1. ?From wanem Jehova i nambawan Man Blong Wokem Graonpot?

LONG Novemba 2010, long Inglan, wan man i wantem pemaot wan olfala graonpot blong Jaena long wan praes we i klosap long 7 bilian vatu. Yumi sapraes blong luk se wan man blong wokem graonpot i yusum graon nomo, blong wokem wan naesfala samting we i sas tumas. Be i no gat wan man long wol ya we i olsem Jehova, we hem i nambawan Man Blong Wokem Graonpot. Baebol i talem se Jehova i “tekem graon,” mo i mekem wan man long hem we i stret gud olgeta. (Jenesis 2:7) Man ya hem i wan “pikinini blong God” mo God i mekem hem blong hem i naf blong folem ol fasin blong God.—Luk 3:38.

2, 3. ?Wanem fasin we ol man Isrel oli gat? ?Olsem wanem yumi save folem fasin blong olgeta?

² Taem Adam i rebel agensem God, hem i no moa stap olsem wan pikinini blong hem. Be plante man we oli kamaot biaen long Adam, oli wantem stap aninit long rul blong Jehova. (Hibrus 12:1) Taem oli obei long God, oli soemaot se oli wantem we hem i Papa blong olgeta, mo hem i jenisim olgeta olsem man blong wokem graonpot, be i no Setan. (Jon 8:44) Fasin blong olgeta blong  holemstrong long God, i mekem yumi tingbaot ol man Isrel we oli tanem tingting blong olgeta from sin blong olgeta, mo oli talem se: “Hae God, yu yu Papa blong mifala. Mifala i olsem graon, mo yu yu man blong wokem graonpot. Yu yu mekem mifala evriwan long han blong yu nomo.”—Aesea 64:8.

³ Ol man blong Jehova tede tu, oli traehad blong gat tingting daon mo obei long hem. Oli glad tumas se oli save singaot Papa long Jehova mo oli wantem se hem i jenisim olgeta. ?Olsem wanem? ?Yumi rere blong kam olsem graon we i sofsof we God i save yusum blong mekem i kam wan spesel graonpot? ?Yumi luksave se Jehova i stap gohed yet blong jenisim ol fasin blong ol brata mo sista blong oli kamgud moa? Blong givhan long yumi blong gat stret tingting, bambae yumi luk olsem wanem Jehova i jusum ol man we hem i wantem jenisim, from wanem hem i jenisim olgeta mo samting we hem i yusum blong jenisim olgeta.

4. ?Olsem wanem Jehova i jusum olgeta we hem i wantem jenisim? Yu tokbaot sam eksampol.

⁴ Fasin blong Jehova blong lukluk man i no olsem fasin blong man. Jehova i stap lukluk hat blong man blong luk se hem i wanem kaen man. (Ridim 1 Samuel 16:7.) Jehova i soemaot samting ya, taem hem i stanemap Kristin kongregesen. Hem i pulum plante man we ol man oli ting nating long olgeta, blong oli kam long hem mo pikinini blong hem. (Jon 6:44) Wan long ol man ya hemia Sol we hem i wan Farisi, mo hem i ‘stap tok agens long God, mo i stap mekem i nogud long God, mo i stap tok nogud long God blong spolem hem.’ (1 Timoti 1:13) Be Jehova i luk hat blong Sol, mo i no luk hem olsem wan graon we i blong sakem nomo. (Ol Proveb 17:3) Be, Jehova i luk se Sol i save jenis i kam wan man we hem i “jusumaot” blong prij “long ol man we oli no laen blong Isrel, mo long ol king, mo long ol laen blong Isrel tu.” (Ol Wok 9:15) Mo tu, Jehova i jusum sam narafala we hem i save jenisim olgeta oli kam olsem ol gudfala graonpot we i “blong yusum long spesel taem.” Hemia olgeta we oli stap dring bitim mak, oli stap mekem rabis fasin blong man wetem woman, mo oli stap stil. (Rom 9:21; 1 Korin 6:9-11) Taem olgeta oli gohed blong stadi long Baebol, mo mekem bilif blong olgeta i kam strong moa, bambae oli letem Jehova i jenisim fasin blong olgeta.

5, 6. From we yumi trastem Jehova olsem man blong wokem graonpot, ?hemia i mekem yumi gat wanem tingting long (1) ol man we yumi prij long olgeta? (2) ol brata mo sista blong yumi?

