante taem, samting we i mekem man i glad hemia i mekem Jehova i no glad.

6. ?From wanem ol ten jif blong Isrel oli twistim trutok?

⁶ Sipos yumi fraet moa long ol man i bitim we yumi fraet long Jehova, bambae yumi save gowe long trutok. Traem tingbaot eksampol blong ol 12 jif we oli go spae long kantri ya we Jehova i promes blong givim long ol man Isrel. Ten long olgeta, oli fraet tumas long ol man Kenan i bitim we oli lavem Jehova. Taswe, oli talem long ol narafala man Isrel se: “Yumi no naf blong faet agensem ol man ya, from we olgeta oli strong moa i bitim yumi.” (Nam. 13:​27-31) I tru se long lukluk blong man, ol man Kenan oli strong moa i bitim ol man Isrel. Be blong talem se ol man Isrel oli  no naf blong winim ol enemi, hemia i olsem we oli no moa tingbaot Jehova. Ol ten spae ya oli sud tingbaot nomo samting we Jehova i wantem se ol man Isrel oli mekem. Mo tu, oli sud tingting dip long ol samting we Jehova i bin mekem blong olgeta i no longtaem i pas. Olsem nao, bambae oli naf blong luksave se Jehova i gat moa paoa i bitim ol man Kenan. Be Josua mo Keleb, tufala i no olsem ol narafala spae ya. Tufala i wantem tumas blong mekem Jehova i glad, taswe tufala i talem long ol narafala man Isrel se: “Sipos Jehova i glad long yumi, bambae hem i tekem yumi go insaed long kantri ya mo bambae i givim long yumi.”—Nam. 14:​6-9.

7. ?Yumi mas mekem wanem blong fraet gud long Jehova? (Mo tu, yu luk pija.)

⁷ Blong fraet gud long Jehova, yumi mas tingbaot nomo blong mekem ol desisen we hem i glad long hem. (Sam 16:8) Taem yumi ridim ol stori long Baebol, i gud yumi askem yumi wan se: ‘?Sipos mi bin fesem trabol olsem, bambae mi mekem wanem?’ Eksampol, traem pijarem se yu stap lesin long ol ten jif blong Isrel we oli stap givim ol giaman ripot ya. ?Bambae yu bilivim ol giaman ripot ya mo yu fraet long ol man, o bambae yu lavem Jehova mo yu wantem mekem hem i glad? Ful nesen blong Isrel i no luksave trutok we Josua mo Keleb i talem. From samting ya, oli mestem janis ya blong go insaed long Promes Lan.—Nam. 14:​10, 22, 23.

8. ?Wanem fasin we yumi mas traehad blong wokem, mo from wanem?

⁸ Gat tingting daon. Jehova i soemaot trutok long olgeta we oli gat tingting daon. (Mat. 11:25) Yumi gat tingting daon taswe yumi akseptem blong lanem trutok. (Wok 8:​30, 31) Be, yumi mas lukaot gud blong yumi no kam praod. From we sipos yumi praod, yumi save gat tingting ya se ol tingting blong yumi oli stret gud folem ol stamba trutok blong Baebol mo ol advaes blong oganaesesen.

9. ?Yumi save mekem wanem blong yumi gohed blong gat tingting daon?

⁹ Blong gat tingting daon oltaem, yumi mas tingbaot se yumi nating nomo taem yumi skelem yumi wetem Jehova. (Sam 8:​3, 4) Mo tu, yumi save prea blong Jehova i halpem yumi blong gat tingting daon mo letem hem i tijim yumi. Jehova bambae i halpem yumi blong tinghae moa long ol samting we hem i talem long Baebol mo oganaesesen blong hem i bitim prapa tingting blong yumi. Taem yu ridim Baebol, i gud yu makem olsem wanem Jehova i lavem ol man we oli gat tingting daon, be i no laekem nating man we praod, i tinghae long hem wan, mo tingting blong hem i go antap tumas. Mo i gud yu gohed blong gat tingting daon sipos yu kasem wan spesel wok we i mekem ol narafala oli luk se yu impoten.

