1, 2. ?From wanem ‘God i lavem Daniel tumas’? ?Olsem wanem yumi save folem fasin blong Daniel blong obei long God oltaem?

TAEM ol man Jiu oli go kalabus long Babilon, oli luk we plante man oli stap wosipim ol aedol mo ol rabis spirit. Be, ol man we oli holemstrong long God olsem Daniel mo trifala fren blong hem, oli no wantem se ol man Babilon oli jenisim fasin blong olgeta. (Daniel 1:6, 8, 12; 3:16-18) Olgeta oli wantem wosipim Jehova nomo. Nating se Daniel i stap plante yia long ples ya, be wan enjel i talem long hem se: “God i lavem yu tumas.”—Daniel 10:11, 19.

² Long taem bifo, taem wan man i wantem wokem wan graonpot, hem i mas mekem graon i sofsof, nao i isi blong hem i save mekem eni samting we hem i wantem. Tede, ol man we oli wosipim Jehova oli save se hem nao i bigfala King blong heven mo wol, mo hem i gat raet blong jenisim fasin blong ol man blong olgeta kantri. (Ridim Jeremaea 18:6.) Nating se i olsem, hem i no fosem yumi blong jenis. Be, hem i wantem se yumi letem hem i jenisim fasin blong yumi. Long stadi ya,  bambae yumi lanem olsem wanem yumi save stap olsem graon we i sofsof. Bambae yumi tokbaot trifala kwestin ya: (1) ?Olsem wanem yumi save blokem ol nogud fasin we oli save mekem se yumi no moa obei long God, nao yumi kam olsem graon we i strong? (2) ?Olsem wanem yumi save wokem ol gudfala fasin we oli save givhan long yumi blong obei long God oltaem, mo stap olsem graon we i sofsof? (3) ?Olsem wanem ol papa mo mama oli save wok wetem God blong jenisim fasin blong ol pikinini blong olgeta?

3. ?Wanem ol fasin we oli save mekem se yumi no moa obei long God? Yu tokbaot wan stori.

³ Ol Proveb 4:23 i talem se: “Yu mas lukaot gud blong mekem se ol samting we yu stap tingbaot oltaem, oli stret, from we laef blong yu i stap soemaot tingting blong yu.” Yumi mas lukaot gud long hat blong yumi oltaem. Taswe, yumi mas sakemaot ol fasin olsem flas, fasin we yumi gohed blong mekem sin mo fasin blong no bilif. Sipos yumi no lukaot gud, ol fasin ya oli save mekem se yumi no moa obei mo yumi kam stronghed. (Daniel 5:1, 20; Hibrus 3:13, 18, 19) Hemia nao samting we i hapen long King Usia. (Ridim 2 Kronikel 26:3-5, 16-21.) Bifo, Usia i obei long God mo i fren gud wetem hem, taswe Jehova i blesem hem. Be taem rul blong hem “i stap kam strong moa olsem, samting ya i mekem hem i kam praod tumas.” Nao hem i wantem go bonem insens long haos blong God, be wok ya i blong ol pris nomo. Taem ol pris oli tok long hem, hem i kros tumas long olgeta. Nao Jehova i panisim hem, mo hem i kasem leprosi mo sik ya i stap long hem kasem we hem i ded.—Ol Proveb 16:18.

4, 5. ?Wanem i save hapen sipos yumi flas? Yu tokbaot wan eksampol.

⁴ Sipos yumi flas, bambae yumi ting se yumi gud moa long ol narafala. Mo tu, bambae yumi no wantem folem ol advaes we yumi kasem. (Ol Proveb 29:1; Rom 12:3) Hemia nao samting we i hapen long Jim we i wan elda. Hem i no glad long wan desisen we ol narafala elda oli mekem. Jim i talem se: “Mi talem long ol brata ya se oli no gat lav nating, mo mi aot long miting ya.” Samwe long sikis manis biaen, hem i go long wan narafala kongregesen, be hem i no kam wan elda. Hem i harem nogud tumas, nao hem i stop blong mekem wok blong Jehova blong 10 yia. Hem i talem se: “Mi mi flas, mo mi blemem Jehova from samting we i hapen. Blong plante yia, ol brata oli kam visitim mi blong traem givhan long mi, be mi no wantem lesin long olgeta.”

