1. ?From wanem samtaem ol man blong Jehova oli gat filing ya se oli stap olgeta wan?

PLANTE long yumi, samtaem yumi harem se yumi stap yumi wan. Samfala, filing ya i stap smoltaem nomo. Be sam narafala, filing ya i stap longtaem. Maet yumi save gat filing ya tu, taem yumi stap wetem plante man. Samfala oli faenem i had blong gat ol fren, taem oli muv i go long wan niufala Kongregesen. Samfala oli gruap long wan famle we oli joen gud tugeta oltaem, be taem oli muvaot, oli gat filing ya se oli stap olgeta wan. Mo sam narafala oli misim kampani blong wan we oli lavem hem tumas, we i ded. Mo sam Kristin, speseli olgeta oli jes lanem trutok, oli gat filing ya taem famle o fren blong olgeta i agensem olgeta o ronemaot olgeta.

2. ?Wanem ol kwestin we bambae yumi ansa long olgeta?

² Jehova i luk mo i kasemsave evri samting long saed blong yumi. Taem yumi harem se yumi stap yumi wan, Jehova i save mo i wantem halpem yumi blong winim filing ya. ?Olsem wanem Jehova i halpem yumi? ?Yumi wan, yumi save mekem wanem? ?Mo olsem wanem yumi save halpem ol narafala long kongregesen we oli gat filing ya? Bambae yumi luk ansa blong ol kwestin ya.

3. ?Olsem wanem Jehova i soem se hem i kea long Elaejah?

³ Jehova i wantem se olgeta we oli wosipim hem oli glad. Hem i stap klosap long yumi wanwan, mo i luksave taem tingting blong yumi i foldaon o yumi harem nogud. (Sam 145:18, 19) Tingbaot olsem wanem Jehova i kea long filing blong  profet Elaejah. Elaejah i laef long wan taem we ol man Isrel oli fesem hadtaem. Ol man oli mekem i strong tumas long ol man blong Jehova, mo Elaejah nao men man we oli wantem kilim hem i ded. (1 King 19:1, 2) Tingting blong Elaejah i foldaon bigwan from we hem i ting se hem wan nomo laswan profet we i stap mekem wok blong Jehova. (1 King 19:10) Be kwiktaem nomo God i mekem wan samting blong givhan long Elaejah. !Jehova i sanem wan enjel blong leftemap tingting blong profet ya se hem i no stap hem wan, i gat sam narafala man Isrel tu we oli stap, we oli wosipim Jehova!—1 King 19:5, 18.

4. ?Olsem wanem Mak 10:29, 30 i soemaot se Jehova i kea long ol man blong hem?

⁴ Jehova i kasemsave se taem yumi jusum blong wosipim hem, maet sam long yumi oli mas lego plante samting. Wan, hemia help we yumi kasem long ol famle mo fren we oli no wosipim Jehova. Ating hemia samting we aposol Pita i wari from, taswe hem i askem long Jisas se: “Mifala i lego evri samting mo mifala i biaen long yu. ?Bambae mifala i kasem wanem?” (Mat. 19:27) Jisas i talem long ol disaepol se Kongregesen bambae i olsem famle blong olgeta. (Ridim Mak 10:29, 30.) Mo Jehova, papa blong yumi long heven, i promes se bambae hem i sapotem olgeta we oli wantem wosipim hem. (Sam 9:10) Naoia bambae yumi tokbaot sam samting we yumi save mekem blong Jehova i halpem yumi blong winim filing ya se yumi stap yu wan.

5. ?From wanem i gud blong tingbaot olsem wanem Jehova i halpem yu?

⁵ Tingbaot olsem wanem Jehova i stap halpem yu. (Sam 55:22) Hemia bambae i halpem yu blong luksave se yu no stap yu wan. Wan singel sista we nem blong hem Carol *, we ol famle blong hem oli no stap long trutok, i talem se: “Taem mi tingbaot olsem wanem Jehova i halpem mi blong winim ol hadtaem, mi luksave se mi no stap mi wan. Mo hemia i mekem mi sua fulwan se Jehova bambae i halpem mi oltaem.”