SAMTING WE YUMI MAS MEKEM BLONG HOLEMSTRONG LONG TRUTOK

10. ?Jehova i yusum hu blong givim advaes mo talem samting we ol man blong hem oli mas mekem?

¹⁰ Gohed blong trastem ol tok we i kam long oganaesesen blong Jehova. Long Isrel bifo, Jehova i yusum Moses mo biaen Josua, blong talem ol samting we ol man blong Hem oli mas mekem. (Jos. 1:​16, 17) Ol man Isrel oli kasem blesing taem oli tingbaot se tufala i stap wok long bihaf blong Jehova. Sam handred yia biaen, taem Kristin kongregesen i stat, Jehova i yusum ol 12 aposol blong lidim ol man blong hem. (Wok 8:​14, 15) Biaen, grup ya i kam bigwan nao ol elda long Jerusalem tu oli joenem olgeta. Taem ol Kristin oli folem gud ol tok blong ol man ya, “ol kongregesen i stap kam strong moa, mo evri dei namba blong olgeta i stap kam antap moa.”  (Wok 16:​4, 5) Tede tu, taem yumi folem gud ol advaes we i kam long oganaesesen blong Jehova, yumi save kasem blesing. ?Be Jehova bambae i harem olsem wanem sipos yumi no wantem obei long olgeta we hem i putumap? Blong ansa long kwestin ya, bambae yumi tokbaot samting we i hapen long ol man Isrel taem oli stap go long Promes Lan.

11. ?Wanem i hapen long ol man Isrel we oli tok agensem Moses? (Mo tu, yu luk pija.)

¹¹ Taem ol man Isrel oli stap wokbaot i go long Promes Lan, olgeta we ol man oli save gud olgeta, oli stap tok agensem Moses mo wok we Jehova i givim long hem, oli se: “Ful asembli ya [i no Moses nomo] i tabu, olgeta evriwan, mo Jehova i stap long medel blong olgeta.” (Nam. 16:​1-3) I tru se long lukluk blong God, “ful asembli ya” i tabu. Be hem i jusum Moses blong i lidim ol man blong Hem. (Nam. 16:28) Taswe, taem ol rebel ya oli stap tok agensem Moses, i olsem we oli stap tok agensem Jehova stret. Oli no tingbaot samting we Jehova i wantem, be oli tingbaot nomo samting we olgeta wan oli wantem, hemia blong kasem paoa mo haenem. Taswe, Jehova i kilim i ded ol lida blong ol rebel ya wetem plante handred taosen man we oli sapotem olgeta. (Nam. 16:​30-35, 41, 49) Tede tu, Jehova i no glad long ol man we oli no respektem ol tok we i kam long oganaesesen blong hem.

12. ?From wanem yumi save gohed blong trastem oganaesesen blong Jehova?

¹² Yumi save gohed blong trastem oganaesesen blong Jehova. Taem Hed Kampani i luksave se yumi mas jenisim sam save we yumi gat long wan trutok blong Baebol, o long fasin blong mekem wok blong Kingdom, oli no fraet blong mekem ol jenis ya. (Prov. 4:18) Oli mekem olsem from we oli wantem mekem Jehova i glad. Mo tu, oli meksua se ol desisen blong olgeta i stanap long Tok blong God we i stret gud, mo i soemaot rod long olgeta man blong Jehova oli folem.

13. ?Wanem ya ‘ol gudfala tok ya we oli stret gud mo oli soemaot rod,’ mo yumi mas mekem wanem wetem?

 ¹³ ‘Gohed blong holem ol gudfala tok ya we oli stret gud mo oli soemaot rod.’ (2 Tim. 1:13) ‘Ol gudfala tok ya we oli stret gud mo oli soemaot rod’ i minim ol Kristin tijing we i stap long Baebol. (Jon 17:17) Ol tijing ya hemia nao samting we yumi bilif long olgeta. Oganaesesen blong Jehova i tijim yumi blong folem gud ol tok ya. Mo taem yumi mekem olsem, bambae hem i blesem yumi.

