1. ?Aposol Pol i givim wanem woning long ol tabu Kristin?

APOSOL Pol i givim woning ya se: “Yufala i no mas letem fasin blong yufala i kam olsem fasin blong wol ya.” (Rom 12:2) Pol i raetem ol tok ya i go long ol Kristin long taem blong hem. ?From wanem hem i givim wan strong woning olsem long ol man mo woman we oli givim laef blong olgeta finis i go long God, mo tabu spirit i makemaot olgeta?—Rom 1:7.

2-3. ?Setan i yusum wanem blong traem pulumaot yumi long Jehova? ?Olsem wanem yumi save brekemdaon ol tingting we oli olsem ol strongfala haos?

² Pol i wari long sam Kristin we oli stap letem ol giaman tingting mo waes blong wol blong Setan i jenisim tingting blong olgeta. (Efes. 4:17-19) Samting ya i save hapen long yumi evriwan. Setan we i god blong wol ya, i wantem tumas blong pulumaot yumi long Jehova, taswe hem i yusum ol defdefren kaen trik. Wan long ol trik ya, se hem i traem pulum yumi blong leftemap yumi o blong wantem kasem haenem. Mo tu, hem i save yusum ol samting we oli hapen long laef blong yumi, kalja blong yumi, mo tijing we yumi kasem, blong pulum yumi blong tingting olsem hem.

³ ?Olsem wanem? ?Yumi save brekemdaon ol tingting ya we “oli olsem ol strongfala haos”? (2 Kor. 10:4) Makemgud ansa we Pol i givim, i se: “Mifala i stap pulumdaon ol giaman  tingting mo evri tingting we ol flas man oli stanemap, we oli blokem ol man blong oli no save God. Hemia i olsem we mifala i holemtaet olgeta tingting blong man oli stap kalabus, blong mekem oli obei long Kraes.” (2 Kor. 10:5) Yes, Jehova i save givhan long yumi, blong yumi jenisim ol tingting we oli no stret. Olsem we gudfala meresin i save givhan long bodi blong i faet agensem sik, Tok blong God tu i save givhan long yumi blong faet agensem wol blong Setan.

4. ?Wanem jenis we plante long yumi oli mekem taem oli kasem save long trutok?

⁴ Traem tingting bak long ol jenis we yu mekem, taem yu kasem save long trutok blong Baebol mo yu mekem desisen blong wosipim Jehova. Plante long yumi oli mas lego sam nogud fasin we oli stap folem. (1 Kor. 6:9-11) !Yumi talem tangkiu tumas long Jehova, we i givhan long yumi blong sakemaot ol nogud fasin ya!

5. Folem Rom 12:2, ?wanem tufala samting we yumi mas mekem?

⁵ Be yumi no mas ting se i no moa gat samting blong jenisim. I tru, bifo we yumi baptaes, yumi sakemaot ol fasin we oli olsem bigfala sin. Be yumi mas gohed yet blong blokem ol samting we oli save pulum yumi blong gobak long ol rabis fasin ya. ?Olsem wanem blong mekem olsem? Pol i ansa se: “Yufala i no mas letem fasin blong yufala i kam olsem fasin blong wol ya, be yufala i mas jenisim tingting blong yufala blong yufala i jenis fulwan.” (Rom 12:2) Taswe yumi mas mekem tu samting: Faswan, yumi ‘no letem fasin blong yumi i kam olsem fasin blong wol.’ Sekenwan, yumi “jenis fulwan.”

6. ?Ol tok blong Jisas long Matiu 12:43-45, oli tijim yumi long wanem?

⁶ Jenis ya we Pol i tokbaot i no minim jenis we man i save luk nomo, be i min se evri samting long saed blong yumi i jenis. (Yu luk bokis ya “ ?Yu Rili Jenis, o Yu Stap Giaman?”)  Yumi mas jenis fulwan, i min se yumi jenisim ol tingting, ol filing, mo ol samting we yumi wantem long hat blong yumi. Taswe yumi evriwan i mas tingbaot se: ‘?Mi mi stap jenisim nomo ol samting we ol narafala oli save luk, o mi stap jenisim ol samting long hat mo tingting blong mi tu, blong kam wan trufala Kristin? Ol tok blong Jisas long Matiu 12:43-45 i soemaot samting we yumi mas mekem. (Ridim.) Ol vas ya oli tijim yumi long wan impoten trutok: I no naf blong sakemaot ol nogud tingting nomo, be i impoten tu blong putum ol tingting blong God long ples blong olgeta.

7. ?Olsem wanem yumi save jenisim tingting mo hat blong yumi?