6. ?Olsem wanem 1 Pita 5:9, 10 i halpem olgeta we oli filim se oli stap olgeta wan?

 ⁶ Tingbaot olsem wanem Jehova i halpem ol brata mo sista we oli harem se oli stap olgeta wan. (Ridim 1 Pita 5:9, 10.) Hiroshi, wan brata we blong plante yia hem wan nomo i wan witnes long famle blong hem, i talem se: “Long Kongregesen, i isi nomo blong luksave se evriwan oli gat problem. Taem yumi kasemsave se yumi evriwan i mekem bes blong yumi blong wosipim Jehova, hemia i enkarejem yumi we stret famle blong yumi i no stap long trutok.”

7. ?Olsem wanem prea i halpem yu?

⁷ Gohed blong gat wan gudfala program long saed blong spirit. Yu mas talemaot ol filing blong yu long Jehova. (1 Pita 5:7) Massiel, wan sista we i jusum blong wosipim Jehova, i harem se i stap hem wan from we ol famle blong hem oli no wosipim Jehova. Hem i talem se: “Wan long ol impoten samting we i halpem mi blong winim filing ya se mi stap mi wan, hemia blong prea oltaem long Jehova. Mi luk hem olsem stret Papa blong mi. Mo evri dei mi prea long hem, plante taem long wan dei. Mi talemaot evri filing blong mi long hem.”

8. ?Olsem wanem fasin blong ridim Baebol mo tingting dip i halpem yu?

⁸ Ridim Baebol evri dei mo tingting dip long ol stori we oli soemaot se Jehova i lavem yu. Bianca, wan sista we i mas stanap strong from ol famle blong hem oli tok nogud long hem, i talem se: “Taem mi ridim mo tingting dip long ol stori long Baebol mo ol stori blong ol man blong Jehova we oli gat sem situesen olsem mi, hemia i rili halpem mi.” Sam Kristin oli lanem baehat sam vas we oli rili laekem, we i leftemap tingting blong olgeta, olsem Ol Sam 27:10 mo Aesea 41:10. Samfala oli talem se taem oli lesin long ol odio rikoding blong ol haf blong miting mo Baebol riding, hemia i mekem oli no filim se oli stap olgeta wan.

9. ?Olsem wanem fasin blong go long ol miting i halpem yu?

⁹ Mekem bes blong yu blong joen oltaem long evri miting. Hemia bambae i leftemap tingting blong yu, mo tu bambae yu save gud ol brata mo sista. (Hib. 10:24, 25) Massiel we yumi tokbaot hem finis, i talem se: “Nating se mi sem tumas, be mi traehad blong go long olgeta miting mo givim wan ansa. Hemia i mekem mi filim se mi pat blong kongregesen.”

10. ?From wanem i impoten blong fren gud wetem ol Kristin we oli bigman long spirit?

¹⁰ Frengud wetem ol Kristin we oli bigman long spirit. Fren wetem olgeta long kongregesen we yu save lanem samting from olgeta, nating sipos yia o bakgraon blong olgeta i defren long yu. Baebol i talem se “waes i stap  wetem ol olfala.” (Job 12:12) Ol olfala tu oli save lanem samting from ol yangfala. Deved i yang moa long Jonatan, be hemia i no blokem tufala blong kam ol gudfala fren. (1 Saml. 18:1) Deved mo Jonatan i givgivhan long tufala blong wosipim Jehova, nating se tufala i fesem ol hadtaem. (1 Saml. 23:16-18) Irina, we hem wan nomo i wan witnes blong Jehova long famle blong hem, i talem se: “Ol brata mo sista oli save kam ol perens o ol brata sista blong yumi long saed blong spirit. Mo Jehova i save yusum olgeta blong oli kam olsem stret famle blong yumi.”