14. ?Wanem i mekem se sam Kristin oli no moa holemtaet ‘ol gudfala tok ya we oli stret gud mo oli soemaot rod’?

¹⁴ ?Wanem i save hapen sipos yumi no moa folem ‘ol gudfala tok ya we oli stret gud mo oli soemaot rod’? Tingbaot wan eksampol. Long taem blong ol fas Kristin, i luk olsem se i gat wan toktok i stap goraon se dei blong Jehova i stap finis. Maet i gat wan leta we samfala oli ting se aposol Pol nao i raetem, taswe oli bilivim tok ya. Sam Kristin long Tesalonaeka oli no tekem taem blong jekem sipos toktok ya i tru o nogat. Taswe oli bilivim mo oli stat blong spredem giaman tok ya. Sipos oli bin tingbaot ol samting we Pol i talem long olgeta taem hem i stap yet wetem olgeta, bambae oli no letem giaman tok ya i trikim olgeta. (2 Tes. 2:​1-5) Pol i givim advaes long olgeta se oli no mas bilivim evri samting we oli harem. Mo blong halpem olgeta long fiuja, hem i finisim seken leta blong hem wetem tok ya se: “Mi Pol mi talem halo long yufala, mo mi nomo mi raetem tok ya. Tok ya i soemaot we leta ya i blong mi stret. Hemia fasin blong mi blong raet.”—2 Tes. 3:17.

15. ?Yumi save mekem wanem blong yumi no bilivim ol giaman tok we i luk olsem se oli tru? Talem wan eksampol. (Mo tu, yu luk ol pija.)

¹⁵ ?Yumi lanem wanem long ol tok we Pol i talem long ol Kristin long Tesalonaeka? Taem yumi harem wan samting we i no laenap wetem wanem we yumi lanem long Baebol, o taem i gat wan toktok i stap goraon, yumi mas gat fasin luksave. Long Soviet Yunion bifo, ol enemi blong yumi oli stap pasem wan leta i goraon we i luk olsem se i kam long wol hedkwota. Leta ya i leftemap tingting blong sam  brata blong oli mekemap wan smol grup we i no joen wetem oganaesesen blong Jehova. Mo i luk olsem se leta ya i tru. Be ol gudfala brata ya oli no letem leta ya i trikim olgeta. Oli luksave se mesej we i stap long leta ya i no laenap wetem samting we oli bin lanem. Tede, samtaem ol enemi blong trutok oli yusum ol teknoloji blong traem mekem tingting blong yumi i hafhaf, o yumi seraot. Taswe, i no gud yumi “hariap blong seksek,” be i gud yumi traem faenemaot se samting we yumi harem o yumi ridim i laenap wetem trutok we yumi lanem finis.—2 Tes. 2:2; 1 Jon 4:1.

16. Folem Rom 16:​17, 18, ?yumi mas mekem wanem sipos samfala oli stap spredem ol giaman tok?

¹⁶ Gohed blong joen gud wetem olgeta we oli holemstrong long Jehova. God i wantem se yumi joen gud long wosip blong yumi, be yumi save mekem olsem nomo sipos yumi holemstrong long trutok. Eni man we i stap spredem ol giaman toktok hem i save mekem kongregesen i seraot. Taswe, Jehova i givim woning long yumi blong “stap longwe” long ol man olsem. Sipos yumi no mekem olsem, yumi save gowe long trutok.—Ridim Rom 16:​17, 18.

17. ?Wanem i save kamaot taem yumi luksave trutok mo yumi holemstrong long hem?

¹⁷ Taem yumi luksave trutok mo yumi holemstrong long hem, bilif blong yumi bambae i stap strong mo yumi stap klosap long Jehova. (Efes. 4:​15, 16) Mo tu, bambae yumi no foldaon long ol giaman tijing mo giaman tok blong Setan. Mo Jehova bambae i gohed blong lukaot gud long yumi long bigfala trabol. Taswe, i gud yumi holemstrong long trutok mo ‘God ya blong pis bambae i stap wetem yumi.’—Fil. 4:​8, 9.