1, 2. (1) Talem tri gudgudfala samting we Jehova i givim. (2) ?Bambae yumi tokbaot wanem?

JEHOVA i rij we i rij, evri samting i blong hem. I no gat wan narafala man long heven no long wol we i rij olsem hem. (1 Kronikel 29:11, 12) Be Jehova i glad tu blong givim presen long narafala. !Yumi talem tangkiu tumas long hem from we hem i givim plante gudgudfala samting long yumi! ?Wanem ol gudgudfala samting ya? (1) Kingdom blong hem, (2) wok blong prij, mo (3) ol trutok long Baebol. Be sipos yumi no lukaot gud, yumi save fogetem se ol samting ya oli sas we oli sas. Oltaem yumi mas tingbaot from wanem oli gud tumas, mo yumi mas wok had blong laekem olgeta moa. ?From wanem? From we Jisas i talem se: “Long weples ol gudgudfala samting blong yufala oli stap long hem, ples ya nao hat blong yufala tu i stap long hem.”—Luk 12:34.

² I gud yumi tokbaot olsem wanem blong laekem moa, Kingdom, wok blong prij, mo trutok. Long semtaem, yu  save tingbaot wanem we yu yu save mekem blong laekem moa, ol sas samting ya we God i givim.

3. ?Man ya long stori blong Jisas i mekem wanem blong pem wan perel? (Yu luk pija long stat blong stadi.)

³ Ridim Matiu 13:45, 46. Jisas i talem stori blong wan man we i stap pem mo salem ol perel. Wan dei, man ya i faenem wan perel we i sas we i sas moa i bitim ol narafala perel we hem i bin luk. Hem i wantem tumas perel ya, ale hem i salem evri samting we hem i gat, blong i save pem. Long tingting blong man ya, perel ya i wan samting we i gud we i gud tumas.

4. ?Yumi rere blong mekem wanem from Kingdom blong God?

⁴ ?Yumi lanem wanem? Yumi lanem se Kingdom blong God i olsem sas perel ya. Sipos yumi laekem Kingdom olsem man ya i laekem perel ya, bambae yumi rere blong lego evri samting, blong obei long Kingdom mo blong stap aninit long rul blong hem oltaem. (Ridim Mak 10:28-30.) Bambae yumi tokbaot tu man we tufala i mekem olsem.

5. ?Sakias i rere blong mekem wanem from Kingdom?

⁵ Sakias i wan man blong tekem mane blong takis, mo hem i rij we i rij from we hem i stap stilim ol man. (Luk 19:1-9) Be wan dei, Sakias i harem ol tok blong Kingdom we Jisas i stap talemaot. Hem i laekem tumas ol tok ya, ale hem i wantem jenisim fasin blong hem. Nao hem i talem se: “Bambae mi givim haf blong olting blong mi long ol puaman. Mo ol man we mi bin giaman long olgeta blong stilim sam samting blong olgeta, bambae mi givimbak ol samting ya fo taem antap bakegen.” Nao Sakias i givimbak mane we hem i stilim, mo i lego fasin ya blong wantem plante samting tumas.

6. ?Wanem ol bigfala jenis we wan woman i mekem, mo from wanem?

⁶ Sam yia i pas finis, wan woman we i mekem rabis fasin ya blong slip wetem woman bakegen, i harem tok blong Kingdom. Mo tu, woman ya i presiden blong wan grup blong sapotem raet blong man i slip wetem man mo woman i slip wetem woman. Taem hem i gohed blong stadi Baebol, hem i luksave se Kingdom i wan samting we i sas tumas. Mo hem i lanem tu se hem i mas mekem sam bigfala jenis long laef blong hem. (1 Korin 6:9, 10) Ale, hem i lego grup ya we hem i presiden blong hem, mo i lego ol rabis fasin blong hem tu. Long 2009, hem i baptaes, mo wan yia biaen, hem i kam wan fultaem paenia. Hem i lavem Jehova tumas, taswe hem i rere blong mekem ol bigfala jenis ya, i bitim we hem i gohed blong mekem ol rabis fasin we hem nomo i wantem.—Mak 12:29, 30.

