1. ?Wanem samting i mekem se yumi hae moa long ol anamol?

JEHOVA i givim wan spesel samting long yumi we i mekem se yumi hae moa long ol anamol, hemia se tingting blong yumi i save stikim yumi. ?Olsem wanem yumi save se tingting blong Adam mo Iv i stikim tufala? Afta we tufala i brekem loa blong God, tufala i haed. Hemia i soemaot se tingting blong tufala i stikim tufala.

2. ?Olsem wanem tingting we i stikim yumi i olsem wan kampas? (Yu luk pija long stat blong stadi.)

² Taem tingting i stikim yumi, yumi harem save se samting we yumi mekem i no stret, taswe tingting olsem i save lidim gud yumi. Taem yumi no trenem tingting blong i stikim yumi, yumi olsem wan sip we i no gat kampas. Win mo taed i save karem sip ya i gowe long stret rod. Be taem kampas i wok gud, i moa isi blong kapten i stiarem sip long stret rod. Long sem fasin, sipos yumi trenem gud tingting blong yumi, bambae hem i lidim yumi long stret rod.

3. ?Wanem i save hapen sipos yumi no trenem gud tingting blong yumi?

³ Sipos yumi no trenem gud tingting blong yumi, bambae  i no givim woning taem yumi wantem mekem samting we i no stret. (1 Timoti 4:1, 2) Mo tu, maet yumi ting se ‘fasin we i nogud, i gud nomo.’ (Aesea 5:20) Jisas i talem long ol man blong hem se: “Taem i stap kam we bambae ol man we oli kilim yufala, oli ting se oli stap mekem tabu wok blong God.” (Jon 16:2) Hemia tingting blong ol man we oli kilim disaepol Steven i ded. (Ol Wok 6:8, 12; 7:54-60) Long ol yia we oli pas, plante man we oli strong long skul blong olgeta oli mekem ol rabis samting, olsem kilim man i ded, mo oli talem se hemia samting we God i wantem. Be blong talem stret, oli mekem samting we i agensem loa blong God. (Eksodas 20:13) !I klia se tingting i no lidim gud olgeta!

4. ?Olsem wanem blong mekem se tingting i lidim gud yumi?

⁴ ?Olsem wanem blong mekem se tingting i lidim gud yumi? Ol loa mo ol stamba trutok blong Baebol oli ‘stret gud blong tijim ol man, soemaot ol samting we i no stret, stretem olgeta samting, mo stretem tingting blong man blong i folem ol stret rul blong God.’ (2 Timoti 3:16) Yumi mas stadi Baebol oltaem, tingting dip long hem, mo mekem i wok long laef blong yumi. Long rod ya, bambae yumi trenem tingting blong yumi folem tingting blong Jehova. Nao yumi sua fulwan se tingting ya bambae i lidim gud yumi. Naoia bambae yumi tokbaot olsem wanem yumi save trenem tingting folem ol loa mo ol stamba trutok blong Jehova.

5, 6. ?Olsem wanem ol loa blong God oli halpem yumi?

⁵ Sipos yumi wantem se ol loa blong God oli halpem yumi, i no naf blong ridim Baebol mo save ol loa ya nomo. Yumi mas lavem mo respektem olgeta tu. Baebol i talem se: “Fasin we i no stret, yufala i mas tanem baksaed long hem, be fasin we i stret, yufala i mas glad long hem.” (Amos 5:15) ?Be olsem wanem blong mekem? Yumi mas traehad blong gat tingting blong Jehova long evri samting. Traem tingbaot se, yu no stap slipgud, nao dokta i talem se yu mas kakae gud, mekem eksasaes, mo mekem sam jenis long laef blong yu. !Yu folem advaes blong hem, mo yu luk se i wok gud! Ating bambae yu glad tumas long advaes ya.

⁶ Long sem fasin, God i stanemap ol loa blong mekem laef blong yumi i kam gud moa, from we oli protektem yumi long ol rabis frut blong sin. Traem tingbaot: Baebol i talem se yumi no mas giaman, stil, mekem rabis fasin blong seks, faet, o mekem wok blong rabis spirit. (Ridim Ol Proveb 6:16-19; Revelesen 21:8) Sipos yumi obei mo yumi luk gudfala frut we i kamaot, bambae yumi lavem moa Jehova mo ol loa blong hem.

7. ?Olsem wanem ol stori blong Baebol oli save halpem yumi?

