Haykanush i wan pablisa long Amenia. Hem i faenem wan paspot, mo insaed long paspot ya i gat sam kad blong bang mo wan bigfala mane. Haykanush i talemaot long man blong hem, we hem tu i wan pablisa we i no baptaes yet.

Nating se tufala i gat bigfala problem long mane, be tufala i wantem givimbak mane ya long man we i lusum. Tufala i luk adres we i stap long paspot ya, mo tufala i karem i gobak long man ya. Man ya mo famle blong hem, oli sapraes tumas long samting we tufala i mekem. Tufala i talem long olgeta se tufala i stap stadi Baebol, mo tufala i lanem se man i no mas giaman mo stil. Mo tufala i tokbaot ol Witnes blong Jehova long olgeta, mo tufala i givim sam magasin.

Famle ya i wantem givim mane long Haykanush, be hem i no wantem karem. Long nekis dei, waef blong man ya i go luk tufala, blong talem tangkiu. Hem i wantem tumas se Haykanush i mas tekem wan ring we hem i givim, we oli wokem long daemon.

Plante man tu bambae oli sapraes long fasin blong Haykanush mo man blong hem we tufala i no save giaman mo stil. ?Olsem wanem? ?Jehova tu i sapraes? ?Wanem tingting blong Jehova long fasin ya blong tufala? ?Gudfala fasin we tufala i gat i blong nating nomo?

Ol ansa blong ol kwestin ya oli no had. ?From wanem? From we ol man blong Jehova oli save se taem oli folem ol fasin blong hem, hemia i gud moa i bitim ol daemon, gol mo ol narafala samting. Ol samting we Jehova i tinghae long hem oli defren olgeta long tingting blong plante man. (Aesea 55:8, 9) Mo ol man blong Jehova oli luk se i moa impoten we oli traehad blong folem ol fasin blong hem.

Yumi save samting ya, taem yumi luk olsem wanem Baebol i tokbaot fasin ya blong kasem save samting mo waes fasin. Ol Proveb 3:13-15 i talem se: “Man we i stap kasem save, mo we i stap kam waes, hem bambae i save harem gud, from we fasin ya i gud moa, i winim we hem i kasem silva, no gol. Waestok i gud moa, i winim ol gudfala ston ya we praes blong olgeta i antap tumas.” Taswe i klia nomo se, Jehova i luk ol gudfala fasin se oli sas moa i bitim ol samting blong bodi.

?Be olsem wanem long fasin ya blong tok tru oltaem?

Jehova i “God ya we i no save giaman.” (Taetas 1:2) Mo hem i pulum aposol Pol blong talem long ol Kristin bifo se: “Mifala i harem se i no gat wan samting nating we i mekem mifala i harem nogud, tingting blong mifala i klin gud nomo. Mo mifala i wantem tumas we oltaem mifala i stap mekem i stret nomo. Plis, oltaem yufala i mas prea from mifala.”—Hibrus 13:18.

Jisas Kraes i soemaot eksampol long fasin ya blong tok tru. Traem tingbaot taem ya we Hae Pris ya Kaeafas i talem long Jisas se: “Hae God i laef, i stap we i stap, mo long nem blong hem, yu yu mas talem trutok. !Yu talem long mifala! ?Yu yu Mesaea, yu Pikinini blong God, no nogat?” Jisas i talem se hem nao i Mesaea, nating se hem i save se ol man Jiu bambae oli agensem hem mo kilim hem i ded from.—Matiu 26:63-67.

?Olsem wanem long yumi? Sipos yumi wantem wan wok no wan samting, ?bambae yumi giaman? ?No bambae yumi tok tru?

Tede, i no isi blong tok tru from we plante man ‘oli tingbaot olgeta nomo, mo oli wantem mane tumas.’ (2 Timoti 3:2) Plante man oli ting se i oraet nomo blong stil, trikim narafala mo mekem ol kruked fasin from we laef i had. Tingting ya i stap kam antap, ale ol man oli ting se i oraet nomo blong giaman mo stil. Sam Kristin oli gat tingting ya tu, ale oli mekem i no stret blong winim mane, nao kongregesen i mas stretem olgeta from.—1 Timoti 3:8; Taetas 1:7.