⁵ Yumi bilif strong se Jehova i save jusum mo pulum ol man we oli wantem save trutok. Taswe, yumi no mas jajem ol man we yumi prij long olgeta, mo olgeta insaed long kongregesen. Yu traem tingbaot fasin we Michael i mekem taem ol Witnes oli prij long hem. Hem i talem se: “Taem mi luk tufala, mi tanemraon nomo mo mi no wantem save long tufala. !Mi mi no gat respek nating! Afta, mi mitim wan famle we oli gat gudfala fasin mo hemia i pulum tingting blong mi bigwan. Be biaen mi sek se olgeta oli ol Witnes blong Jehova. Fasin blong olgeta i mekem se mi jenisim tingting  we mi gat long ol Witnes. Smoltaem afta, mi luksave se tingting we mi gat i no stret from we mi stap bilif nomo long ol samting we ol man oli stap talem.” Michael i wantem save moa mo hem i glad blong stadi. Biaen hem i baptaes mo i mekem wok blong Jehova fultaem.

⁶ Sipos yumi luksave Jehova olsem man blong wokem graonpot, bambae yumi luk ol brata mo sista olsem we Jehova i luk olgeta. Bambae yumi luk se oli stap traehad yet blong kam gud moa long fasin blong olgeta. Hemia nao tingting we Jehova i gat long olgeta. Hem i savegud olgeta, mo hem i save se sin we i stap long olgeta, i blong smoltaem nomo. Mo tu, hem i save se bambae oli gat gudfala fasin sipos oli jenis. (Ol Sam 130:3) Yumi save folem fasin ya blong Jehova, sipos yumi tu yumi gat gudfala tingting long ol brata mo sista blong yumi. Mo tu, yumi save wok wetem Jehova, blong givhan long olgeta blong oli gohed gud. (1 Tesalonaeka 5:14, 15) Ol elda long kongregesen oli mas soemaot gudfala eksampol long fasin ya.—Efesas 4:8, 11-13.

7. ?From wanem yu glad taem Jehova i stretem yu?

⁷ Maet sam man oli talem se: ‘Mi mi no laekem nating taem papa mo mama blong mi i stretem mi, be taem mi gat pikinini mi luksave se fasin ya i impoten tumas.’ Taem yumi stap kam bigwan, yumi luk se fasin ya blong stretem narafala i wan gudfala samting, from we i soemaot se yumi lavem hem. (Ridim Hibrus 12:5, 6, 11.) Jehova i lavem yumi olsem ol pikinini blong hem, taswe hem i stap stretem yumi. Hem i wantem se yumi kam waes mo yumi glad, mo yumi lavem hem olsem Papa blong yumi. (Ol Proveb 23:15) Hem i no wantem luk we yumi harem nogud, mo yumi ded we yumi no tanem tingting blong yumi from ol sin blong yumi.—Efesas 2:2, 3.

8, 9. ?Tede, Jehova i givim wanem blong givhan long yumi? ?Long fiuja, Jehova bambae i givhan long yumi olsem wanem?

⁸ Bifo we yumi kam long trutok, maet yumi gat plante nogud fasin. Be Jehova i stretem yumi, nao yumi jenisim ol fasin blong yumi mo yumi gat ol gudfala fasin. (Aesea 11:6-8; Kolosi 3:9, 10) Tede, Jehova i givim ol brata mo sista blong givhan long yumi blong yumi save jenisim ol fasin blong yumi. Taswe, taem yumi joen wetem ol brata mo sista, yumi harem gud mo yumi sef nating se wol ya i fulap long rabis fasin. Samfala oli gruap long ol famle we oli no soemaot lav long olgeta. Be taem oli joen wetem ol brata mo sista, oli harem gud moa. (Jon 13:35) Mo yumi lanem blong soemaot lav tu long ol narafala. Be samting we i moa impoten se, yumi save Jehova mo yumi haremsave se hem i lavem yumi olsem wan papa.—Jemes 4:8.

⁹ Long niufala wol, bambae yumi harem gud fulwan blong joen wetem ol brata mo sista. Mo tu, bambae yumi harem gud blong laef long paradaes aninit long Kingdom blong God. Long taem ya, bambae Jehova i gohed blong stretem yumi mo tijim yumi long wan fasin we i gud moa. (Aesea 11:9) Mo Jehova bambae i mekem tingting mo bodi blong yumi i kam stret gud olgeta. Hemia bambae i  mekem se i isi long yumi blong kasemsave long ol loa blong hem, mo yumi obei fulwan long olgeta. Taswe, i gud we yumi gohed blong letem Jehova i stretem yumi mo yumi soemaot se yumi tinghae long lav we hem i soem long yumi.—Ol Proveb 3:11, 12.