7. ?Yumi mas lukaot gud long wanem samting?

⁷ Plante long yumi oli mekem ol bigfala jenis finis blong stap aninit long  rul blong Kingdom. (Rom 12:2) Be wok blong yumi i no finis yet. Yumi mas lukaot gud se yumi no laekem tumas ol sas samting blong wol mo ol rabis fasin blong hem. Yumi no wantem se wan samting olsem i spolem lav we yumi gat long Kingdom. (Ol Proveb 4:23; Matiu 5:27-29) Blong holemtaet lav ya, Jehova i givim wan narafala gudfala samting long yumi.

8. (1) ?From wanem Pol i talem se wok blong prij i olsem “ol gudgudfala samting” insaed long graonpot? (2) ?Pol i soemaot olsem wanem se hem i laekem wok blong prij?

⁸ Jisas i givim wok long yumi blong prij mo blong tijim ol man long gud nius blong Kingdom. (Matiu 28:19, 20) Aposol Pol i talem se wok ya i olsem ol gudgudfala samting we man i fulumap long wan graonpot. (2 Korin 4:7; 1 Timoti 1:12) From we yumi sinman, yumi olsem ol graonpot nomo. Be tok we yumi talemaot i olsem ol gudgudfala samting insaed long graonpot. Hemia from we tok ya i save givim laef blong olwe long yumi mo long olgeta we oli lesin long yumi. Taswe, Pol i talem se: “Mi mi mekem evri samting from gud nius, blong mi save talemaot long ol narafala man.” (1 Korin 9:23) Pol i wok had blong tijim ol man long Kingdom blong God. (Ridim Rom 1:14, 15; 2 Timoti 4:2.) Hem i laekem tumas gud nius ya, taswe, hem i gohed nomo blong prij, nating se ol man oli agensem hem mo oli mekem i nogud long hem. (1 Tesalonaeka 2:2) ?Yumi soemaot olsem wanem se yumi laekem wok blong prij olsem Pol?

9. ?Olsem wanem yumi soemaot se yumi laekem tumas wok blong prij?

⁹ Pol i soemaot se hem i laekem tumas wok blong prij, taem hem i tekem evri janis blong prij. Tede, yumi folem eksampol blong Pol mo ol Kristin bifo. Yumi talemaot gud nius long ol haos wanwan, long rod, long taon, mo long ol narafala ples we i gat man. (Ol Wok 5:42; 20:20) Yumi lukaot rod blong prij moa. Yumi save mekem wok blong haftaem paenia no fultaem paenia, no lanem wan narafala lanwis. Maet yumi muv i go long wan narafala kantri, no long wan narafala ples long kantri blong yumi nomo.—Ol Wok 16:9, 10.

10. ?Wanem blesing we Aerin i kasem taem hem i wok had blong talemaot gud nius?

¹⁰ Long Amerika, wan sista we i no mared, nem blong hem Aerin, i wantem talemaot gud nius long ol man Rasia. Ale long 1993, hem i joenem wan grup long New York we oli toktok lanwis blong Rasia. I gat 20 pablisa nomo long grup ya. Afta we 20 yia i pas, Aerin i no save gud yet lanwis blong Rasia. Be Jehova i givhan long hem mo ol narafala pablisa, blong oli prij long lanwis ya. Tede, i gat sikis kongregesen long New York we oli toktok lanwis  blong Rasia. Aerin i stadi wetem plante man, mo 15 long olgeta oli baptaes finis. Sam long olgeta oli wok long Betel, sam oli paenia, mo sam oli elda. Aerin i talem se: “I gat plante samting we mi save mekem long laef blong mi, be i no gat wan long olgeta we i save givim moa glad long mi, i bitim wok ya we mi jusum.” !Aerin i laekem tumas wok blong prij!

11. ?Wanem i save kamaot sipos yumi gohed blong prij, nating se ol man oli agensem yumi?