⁵ Jim i talem se: “Oltaem mi tingbaot se ol narafala oli rong.” Eksampol blong hem i soemaot se sipos yumi flas, yumi save mekem eskius from mastik blong yumi. Sipos samting olsem i hapen, hemia i soemaot se yumi no moa stap olsem graon we i sofsof. (Jeremaea 17:9) ?I gat wan taem we wan brata no sista i mekem yu yu kros? ?Yu yu harem nogud from we yu lusum wan wok long kongregesen? ?Yu yu mekem wanem taem wan samting olsem i hapen? ?Yu yu kam flas? ?No, yu luksave se i moa impoten we yu gat pis wetem ol brata, mo gohed blong holemstrong long Jehova?—Ridim Ol Sam 119:165; Kolosi 3:13.

6. ?Wanem i save hapen sipos yumi gohed blong mekem sin?

 ⁶ Taem wan man i gohed blong mekem sin mo i haedem, hemia i save mekem se i had blong hem i obei long ol advaes blong Baebol. Nao, bambae i isi nomo blong hem i gohed blong mekem sin. Wan brata i talem se sloslo hem i no moa harem nogud from rabis fasin we hem i stap mekem. (Prija 8:11) Wan narafala brata we i stap lukluk rabis pija blong man wetem woman, i talem se: “Sloslo mi fraet blong go storian wetem ol elda.” Rabis fasin blong hem i mekem se hem i no moa fren gud wetem Jehova. Biaen, ol elda oli kasemsave problem we hem i gat, nao oli givhan long hem. I tru, yumi evriwan i sinman. Be sipos yumi no glad long olgeta we oli givim advaes, mo yumi no askem God blong i fogivim yumi mo i givhan long yumi, bambae yumi no moa wantem obei long God.

7, 8. (1) ?Ol man Isrel oli soemaot olsem wanem se oli no moa bilif long Jehova? (2) ?Stori blong olgeta i tijim yumi long wanem?

⁷ Ol man Isrel oli luk plante merikel taem Jehova i tekemaot olgeta long Ijip. Be, oli no moa wantem obei long Jehova taem oli stap go klosap long Promes Lan. ?From wanem? From we oli no moa bilif long God. Oli no moa trastem Jehova, oli fraet mo oli stap tok agens long Moses. Mo tu, oli wantem gobak long Ijip. Jehova i harem nogud tumas mo hem i talem se: “?Olgeta ya bambae oli stap tanem baksaed long mi gogo kasem wetaem?” (Namba 14:1-4, 11; Ol Sam 78:40, 41) Ol man Isrel oli ded long draeples, from we oli no obei long Jehova mo oli no bilif long hem.

⁸ Tede, yumi stap go klosap long niufala wol mo i gat plante samting we oli save traem bilif blong yumi. Taswe, yumi mas mekem bilif blong yumi i strong. ?Yumi save mekem samting ya olsem wanem? I gud yumi wanwan i tingting gud long ol tok blong Jisas long Matiu 6:33, mo yumi tingbaot ol kwestin ya: ‘?Ol mak mo ol desisen blong mi oli soemaot se mi trastem ol tok blong Jisas? ?Bambae mi lego ol miting mo wok blong prij blong mi wok from moa mane? ?Bambae mi mekem wanem sipos bos blong mi i talem se mi mas spenem moa taem long wok? ?Bambae mi letem wol ya i jenisim fasin blong mi mo maet i mekem se mi no moa mekem wok blong Jehova?’

9. ?From wanem yumi mas “traem luklukgud” sipos yumi gat strong bilif no nogat? ?Yumi save mekem samting ya olsem wanem?