10. ?Olsem wanem Jisas i soemaot gudfala fasin blong Jehova, taem hem i stretem narafala?

¹⁰ Wan man blong wokem graonpot i savegud graon we hem i yusum. Long sem fasin, Jehova i savegud yumi. Hem i savegud ol slak fasin blong yumi, ol samting we yumi no naf blong mekem mo ol gudfala wok we yumi mekem finis. Mo taem hem i stretem yumi, hem i tingbaot ol samting ya. (Ridim Ol Sam 103:10-14.) Yumi save kasemsave olsem wanem Jehova i stretem yumi, taem yumi luk olsem wanem Jisas i stretem ol aposol blong hem taem oli mestem. Samtaem ol aposol oli stap raorao se hu long olgeta i hae moa. Sipos yu stap long taem ya, ?bambae yu gat wanem tingting long fasin blong olgeta? Maet yu ting se oli no olsem graon we i sofsof. Be, Jisas i no gat tingting olsem. Hem i kaen mo i gat longfala tingting taem hem i givim advaes long olgeta. Mo hem i save se ol aposol blong hem oli save jenisim fasin blong olgeta, sipos oli lesin long hem mo oli gat tingting daon olsem hem. (Mak 9:33-37; 10:37, 41-45; Luk 22:24-27) Afta we Jisas i laef bakegen mo ol aposol oli kasem tabu spirit, oli no moa raorao. Be, oli putum tingting blong olgeta i stap strong long wok we Jisas i givim long olgeta.—Ol Wok 5:42.

11. ?Deved i soemaot olsem wanem se hem i olsem graon we i sofsof? ?Yumi save folem fasin blong hem olsem wanem?

¹¹ Tede, Jehova i yusum Baebol, tabu spirit blong hem mo kongregesen blong stretem yumi. ?Olsem wanem Baebol i save jenisim fasin blong yumi? Yumi mas ridim, tingting dip long hem mo yumi askem long Jehova blong i givhan long yumi blong mekem samting we yumi lanem i wok long laef blong yumi. King Deved i talem se: “Oltaem, taem we mi ledaon long bed, mi stap tingbaot yu. I stat long sapa gogo kasem long moning mi mi stap tingting long yu.” (Ol Sam 63:6) Mo tu hem i talem se: “Mi mi stap presem Hae God, from we oltaem hem i stap lidim mi, mo long naet, tingting blong mi i stap toktok long mi, i stap soemaot rod long mi.” (Ol Sam 16:7) Deved i tingting dip long advaes blong Jehova mo hem i letem advaes ya oli tajem hat blong hem, mo i jenisim ol tingting blong hem, nating se i had long hem. (2 Samuel 12:1-13) Deved i soemaot wan nambawan eksampol blong gat tingting daon mo obei long Jehova oltaem. Taswe i gud yu tingbaot ol kwestin ya: ‘Taem mi ridim Baebol, ?mi tingting dip long hem mo mi letem i tajem hat blong mi? ?Olsem wanem mi save spenem moa taem blong tingting dip?’—Ol Sam 1:2, 3.

12, 13. ?Olsem wanem Jehova i stretem yumi taem hem i yusum, (1) tabu spirit blong hem? (2) kongregesen?

¹² Tabu spirit i save jenisim fasin blong yumi long plante rod. Eksampol, tabu spirit i save givhan long yumi blong folem fasin blong Jisas mo blong wokem ol gudfala fasin. (Galesia 5:22, 23) Wan long ol fasin ya hemia lav. Yumi lavem God mo yumi wantem obei long hem mo letem hem i jenisim yumi, from we yumi save se ol loa blong hem oli save givhan long yumi. Mo tu, tabu spirit i save givim paoa long yumi blong no letem ol fasin blong wol oli spolem yumi. (Efesas 2:2) Taem aposol Pol i yangfala, ol tija blong ol man Jiu oli pulum hem blong folem bilif blong olgeta. Be tabu spirit i givhan long hem blong jenis. Hem i talem se: ‘Mi save mekem evri samting, long  paoa blong God ya we i stap mekem mi mi strong.’ (Filipae 4:13) Taswe, i gud yumi mekem olsem Pol blong askem long Jehova blong i givim tabu spirit long yumi, mo yumi save se bambae hem i ansa long prea blong yumi.—Ol Sam 10:17.