⁷ ?I tru se yumi save jenisim tingting mo hat blong yumi? Yes. Baebol i talem se: “Yufala i mas gohed blong mekem se paoa we i stap pusum tingting blong yufala, i kam niuwan. Mo yufala i mas werem niufala fasin we God i wokem folem samting we hem i wantem. Fasin ya i joen wetem stret fasin mo fasin ya blong holemstrong oltaem.” (Efes. 4:23, 24) Yes, yumi save jenis fulwan, be i no isi blong mekem olsem. I no naf blong blokem ol nogud tingting mo fasin. Yumi mas ‘mekem paoa we i pusum tingting blong yumi i kam niuwan.’ Hemia i min se yumi mas jenisim ol samting we yumi laekem mo wantem, ol fasin blong yumi, mo tingting we i pulum yumi blong mekem samting. Taswe, yumi mas traehad oltaem.

8-9. Talem stori blong wan brata we i soemaot se yumi mas jenis fulwan.

⁸ Traem tingbaot wan brata we bifo hem i man blong faet, be taem hem i kasem trutok, hem i lego dring mo faet, nao i baptaes. Hemia i givim wan nambawan witnes long ol man ples blong hem. Be smoltaem afta we hem i baptaes, i gat wan samting i hapen we i traem hem bigwan. Wan naet, wan man we i drong i kam long haos blong hem, mo i wantem faetem hem. Fastaem brata i blokem tingting ya blong wantem faet. Be taem man ya i tok nogud long nem blong Jehova, brata ya i no moa save holemtaet kros blong hem. Ale, hem i go afsaed mo i faetem man ya. ?From wanem hem i mekem olsem? Stadi blong Baebol i givhan long hem blong i blokem tingting blong wantem faet, be hem i no jenisim yet paoa we i pusum tingting blong hem. Hemia i min se, hem i no jenisim hat mo tingting blong hem.

⁹ Be brata ya i gohed blong traehad. (Prov. 24:16) Ol elda oli givhan long hem, mo hem i gohed gud gogo hem i naf blong kam wan elda. Be long wan naet, afsaed long Haos Kingdom nomo, hem i fesem sem trabol we hem i bin fesem plante yia bifo. Wan man we i drong i wantem faetem wan elda. ?Brata ya i mekem wanem? Hem i no kam kros, be wetem tingting daon, hem i toktok gud long man ya blong mekem kros blong hem i godaon, mo i givhan long hem blong i gobak long haos. ?From wanem brata ya i no mekem sem mak olsem fastaem? From we hem i jenisim paoa we i pusum tingting blong hem. Hem i jenis fulwan long hat mo tingting blong hem, mo i kam wan man blong mekem pis, wan man we i gat tingting daon. !Hemia i leftemap nem blong Jehova bigwan!

10. ?Yumi mas mekem wanem blong jenis fulwan?

¹⁰ I tekem taem blong mekem ol jenis ya, mo yumi mas traehad. Maet yumi mas “wok had” blong plante yia. (2 Pita 1:5) I no naf nomo blong save trutok plante yia. Yumi mas traehad blong jenisim yumi fulwan. Bambae yumi tokbaot sam stamba samting we oli save givhan long yumi.

11. ?Olsem wanem prea i givhan long yumi blong jenisim paoa we i pusum tingting?

¹¹ Fas samting hemia prea. Yumi mas prea olsem man we i raetem Sam ya se: “God, plis yu mekem tingting blong mi i klin olgeta. Plis yu mekem we hat blong mi i kam niuwan bakegen, mo i stap strong long yu oltaem.” (Sam 51:10) I gud yumi luksave se yumi mas jenisim paoa we i pusum tingting blong yumi, mo yumi askem long Jehova blong i givhan long yumi. ?From wanem yumi save se Jehova bambae i givhan? Hemia from promes we hem i mekem long ol stronghed man Isrel long taem blong Esikel, i se: “Bambae mi mekem laef blong yufala i niuwan, mi givim narafala tingting long yufala, . . . mo mi givim gudfala tingting long yufala blong yufala i save obei long mi.” (Esik. 11:19) Jehova i glad blong givhan long ol man Isrel blong oli jenis, mo hem i glad blong givhan long yumi tu.

12-13. (1) Folem Ol Sam 119:59, ?yumi mas tingting dip long wanem? (2) ?Wanem ol kwestin we yumi save tingbaot?

¹² Seken impoten samting, se yumi mas tingting dip. Taem yumi ridim Baebol evri dei, yumi mas tekem taem blong tingting dip long ol tingting mo filing we yumi mas jenisim. (Ridim Ol Sam 119:59, NW; * Hib. 4:12; Jem. 1:25) Yumi mas luksave enikaen tingting o filing we i kamaot long wol. Yumi no mas giaman long yumi, be yumi mas luksave ol fasin blong yumi we oli no stret, mo wok had blong sakemaot olgeta.