¹¹ Sipos yumi laekem tumas wok blong prij olsem Pol, bambae yumi gohed blong prij nating se ol man oli agensem yumi. (Ol Wok 14:19-22) Long ol yia 1930 kasem yia 1944, ol brata long Amerika oli kasem plante trabol, be oli gohed nomo blong prij. Taem ol haeman oli traem stopem olgeta, ol brata oli putum olgeta long kot mo oli winim plante kot kes. Long 1943, Brata Knorr i tokbaot wan kot kes we oli winim long Saprim Kot. Hem i talem se, sipos ol brata oli no bin gohed blong prij, oli no save win long kot olsem. Hem i talem tu se, nating se ol man oli agensem olgeta, be oli no naf blong stopem olgeta from we long fulwol ol brata oli gohed blong prij. Long plante narafala kantri tu, ol brata oli win long kot. Tru ya, sipos yumi laekem wok blong prij, bambae yumi no stop taem ol man oli agensem yumi.

12. ?Yu yu gat strong tingting blong mekem wanem?

¹² Sipos yumi tingbaot wok blong prij olsem wan samting we i sas we i sas, bambae yumi no tingbaot nomo hamas aoa yumi raetem long ripot blong yumi. Bambae yumi mekem bes blong yumi blong ‘finisim wok ya blong talemaot gud nius long olgeta ples.’ (Ol Wok 20:24; 2 Timoti 4:5) ?Be bambae yumi tijim narafala long wanem? God i givim wan narafala sas samting long yumi.

13, 14. ?Wanem “ol gudgudfala samting” long Matiu 13:52 we yumi hivimap? ?Olsem wanem yumi hivimap?

¹³ Jehova i Stamba blong trutok. Taswe, namba tri sas samting we hem i givim long yumi, hemia ol trutok we yumi lanem. (2 Samuel 7:28, NW; Jon 17:17) Hem i wantem serem ol trutok ya wetem yumi, from we hem i wan Papa we i laekem blong givim presen. Yumi lanem ol trutok ya taem yumi ridim Baebol mo ol buk blong yumi, mo taem yumi go long ol miting evri wik mo ol asembli. Yumi gohed blong lanem ol trutok ya, gogo yumi mekem olsem Jisas i talem. Yumi ‘hivimap ol gudgudfala samting i stap,’ hemia “ol niuwan wetem ol olfala wan.” (Ridim Matiu 13:52) Jehova bambae i givhan long yumi, blong yumi “hivimap” plante gudgudfala samting sipos yumi traehad blong faenem ol trutok ya, olsem we yumi traehad blong faenem wan sas samting we i haed. (Ridim Ol Proveb 2:4-7.) ?Olsem wanem yumi faenem ol trutok ya?

¹⁴ Sipos yumi stadi Baebol mo mekem risej long ol buk blong yumi, bambae yumi faenem ol ‘niufala’ trutok, hemia ol trutok we yumi no save bifo. (Josua 1:8, 9; Ol Sam 1:2, 3) Fas Wajtaoa we oli printim long Julae 1879, i talem se trutok i olsem wan flaoa we ol rabis gras i kavremap. Blong faenem flaoa ya, wan man i mas lukaotem. Mo taem hem i faenem, hem i no stop, be hem i gohed nomo gogo i faenem plante moa flaoa. Long sem fasin, yumi no mas stop taem yumi faenem wan trutok long Baebol. Be yumi mas gohed nomo blong traem faenem plante moa trutok.

15. ?From wanem sam trutok oli “olfala”? ?Weswan long ol trutok ya we yu yu laekem moa?

¹⁵ Taem yumi stat blong stadi Baebol, yumi lanem sam nambawan trutok. Ol trutok ya oli “olfala” from we yumi lanem olgeta bifo finis. ?Wanem sam long ol olfala trutok ya? Yumi lanem se Jehova i mekem yumi, mo hem i gat wan stamba tingting we bambae i kamtru long ol man. Yumi lanem tu se God i sanem Pikinini blong hem i kam long wol, blong i ded olsem wan ransom blong tekemaot yumi long sin mo ded. Mo yumi lanem se Kingdom blong God bambae i finisim ol trabol we i mekem yumi safa, mo yumi save laef olwe long wol ya we bambae i gat pis mo glad long hem.—Jon 3:16; Revelesen 4:11; 21:3, 4.