11. ?Yumi mas mekem wanem blong gat ol gudfala fren?

¹¹ Maet i no isi blong faenem ol niufala fren, speseli sipos yu stap sem. Ratna, wan sista we i stap sem mo we i lanem trutok nating se i kasem fasin agens, i talem se: “Mi luksave se mi nidim we ol famle blong mi long saed blong spirit oli givhan long mi.” I had blong talemaot filing blong yu long narafala, be taem yu mekem, bambae yutufala i kam gudfala fren. Ol fren blong yu oli wantem enkarejem yu mo sapotem yu, be yu mas talemaot nid blong yu blong oli save halpem yu.

12. ?Olsem wanem wok blong prij i halpem yumi blong faenem ol gudfala fren?

¹² Wan long ol beswan rod blong faenem ol fren, hemia blong joen wetem ol narafala Kristin long wok blong prij. Carol we yumi tokbaot hem finis, i talem se: “Mi faenem plante gudfala fren, taem mi joen wetem ol sista long wok blong prij mo long ol narafala tiokratik wok. Long ol yia we i pas, Jehova i yusum ol fren ya blong sapotem mi.” Taem yumi fren wetem olgeta we oli bigman long spirit, hemia i no blong nating, from we Jehova i save yusum ol fren olsem blong halpem yumi blong dil wetem filing ya blong harem se yumi stap yumi wan.—Prov. 17:17.

13. ?Evriwan long kongregesen oli gat wanem wok blong mekem?

¹³ Evriwan i gat wok ya blong mekem se i gat pis mo lav long kongregesen, nao i no gat wan i harem se hem i stap hem wan. (Jon 13:35) !Samting we yumi mekem o talem i save gat paoa long narafala! Makem samting we wan sista i talem, i se: “Taem mi lanem trutok, olgeta long kongregesen oli kam olsem famle blong mi. Sipos oli no bin sapotem mi, maet tede mi no save stap olsem wan Witnes blong Jehova.” ?Yu save mekem wanem blong halpem olgeta we oli no gat famle long trutok, blong oli filim se oli pat blong kongregesen?

14. ?Yu save mekem wanem blong frengud wetem ol niuwan?

¹⁴ Tekem faswan step blong fren wetem narafala. Yumi save stat, taem yumi welkamem wan niuwan long kongregesen. (Rom 15:7) Be i no naf nomo blong talem halo, yumi mas mekem sam moa samting. Yumi wantem se frensip ya i kam strong moa. Taswe, i gud yu kaen mo soem se yu kea long ol niuwan. Traem kasemsave long ol problem we oli fesem, i bitim we yu askem ol kwestin blong mekem oli sem. Maet samfala oli faenem i had blong talemaot tingting blong olgeta, taswe yu no mas fosem olgeta blong toktok. Be i gud yu askem ol gudfala kwestin mo gat longfala tingting blong lesin taem oli ansa. Eksampol, maet yu save askem se olsem wanem nao oli faenem trutok.

15. ?Olsem wanem ol Kristin we oli bigman long spirit oli save halpem ol narafala long kongregesen?

¹⁵ Taem ol Kristin we oli bigman long spirit, speseli ol elda, oli soem se oli kea long evriwan, hemia i save mekem kongregesen i kam strong. Melissa we hem wetem mama nomo i stap long trutok, i talem se: “Mi mi glad tumas  long ol brata we oli kam olsem papa blong mi. Oli spenem taem wetem mi mo intres long mi long ol yia we oli pas. Enitaem we mi nidim blong toktok, i gat man i stap blong lesin long mi.” Mauricio, wan yangfala brata we i harem nogud taem Baebol tija blong hem i lego trutok, i talem se: “Samting we i halpem mi blong gohed, hemia taem ol elda oli soem se oli kea long mi. Oltaem oli toktok wetem mi, oli prij wetem mi, oli serem ol poen we oli lanem long ol prapa stadi blong olgeta, mo oli plei spot tu wetem mi.” Melissa mo Mauricio i gohed blong mekem wok blong Jehova fultaem.

