1. ?Wan bigfala hip blong ol man mo woman oli harem wanem mesej?

WAN bigfala hip blong ol man mo woman we oli kamaot long ol defdefren kantri mo oli toktok defren lanwis oli kam wanples long Jerusalem. Long dei ya, wan narakaen samting i hapen. !Wan grup blong ol man Jiu oli stat blong toktok long lanwis blong ol man ya! Ol man ya oli sapraes. Be samting we ol man ya oli talem mo samting we aposol Pita i talem, i mekem oli sapraes moa. Oli lanem se sipos oli wantem kasem laef, oli mas soemaot se oli bilif long Jisas Kraes. Samting ya i tajem hat blong olgeta. Nao oli askem se: “?Bambae mifala i mekem wanem?” Pita i talem se: “Yufala evriwan i mas baptaes.”—Wok 2:37, 38.

2. ?Bambae yumi tokbaot wanem long stadi ya? (Yu luk pija long fran pej.)

² Biaen wan nambawan samting i hapen. Long dei ya, samwe 3,000 man oli baptaes mo oli kam disaepol blong Kraes. Hemia nao stat blong bigfala wok ya blong mekem disaepol, we Jisas i talem long ol man blong hem blong oli mekem. Mo wok ya i stap gohed kam kasem naoia. Be tede, yumi no save storian wetem wan man blong sam aoa nomo, biaen hem i rere blong baptaes. Maet i save tekem plante manis o iven wan yia o moa, blong studen i save kasem mak ya blong baptaes. Sipos yu stap stadi wetem wan man naoia, bambae yu luksave se yu mas wok had blong givhan long hem blong i kam disaepol blong Kraes. Long stadi ya, bambae yumi tokbaot samting we yu save mekem blong halpem Baebol studen blong yu blong i baptaes.

3. Folem Matiu 28:19, 20, ?studen i mas mekem wanem blong kasem mak blong baptaes?

³ Bifo we wan Baebol studen i baptaes, hem i mas folem ol samting we Baebol i tijim. (Ridim Matiu 28:19, 20.) Taem wan Baebol studen i folem samting we hem i lanem, hem i kam olsem ‘man ya we i waes,’ we Jisas i tokbaot long pijatok blong hem, se i digim hol i godaon dip mo i wokem haos blong hem antap long wan ston we i strong. (Mat. 7:24, 25; Luk 6:47, 48) ?Olsem wanem yumi save halpem wan studen blong i folem samting we hem i lanem? Bambae yumi tokbaot tri samting.

4. ?Olsem wanem yumi save halpem studen blong i kasem mak ya blong baptaes? (Luk bokis ya “ Halpem Studen Blong Yu Blong i Putum Ol Man Mo i Kasem.”)

⁴ Halpem studen blong i putum ol mak. ?From wanem? Tingbaot pijatok ya: Sipos yu stap draev i go long wan ples farawe, maet long rod bambae yu stop blong luk sam naes ples, nao hemia bambae i mekem yu harem se ples we yu wantem go long hem i no longwe tumas. Long sem fasin, taem wan Baebol studen i putum ol mak we i save kasem kwiktaem mo i kasem olgeta, hemia bambae i mekem hem i luksave se i posibol blong i kasem mak blong baptaes. Yusum bokis ya “nekis step” long buk ya !Enjoem Laef Olwe! blong halpem studen blong putum ol mak we hem i save kasem. Long en blong wanwan lesen, tokbaot olsem wanem ol mak ya oli save halpem studen blong folem ol samting we hem i jes lanem. Sipos yu tingbaot wan narafala mak we hem i save kasem, yu raetem aninit long haf ya “narafala.” Yusum bokis ya tu blong tokbaot ol mak we studen i save kasem kwiktaem mo olgeta we hem i kasem long ol taem we i kam.