⁹ Baebol i givim advaes long saed blong ol rabis fren, olgeta we kongregesen i putumaot mo samting we yumi mekem blong spel mo pleplei. Be sipos yumi no stap folem ol advaes ya, bambae yumi no moa obei long God. ?Bambae yu mekem wanem sipos yu gat fasin ya? I impoten we yu mas jekemap bilif blong yu, kwiktaem. Baebol i talem se: “I gud yufala nomo i traem luklukgud long laef blong yufala, yufala nomo i jajem yufala. Yufala i mas traem faenemaot se yufala i stap holem yet fasin blong bilif, no  yufala i no moa holem.” (2 Korin 13:5) Taem yu jekemap bilif blong yu mo yu faenemaot se yu mas stretem sam samting, i gud yu mekem mo yu mas yusum Baebol blong lidim yu oltaem.

10. ?Wanem i save givhan long yumi blong kam olsem graon we i sofsof long han blong Jehova?

¹⁰ God i givim Baebol, Kristin kongregesen, mo wok blong prij, blong givhan long yumi blong yumi kam olsem graon we i sofsof. Taem yumi ridim Baebol mo tingting dip long hem evri dei, hemia bambae i givhan long yumi blong letem Jehova i jenisim yumi. Jehova i talem long ol king blong Isrel blong oli raetemdaon Loa blong God mo ridim evri dei. (Dutronome 17:18, 19) Ol aposol oli save se i impoten blong ridim Baebol mo tingting dip long hem, from we i save givhan long olgeta long wok blong prij. Oli yusum ol Hibru haf blong Baebol plante taem long ol leta blong olgeta. Mo tu taem oli prij, oli leftemap tingting blong ol man blong oli ridim Baebol. (Ol Wok 17:11) Tede tu, yumi luk se i impoten blong yumi ridim Baebol mo tingting dip long hem evri dei. (1 Timoti 4:15) Hemia bambae i givhan long yumi blong gat tingting daon oltaem, mo letem Jehova i jenisim yumi.

11, 12. ?Olsem wanem Jehova i yusum Kristin kongregesen blong jenisim yumi? Yu tokbaot wan stori.

¹¹ Jehova i save samting we yumi wanwan  i nidim mo hem i yusum Kristin kongregesen blong jenisim yumi. Jim, we yumi tokbaot finis, i stat blong jenisim fasin blong hem taem wan elda i go blong givhan long hem. Jim i talem se: “Elda ya i neva tok strong long mi from samting we mi mekem. Be hem i leftemap tingting blong mi oltaem, mo hem i soemaot se hem i wantem givhan long mi.” Samwe long tri manis biaen, elda ya i invaetem Jim blong go long miting, mo ol brata mo sista oli welkamem gud hem. Fasin blong olgeta, i givhan long hem blong jenisim tingting blong hem. Ale, hem i stat blong luksave se ol tingting blong hem oli no impoten. Ol elda mo woman blong Jim, oli leftemap tingting blong hem mo sloslo hem i mekem wok blong Jehova bakegen. Mo tu, Jim i harem gud taem hem i ridim tufala haf ya, “I No Fol Blong Jehova” mo “Holemstrong Long Wok Blong Jehova,” we oli stap long Wajtaoa blong 15 Novemba 1992.

¹² Biaen, Jim i kam wan elda bakegen. Stat long taem ya, hem i givhan long ol narafala brata we oli gat sem problem olsem hem, mo blong mekem bilif blong olgeta i strong. Hem i ting se hem i bin fren gud wetem Jehova, be nogat. Hem i harem nogud from we hem i flas, nao hem i tingbaot nomo mastik blong ol narafala, be hem i no tingbaot ol samting we oli moa impoten.—1 Korin 10:12.

13. ?Wok blong prij i givhan long yumi blong gat wanem fasin? ?Wanem ol gudfala samting we oli save kamaot from?

¹³ Wok blong prij i givhan long yumi blong gat ol gudfala fasin. Taem yumi prij, yumi mas soemaot se yumi gat tingting daon mo ol narafala fasin we oli olsem ol frut blong tabu spirit. (Galesia 5:22, 23) I gud yu tingbaot ol gudfala fasin we yu lanem long wok blong prij. Taem yumi folem fasin blong Kraes, bambae ol man oli glad blong lesin mo maet i save jenisim tingting we oli gat long yumi. Traem tingbaot tu Witnes long Ostrelia. Tufala i go prij long wan woman, be hem i kros tumas mo i tok strong long tufala. Be, tufala i respektem hem mo tufala i lesin long hem. Biaen, woman ya i raetem wan leta i go long branj ofis, blong talem sore. Hem i talem se: “Mi mi wan krangke woman stret, blong traem ronemaot tufala man we oli kam blong tokbaot Baebol.” Stori ya i soemaot se gudfala samting i save kamaot taem yumi gat tingting daon long wok blong prij. I tru se wok blong prij i save givhan long ol narafala, be i save givhan long yumi tu blong wokem ol gudfala fasin.