⁷ Blong save wanem i stret mo wanem i no stret, i no nid blong brekem loa blong God mo kasem nogud frut. Yumi save lanem lesen from mastik blong sam man we Baebol i tokbaot. Ol Proveb 1:5 i talem se: “Ol tok ya i save mekem ol waes man oli gat save moa.” !Save ya i nambawan from we i kamaot long God! Traem tingbaot Deved we i harem nogud tumas taem hem i brekem loa blong Jehova mo i mekem rabis fasin wetem Batseba.  (2 Samuel 12:7-14) Taem yu ridim stori ya, i gud yu askem se: ‘?Deved i sud mekem wanem blong blokem trabol ya? ?Sipos mi, bambae mi mekem wanem? Sipos wan samting olsem i traem mi, ?bambae mi mekem olsem Deved o Josef?’ (Jenesis 39:11-15) Sipos yumi tingting gud long rabis frut we i save kamaot, bambae yumi ‘tanem baksaed long fasin we i no stret.’

8, 9. (1) ?Tingting we i stikim yumi i save halpem yumi olsem wanem? (2) ?Olsem wanem ol stamba trutok blong Baebol oli save gat paoa long tingting?

⁸ Yumi mas stap longwe long ol samting we God i no laekem. ?Be olsem wanem sipos i no gat wan loa agensem samting we yu wantem mekem? ?Olsem wanem blong save samting we God i wantem? Sipos yu trenem tingting blong yu folem Baebol, bambae yu mekem desisen we i waes.

⁹ From we Jehova i lavem yumi, hem i givim ol stamba trutok we oli save lidim tingting blong yumi. Nao tingting bambae i stikim yumi taem yumi wantem mekem samting we i no stret. Jehova i talem se: “Mi mi Hae God, mi God blong yufala. Mi nao mi stap tijim yufala blong givhan long yufala, mo mi stap lidim yufala long ol rod we i stret blong yufala i folem.” (Aesea 48:17, 18) Taem yumi tingting dip long ol stamba trutok blong Baebol mo putum olgeta long hat blong  yumi, yumi save stretem mo jenisim tingting blong yumi. Hemia bambae i givhan long yumi blong yumi mekem ol waes desisen.

10. ?Olsem wanem Baebol i givhan long yumi blong mekem ol gudfala desisen? ?Olsem wanem Jisas i yusum ol stamba trutok blong tijim ol disaepol?

¹⁰ Wan stamba trutok i save lidim tingting blong yumi, nao yumi mekem gudfala desisen. Sipos yumi save ol stamba trutok ya, bambae yumi kasem save tingting blong Jehova, mo from wanem hem i putumap sam loa. Jisas i yusum ol stamba trutok blong tijim ol disaepol se evri fasin mo aksen blong olgeta i gat frut. Olsem nao, kros i save lidim man blong i kilim narafala, mo ol nogud tingting oli save lidim man blong i mekem rabis fasin blong seks. (Matiu 5:21, 22, 27, 28) Taem yumi letem ol stamba trutok blong Baebol oli lidim yumi, yumi stap trenem gud tingting blong yumi, nao yumi save mekem ol gudfala jus we oli givim ona long God.—1 Korin 10:31.

11. ?Olsem wanem ol Kristin oli save gat defdefren tingting long sam samting?

¹¹ Nating se ol Kristin oli trenem tingting folem Baebol, be olgeta wanwan oli save gat defdefren tingting long sam samting, olsem strong dring. Baebol i no talem se i rong blong dring smol, be i givim woning se yumi no mas dring bitim mak. (Ol Proveb 20:1; 1 Timoti 3:8) ?Olsem wanem? ?Wan Kristin i mas tingbaot nomo blong no dring bitim mak? ?I gat wan narafala samting tu we hem i mas tingbaot? Yes. Nating se tingting blong hem i letem hem i dring smol, be hem i mas tingbaot narafala we i no wantem dring nating.

12. ?Rom 14:21 i soemaot olsem wanem, se yumi mas respektem tingting blong narafala?

¹² Pol i soemaot se yumi mas respektem tingting blong ol narafala, i se: “I moa gud yu no kakae mit, mo yu no dring waen, mo yu no mekem eni samting we i save mekem brata blong yu i foldaon.” (Rom 14:21) Taswe, nating se yumi gat raet blong dring, be yumi rere blong lego raet ya taem yumi save spolem tingting blong wan narafala Kristin. Bifo we wan brata i kam long trutok, maet hem i alkolik, taswe naoia hem i no moa dring nating. Yumi no wantem pulum hem i gobak long olfala fasin blong hem. (1 Korin 6:9, 10) Sipos yumi singaot brata ya i kam kakae long haos blong yumi, ?i stret blong traem fosem hem blong dring? !Nogat!

13. ?Timoti i mekem wanem blong respektem tingting blong ol man we hem i prij long olgeta?

¹³ Yangfala Timoti i save se ol man Jiu we hem i prij long olgeta oli tinghevi long sakomsaes. Mo hem i gat sem fasin olsem aposol Pol we i no wantem spolem tingting blong olgeta. Taswe, hem tu i sakomsaes, nating se hem i mas harem nogud long bodi blong hem. (Ol Wok 16:3; 1 Korin 9:19-23) ?Yu tu yu rere blong mekem samting we i had, blong givhan long narafala?