5. Folem Mak 10:17-22, ?Jisas i talem wanem long wan rijman, mo from wanem?

⁵ Halpem studen blong i mekem sam jenis.  (Ridim Mak 10:17-22.) Jisas i save se bambae i had blong wan rijman i salemaot olgeta samting blong hem. (Mak 10:23) Be yet, hem i talem long man ya blong i mekem bigfala jenis ya long laef blong hem. ?From wanem? Hemia from we Jisas i lavem hem. Samtaem yumi fraet blong enkarejem studen blong i folem samting we hem i lanem, from yumi ting se hem i no rere yet blong mekem ol jenis ya. Maet i tekem taem blong wan man i sakemaot ol olfala fasin, mo wokem ol niufala fasin. (Kol. 3:9, 10) Be sipos yu kwik blong tokbaot ol samting we studen i mas jenisim, bambae hem tu i stat blong mekem ol jenis ya. Taem yu mekem olsem, yu soemaot se yu kea long hem.—Sam 141:5; Prov. 27:17.

6. ?From wanem i impoten blong askem tingting blong studen?

⁶ I impoten blong askem tingting blong studen long wan topik. Hemia i save givhan long yumi blong faenemaot samting we studen i kasem save mo bilif long hem. Sipos yu mekem olsem bambae yu luk se i isi nomo blong yutufala i tokbaot ol topik we maet i had blong hem i akseptem. Long buk ya !Enjoem Laef Olwe! i gat plante kwestin we i save pulum studen blong talemaot tingting blong hem. Eksampol, long lesen 04 i se: “?Yu ting se Jehova i harem olsem wanem taem yu yusum nem blong hem?” Wan narawan long Lesen 09 i se: “?Wanem sam samting we yu wantem prea from?” Maet fastaem bambae i had blong studen blong yu i ansa long ol kwestin ya. Yu save halpem hem, taem yu trenem hem blong i yusum tingting blong hem blong eksplenem ol vas mo ol pija we i stap.

7. ?Olsem wanem yumi save yusum gud ol tru ekspiriens?

⁷ Taem studen blong yu i kasemsave samting we hem i mas mekem, i gud yu yusum ol tru ekspiriens blong givhan long hem. Eksampol, sipos hem i no stap kam oltaem long ol miting, i gud yu soem video ya Jehova i Tingbaot Mi we i stap long haf ya “Faenemaot” long lesen 14 long buk ya !Enjoem Laef Olwe! Long sam lesen long buk ya, yu save faenem ol ekspiriens long haf ya “Digim Moa” o “Faenemaot.” * Yu no mas komperem studen blong yu wetem wan narafala mo talem se: “Sipos hem i save mekem, yu tu yu save mekem.” Yu letem studen hem wan i luksave samting ya. Be yu save tokbaot ol men poen we i halpem man ya long video blong i folem ol tijing blong Baebol. Maet yu save tokbaot wan men vas o wan narafala poen we yu makem long video ya. Sipos i posibol, talem stret olsem wanem Jehova i halpem man ya.

8. ?Olsem wanem yumi save halpem studen blong i lavem Jehova?

⁸ Halpem studen blong i lavem Jehova. ?Olsem wanem blong mekem? Traem faenem eni rod blong tokbaot ol fasin blong Jehova. Halpem studen blong i luk Jehova olsem wan hapi God we i stap sapotem olgeta we oli lavem hem. (1 Tim. 1:11; Hib. 11:6) Eksplenem long studen se sipos hem i folem ol save ya, bambae hem i kasem ol gudfala samting, mo hemia i soemaot se Jehova i lavem hem. (Aes. 48:17, 18) Taem studen blong yu i lavem Jehova moa, bambae hem i wantem blong mekem ol jenis.—1 Jon 5:3.

9. ?Olsem wanem Mak 10:29, 30, i save halpem wan studen blong i kasem mak blong baptaes?