16-17. ?Yumi save mekem wanem moa blong halpem ol narafala?

¹⁶ Mekem samting blong givhan. (Gal. 6:10) Leo, we i mekem wok blong misinari farawe long famle blong hem, i talem se: “Plante taem, samting we yu nidim hemia blong narafala i mekem wan smol samting blong soemaot se hem i kaen long yu long stret taem we yu nidim. Wan dei mi bin aksiden long trak, mo taem mi gobak long haos, mi wari bitim mak. Be wan kapol i singaot mi mi go long haos blong tufala blong kakae. Mi no rimemba samting we mifala i kakae, be mi tingbaot se oli rili kaen long mi, taem oli lesin gud long mi. !Mo hemia i mekem mi harem gud bakegen!”

¹⁷ Yumi evriwan i laekem blong go long ol asembli, from hemia taem we yumi joen wetem ol narafala mo tokbaot ol samting we yumi lanem long asembli. Be Carol we yumi tokbaot hem finis, i talem se: “Taem mi go long ol asembli, mi harem se mi stap mi wan nomo.” ?From wanem? Hem i se: “Nating se mi stap long medel blong plante handred o taosen brata mo sista, be plante taem oli joen wanples wetem famle blong olgeta nomo. Mo taem mi luk samting ya, hemia i mekem mi harem se mi stap mi wan.” Sam narafala oli faenem i had blong go long asembli afta we oli lusum hasban o waef blong olgeta long ded. ?Yu yu save wan we i stap gotru long wan hadtaem olsem? Sipos yes, long nekis asembli, i gud yu invaetem hem blong i joen wetem yu mo famle blong yu.

18. ?Olsem wanem yumi save folem 2 Korin 6:11-13, taem yumi invaetem narafala i kam long haos?

¹⁸ Spenem taem tugeta. Traem spenem taem  wetem ol defdefren brata mo sista, speseli olgeta we oli harem se oli stap olgeta wan. Yumi mas “openem hat blong [yumi] moa,” long olgeta. (Ridim 2 Korin 6:11-13.) Melissa we yumi tokbaot hem finis, i talem se: “Oltaem mifala i glad taem ol brata mo sista oli invaetem mifala i go long haos blong olgeta, blong spenem taem wetem famle blong olgeta o blong go long wan trip tugeta.” ?Yu yu tingbaot wan long kongregesen we yu save invaetem hem i kam long haos blong yu?

19. ?Wetaem i stret blong spenem taem wetem sam brata mo sista?

¹⁹ I gat sam taem we ol brata mo sista bambae oli glad moa sipos yumi spenem taem wetem olgeta. Samfala maet i had blong oli stap wetem ol famle blong olgeta we oli no stap long trutok, speseli long taem blong ol giaman lafet. Sam narafala, maet i gat sam spesel dei we oli harem nogud tumas, olsem det we hasban o waef i ded long hem. Taem yumi spenem taem wetem ol brata sista we oli stap gotru long ol hadtaem olsem, yumi soem se yumi “stap tingbaot” olgeta.—Fil. 2:20.

20. ?Olsem wanem Matiu 12:48-50 i halpem yumi taem yumi harem se yumi stap yumi wan?

²⁰ I gat plante risen we i mekem se samtaem wan Kristin i harem se i stap hem wan. Be yumi no mas foget se Jehova i kasemsave taem yumi gat filing olsem. Plante taem hem i yusum ol brata mo sista blong givim samting we yumi nidim. (Ridim Matiu 12:48-50.) Taswe i gud yumi mekem bes blong yumi blong halpem ol brata mo sista, hemia i soem se yumi stap sapotem arenjmen we Jehova i stanemap. !Nomata wanem filing yumi gat, yumi mas tingbaot se yumi neva stap yumi wan, from we oltaem Jehova i stap wetem yumi!