¹³ Mo tu, Jehova i yusum kongregesen, mo ol elda blong stretem yumi wanwan. Eksampol, sipos ol elda oli luk se yumi gat wan slak fasin, bambae oli wantem givhan long yumi. Ol advaes we oli givim, oli no folem prapa tingting blong olgeta nomo. (Galesia 6:1) Be, oli prea long Jehova blong hem i givim save mo waes long olgeta. Mo oli mekem risej long Baebol mo ol buk mo magasin blong yumi, blong faenem sam gudfala advaes blong givhan long yumi. Maet ol elda oli luk se yu nidim sam advaes long saed blong ol klos we yu werem. Nao sipos oli kam luk yu, i gud yu tingbaot se advaes we yu kasem i soemaot se God i lavem yu. Mo taem yu folem advaes ya, yu soemaot se yu yu olsem graon we i sofsof we Jehova i save jenisim, mo bambae yu harem gud.

14. ?Olsem wanem Jehova i respektem raet we yumi gat blong jusum samting we yumi wantem?

¹⁴ Sipos yumi kasem save olsem wanem Jehova i stap stretem yumi, hemia bambae i givhan long yumi blong fren gud wetem ol brata mo sista. Mo tu, bambae yumi gat gudfala tingting long ol man we yumi prij long olgeta, mo hemia i minim tu ol Baebol stadi blong yumi. Long taem bifo, taem wan man i wantem wokem wan graonpot, hem i mas klinim gud graon blong hem fastaem, blong karemaot ol ston mo ol narafala samting. Jehova, we i Bigfala Man Blong Wokem Graonpot, hem i save givhan long ol man we oli wantem se hem i jenisim fasin blong olgeta. Hem i no fosem olgeta blong oli jenis, be hem i soemaot long olgeta ol loa blong hem we oli klingud. Nao olgeta oli mas jusum sipos oli wantem jenisim fasin blong olgeta no nogat.

15, 16. ?Olsem wanem ol Baebol stadi oli save soemaot se oli wantem we Jehova i jenisim olgeta? Yu talem wan stori.

 ¹⁵ Yu traem tingbaot Tessie, wan sista long Ostrelia. Taem hem i stap stadi yet, i isi nomo blong hem i kasem save long samting we Baebol i talem. Be, hem i no putum wan mak, mo hem i no go long ol miting. Sista we i stadi wetem hem i prea long Jehova mo i mekem desisen se bambae hem i stopem stadi blong Tessie. Afta, i gat wan samting i hapen we i mekem sista ya i sapraes tumas. Long laswan taem we bambae tufala i stadi, Tessie i talem long sista ya from wanem hem i no save gohed gud. Hem i talem se hem i harem olsem se hem i gat tu fes from we hem i laekem blong plei kad blong winim mane. Mo naoia, hem i mekem desisen se bambae hem i stop.

¹⁶ Biaen, Tessie i stat blong go long ol miting mo i stat blong soemaot ol Kristin fasin long laef blong hem, nating se sam long ol fren blong hem oli jikim hem. Mo biaen, Tessie i baptaes mo i kam wan fultaem paenia nating se hem i mas lukaot long ol pikinini blong hem. Stori ya i soemaot se taem wan Baebol stadi i stat blong jenisim laef blong hem, God bambae i pulum hem i kam klosap long hem, mo bambae i jenisim hem i kam wan naesfala graonpot we i sas tumas.

17. (1) ?Yu yu harem olsem wanem taem yu save se Jehova, we i olsem man blong wokem graonpot, i stap jenisim fasin blong yu? (2) ?Wanem ol kwestin we bambae yumi tokbaot long nekis stadi?

¹⁷ Tede, sam man oli stap wokem yet ol naesfala graonpot wetem han blong olgeta nomo. Long sem fasin, Jehova i gat longfala tingting taem hem i yusum Tok blong hem blong jenisim yumi. Mo tu, hem i stap lukluk samting we bambae yumi mekem taem yumi kasem ol advaes ya. (Ridim Ol Sam 32:8.) ?Yu yu haremsave se Jehova i kea long yu? ?Yu yu luksave olsem wanem Jehova i stap jenisim fasin blong yu? Sipos yes, ?wanem ol gudfala fasin we bambae oli givhan long yu blong kam olsem graon we i sofsof? ?Wanem ol fasin we yu mas blokem blong mekem se yu no kam olsem graon we i strong? ?Mo olsem wanem ol papa mo mama oli save wok wetem Jehova blong jenisim fasin blong ol pikinini blong olgeta? Long nekis stadi bambae yumi ansa long ol kwestin ya.