STADI 26
“Yufala i Kambak Long Mi”
“Sipos . . . yufala i kambak long mi, mi bambae mi save kambak long yufala.”—MAL. 3:7.
SINGSING 102 Yumi “Givhan Long Olgeta We Oli No Strong”
BIGFALA TINGTING *
1. ?Jehova i harem olsem wanem taem wan sipsip i kambak long hem?
OLSEM yumi tokbaot long las stadi, Jehova i talem se hem i gudfala man blong lukaot long sipsip, we i lavem ol sipsip blong hem mo i lukaot gud long olgeta. Mo tu, hem i lukaot olgeta we oli lusum rod. Hem i talem long ol man Isrel we oli gowe long hem, se: “Sipos . . . yufala i kambak long mi, mi bambae mi save kambak long yufala.” Yumi save se hem i gat sem tingting tede, from we hem i talem se: “Mi no save jenis samtaem.” (Mal. 3:6, 7) Jisas i talem se Jehova mo ol enjel oli glad tumas, taem wan sipsip we i lus i kambak long Hem.—Luk 15:10, 32.
2. Long stadi ya, ?bambae yumi tokbaot wanem?
2 Bambae yumi tokbaot tri parabol blong Jisas, we oli soemaot olsem wanem blong halpem olgeta we oli gowe long Jehova, mo sam fasin we yumi nidim blong halpem olgeta. Mo tu, bambae yumi tokbaot bigfala glad we yumi kasem, taem yumi wok had blong givhan long olgeta.
LUKAOT SELEN WE I LUS
3-4. ?From wanem woman ya long Luk 15:8-10 i wok had blong lukaot drakma selen we i lus?
3 Yumi mas wok had blong faenem olgeta we oli wantem kambak long Jehova. Long wan parabol long Gospel blong Luk, Jisas i tokbaot woman we i lukaot wan sas samting we i lus, hemia wan drakma selen. Impoten poen long parabol ya, hemia se woman ya i wok had blong lukaot selen ya.—Ridim Luk 15:8-10.
4 Jisas i tokbaot filing blong woman ya taem hem i faenem drakma selen we i lus. Long taem blong Jisas, sam mama long Isrel oli givim ten drakma selen long gel blong olgeta long dei we hem i mared. Maet woman long parabol blong Jisas i kasem ten drakma selen long mama blong hem, mo wan long olgeta nao i lus. Hem i ting se selen ya i foldaon long floa. Ale hem i laetem wan laet mo i lukaot olbaot long floa, be hem i no faenem. Maet laet ya i no strong, taswe hem i no save luk smol silva mane ya. Nao hem i brum gud long ful haos. Saye, laet i saenem wan smol samting long ol das we hem i hivimap, hemia sas drakma selen blong hem. !Hem i harem gud tumas! Hem i singaot ol fren mo ol neba blong talemaot gud nius ya long olgeta.
5. ?From wanem samtaem i had blong faenem olgeta we oli lego kongregesen?
5 Olsem yumi luk long stori blong Jisas, yumi mas wok had blong faenem wan samting we i lus. Long sem fasin, yumi mas wok had blong faenem olgeta we oli lego kongregesen. Maet plante yia finis oli no moa joen wetem yumi. Samfala oli muv i go long wan narafala ples, we ol brata oli no save olgeta. Sam long olgeta oli wantem tumas blong kambak long Jehova. Oli wantem joen bakegen wetem famle blong Jehova blong wosipim hem, be oli nidim help blong yumi.
6. ?Olsem wanem yumi evriwan i joen long wok blong lukaot olgeta we oli lego kongregesen?
6 ?Hu i save joen long wok ya blong lukaot olgeta we oli no moa joen long kongregesen? Yumi evriwan—ol elda, ol paenia, famle blong olgeta, mo ol pablisa. ?Olsem wanem? ?Wan fren o famle blong yu i no moa prij? Taem yu prij long ol haos wanwan o long pablik ples, ?yu faenem wan we i no moa joen wetem yumi? I gud yu eksplenem long hem se sipos hem i glad we ol elda oli visitim hem, hem i save givim fon namba blong hem o talem ples we hem i stap, blong yu save pasem i go long ol elda.
7. ?Yumi lanem wanem long wan elda we nem blong hem Tomas?
7 ?Ol elda oli save mekem wanem blong faenem olgeta we oli wantem kambak long Jehova? Wan elda long Spen we nem blong hem Tomas, * i givhan long bitim 40 Witnes blong oli kambak long kongregesen. Hem i talem se: “Fastaem, mi askem long plante pablisa sipos oli save samfala we oli no moa kam long miting, mo ples we oli stap long hem. Bighaf blong olgeta oli glad blong givhan, from we oli harem se olgeta tu oli stap joen long wok ya blong lukaot ol sipsip we oli lus. Biaen, taem mi go luk ol brata mo sista we oli no moa joen wetem yumi, mi traem save long ol pikinini mo ol famle blong olgeta tu. Plante long ol pikinini ya oli bin kam long ol miting, mo sam oli pablisa. Yumi save givhan long olgeta tu blong oli kambak long Jehova.”