14. ?Papa mo mama i mas mekem wanem sipos tufala i wantem tijimgud pikinini blong tufala?

¹⁴ Plante pikinini oli gat tingting daon mo oli wantem tumas blong lanem samting.  (Matiu 18:1-4) Taswe i waes blong ol papa mo mama oli givhan long pikinini blong olgeta blong oli laekem trutok taem oli smol yet. (2 Timoti 3:14, 15) Papa mo mama i mas laekem trutok fastaem mo folem samting we Baebol i talem, blong mekem gud wok blong tufala. Sipos tufala i mekem olsem, bambae i isi blong pikinini i laekem trutok. Mo taem tufala i stretem hem bambae hem i kasem save se tufala i lavem hem mo Jehova tu i lavem hem.

15, 16. ?Olsem wanem ol papa mo mama oli soemaot se oli trastem Jehova taem kongregesen i putumaot pikinini blong olgeta?

¹⁵ Nating se ol papa mo mama oli tijimgud ol pikinini, be samtaem ol pikinini oli lego Jehova no kongregesen i putumaot olgeta. Samting ya i save mekem famle i harem nogud bigwan. Wan sista blong Saot Afrika i talem se: “Taem kongregesen i putumaot brata blong mi, i olsem we hem i ded. !Mi harem nogud tumas!” ?Be sista ya mo papa mo mama blong hem oli mekem wanem? Olgeta oli folem ol advaes blong Baebol. (Ridim 1 Korin 5:11, 13.) Papa mo mama ya i save se taem tufala obei long ol advaes blong Jehova, hemia bambae i givhan long olgeta. Mo tufala i luksave se taem kongregesen i putumaot wan Kristin, hemia i soemaot se Jehova i lavem ol man blong hem. Taswe, tufala i storian nomo wetem boe blong tufala, taem oli nidim blong tokbaot sam samting blong famle.

¹⁶ ?Boe ya i harem olsem wanem? Biaen, hem i talem se: “Samting we famle blong mi i mekem, i no blong spolem mi, be oli mekem olsem blong obei long Jehova mo ogenaesesen blong hem.” Hem i talem tu se: “Taem yu askem strong long Jehova blong i givhan long yu mo i fogivim yu, bambae yu luksave se yu nidim hem bigwan.” Famle ya i glad bigwan taem yangfala ya i kambak long Jehova. I tru, taem yumi obei oltaem long God, bambae yumi glad tumas.—Ol Proveb 3:5, 6; 28:26.

17. ?From wanem i gud we yumi letem Jehova i lidim yumi? ?Wanem blesing bambae yumi kasem?

¹⁷ Profet Aesea i talemaot finis se bambae ol man Jiu long Babilon oli tanem tingting blong olgeta from ol sin blong olgeta, mo oli talem se: “Hae God, yu yu Papa blong mifala. Mifala i olsem graon, mo yu yu man blong wokem graonpot. Yu yu mekem mifala evriwan long han blong yu nomo.” Mo bambae oli krae strong i go long Jehova se: “!Plis yu no holem ol sin blong mifala oli stap olwe long fes blong yu! !Mifala i man blong yu! !Plis yu sore long mifala!” (Aesea 64:8, 9) Taem yumi gat tingting daon mo yumi obei long Jehova oltaem, bambae hem i lavem yumi tumas olsem Daniel. Jehova bambae i gohed blong yusum Baebol, tabu spirit blong hem, mo ogenaesesen blong hem blong jenisim fasin blong yumi. Nao long fiuja, bambae yumi kam “ol pikinini blong hem” we yumi stret gud olgeta.—Rom 8:21.