16. Taem i gat wan jenis long save blong yumi long Baebol, ?yumi mas mekem wanem?

¹⁶ Samtaem, i gat wan jenis long save blong yumi, long saed blong wan profet tok no wan vas long Baebol. Yumi mas tekem taem blong stadi mo tingting dip long hem. (Ol Wok 17:11; 1 Timoti 4:15) Yumi traem kasem save long ol bigfala poen, we oli defren long save blong yumi bifo. Mo tu, yumi traem makem ol smosmol poen we oli defren. Taem yumi stadi gud olsem, niufala trutok ya bambae i kam haf blong ol gudgudfala trutok blong Baebol we yumi stap hivimap. ?From wanem i gud yumi traehad olsem?

17, 18. ?Olsem wanem tabu spirit i save givhan long yumi?

¹⁷ Jisas i talem se tabu spirit i save givhan long yumi, blong yumi tingbaot samting we yumi lanem bifo. (Jon 14:25, 26) ?Olsem wanem? ?Tabu spirit i save mekem olsem taem yumi stap  prij? !Yes! Traem tingbaot wan brata we nem blong hem Pita. Long 1970, Pita i gat 19 yia mo i jes stat blong wok long Betel long Inglan. Wan dei, hem i prij long wan medel man we i gat wan longfala mustas, mo i askem long hem sipos hem i wantem kasem save long Baebol. Man ya i sek, from we hem i wan tija blong ol man Jiu. Tingting blong hem se, “!Ei, yangfala ya i ting se i save tijim mi ya!” Ale, hem i askem long Pita se: “Boe blong mi, yu traem talem, ?oli raetem buk blong Daniel long wanem lanwis?” Pita i ansa se: “Oli raetem haf long Arameik.” Tija ya i sapraes we yangfala ya i save ansa, be Pita i sapraes moa. ?Olsem wanem Pita i save? Taem hem i gobak long haos, hem i jekem ol Wajtaoa mo Wekap! we hem i ridim long ol manis we i pas. Nao hem i faenem wan we i talem se oli raetem buk blong Daniel long Arameik. (Daniel 2:4) Yes, tabu spirit i save mekem yumi tingbaot samting we yumi ridim finis, mo yumi putum i stap wetem ol gudgudfala samting we yumi lanem finis.—Luk 12:11, 12; 21:13-15.

¹⁸ Sipos yumi laekem tumas trutok, bambae yumi wantem lanem moa, mo joenem long ol trutok we yumi save finis. Sipos yumi gohed blong mekem samting ya, bambae yumi rere gud blong tijim ol narafala.

19. ?From wanem yumi mas lukaot gud long ol gudgudfala samting we God i givim?

¹⁹ Long stadi ya, yumi lanem se yumi mas laekem tumas ol gudgudfala samting we Jehova i stap givim. !Be lukaot! !Setan mo wol blong hem i save spolem lav ya! Hem i save pulum yumi wetem promes blong gat wan gudfala wok we i givim bigfala mane, no ol drim blong wan isi laef, no ol sas samting we yumi save flas from. Aposol Jon i givim woning se wol ya mo ol samting blong hem, bambae oli lus. (1 Jon 2:15-17) Taswe, yumi mas glad long ol gudgudfala samting we God i givim mo yumi mas lukaot gud long olgeta.

20. ?Yu yu gat strong tingting blong mekem wanem?

²⁰ Yu mas rere blong lego eni samting we i save mekem se yu no moa laekem tumas Kingdom mo wok blong prij. Yu mas gat strong tingting blong prij, mo gohed blong lukaotem ol trutok blong Baebol. Sipos yu mekem olsem, bambae yu hivimap ‘ol gudgudfala samting long heven we stilman i no save go klosap long hem, mo kakros tu i no save kakae. From we long weples ol gudgudfala samting blong yu oli stap long hem, ples ya nao hat blong yu tu i stap long hem.’—Luk 12:33, 34.