14, 15. (1) ?Olsem wanem blong kam bigman long Kraes? (2) ?Olgeta we oli bigman long Kraes oli mekem olsem wanem long ol narafala?

¹⁴ Yumi evriwan i mas wantem blong go moa i bitim we yumi save “ol stamba tijing we oli tokbaot Kraes.” Yumi wantem ‘gohed kwik blong kam bigman.’ (Hibrus 6:1) Blong kam bigman long Kraes, i no naf we yumi stap plante yia long trutok. Yumi mas traehad tu, mo gohed blong kasem ol dip save. Taswe, yumi mas ridim Baebol evri dei. (Ol Sam 1:1-3) Sipos yumi mekem olsem, bambae yumi kasem save moa long ol loa mo ol stamba trutok blong Baebol.

¹⁵ ?Long tingting blong ol Kristin, wanem loa i moa impoten? Loa ya se yumi mas lavlavem yumi. Jisas i talem se: “Sipos yufala i lavlavem yufala, bambae olgeta man oli save se yufala i disaepol blong mi.” (Jon 13:35) Baebol i talem se lav hem i “loa blong king,” mo “man we i lavem narafala hem i stap folem olgeta loa.” (Jemes 2:8; Rom 13:10) Yumi no sapraes se lav i impoten tumas, from we Baebol i talem se “God hem i lav.” (1 Jon 4:8) Lav ya i no wan filing nomo. Ol samting we God i mekem oli soemaot se hem i lavem yumi. Jon i talem se: “God i soemaot lav ya long yumi olsem: Hem i sanem stret Pikinini blong hem, wan nomo we hem i gat, i kam long wol, blong yumi save kasem laef from hem.” (1 Jon 4:9) Yumi bigman long Kraes taem yumi mekem ol samting blong soemaot se yumi lavem Jehova, Jisas, ol brata mo sista, mo ol narafala man.—Matiu 22:37-39.

16. Taem yumi kam bigman long Kraes, ?from wanem yumi laekem tumas ol advaes blong Baebol?

¹⁶ Taem yumi kam bigman long Kraes,  yumi laekem tumas ol stamba trutok blong Baebol. Ol loa oli stret long sam samting nomo, be ol stamba trutok oli stret long plante samting. Traem tingbaot wan pikinini we i no kasem save se ol rabis fren oli save spolem hem. Papa mo mama blong hem i mas putum sam loa blong protektem hem. (1 Korin 15:33) Be taem pikinini i kam bigwan, hem nomo i naf blong tingting gud long ol advaes blong Baebol. Nao hem i save jusum ol gudfala fren. (Ridim 1 Korin 13:11; 14:20.) Moa we yumi tingting long ol advaes blong Baebol, moa we yumi save trastem tingting blong yumi blong lidim gud yumi, from we yumi stap folem tingting blong God.

17. ?Wanem ol samting we yumi gat blong mekem ol gudfala desisen?

¹⁷ Yumi gat evri samting we yumi nidim blong mekem ol desisen we Jehova i glad long olgeta. Long Baebol, i gat ol loa mo ol stamba trutok we oli halpem yumi blong kam ‘naf blong mekem wok, mo blong gat evri samting we yumi nidim blong mekem evri gudfala wok.’ (2 Timoti 3:16, 17) Ol stamba trutok oli soemaot tingting blong Jehova. Be yumi mas traehad blong faenem olgeta. (Efesas 5:17) Yumi gat ol samting blong givhan long yumi, olsem Buk Blong Mekem Risej, Wajtaoa LAEBRI LONG INTENET, mo JW Laebri. Sipos yumi yusum ol tul ya, bambae yumi kasem ol gudfala samting long stadi blong yumi wanwan mo famle stadi.

18. Sipos yumi folem ol loa mo ol stamba trutok blong Baebol, ?wanem bambae i hapen?

¹⁸ !Laef blong yumi i kamgud moa taem yumi folem ol loa mo ol stamba trutok blong Jehova! Ol Sam 119:97-100 i talem se: “Mi mi laekem Loa blong yu tumas, mi stap tingting long hem i stat long moning, gogo kasem sapa. Tok ya we yu yu putum i stap oltaem long tingting blong mi, i stap mekem mi mi waes moa, i winim ol enemi blong mi. From we oltaem mi mi stap tingting long ol rul we yu yu mekem, mi mi save plante samting moa, i winim ol tija blong mi. Oltaem, mi mi stap obei long ol loa blong yu nao mi mi waes moa, i winim ol ololfala.” Sipos yumi stap tingting oltaem long ol loa mo ol stamba trutok blong Baebol, bambae yumi kam waes, mo yumi soemaot se yumi gat tingting blong God. Sipos yumi trenem tingting blong yumi folem ol loa mo ol stamba trutok blong Baebol, bambae yumi ‘kam bigman olsem Kraes.’—Efesas 4:13.