HALPEM OL PIKININI BLONG JEHOVA BLONG OLI KAMBAK
8. Long parabol blong boe we i lusum rod long Luk 15:17-24, ?papa i mekem wanem long boe blong hem we i tanem tingting?
8 ?Wanem ol fasin we yumi mas gat blong givhan long olgeta we oli wantem kambak long Jehova? Tingbaot ol samting we yumi lanem long parabol blong boe we i lusum rod. (Ridim Luk 15:17-24.) Jisas i talem se afta we taem i pas, gudfala tingting i kambak long boe ya, nao hem i gobak long papa blong hem. Papa ya i resis i go blong mitim hem, mo i putum han blong hem i goraon long boe ya blong soemaot se hem i lavem hem yet. Tingting blong boe ya i stikim hem, mo hem i harem se i no stret blong papa i talem se hem i boe blong hem. Hem i talemaot ol filing blong hem, mo papa i sore long hem. Nao papa i mekem sam samting, blong welkamem bak boe ya olsem pikinini we hem i lavem, be i no olsem wan wokboe. Hem i mekem wan lafet, mo i putum klos we i beswan long boe blong hem we i tanem tingting.
9. ?Wanem ol fasin we yumi nidim blong givhan long olgeta we oli wantem kambak long Jehova? (Yu luk bokis ya, “ Givhan Long Olgeta We Oli Wantem Kambak.”)
9 Jehova i olsem papa long stori ya. Hem i lavem ol brata mo sista we oli no moa joen wetem yumi, mo hem i wantem se oli kambak. Sipos yumi folem fasin blong Jehova, yumi save halpem olgeta. Yumi mas gat longfala tingting, traehad blong kasem save filing blong olgeta, mo soemaot lav. ?From wanem yumi nidim ol fasin ya, mo olsem wanem blong soemaot olgeta?
10. ?Olsem wanem longfala tingting i givhan, taem yumi halpem narafala blong i kambak long Jehova?
10 Yumi mas gat longfala tingting from we i tekem taem blong wan brata o sista i kambak long Jehova. Plante oli talem se ol elda mo ol narafala long kongregesen oli visitim olgeta plante taem bifo we oli kambak. Wan sista long Saotis Esia, nem blong hem Nansi, i talem se: “Wan gudfala fren long kongregesen i givhan bigwan long mi. Hem i lavem mi olsem we hem i bigfala sista blong mi. Hem i tokbaot ol gudfala taem we mitufala i gat bifo. Hem i gat longfala tingting blong lesin taem mi talemaot ol filing blong mi, mo hem i no fraet blong givim advaes. Hem i wan trufala fren, we i rere blong halpem mi oltaem.”
11. ?From wanem yumi mas traehad blong kasem save filing blong narafala?
11 Taem yumi kasem save filing blong narafala, hemia i olsem wan meresin we i mekem hem i harem gud bakegen. Samfala we oli no moa joen wetem yumi, oli stap kros plante yia long wan brata o sista. Maet oli ting se hem i mekem i no stret long olgeta. Ol nogud filing ya i mekem se oli no wantem kambak long Jehova. Maet oli nidim wan fren we i lesin mo i kasem save filing blong olgeta. (Jem. 1:19) Maria i talem se: “Bifo we mi kambak long kongregesen, mi nidim wan fren we i rere blong lesin taem mi talemaot ol trabol blong mi, mo i givim advaes.”
12. ?Olsem wanem Jehova i pulum ol man i kam long hem? Talem wan pijatok.
12 Baebol i talem se Jehova i stap pulum ol man i kam long hem wetem lav blong hem. ?Olsem wanem hem i mekem samting ya? Tingbaot sipos yu stap draon long solwota we i raf, nao wan man i sakem laef jaket long yu. I sua se yu glad, from we hemia i mekem se yu save flot. Be blong sevem laef blong yu, yu mas kamaot long solwota. Taswe wan man we i stap long bot i mas sakem wan rop long yu, mo pulum yu yu go long bot. Jehova i tokbaot ol man Isrel we oli gowe long hem se: “Mi mi stap mekem long olgeta olsem wan pikinini blong mi, we mi lavem hem, . . . nao oltaem mi stap pulum hem i kam long mi.” (Hos. 11:4) God i gat sem tingting tede long olgeta we oli no moa wosipim hem, mo oli stap draon long ol problem mo wari blong olgeta. Hem i wantem we oli save se hem i lavem olgeta, mo hem i wantem pulum olgeta oli kambak long hem. Jehova i save yusum yu blong yu soemaot lav ya long olgeta.
13. ?Olsem wanem stori blong Pablo i soemaot se lav i save pulum man i kambak long Jehova?
13 I impoten blong talem oltaem long olgeta we oli no moa joen wetem yumi, se Jehova i lavem olgeta mo yumi tu yumi lavem olgeta. Pablo, we yumi tokbaot hem long las stadi, i gowe long Jehova blong 30 yia. Hem i talem se: “Wan dei, taem mi kamaot long haos, mi mitim wan olfala sista. Hem i toktok kaen long mi mo i soemaot lav. Mi krae olsem wan pikinini. Mi talem long hem se ating Jehova i sanem hem i kam blong toktok long mi. Stret long taem ya nao, mi mekem desisen blong kambak long Jehova.”