⁹ Baebol studen i mas mekem sam sakrefaes blong i save kasem mak blong baptaes. Olsem  rijman ya we yumi tokbaot finis, maet sam studen oli mas lego sam samting long saed blong bodi. Sipos wok blong olgeta i agensem ol rul blong Baebol, maet oli mas lego wok ya mo faenem wan narawan. Plante long olgeta, maet oli mas lego ol fren blong olgeta we oli no lavem Jehova. Sam narafala, maet famle blong olgeta i ronemaot olgeta from oli no laekem ol Witnes blong Jehova. Jisas i talem se maet samfala bambae oli faenem i had blong mekem ol sakrefaes olsem. Be hem i promes se olgeta we oli folem hem, bambae oli no harem nogud. Jehova bambae i blesem olgeta, taem i givim wan famle long saed blong spirit long olgeta. (Ridim Mak 10:29, 30.) ?Olsem wanem yu save halpem Baebol studen blong yu blong i harem gud long naesfala presen ya?

10. ?Yu yu lanem wanem long ekspiriens blong Manuel?

¹⁰ Traehad blong fren gud wetem studen. I impoten blong soem long studen blong yu se yu kea long hem. ?From wanem? Manuel we i laef long Meksiko i tingtingbak long taem we hem i bin stadi Baebol, mo i talem se: “Evri taem bifo mitufala i stadi, tija blong mi bambae i askem sipos mi oraet. Hemia i mekem se mi no fraet mo mi save tokbaot eni samting nomo wetem hem. Mi harem save se hem i rili kea long mi.”

11. ?Olsem wanem fasin blong spenem taem wetem studen i save givhan long hem?

¹¹ Spenem taem wetem studen blong yu, olsem we Jisas i spenem taem wetem ol man blong hem. (Jon 3:22) Sipos i stret, yu invaetem Baebol studen blong yu we i gohed gud, blong i kam long haos blong dring ti, kakae, o wajem brodkasting. Maet studen bambae i glad moa sipos yu invaetem hem long taem we i gat ol giaman lafet we hem i no save joen wetem ol famle blong hem. Kazibwe we i laef long Uganda i talem se: “Mi luk se mi lanem plante samting long saed blong Jehova, taem mi spenem taem wetem tija blong mi, sem mak olsem long taem blong stadi. Mi luksave se Jehova i kea long ol man blong hem, mo oli  glad tumas. Mo hemia nao samting we mi wantem.”

12. ?From wanem i gud blong tekem ol defren pablisa i go long stadi?

¹² Tekem ol defren pablisa i go long stadi. Samtaem, yumi harem se i moa isi blong go yumi wan, o blong tekem semfala pablisa nomo i go wetem yumi. Nating se i moa isi olsem, be sipos yumi traehad blong tekem ol defdefren pablisa wetem yumi, hemia bambae i givhan bigwan long Baebol stadi. Dmitrii we i laef long Moldova i talem se: “Evri pablisa we oli kam long stadi blong mi, oli gat prapa wei blong olgeta blong eksplenem wan samting. Hemia i halpem mi blong folem ol samting we mi lanem long ol defdefren rod. Mo tu, long faswan miting blong mi, mi no fraet tumas from we mi mitim finis plante brata mo sista.”

13. ?From wanem yumi mas halpem studen blong i kam long ol miting?

¹³ Halpem studen blong i kam long ol miting. ?From wanem? From hemia i wan haf blong wosip mo Jehova i talem se ol man blong hem oli mas joen wanples. (Hib. 10:24, 25) Mo tu, ol brata sista long Kongregesen oli olsem famle blong yumi long saed blong spirit. Taem yumi joen wanples long ol miting, hemia i olsem we yumi joen tugeta long wan haos blong serem wan naesfala kakae. Taem yu halpem Baebol studen blong i kam long ol miting, yu stap halpem hem blong i tekem wan impoten step blong i kasem mak blong baptaes. Be maet bambae i had blong hem i tekem step blong kam long ol miting. Sipos i olsem, ?olsem wanem buk ya !Enjoem Laef Olwe! i save halpem studen blong i winim ol samting we i save blokem hem blong i kam long ol miting?

14. ?Olsem wanem yu save pulum studen blong i kam long ol miting?