Be plante Kristin oli folem fasin blong Jisas. Oli luksave se i impoten blong gat ol fasin blong God, i bitim we oli gat ol sas samting. Taswe, ol yangfala Kristin oli no giaman blong oli kasem gudfala mak long skul. (Ol Proveb 20:23) I no oltaem we bambae yumi kasem wan presen olsem Haykanush, taem yumi no giaman. Be taem yumi no giaman, yumi  mekem samting we God i wantem mo bambae tingting blong yumi i stap klin. Hemia i mekem yumi harem gud tumas.

Eksampol blong Gagik i soemaot samting ya. Hem i talem se: “Bifo we mi kam wan brata, mi wok long wan bigfala kampani olsem wan maneja. Bos blong mi i no wantem pem takis, nao hem i stap mekem ol giaman ripot blong soemaot se mane we mifala i kasem i smol nomo. Ale, taem man blong tekem takis i kam, mi pem hem blong i haedem nogud fasin we kampani i stap mekem. Taswe, ol man oli save se mi mi wan man blong giaman. Be taem mi save trutok, mi lego rabis fasin ya. Mo tu, mi lego wok blong mi nating se oli pem gud mi. Ale, mi statem wan bisnes blong mi mo mi rejistarem nem blong kampani blong mi. Mo stat long taem ya, mi pem evri takis blong mi.”—2 Korin 8:21.

Gagik i talem se: “Mane we mi winim i smol moa long mane we mi kasem fastaem, taswe i no isi blong pem evri samting we famle i nidim. Be hemia i nating, from we naoia mi mi glad moa. Tingting blong mi i klin long fes blong Jehova, mo mi soemaot wan gudfala eksampol long tufala boe blong mi. Mo tu, mi mekem sam wok long kongregesen. Naoia, ol man we mi mekem bisnes wetem olgeta mo ol man blong takis, oli save se mi mi wan man we mi no moa stap giaman.”

Jehova i lavem olgeta we oli wosipim hem mo oli stap folem ol gudfala fasin blong hem, olsem fasin ya blong no giaman. (Taetas 2:10) Mo hem i promes blong givhan long yumi. Hem i pulum King Deved blong talem se: “Naoia mi mi olfala, mi stap longtaem, be neva mi luk wan gudfala man we Hae God i lego hem, no ol pikinini blong man olsem we oli stap asaskem kakae olbaot.”—Ol Sam 37:25.

Stori blong Rut i soemaot se Jehova i save givhan long yumi. Rut i lukaot gud oltaem long Naomi, we i mama blong man blong hem. Nating se Naomi i kam olfala, be Rut i no lego hem. Rut i muv i go long Isrel blong hem i save wosipim trufala God. (Rut 1:16, 17) Rut i wok had mo i wok stret folem Loa blong Jehova long saed blong ol puaman, taem hem i pikimap ol bale we ol man blong wok oli lego i stap. Jehova i neva lego Rut mo Naomi, olsem we hem i mekem long Deved. (Rut 2:2-18) Hem i givim ol samting we Rut i nidim, mo tu hem i jusumaot Rut blong hem i kam wan famle long laen blong King Deved mo blong Mesaea.—Rut 4:13-17; Matiu 1:5, 16.

Maet i had long sam man blong Jehova blong kasem mane blong pem ol samting we oli nidim. Nating se i olsem, olgeta oli wok had mo oli no traem blong stil mo giaman. Olsemia, oli soemaot se ol gudfala fasin blong God, oli sas moa long olgeta i bitim ol samting blong bodi.—Ol Proveb 12:24; Efesas 4:28.

Ol Kristin long fulwol oli soemaot se oli trastem Jehova olsem Rut. Oli trastem promes blong Hem we i talem se: “Bambae mi mi no save livim yu yu stap yu wan. Bambae mi mi no save lego yu samtaem.” (Hibrus 13:5) Oltaem, Jehova i soemaot se hem i save givhan long olgeta we oli no giaman mo stil. Oltaem hem i givim ol samting we ol man blong hem oli nidim.—Matiu 6:33.

I tru, ol man oli tinghae long daemon mo ol narafala samting blong bodi. Be yumi sua se Papa blong yumi long heven, i tinghae moa long fasin blong yumi blong no giaman mo ol narafala gudfala fasin blong yumi, i bitim ol sas ston.