SOEMAOT LAV LONG OLGETA WE OLI SLAK
14. Folem Luk 15:4, 5, ?man blong lukaot long sipsip i mekem wanem taem hem i faenem sipsip we i lus?
14 Yumi mas gohed longtaem blong givhan long olgeta we oli no moa joen wetem yumi. Olsem boe we i lusum rod, maet oli gat ol nogud filing we bambae i tekem taem blong kamgud. Mo ating oli harem se oli no moa gat paoa, from ol nogud samting we oli fesem long wol blong Setan. Yumi mas givhan long olgeta blong oli mekem bilif blong olgeta i strong bakegen. Long parabol blong sipsip we i lus, Jisas i talem se taem man blong lukaot long sipsip i faenem sipsip blong hem, hem i putum long solda blong hem mo i karem i gobak long ol narafala sipsip. Man ya i yusum taem mo paoa blong hem finis blong faenem sipsip ya. Be hem i luksave se hem i mas karem sipsip ya, from we hem i no gat paoa blong wokbaot hem wan.—Ridim Luk 15:4, 5.
15. ?Olsem wanem blong givhan long olgeta we oli wantem kambak long Jehova? (Yu luk bokis ya, “ Wan Gudfala Buklet.”)
15 Maet yumi yusum plante taem mo paoa blong halpem olgeta we oli wantem kambak, blong oli winim sam samting we i stap blokem olgeta. Tabu spirit, Baebol, mo ol buk blong yumi, oli save halpem olgeta blong oli kam strong bakegen. (Rom 15:1) ?Yumi save mekem wanem? Wan brata we i elda longtaem finis, i talem se, “Taem wan man i mekem desisen blong kambak long Jehova, hem i nidim wan Baebol stadi.” * Taswe sipos ol elda oli askem long yu blong mekem stadi wetem brata o sista we i wantem kambak, i gud yu glad blong mekem. Elda ya i gohed se, “Pablisa i mas kam wan gudfala fren blong hemia we i wantem kambak, olsem nao, i isi blong hem i trastem pablisa mo i talemaot evri samting long hem.”
GLAD LONG HEVEN MO LONG WOL
16. ?Olsem wanem yumi save se ol enjel oli stap wok wetem yumi?
16 I gat plante stori we oli soemaot se ol enjel oli wok wetem yumi, blong faenem olgeta we oli wantem kambak long Jehova. (Rev. 14:6) Traem tingbaot Silvio blong Ekwado. Hem i prea wetem fulhat blong hem, blong Jehova i sanem wan man blong i halpem hem blong kambak. Hem i no finisim prea blong hem yet, be wan man i noknok long doa. I gat tu elda we oli kam long haos blong hem. Tufala i glad blong givhan long hem.
17. ?Wanem blesing we yumi kasem taem yumi givhan long olgeta we oli wantem kambak?
17 Yumi kasem bigfala glad taem yumi givhan long olgeta we oli wantem kambak long Jehova. Salvado i wan paenia we i traehad bigwan blong halpem olgeta, mo hem i talem se: “Samtaem mi glad tumas, we mi wantem krae nomo. Mi harem gud tumas blong tingbaot se Jehova i faenem wan gudfala sipsip blong hem we i lus long wol blong Setan. Mi harem gud tu from we mi gat blesing ya blong joen wetem Jehova blong mekem wok ya.”—Wok 20:35.
18. Sipos yu no moa joen wetem ol man blong Jehova, ?yu save sua long wanem?
18 Sipos yu yu no moa joen wetem ol man blong Jehova, yu save sua se hem i lavem yu yet. Hem i wantem se yu kambak long hem. Be yu mas mekem sam samting. Olsem papa ya long parabol blong Jisas, Jehova i stap wet blong yu yu kambak, mo bambae hem i glad blong welkamem yu.
SINGSING 103 God i Givim Ol Man Blong Lukaot Long Ol Sipsip
^ par. 5 Jehova i wantem se olgeta we oli no moa joen long kongregesen oli kambak. Yumi save mekem plante samting blong givhan long olgeta we oli wantem folem tok ya blong Jehova se: “Kambak long mi.” Long stadi ya, bambae yumi tokbaot olsem wanem yumi save givhan long olgeta.
^ par. 7 Mifala i jenisim sam nem.
^ par. 15 Maet i gud blong stadi long sam haf blong buk ya ‘Stap Long Laef Ya We God i Lavem Yu.’ Sipos no, maet i gud blong tokbaot sam japta long buk ya Draw Close to Jehovah. Sevis Komiti Blong Kongregesen bambae i jusum brata o sista we i stret blong mekem stadi ya.
^ par. 68 PIJA: Tri brata oli halpem wan brata we i wantem kambak. Blong mekem olsem, trifala i toktok long hem oltaem, mekem hem i save se Jehova mo ol brata mo sista oli lavem hem, lesin long hem, mo traem kasem save filing blong hem.
