Hemia wan save we i jenis. ?From wanem save ya i jenis?

Bifo long yia 607 bifo Kraes, Jehova i soemaot wan vison long Esikel. Vison ya i soemaot samting we bambae i hapen long Jerusalem bifo we i lus. Long vison ya, Esikel i luk plante nogud samting we oli stap hapen. Biaen, hem i luk sikis man we oli karem “ol samting blong faet blong olgeta.” Mo tu, hem i luk wan man blong raetemdaon ol samting we hem “i werem gudfala klos we oli wokem long linen” mo hem i “gat wan paos we i gat ol samting blong raet i stap long hem.” (Esikel 8:6-12; 9:2, 3) Jehova i talem long man ya blong pastru long taon mo “putum mak long fored blong olgeta man we oli trabol, oli stap harem nogud from ol samting nogud ya we ol narafala man ya oli stap mekem insaed long taon ya.” Mo biaen, Jehova i talem long ol sikis man ya we oli karem ol samting blong faet, blong oli go long taon ya mo kilim olgeta we oli no gat mak. (Esikel 9:4-7) ?Yumi lanem wanem long vison ya, mo hu ya man blong raetemdaon ol samting?

Esikel i luk vison ya long yia 612 bifo Kraes. Fastaem we profet tok ya i kamtru, hemia faef yia afta we Esikel i luk vison ya. Long taem ya, Jehova i letem ol soldia blong Babilon oli spolem Jerusalem. Jehova i yusum ol man Babilon blong panisim ol man blong hem we oli no obei long hem. (Jeremaea 25:9, 15-18) ?Be olsem wanem long ol man Jiu we oli no lego God mo oli no glad long ol rabis samting we  oli stap hapen long Jerusalem? Jehova i lukaot gud long olgeta blong oli laef.

Long vison ya, Esikel i no putum wan prapa mak stret long hed blong ol man, mo hem i no joen long faet blong spolem Jerusalem. Be ol enjel nao oli lidim faet ya blong spolem Jerusalem. Taswe, profet tok ya i givhan long yumi blong luk samting we i stap hapen long heven. Jehova i talem long ol enjel blong oli spolem ol nogud man, mo oli mas meksua se ol gudfala man oli laef. *

Mo tu, profet tok ya bambae i kamtru long fiuja. Bifo, yumi talem se man ya blong raetemdaon ol samting, i pija blong ol tabu Kristin we oli laef yet long wol. Mo yumi talem se olgeta we oli gat mak, hemia olgeta we oli glad blong lesin long gud nius. Be i no longtaem i pas, ol save oli kam moa klia taswe yumi mas jenisim save we yumi gat blong eksplenem profet tok ya. Long Matiu 25:31-33, yumi lanem se Jisas nao i man ya we bambae i jajem ol man. Hem bambae i mekem samting ya long taem blong bigfala trabol. Long taem ya, olgeta we Jisas i jajem olgeta olsem ol sipsip bambae oli laef, be olgeta we hem i jajem olgeta olsem ol nani bambae oli ded.

Taswe, ?yumi lanem wanem long vison blong Esikel? Yumi lanem faef samting:

1. Bifo we Jerusalem i lus, Esikel, Jeremaea mo Aesea oli wonem ol man long samting we bambae i hapen long taon ya. Olgeta oli olsem ol wajman. Tede, Jehova i yusum wan smol grup blong ol tabu Kristin blong tijim ol man blong hem, mo blong wonem olgeta bifo we bigfala trabol i kam. Mo tu, olgeta man blong God oli mas wok strong blong wonem ol man bifo we bigfala trabol i kam.—Matiu 24:45-47.

2. Esikel i no putum mak long olgeta we oli laef long taem blong hem. Tede tu, ol man blong Jehova oli no putum mak long olgeta we bambae oli laef. Be oli prij long ol man mo oli wonem olgeta long samting we bambae i hapen long fiuja. Ol enjel oli stap givhan long wok blong prij, we i stap gohed long fulwol.—Revelesen 14:6.

3. Olgeta we bambae oli laef long fiuja, bambae oli no gat wan prapa mak long fored blong hed blong olgeta, olsem olgeta long taem blong Esikel. ?Ol man oli mas mekem wanem blong oli laef long taem blong bigfala trabol? Taem oli harem woning, oli mas obei mo folem ol fasin blong Jisas, oli mas givim laef blong olgeta long God, mo oli mas givhan long ol brata blong Kraes blong prij. (Matiu 25:35-40) Nao long taem blong bigfala trabol, bambae oli kasem mak, we i min se Jisas i jusumaot olgeta blong oli laef.

4. Man ya blong raetemdaon ol samting, hem i pija blong Jisas. Long taem blong bigfala trabol, Jisas bambae i putum mak long ol man blong hem taem hem i jajem olgeta olsem ol sipsip. Biaen, bambae oli kasem laef we i no save finis long wol ya.—Matiu 25:34, 46. *

5. Tede, ol sikis man we oli karem ol samting blong faet, oli pija blong ol enjel we bambae oli folem Jisas blong go faet. Bambae i no longtaem oli spolem ol rabis man blong olgeta kantri long wol.—Esikel 10:2, 6, 7; Revelesen 19:11-21.

Ol samting we yumi lanem long vison ya, oli givhan long yumi blong gat strong tingting se Jehova bambae i no save spolem ol gudfala man, taem hem i spolem ol rabis man. (2 Pita 2:9; 3:9) Mo tu, yumi lanem se naoia wok blong prij i impoten tumas. !Evri man oli mas harem woning bifo we en i kam!—Matiu 24:14.