¹³ Yumi wanwan i save tingting dip long ol kwestin ya: ‘Long hat blong mi, ?mi stap jalus long narafala?’ (1 Pita 2:1) ‘?Mi stap flas from ples we mi kamaot long hem, o from we mi skul gud, o mi gat mane?’ (Prov. 16:5) ‘?Mi stap lukluk daon long ol narafala we oli no gat plante samting olsem mi o oli kamaot long narafala laen?’ (Jem. 2:2-4) ‘?Mi laekem ol samting long wol blong Setan?’ (1 Jon 2:15-17) ‘?Mi laekem ol muvi mo pleplei, we oli soemaot ol doti fasin blong seks mo faet?’ (Sam 97:10; 101:3; Amos 5:15) Ansa blong ol kwestin ya bambae i soemaot ol samting we yu mas jenisim. Sipos yu brekemdaon ol tingting mo filing long hat blong yu we oli “olsem ol strongfala haos,” bambae yu mekem Papa blong yumi long heven i glad.—Sam 19:14.

14. ?From wanem i impoten blong jusum ol gudfala fren?

¹⁴ Namba tri impoten samting se yumi mas jusum ol gudfala fren. Maet yumi no luksave, be ol fren oli gat bigfala paoa long yumi. (Prov. 13:20) Ol fren we yumi joen wetem olgeta long wok mo skul, oli no save givhan long yumi blong gat ol tingting we God i glad long olgeta. Be ol gudfala fren, hemia olgeta we yumi faenem long ol miting blong yumi. Long ples ya, yumi kasem gudfala tingting we i pulum yumi blong ‘lavem ol narafala, mo mekem ol gudfala wok.’—Hib. 10:24, 25, futnot.

15-16. ?Olsem wanem Setan i traem blong jenisim tingting blong yumi?

¹⁵ Yu no mas fogetem se Setan i wantem tumas blong jenisim tingting blong yu. Hem i yusum enikaen tingting blong traem spolem ol gudfala tingting we yumi kasem long Tok blong God.

¹⁶ Setan i stap askem long yumi yet, kwestin ya we hem i askem long Iv long garen blong Iden, se: “?I tru we God i blokem . . . ?” (Jen. 3:1) Long wol ya we Setan i bos long hem, oltaem yumi harem ol kwestin olsem: ‘?I tru se God i no glad long fasin ya we man i mared  long man, mo woman i mared long woman? ?I tru se God i no wantem we yu mekem lafet blong Krismas mo betde? ?I tru se God i no wantem we yu tekem blad blong narafala man long bodi blong yu? ?I tru se God i no wantem we yu joen wetem ol fren mo famle we kongregesen i putumaot olgeta?’

17. Taem yumi gat kwestin long saed blong bilif blong yumi, ?yumi mas mekem wanem? Folem Kolosi 2:6, 7, ?wanem gudfala frut i save kamaot?

¹⁷ Yumi mas gat strong tingting se ol bilif blong yumi oli tru. Sipos yumi no traehad blong faenem ansa long ol kwestin we yumi gat, bilif blong yumi bambae i hafhaf. Sloslo ol kwestin ya oli save jenisim tingting mo spolem bilif blong yumi. Taswe, ?yumi mas mekem wanem? Baebol i talem se yumi mas jenisim tingting blong yumi, blong yumi save pruvum se “samting we God i wantem i gud, i stret gud, mo hem i glad long hem.” (Rom 12:2) Sipos yumi stadi oltaem, bambae yumi pruvum se ol samting we yumi lanem long Baebol oli tru. Nao bambae yumi bilif fulwan se ol rul blong Jehova oli stret. Olsem wan tri we rus blong hem i stap dip insaed long graon, ‘bilif blong yumi bambae i kam strong moa oltaem.’—Ridim Kolosi 2:6, 7.

18. ?Wanem bambae i givhan long yu blong protektem yu wan long ol rabis fasin blong wol blong Setan?

¹⁸ Yu nomo yu save mekem bilif blong yu i strong moa, narafala man i no save mekem. Taswe yu mas gohed blong mekem paoa we i pusum tingting blong yu i kam niuwan. Prea oltaem, mo askem long Jehova blong i givim tabu spirit blong halpem yu. Tingting dip mo jekem ol tingting we oli pulum yu blong mekem samting. Jusum ol gudfala fren, mo joen wetem olgeta we oli givhan long yu blong jenisim tingting blong yu. Sipos yu mekem olsem, bambae yu protektem yu wan long ol rabis fasin blong wol blong Setan, mo bambae yu pulumdaon “ol giaman tingting mo evri tingting we ol flas man oli stanemap, we oli blokem ol man blong oli no save God.”—2 Kor. 10:5.