¹⁴ Lesen 10 blong buk ya !Enjoem Laef Olwe! i save halpem yu blong pulum studen i kam long ol miting. Bifo we oli rilisim buk ya, oli askem sam pablisa blong traem lesen 10 ya wetem ol studen blong olgeta, mo oli luk se i wok gud. Be yu no nid blong wet kasem lesen 10 blong invaetem studen i kam long ol miting, yu save invaetem hem long faswan taem we i stadi, mo yu gohed blong mekem olsem. Ol Baebol studen oli fesem ol defdefren problem. Taswe i gud yu faenemaot problem we studen blong yu i fesem, mo luk sipos yu save givhan long hem. Yu no mas harem nogud sipos i tekem taem blong studen i kam long miting. Yu mas gat longfala tingting, mo yu gohed blong invaetem hem.

15. ?Wanem sam samting we maet studen i fraet long hem?

¹⁵ ?Yu yu bin fraet blong kam wan Witnes blong Jehova? ?Maet yu bin fraet blong prij long ol haos wanwan? ?O maet yu fraet se ol fren mo famle bambae ol agensem yu? Sipos yes, bambae i isi blong yu kasem save filing blong studen blong yu. Jisas i talem se sam man bambae oli fraet olsem. Be hem i talem long ol man blong hem se oli no mas letem fraet i stopem olgeta blong mekem wok blong Jehova. (Mat. 10:16, 17, 27, 28) ?Olsem wanem Jisas i halpem ol man blong hem blong winim fraet? ?Mo olsem wanem yu save folem eksampol blong hem?

16. ?Olsem wanem yumi save trenem studen blong i tokbaot bilif blong hem?

¹⁶ Gohed blong trenem studen blong i tokbaot bilif blong hem. Maet ol disaepol blong Jisas oli fraet taem hem i sanemaot olgeta blong oli go prij. Be Jisas i halpem olgeta taem i talem weples bambae oli go prij long hem mo wanem mesej we oli mas talemaot. (Mat. 10:5-7) ?Olsem wanem blong mekem olsem Jisas? Halpem studen blong i luksave wetaem  hem i save prij. Eksampol, askem sipos hem i save wan man we hem i wantem talemaot ol trutok blong Baebol long hem, biaen halpem hem blong i save serem trutok ya long fasin we i isi. Sipos i stret, yu yusum haf ya “Sam man oli se” o “Maet man i askem se,” we i stap long buk ya !Enjoem Laef Olwe! blong yutufala i save praktis tugeta. I gud yu trenem studen blong i yusum Baebol blong givim stret ansa long wan simpol wei.

17. ?Olsem wanem yu save yusum Matiu 10:19, 20, 29-31 blong halpem studen blong i trastem Jehova?

¹⁷ Halpem studen blong i trastem Jehova. Jisas i talem long ol disaepol se Jehova bambae i halpem olgeta, from we hem i lavem olgeta. (Ridim Matiu 10:19, 20, 29-31.) Rimaenem studen blong yu se Jehova bambae i halpem hem tu. Yu save halpem hem blong i trastem Jehova, taem yu prea wetem hem mo tokbaot ol mak we hem i wantem kasem. Franciszek we i laef long Polan, i talem se: “Taem tija blong mi i prea, oltaem hem i tokbaot ol mak blong mi. Taem mi luk we Jehova i ansarem ol prea ya, kwiktaem nomo mi stat blong prea. Mi harem save se Jehova i halpem mi, taem mi askem sam dei blong spel long niufala wok blong mi, blong go long ol miting mo asembli.”

18. ?Wanem filing blong Jehova long ol Kristin tija?

¹⁸ Jehova i kea bigwan long ol Baebol studen blong yumi. Hem i save se ol Kristin tija oli rili wok had blong halpem ol man blong oli kam klosap long hem, mo from samting ya, hem i lavem olgeta. (Aes. 52:7) Sipos naoia yu no gat wan Baebol stadi, be yet, yu save halpem ol Baebol studen blong oli save kasem mak blong baptaes, taem yu folem ol narafala pablisa long ol stadi blong olgeta.